੮. ਅਟ੍ਠਕਵਾਰੋ
੩੨੮. ਅਟ੍ਠਾਨਿਸਂਸੇ ਸਮ੍ਪਸ੍ਸਮਾਨੇਨ ਨ ਸੋ ਭਿਕ੍ਖੁ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਤਬ੍ਬੋ. ਅਟ੍ਠਾਨਿਸਂਸੇ ਸਮ੍ਪਸ੍ਸਮਾਨੇਨ ਪਰੇਸਮ੍ਪਿ ਸਦ੍ਧਾਯ ਸਾ ਆਪਤ੍ਤਿ ਦੇਸੇਤਬ੍ਬਾ. ਅਟ੍ਠ ਯਾਵਤਤਿਯਕਾ. ਅਟ੍ਠਹਾਕਾਰੇਹਿ ਕੁਲਾਨਿ ਦੂਸੇਤਿ. ਅਟ੍ਠ ਮਾਤਿਕਾ ਚੀਵਰਸ੍ਸ ਉਪ੍ਪਾਦਾਯ. ਅਟ੍ਠ ਮਾਤਿਕਾ ਕਥਿਨਸ੍ਸ ਉਬ੍ਭਾਰਾਯ. ਅਟ੍ਠ ਪਾਨਾਨਿ. [ਚੂਲ਼ਵ. ੩੪੮; ਅ. ਨਿ. ੮.੭] ਅਟ੍ਠਹਿ ਅਸਦ੍ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦੇਵਦਤ੍ਤੋ ਆਪਾਯਿਕੋ ਨੇਰਯਿਕੋ ਕਪ੍ਪਟ੍ਠੋ ਅਤੇਕਿਚ੍ਛੋ. ਅਟ੍ਠ ਲੋਕਧਮ੍ਮਾ. ਅਟ੍ਠ ਗਰੁਧਮ੍ਮਾ. ਅਟ੍ਠ ਪਾਟਿਦੇਸਨੀਯਾ. ਅਟ੍ਠਙ੍ਗਿਕੋ ਮੁਸਾਵਾਦੋ. ਅਟ੍ਠ ਉਪੋਸਥਙ੍ਗਾਨਿ. ਅਟ੍ਠ ਦੂਤੇਯ੍ਯਙ੍ਗਾਨਿ. ਅਟ੍ਠ ਤਿਤ੍ਥਿਯਵਤ੍ਤਾਨਿ. ਅਟ੍ਠ ਅਚ੍ਛਰਿਯਾ ਅਬ੍ਭੁਤਧਮ੍ਮਾ ਮਹਾਸਮੁਦ੍ਦੇ. ਅਟ੍ਠ ਅਚ੍ਛਰਿਯਾ ਅਬ੍ਭੁਤਧਮ੍ਮਾ ਇਮਸ੍ਮਿਂ ਧਮ੍ਮਵਿਨਯੇ. ਅਟ੍ਠ ਅਨਤਿਰਿਤ੍ਤਾ. ਅਟ੍ਠ ਅਤਿਰਿਤ੍ਤਾ. ਅਟ੍ਠਮੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤਿ. ਅਟ੍ਠ ਪਾਰਾਜਿਕਾ. ਅਟ੍ਠਮਂ ਵਤ੍ਥੁਂ ਪਰਿਪੂਰੇਨ੍ਤੀ ਨਾਸੇਤਬ੍ਬਾ. ਅਟ੍ਠਮਂ ਵਤ੍ਥੁਂ ਪਰਿਪੂਰੇਨ੍ਤਿਯਾ ਦੇਸਿਤਾਪਿ ਅਦੇਸਿਤਾ ਹੋਤਿ. ਅਟ੍ਠਵਾਚਿਕਾ ਉਪਸਮ੍ਪਦਾ. ਅਟ੍ਠਨ੍ਨਂ ਪਚ੍ਚੁਟ੍ਠਾਤਬ੍ਬਂ. ਅਟ੍ਠਨ੍ਨਂ ਆਸਨਂ ਦਾਤਬ੍ਬਂ. ਉਪਾਸਿਕਾ ਅਟ੍ਠ ਵਰਾਨਿ ਯਾਚਤਿ. ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਭਿਕ੍ਖੁਨੋਵਾਦਕੋ ਸਮ੍ਮਨ੍ਨਿਤਬ੍ਬੋ [ਸਮ੍ਮਨਿਤਬ੍ਬੋ (ਕ.)]. ਅਟ੍ਠਾਨਿਸਂਸਾ ਵਿਨਯਧਰੇ. ਅਟ੍ਠ ਪਰਮਾਨਿ. ਤਸ੍ਸਪਾਪਿਯਸਿਕਕਮ੍ਮਕਤੇਨ ਭਿਕ੍ਖੁਨਾ ਅਟ੍ਠਸੁ ਧਮ੍ਮੇਸੁ ਸਮ੍ਮਾ ਵਤ੍ਤਿਤਬ੍ਬਂ. ਅਟ੍ਠ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ ਅਟ੍ਠ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨੀਤਿ.
ਅਟ੍ਠਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਨ ਸੋ ਭਿਕ੍ਖੁ ਪਰੇਸਮ੍ਪਿ, ਯਾਵਤਤਿਯਦੂਸਨਾ;
ਮਾਤਿਕਾ ਕਥਿਨੁਬ੍ਭਾਰਾ, ਪਾਨਾ ਅਭਿਭੂਤੇਨ ਚ.
ਲੋਕਧਮ੍ਮਾ ਗਰੁਧਮ੍ਮਾ, ਪਾਟਿਦੇਸਨੀਯਾ ਮੁਸਾ;
ਉਪੋਸਥਾ ਚ ਦੂਤਙ੍ਗਾ, ਤਿਤ੍ਥਿਯਾ ਸਮੁਦ੍ਦੇਪਿ ਚ.
ਅਬ੍ਭੁਤਾ ਅਨਤਿਰਿਤ੍ਤਂ, ਅਤਿਰਿਤ੍ਤਂ ਨਿਸ੍ਸਗ੍ਗਿਯਂ;
ਪਾਰਾਜਿਕਟ੍ਠਮਂ ਵਤ੍ਥੁ, ਅਦੇਸਿਤੂਪਸਮ੍ਪਦਾ.
ਪਚ੍ਚੁਟ੍ਠਾਨਾਸਨਞ੍ਚੇਵ, ਵਰਂ ਓਵਾਦਕੇਨ ਚ;
ਆਨਿਸਂਸਾ ਪਰਮਾਨਿ, ਅਟ੍ਠਧਮ੍ਮੇਸੁ ਵਤ੍ਤਨਾ;
ਅਧਮ੍ਮਿਕਾ ਧਮ੍ਮਿਕਾ ਚ, ਅਟ੍ਠਕਾ ਸੁਪ੍ਪਕਾਸਿਤਾਤਿ.