ਗਾਥਾਸਙ੍ਗਣਿਕਂ

੧. ਸਤ੍ਤਨਗਰੇਸੁ ਪਞ੍ਞਤ੍ਤਸਿਕ੍ਖਾਪਦਂ

੩੩੫. ਏਕਂਸਂ ਚੀਵਰਂ ਕਤ੍ਵਾ, ਪਗ੍ਗਣ੍ਹਿਤ੍ਵਾਨ ਅਞ੍ਜਲਿਂ;

ਆਸੀਸਮਾਨਰੂਪੋਵ [ਆਸਿਂਸਮਾਨਰੂਪੋਵ (ਸੀ. ਸ੍ਯਾ.)], ਕਿਸ੍ਸ ਤ੍ਵਂ ਇਧ ਮਾਗਤੋ.

ਦ੍ਵੀਸੁ ਵਿਨਯੇਸੁ ਯੇ ਪਞ੍ਞਤ੍ਤਾ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ;

ਕਤਿ ਤੇ ਸਿਕ੍ਖਾਪਦਾ ਹੋਨ੍ਤਿ;

ਕਤਿਸੁ ਨਗਰੇਸੁ ਪਞ੍ਞਤ੍ਤਾ.

ਭਦ੍ਦਕੋ ਤੇ ਉਮ੍ਮਙ੍ਗੋ, ਯੋਨਿਸੋ ਪਰਿਪੁਚ੍ਛਸਿ;

ਤਗ੍ਘ ਤੇ ਅਹਮਕ੍ਖਿਸ੍ਸਂ, ਯਥਾਸਿ ਕੁਸਲੋ ਤਥਾ.

ਦ੍ਵੀਸੁ ਵਿਨਯੇਸੁ ਯੇ ਪਞ੍ਞਤ੍ਤਾ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ;

ਅਡ੍ਢੁਡ੍ਢਸਤਾਨਿ ਤੇ ਹੋਨ੍ਤਿ;

ਸਤ੍ਤਸੁ ਨਗਰੇਸੁ ਪਞ੍ਞਤ੍ਤਾ.

ਕਤਮੇਸੁ ਸਤ੍ਤਸੁ ਨਗਰੇਸੁ ਪਞ੍ਞਤ੍ਤਾ;

ਇਙ੍ਘ ਮੇ ਤ੍ਵਂ ਬ੍ਯਾਕਰ ਨਂ [ਇਙ੍ਘ ਮੇ ਤਂ ਬ੍ਯਾਕਰ (ਕ.)];

ਤਂ ਵਚਨਪਥਂ [ਤਵ ਵਚਨਪਥਂ (ਸ੍ਯਾ.)] ਨਿਸਾਮਯਿਤ੍ਵਾ;

ਪਟਿਪਜ੍ਜੇਮ ਹਿਤਾਯ ਨੋ ਸਿਯਾ.

ਵੇਸਾਲਿਯਂ ਰਾਜਗਹੇ, ਸਾਵਤ੍ਥਿਯਞ੍ਚ ਆਲ਼ਵਿਯਂ;

ਕੋਸਮ੍ਬਿਯਞ੍ਚ ਸਕ੍ਕੇਸੁ, ਭਗ੍ਗੇਸੁ ਚੇਵ ਪਞ੍ਞਤ੍ਤਾ.

ਕਤਿ ਵੇਸਾਲਿਯਂ ਪਞ੍ਞਤ੍ਤਾ, ਕਤਿ ਰਾਜਗਹੇ ਕਤਾ;

ਸਾਵਤ੍ਥਿਯਂ ਕਤਿ ਹੋਨ੍ਤਿ, ਕਤਿ ਆਲ਼ਵਿਯਂ ਕਤਾ.

ਕਤਿ ਕੋਸਮ੍ਬਿਯਂ ਪਞ੍ਞਤ੍ਤਾ, ਕਤਿ ਸਕ੍ਕੇਸੁ ਵੁਚ੍ਚਨ੍ਤਿ;

ਕਤਿ ਭਗ੍ਗੇਸੁ ਪਞ੍ਞਤ੍ਤਾ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ.

ਦਸ ਵੇਸਾਲਿਯਂ ਪਞ੍ਞਤ੍ਤਾ, ਏਕਵੀਸ ਰਾਜਗਹੇ ਕਤਾ;

ਛਊਨ ਤੀਣਿਸਤਾਨਿ, ਸਬ੍ਬੇ ਸਾਵਤ੍ਥਿਯਂ ਕਤਾ.

ਛ ਆਲ਼ਵਿਯਂ ਪਞ੍ਞਤ੍ਤਾ, ਅਟ੍ਠ ਕੋਸਮ੍ਬਿਯਂ ਕਤਾ;

ਅਟ੍ਠ ਸਕ੍ਕੇਸੁ ਵੁਚ੍ਚਨ੍ਤਿ, ਤਯੋ ਭਗ੍ਗੇਸੁ ਪਞ੍ਞਤ੍ਤਾ.

ਯੇ ਵੇਸਾਲਿਯਂ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ [ਯਥਾਕਥਂ (ਸੀ. ਸ੍ਯਾ. ਏਵਮੁਪਰਿਪਿ)];

ਮੇਥੁਨਵਿਗ੍ਗਹੁਤ੍ਤਰਿ, ਅਤਿਰੇਕਞ੍ਚ ਕਾਲ਼ਕਂ.

ਭੂਤਂ ਪਰਮ੍ਪਰਭਤ੍ਤਂ, ਦਨ੍ਤਪੋਨੇਨ [ਦਨ੍ਤਪੋਣੇਨ (ਕ.)] ਅਚੇਲਕੋ;

ਭਿਕ੍ਖੁਨੀਸੁ ਚ ਅਕ੍ਕੋਸੋ, ਦਸੇਤੇ ਵੇਸਾਲਿਯਂ ਕਤਾ.

ਯੇ ਰਾਜਗਹੇ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ;

ਅਦਿਨ੍ਨਾਦਾਨਂ ਰਾਜਗਹੇ, ਦ੍ਵੇ ਅਨੁਦ੍ਧਂਸਨਾ ਦ੍ਵੇਪਿ ਚ ਭੇਦਾ.

ਅਨ੍ਤਰਵਾਸਕਂ ਰੂਪਿਯਂ ਸੁਤ੍ਤਂ, ਉਜ੍ਝਾਪਨੇਨ ਚ ਪਾਚਿਤਪਿਣ੍ਡਂ;

ਗਣਭੋਜਨਂ ਵਿਕਾਲੇ ਚ, ਚਾਰਿਤ੍ਤਂ ਨਹਾਨਂ ਊਨਵੀਸਤਿ.

ਚੀਵਰਂ ਦਤ੍ਵਾ ਵੋਸਾਸਨ੍ਤਿ, ਏਤੇ ਰਾਜਗਹੇ ਕਤਾ;

ਗਿਰਗ੍ਗਚਰਿਯਾ ਤਤ੍ਥੇਵ, ਛਨ੍ਦਦਾਨੇਨ ਏਕਵੀਸਤਿ.

ਯੇ ਸਾਵਤ੍ਥਿਯਂ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ;

ਪਾਰਾਜਿਕਾਨਿ ਚਤ੍ਤਾਰਿ, ਸਙ੍ਘਾਦਿਸੇਸਾ ਭਵਨ੍ਤਿ ਸੋਲ਼ਸ.

ਅਨਿਯਤਾ ਚ ਦ੍ਵੇ ਹੋਨ੍ਤਿ, ਨਿਸ੍ਸਗ੍ਗਿਯਾ ਚਤੁਵੀਸਤਿ;

ਛਪਞ੍ਞਾਸਸਤਞ੍ਚੇਵ, ਖੁਦ੍ਦਕਾਨਿ ਪਵੁਚ੍ਚਨ੍ਤਿ.

ਦਸਯੇਵ ਚ ਗਾਰਯ੍ਹਾ, ਦ੍ਵੇਸਤ੍ਤਤਿ ਚ ਸੇਖਿਯਾ;

ਛਊਨ ਤੀਣਿਸਤਾਨਿ, ਸਬ੍ਬੇ ਸਾਵਤ੍ਥਿਯਂ ਕਤਾ.

ਯੇ ਆਲ਼ਵਿਯਂ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ;

ਕੁਟਿਕੋਸਿਯਸੇਯ੍ਯਾ ਚ, ਖਣਨੇ ਗਚ੍ਛ ਦੇਵਤੇ;

ਸਪ੍ਪਾਣਕਞ੍ਚ ਸਿਞ੍ਚਨ੍ਤਿ, ਛ ਏਤੇ ਆਲ਼ਵਿਯਂ ਕਤਾ.

ਯੇ ਕੋਸਮ੍ਬਿਯਂ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ;

ਮਹਾਵਿਹਾਰੋ ਦੋਵਚਸ੍ਸਂ, ਅਞ੍ਞਂ ਦ੍ਵਾਰਂ ਸੁਰਾਯ ਚ;

ਅਨਾਦਰਿਯਂ ਸਹਧਮ੍ਮੋ, ਪਯੋਪਾਨੇਨ ਅਟ੍ਠਮਂ.

ਯੇ ਸਕ੍ਕੇਸੁ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ;

ਏਲ਼ਕਲੋਮਾਨਿ ਪਤ੍ਤੋ ਚ, ਓਵਾਦੋ ਚੇਵ ਭੇਸਜ੍ਜਂ.

ਸੂਚਿ ਆਰਞ੍ਞਿਕੋ ਚੇਵ, ਅਟ੍ਠੇਤੇ [ਛ ਏਤੇ (ਸਬ੍ਬਤ੍ਥ)] ਕਾਪਿਲਵਤ੍ਥਵੇ;

ਉਦਕਸੁਦ੍ਧਿਯਾ ਓਵਾਦੋ, ਭਿਕ੍ਖੁਨੀਸੁ ਪਵੁਚ੍ਚਨ੍ਤਿ.

ਯੇ ਭਗ੍ਗੇਸੁ ਪਞ੍ਞਤ੍ਤਾ, ਤੇ ਸੁਣੋਹਿ ਯਥਾਤਥਂ;

ਸਮਾਦਹਿਤ੍ਵਾ ਵਿਸਿਬ੍ਬੇਨ੍ਤਿ, ਸਾਮਿਸੇਨ ਸਸਿਤ੍ਥਕਂ.

ਪਾਰਾਜਿਕਾਨਿ ਚਤ੍ਤਾਰਿ, ਸਙ੍ਘਾਦਿਸੇਸਾਨਿ ਭਵਨ੍ਤਿ;

ਸਤ੍ਤ ਚ ਨਿਸ੍ਸਗ੍ਗਿਯਾਨਿ, ਅਟ੍ਠ ਦ੍ਵਤ੍ਤਿਂਸ ਖੁਦ੍ਦਕਾ.

ਦ੍ਵੇ ਗਾਰਯ੍ਹਾ ਤਯੋ ਸੇਕ੍ਖਾ, ਛਪ੍ਪਞ੍ਞਾਸ ਸਿਕ੍ਖਾਪਦਾ;

ਛਸੁ ਨਗਰੇਸੁ ਪਞ੍ਞਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ.

ਛਊਨ ਤੀਣਿਸਤਾਨਿ, ਸਬ੍ਬੇ ਸਾਵਤ੍ਥਿਯਂ ਕਤਾ;

ਕਾਰੁਣਿਕੇਨ ਬੁਦ੍ਧੇਨ, ਗੋਤਮੇਨ ਯਸਸ੍ਸਿਨਾ.

੨. ਚਤੁਵਿਪਤ੍ਤਿਂ

੩੩੬. ਯਂ ਤਂ [ਯਂ ਯਂ (ਕ.)] ਪੁਚ੍ਛਿਮ੍ਹ ਅਕਿਤ੍ਤਯਿ ਨੋ;

ਤਂ ਤਂ ਬ੍ਯਾਕਤਂ ਅਨਞ੍ਞਥਾ;

ਅਞ੍ਞਂ ਤਂ ਪੁਚ੍ਛਾਮਿ ਤਦਿਙ੍ਘ ਬ੍ਰੂਹਿ;

ਗਰੁਕ ਲਹੁਕਞ੍ਚਾਪਿ ਸਾਵਸੇਸਂ;

ਅਨਵਸੇਸਂ ਦੁਟ੍ਠੁਲ੍ਲਞ੍ਚ ਅਦੁਟ੍ਠੁਲ੍ਲਂ;

ਯੇ ਚ ਯਾਵਤਤਿਯਕਾ.

ਸਾਧਾਰਣਂ ਅਸਾਧਾਰਣਂ;

ਵਿਭਤ੍ਤਿਯੋ ਚ [ਵਿਪਤ੍ਤਿਯੋ ਚ (ਸੀ. ਸ੍ਯਾ.)] ਯੇਹਿ ਸਮਥੇਹਿ ਸਮ੍ਮਨ੍ਤਿ;

ਸਬ੍ਬਾਨਿਪੇਤਾਨਿ ਵਿਯਾਕਰੋਹਿ;

ਹਨ੍ਦ ਵਾਕ੍ਯਂ ਸੁਣੋਮ ਤੇ.

ਏਕਤਿਂਸਾ ਯੇ ਗਰੁਕਾ, ਅਟ੍ਠੇਤ੍ਥ ਅਨਵਸੇਸਾ;

ਯੇ ਗਰੁਕਾ ਤੇ ਦੁਟ੍ਠੁਲ੍ਲਾ, ਯੇ ਦੁਟ੍ਠੁਲ੍ਲਾ ਸਾ ਸੀਲਵਿਪਤ੍ਤਿ;

ਪਾਰਾਜਿਕਂ ਸਙ੍ਘਾਦਿਸੇਸੋ, ‘‘ਸੀਲਵਿਪਤ੍ਤੀ’’ਤਿ ਵੁਚ੍ਚਤਿ.

ਥੁਲ੍ਲਚ੍ਚਯਂ ਪਾਚਿਤ੍ਤਿਯਾ, ਪਾਟਿਦੇਸਨੀਯਂ ਦੁਕ੍ਕਟਂ;

ਦੁਬ੍ਭਾਸਿਤਂ ਯੋ ਚਾਯਂ, ਅਕ੍ਕੋਸਤਿ ਹਸਾਧਿਪ੍ਪਾਯੋ;

ਅਯਂ ਸਾ ਆਚਾਰਵਿਪਤ੍ਤਿਸਮ੍ਮਤਾ.

ਵਿਪਰੀਤਦਿਟ੍ਠਿਂ ਗਣ੍ਹਨ੍ਤਿ, ਅਸਦ੍ਧਮ੍ਮੇਹਿ ਪੁਰਕ੍ਖਤਾ;

ਅਬ੍ਭਾਚਿਕ੍ਖਨ੍ਤਿ ਸਮ੍ਬੁਦ੍ਧਂ, ਦੁਪ੍ਪਞ੍ਞਾ ਮੋਹਪਾਰੁਤਾ;

ਅਯਂ ਸਾ ਦਿਟ੍ਠਿਵਿਪਤ੍ਤਿਸਮ੍ਮਤਾ.

ਆਜੀਵਹੇਤੁ ਆਜੀਵਕਾਰਣਾ ਪਾਪਿਚ੍ਛੋ ਇਚ੍ਛਾਪਕਤੋ ਅਸਨ੍ਤਂ ਅਭੂਤਂ ਉਤ੍ਤਰਿਮਨੁਸ੍ਸਧਮ੍ਮਂ ਉਲ੍ਲਪਤਿ, ਆਜੀਵਹੇਤੁ ਆਜੀਵਕਾਰਣਾ ਸਞ੍ਚਰਿਤ੍ਤਂ ਸਮਾਪਜ੍ਜਤਿ, ਆਜੀਵਹੇਤੁ ਆਜੀਵਕਾਰਣਾ – ‘‘ਯੋ ਤੇ ਵਿਹਾਰੇ ਵਸਤਿ, ਸੋ ਭਿਕ੍ਖੁ ਅਰਹਾ’’ਤਿ ਭਣਤਿ, ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁ ਪਣੀਤਭੋਜਨਾਨਿ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਜੀਵਹੇਤੁ ਆਜੀਵਕਾਰਣਾ ਭਿਕ੍ਖੁਨੀ ਪਣੀਤਭੋਜਨਾਨਿ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ, ਆਜੀਵਹੇਤੁ ਆਜੀਵਕਾਰਣਾ ਸੂਪਂ ਵਾ ਓਦਨਂ ਵਾ ਅਗਿਲਾਨੋ ਅਤ੍ਤਨੋ ਅਤ੍ਥਾਯ ਵਿਞ੍ਞਾਪੇਤ੍ਵਾ ਭੁਞ੍ਜਤਿ. ਅਯਂ ਸਾ ਆਜੀਵਵਿਪਤ੍ਤਿ ਸਮ੍ਮਤਾ.

ਏਕਾਦਸ ਯਾਵਤਤਿਯਕਾ, ਤੇ ਸੁਣੋਹਿ ਯਥਾਤਥਂ;

ਉਕ੍ਖਿਤ੍ਤਾਨੁਵਤ੍ਤਿਕਾ, ਅਟ੍ਠ ਯਾਵਤਤਿਯਕਾ;

ਅਰਿਟ੍ਠੋ ਚਣ੍ਡਕਾਲ਼ੀ ਚ, ਇਮੇ ਤੇ ਯਾਵਤਤਿਯਕਾ.

੩. ਛੇਦਨਕਾਦਿ

੩੩੭. ਕਤਿ ਛੇਦਨਕਾਨਿ? ਕਤਿ ਭੇਦਨਕਾਨਿ? ਕਤਿ ਉਦ੍ਦਾਲਨਕਾਨਿ? ਕਤਿ ਅਨਞ੍ਞਪਾਚਿਤ੍ਤਿਯਾਨਿ? ਕਤਿ ਭਿਕ੍ਖੁਸਮ੍ਮੁਤਿਯੋ? ਕਤਿ ਸਾਮੀਚਿਯੋ? ਕਤਿ ਪਰਮਾਨਿ?

ਕਤਿ ਜਾਨਨ੍ਤਿ ਪਞ੍ਞਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ.

ਛ ਛੇਦਨਕਾਨਿ. ਏਕਂ ਭੇਦਨਕਂ. ਏਕਂ ਉਦ੍ਦਾਲਨਕਂ. ਚਤ੍ਤਾਰਿ ਅਨਞ੍ਞਪਾਚਿਤ੍ਤਿਯਾਨਿ. ਚਤਸ੍ਸੋ ਭਿਕ੍ਖੁਸਮ੍ਮੁਤਿਯੋ. ਸਤ੍ਤ ਸਾਮੀਚਿਯੋ. ਚੁਦ੍ਦਸ ਪਰਮਾਨਿ.

ਸੋਦਸ [ਸੋਲ਼ਸ (ਸੀ. ਸ੍ਯਾ.) ਅਟ੍ਠਕਥਾ ਓਲੋਕੇਤਬ੍ਬਾ] ਜਾਨਨ੍ਤਿ ਪਞ੍ਞਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ.

੪. ਅਸਾਧਾਰਣਾਦਿ

੩੩੮. ਵੀਸਂ ਦ੍ਵੇ ਸਤਾਨਿ ਭਿਕ੍ਖੂਨਂ ਸਿਕ੍ਖਾਪਦਾਨਿ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ;

ਤੀਣਿ ਸਤਾਨਿ ਚਤ੍ਤਾਰਿ ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ.

ਛਚਤ੍ਤਾਰੀਸਾ ਭਿਕ੍ਖੂਨਂ, ਭਿਕ੍ਖੁਨੀਹਿ ਅਸਾਧਾਰਣਾ;

ਸਤਂ ਤਿਂਸਾ ਚ ਭਿਕ੍ਖੁਨੀਨਂ, ਭਿਕ੍ਖੂਹਿ ਅਸਾਧਾਰਣਾ.

ਸਤਂ ਸਤ੍ਤਤਿ ਛਚ੍ਚੇਵ, ਉਭਿਨ੍ਨਂ ਅਸਾਧਾਰਣਾ;

ਸਤਂ ਸਤ੍ਤਤਿ ਚਤ੍ਤਾਰਿ, ਉਭਿਨ੍ਨਂ ਸਮਸਿਕ੍ਖਤਾ.

ਵੀਸਂ ਦ੍ਵੇ ਸਤਾਨਿ ਭਿਕ੍ਖੂਨਂ ਸਿਕ੍ਖਾਪਦਾਨਿ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ;

ਤੇ ਸੁਣੋਹਿ ਯਥਾਤਥਂ.

ਪਾਰਾਜਿਕਾਨਿ ਚਤ੍ਤਾਰਿ, ਸਙ੍ਘਾਦਿਸੇਸਾਨਿ ਭਵਨ੍ਤਿ ਤੇਰਸ;

ਅਨਿਯਤਾ ਦ੍ਵੇ ਹੋਨ੍ਤਿ.

ਨਿਸ੍ਸਗ੍ਗਿਯਾਨਿ ਤਿਂਸੇਵ, ਦ੍ਵੇਨਵੁਤਿ ਚ ਖੁਦ੍ਦਕਾ;

ਚਤ੍ਤਾਰੋ ਪਾਟਿਦੇਸਨੀਯਾ, ਪਞ੍ਚਸਤ੍ਤਤਿ ਸੇਖਿਯਾ.

ਵੀਸਂ ਦ੍ਵੇ ਸਤਾਨਿ ਚਿਮੇ ਹੋਨ੍ਤਿ ਭਿਕ੍ਖੂਨਂ ਸਿਕ੍ਖਾਪਦਾਨਿ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ.

ਤੀਣਿ ਸਤਾਨਿ ਚਤ੍ਤਾਰਿ, ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ, ਤੇ ਸੁਣੋਹਿ ਯਥਾਤਥਂ.

ਪਾਰਾਜਿਕਾਨਿ ਅਟ੍ਠ, ਸਙ੍ਘਾਦਿਸੇਸਾਨਿ ਭਵਨ੍ਤਿ ਸਤ੍ਤਰਸ;

ਨਿਸ੍ਸਗ੍ਗਿਯਾਨਿ ਤਿਂਸੇਵ, ਸਤਂ ਸਟ੍ਠਿ ਛ ਚੇਵ ਖੁਦ੍ਦਕਾਨਿ ਪਵੁਚ੍ਚਨ੍ਤਿ.

ਅਟ੍ਠ ਪਾਟਿਦੇਸਨੀਯਾ, ਪਞ੍ਚਸਤ੍ਤਤਿ ਸੇਖਿਯਾ;

ਤੀਣਿ ਸਤਾਨਿ ਚਤ੍ਤਾਰਿ ਚਿਮੇ ਹੋਨ੍ਤਿ ਭਿਕ੍ਖੁਨੀਨਂ ਸਿਕ੍ਖਾਪਦਾਨਿ;

ਉਦ੍ਦੇਸਂ ਆਗਚ੍ਛਨ੍ਤਿ ਉਪੋਸਥੇਸੁ.

ਛਚਤ੍ਤਾਰੀਸਾ ਭਿਕ੍ਖੂਨਂ, ਭਿਕ੍ਖੁਨੀਹਿ ਅਸਾਧਾਰਣਾ;

ਤੇ ਸੁਣੋਹਿ ਯਥਾਤਥਂ.

ਸਙ੍ਘਾਦਿਸੇਸਾ, ਦ੍ਵੇ ਅਨਿਯਤੇਹਿ ਅਟ੍ਠ;

ਨਿਸ੍ਸਗ੍ਗਿਯਾਨਿ ਦ੍ਵਾਦਸ, ਤੇਹਿ ਤੇ ਹੋਨ੍ਤਿ ਵੀਸਤਿ.

ਦ੍ਵੇਵੀਸਤਿ ਖੁਦ੍ਦਕਾ, ਚਤੁਰੋ ਪਾਟਿਦੇਸਨੀਯਾ;

ਛਚਤ੍ਤਾਰੀਸਾ ਚਿਮੇ ਹੋਨ੍ਤਿ, ਭਿਕ੍ਖੂਨਂ ਭਿਕ੍ਖੁਨੀਹਿ ਅਸਾਧਾਰਣਾ.

ਸਤਂ ਤਿਂਸਾ ਚ ਭਿਕ੍ਖੁਨੀਨਂ, ਭਿਕ੍ਖੂਹਿ ਅਸਾਧਾਰਣਾ;

ਤੇ ਸੁਣੋਹਿ ਯਥਾਤਥਂ.

ਪਾਰਾਜਿਕਾਨਿ ਚਤ੍ਤਾਰਿ, ਸਙ੍ਘਮ੍ਹਾ ਦਸ ਨਿਸ੍ਸਰੇ;

ਨਿਸ੍ਸਗ੍ਗਿਯਾਨਿ ਦ੍ਵਾਦਸ, ਛਨ੍ਨਵੁਤਿ ਚ ਖੁਦ੍ਦਕਾ;

ਅਟ੍ਠ ਪਾਟਿਦੇਸਨੀਯਾ.

ਸਤਂ ਤਿਂਸਾ ਚਿਮੇ ਹੋਨ੍ਤਿ ਭਿਕ੍ਖੁਨੀਨਂ, ਭਿਕ੍ਖੂਹਿ ਅਸਾਧਾਰਣਾ;

ਸਤਂ ਸਤ੍ਤਤਿ ਛਚ੍ਚੇਵ, ਉਭਿਨ੍ਨਂ ਅਸਾਧਾਰਣਾ;

ਤੇ ਸੁਣੋਹਿ ਯਥਾਤਥਂ.

ਪਾਰਾਜਿਕਾਨਿ ਚਤ੍ਤਾਰਿ, ਸਙ੍ਘਾਦਿਸੇਸਾਨਿ ਭਵਨ੍ਤਿ ਸੋਲ਼ਸ;

ਅਨਿਯਤਾ ਦ੍ਵੇ ਹੋਨ੍ਤਿ, ਨਿਸ੍ਸਗ੍ਗਿਯਾਨਿ ਚਤੁਵੀਸਤਿ;

ਸਤਂ ਅਟ੍ਠਾਰਸਾ ਚੇਵ, ਖੁਦ੍ਦਕਾਨਿ ਪਵੁਚ੍ਚਨ੍ਤਿ;

ਦ੍ਵਾਦਸ ਪਾਟਿਦੇਸਨੀਯਾ.

ਸਤਂ ਸਤ੍ਤਤਿ ਛਚ੍ਚੇਵਿਮੇ ਹੋਨ੍ਤਿ, ਉਭਿਨ੍ਨਂ ਅਸਾਧਾਰਣਾ;

ਸਤਂ ਸਤ੍ਤਤਿ ਚਤ੍ਤਾਰਿ, ਉਭਿਨ੍ਨਂ ਸਮਸਿਕ੍ਖਤਾ;

ਤੇ ਸੁਣੋਹਿ ਯਥਾਤਥਂ.

ਪਾਰਾਜਿਕਾਨਿ ਚਤ੍ਤਾਰਿ, ਸਙ੍ਘਾਦਿਸੇਸਾਨਿ ਭਵਨ੍ਤਿ ਸਤ੍ਤ;

ਨਿਸ੍ਸਗ੍ਗਿਯਾਨਿ ਅਟ੍ਠਾਰਸ, ਸਮਸਤ੍ਤਤਿ ਖੁਦ੍ਦਕਾ;

ਪਞ੍ਚਸਤ੍ਤਤਿ ਸੇਖਿਯਾਨਿ.

ਸਤਂ ਸਤ੍ਤਤਿ ਚਤ੍ਤਾਰਿ ਚਿਮੇ ਹੋਨ੍ਤਿ, ਉਭਿਨ੍ਨਂ ਸਮਸਿਕ੍ਖਤਾ;

ਅਟ੍ਠੇ ਪਾਰਾਜਿਕਾ ਯੇ ਦੁਰਾਸਦਾ, ਤਾਲਵਤ੍ਥੁਸਮੂਪਮਾ.

ਪਣ੍ਡੁਪਲਾਸੋ ਪੁਥੁਸਿਲਾ, ਸੀਸਚ੍ਛਿਨ੍ਨੋਵ ਸੋ ਨਰੋ;

ਤਾਲੋਵ ਮਤ੍ਥਕਚ੍ਛਿਨ੍ਨੋ, ਅਵਿਰੁਲ਼੍ਹੀ ਭਵਨ੍ਤਿ ਤੇ.

ਤੇਵੀਸਤਿ ਸਙ੍ਘਾਦਿਸੇਸਾ, ਦ੍ਵੇ ਅਨਿਯਤਾ;

ਦ੍ਵੇ ਚਤ੍ਤਾਰੀਸ ਨਿਸ੍ਸਗ੍ਗਿਯਾ;

ਅਟ੍ਠਾਸੀਤਿਸਤਂ ਪਾਚਿਤ੍ਤਿਯਾ, ਦ੍ਵਾਦਸ ਪਾਟਿਦੇਸਨੀਯਾ.

ਪਞ੍ਚਸਤ੍ਤਤਿ ਸੇਖਿਯਾ, ਤੀਹਿ ਸਮਥੇਹਿ ਸਮ੍ਮਨ੍ਤਿ;

ਸਮ੍ਮੁਖਾ ਚ ਪਟਿਞ੍ਞਾਯ, ਤਿਣਵਤ੍ਥਾਰਕੇਨ ਚ.

ਦ੍ਵੇ ਉਪੋਸਥਾ ਦ੍ਵੇ ਪਵਾਰਣਾ;