੬. ਛਕ੍ਕਵਾਰੋ

੩੨੬. [ਦੀ. ਨਿ. ੩.੩੨੪] ਛ ਅਗਾਰਵਾ. ਛ ਗਾਰਵਾ. ਛ ਵਿਨੀਤਵਤ੍ਥੂਨਿ. ਛ ਸਾਮੀਚਿਯੋ. ਛ ਆਪਤ੍ਤਿਸਮੁਟ੍ਠਾਨਾ. ਛਚ੍ਛੇਦਨਕਾ ਆਪਤ੍ਤਿਯੋ. ਛਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ. ਛਾਨਿਸਂਸਾ ਵਿਨਯਧਰੇ. ਛ ਪਰਮਾਨਿ. ਛਾਰਤ੍ਤਂ ਤਿਚੀਵਰੇਨ ਵਿਪ੍ਪਵਸਿਤਬ੍ਬਂ. ਛ ਚੀਵਰਾਨਿ. ਛ ਰਜਨਾਨਿ. ਛ ਆਪਤ੍ਤਿਯੋ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ ਨ ਵਾਚਤੋ. ਛ ਆਪਤ੍ਤਿਯੋ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ ਨ ਕਾਯਤੋ. ਛ ਆਪਤ੍ਤਿਯੋ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ. ਛ ਕਮ੍ਮਾਨਿ. ਛ ਵਿਵਾਦਮੂਲਾਨਿ. ਛ ਅਨੁਵਾਦਮੂਲਾਨਿ. ਛ ਸਾਰਣੀਯਾ ਧਮ੍ਮਾ ਦੀਘਸੋ. ਛ ਵਿਦਤ੍ਥਿਯੋ, ਸੁਗਤਵਿਦਤ੍ਥਿਯਾ, ਤਿਰਿਯਂ ਛ ਵਿਦਤ੍ਥਿਯੋ. ਛ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਆਚਰਿਯਮ੍ਹਾ. ਛ ਨਹਾਨੇ ਅਨੁਪਞ੍ਞਤ੍ਤਿਯੋ – ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ, ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ.

[ਮਹਾਵ. ੮੫ ਆਦਯੋ] ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਪਞ੍ਞਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਅਤ੍ਤਨਾ ਅਸੇਕ੍ਖੇਨ ਸੀਲਕ੍ਖਨ੍ਧੇ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸੀਲਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸਮਾਧਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਪਞ੍ਞਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਪਞ੍ਞਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਸਮਾਦਪੇਤਾ; ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਨ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਨ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਨ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਬਹੁਸ੍ਸੁਤੋ ਹੋਤਿ, ਪਞ੍ਞਵਾ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ [ਅਨਭਿਰਤਿਂ (ਕ.)], ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ [ਵਿਨੋਦੇਤੁਂ ਵਾ ਵਿਨੋਦਾਪੇਤੁਂ ਵਾ (ਸ੍ਯਾ.) ਮਹਾਵ. ੮੫], ਆਪਤ੍ਤਿਂ ਜਾਨਾਤਿ, ਆਪਤ੍ਤਿਵੁਟ੍ਠਾਨਂ ਜਾਨਾਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਆਭਿਸਮਾਚਾਰਿਕਾਯ ਸਿਕ੍ਖਾਯ ਸਿਕ੍ਖਾਪੇਤੁਂ, ਆਦਿਬ੍ਰਹ੍ਮਚਾਰਿਯਕਾਯ ਸਿਕ੍ਖਾਯ ਵਿਨੇਤੁਂ, ਅਭਿਧਮ੍ਮੇ ਵਿਨੇਤੁਂ, ਅਭਿਵਿਨਯੇ ਵਿਨੇਤੁਂ, ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.

ਛ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ, ਛ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨੀਤਿ.

ਛਕ੍ਕਂ ਨਿਟ੍ਠਿਤਂ.

ਤਸ੍ਸੁਦ੍ਦਾਨਂ –

ਅਗਾਰਵਾ ਗਾਰਵਾ ਚ, ਵਿਨੀਤਾ ਸਾਮੀਚਿਪਿ ਚ;

ਸਮੁਟ੍ਠਾਨਾ ਛੇਦਨਾ ਚੇਵ, ਆਕਾਰਾਨਿਸਂਸੇਨ ਚ.

ਪਰਮਾਨਿ ਚ ਛਾਰਤ੍ਤਂ, ਚੀਵਰਂ ਰਜਨਾਨਿ ਚ;

ਕਾਯਤੋ ਚਿਤ੍ਤਤੋ ਚਾਪਿ, ਵਾਚਤੋ ਚਿਤ੍ਤਤੋਪਿ ਚ.

ਕਾਯਵਾਚਾਚਿਤ੍ਤਤੋ ਚ, ਕਮ੍ਮਵਿਵਾਦਮੇਵ ਚ;

ਅਨੁਵਾਦਾ ਦੀਘਸੋ ਚ, ਤਿਰਿਯਂ ਨਿਸ੍ਸਯੇਨ ਚ.

ਅਨੁਪਞ੍ਞਤ੍ਤਿ ਆਦਾਯ, ਸਮਾਦਾਯ ਤਥੇਵ ਚ;

ਅਸੇਕ੍ਖੇ ਸਮਾਦਪੇਤਾ, ਸਦ੍ਧੋ ਅਧਿਸੀਲੇਨ ਚ;

ਗਿਲਾਨਾਭਿਸਮਾਚਾਰੀ, ਆਪਤ੍ਤਾਧਮ੍ਮਧਮ੍ਮਿਕਾਤਿ.