੩. ਤਿਕਵਾਰੋ

੩੨੩. ਅਤ੍ਥਾਪਤ੍ਤਿ ਤਿਟ੍ਠਨ੍ਤੇ ਭਗਵਤਿ ਆਪਜ੍ਜਤਿ, ਨੋ ਪਰਿਨਿਬ੍ਬੁਤੇ; ਅਤ੍ਥਾਪਤ੍ਤਿ ਪਰਿਨਿਬ੍ਬੁਤੇ ਭਗਵਤਿ ਆਪਜ੍ਜਤਿ, ਨੋ ਤਿਟ੍ਠਨ੍ਤੇ; ਅਤ੍ਥਾਪਤ੍ਤਿ ਤਿਟ੍ਠਨ੍ਤੇਪਿ ਭਗਵਤਿ ਆਪਜ੍ਜਤਿ ਪਰਿਨਿਬ੍ਬੁਤੇਪਿ. ਅਤ੍ਥਾਪਤ੍ਤਿ ਕਾਲੇ ਆਪਜ੍ਜਤਿ, ਨੋ ਵਿਕਾਲੇ; ਅਤ੍ਥਾਪਤ੍ਤਿ ਵਿਕਾਲੇ ਆਪਜ੍ਜਤਿ, ਨੋ ਕਾਲੇ; ਅਤ੍ਥਾਪਤ੍ਤਿ ਕਾਲੇ ਚੇਵ ਆਪਜ੍ਜਤਿ ਵਿਕਾਲੇ ਚ. ਅਤ੍ਥਾਪਤ੍ਤਿ ਰਤ੍ਤਿਂ ਆਪਜ੍ਜਤਿ, ਨੋ ਦਿਵਾ; ਅਤ੍ਥਾਪਤ੍ਤਿ ਦਿਵਾ ਆਪਜ੍ਜਤਿ, ਨੋ ਰਤ੍ਤਿਂ; ਅਤ੍ਥਾਪਤ੍ਤਿ ਰਤ੍ਤਿਞ੍ਚੇਵ ਆਪਜ੍ਜਤਿ ਦਿਵਾ ਚ. ਅਤ੍ਥਾਪਤ੍ਤਿ ਦਸਵਸ੍ਸੋ ਆਪਜ੍ਜਤਿ, ਨੋ ਊਨਦਸਵਸ੍ਸੋ; ਅਤ੍ਥਾਪਤ੍ਤਿ ਊਨਦਸਵਸ੍ਸੋ ਆਪਜ੍ਜਤਿ, ਨੋ ਦਸਵਸ੍ਸੋ; ਅਤ੍ਥਾਪਤ੍ਤਿ ਦਸਵਸ੍ਸੋ ਚੇਵ ਆਪਜ੍ਜਤਿ ਊਨਦਸਵਸ੍ਸੋ ਚ. ਅਤ੍ਥਾਪਤ੍ਤਿ ਪਞ੍ਚਵਸ੍ਸੋ ਆਪਜ੍ਜਤਿ, ਨੋ ਊਨਪਞ੍ਚਵਸ੍ਸੋ; ਅਤ੍ਥਾਪਤ੍ਤਿ ਊਨਪਞ੍ਚਵਸ੍ਸੋ ਆਪਜ੍ਜਤਿ, ਨੋ ਪਞ੍ਚਵਸ੍ਸੋ; ਅਤ੍ਥਾਪਤ੍ਤਿ ਪਞ੍ਚਵਸ੍ਸੋ ਚੇਵ ਆਪਜ੍ਜਤਿ ਊਨਪਞ੍ਚਵਸ੍ਸੋ ਚ. ਅਤ੍ਥਾਪਤ੍ਤਿ ਕੁਸਲਚਿਤ੍ਤੋ ਆਪਜ੍ਜਤਿ; ਅਤ੍ਥਾਪਤ੍ਤਿ ਅਕੁਸਲਚਿਤ੍ਤੋ ਆਪਜ੍ਜਤਿ; ਅਤ੍ਥਾਪਤ੍ਤਿ ਅਬ੍ਯਾਕਤਚਿਤ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਸੁਖਵੇਦਨਾਸਮਙ੍ਗੀ ਆਪਜ੍ਜਤਿ; ਅਤ੍ਥਾਪਤ੍ਤਿ ਦੁਕ੍ਖਵੇਦਨਾਸਮਙ੍ਗੀ ਆਪਜ੍ਜਤਿ; ਅਤ੍ਥਾਪਤ੍ਤਿ ਅਦੁਕ੍ਖਮਸੁਖਵੇਦਨਾਸਮਙ੍ਗੀ ਆਪਜ੍ਜਤਿ. ਤੀਣਿ ਚੋਦਨਾਵਤ੍ਥੂਨਿ – ਦਿਟ੍ਠੇਨ, ਸੁਤੇਨ, ਪਰਿਸਙ੍ਕਾਯ. ਤਯੋ ਸਲਾਕਗ੍ਗਾਹਾ – ਗੁਲ਼੍ਹਕੋ, ਵਿਵਟਕੋ [ਵਿਵਟ੍ਟਕੋ (ਕ.)], ਸਕਣ੍ਣਜਪ੍ਪਕੋ. ਤਯੋ ਪਟਿਕ੍ਖੇਪਾ – ਮਹਿਚ੍ਛਤਾ, ਅਸਨ੍ਤੁਟ੍ਠਿਤਾ [ਅਸਨ੍ਤੁਟ੍ਠਤਾ (ਸ੍ਯਾ.)], ਅਸਲ੍ਲੇਖਤਾ. ਤਯੋ ਅਨੁਞ੍ਞਾਤਾ – ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿਤਾ, ਸਲ੍ਲੇਖਤਾ. ਅਪਰੇਪਿ ਤਯੋ ਪਟਿਕ੍ਖੇਪਾ – ਮਹਿਚ੍ਛਤਾ, ਅਸਨ੍ਤੁਟ੍ਠਿਤਾ, ਅਮਤ੍ਤਞ੍ਞੁਤਾ. ਤਯੋ ਅਨੁਞ੍ਞਾਤਾ – ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿਤਾ, ਮਤ੍ਤਞ੍ਞੁਤਾ. ਤਿਸ੍ਸੋ ਪਞ੍ਞਤ੍ਤਿਯੋ – ਪਞ੍ਞਤ੍ਤਿ, ਅਨੁਪਞ੍ਞਤ੍ਤਿ, ਅਨੁਪ੍ਪਨ੍ਨਪਞ੍ਞਤ੍ਤਿ. ਅਪਰਾਪਿ ਤਿਸ੍ਸੋ ਪਞ੍ਞਤ੍ਤਿਯੋ – ਸਬ੍ਬਤ੍ਥਪਞ੍ਞਤ੍ਤਿ, ਪਦੇਸਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ. ਅਪਰਾਪਿ ਤਿਸ੍ਸੋ ਪਞ੍ਞਤ੍ਤਿਯੋ – ਅਸਾਧਾਰਣਪਞ੍ਞਤ੍ਤਿ, ਏਕਤੋਪਞ੍ਞਤ੍ਤਿ, ਉਭਤੋਪਞ੍ਞਤ੍ਤਿ.

ਅਤ੍ਥਾਪਤ੍ਤਿ ਬਾਲੋ ਆਪਜ੍ਜਤਿ, ਨੋ ਪਣ੍ਡਿਤੋ; ਅਤ੍ਥਾਪਤ੍ਤਿ ਪਣ੍ਡਿਤੋ ਆਪਜ੍ਜਤਿ, ਨੋ ਬਾਲੋ; ਅਤ੍ਥਾਪਤ੍ਤਿ ਬਾਲੋ ਚੇਵ ਆਪਜ੍ਜਤਿ ਪਣ੍ਡਿਤੋ ਚ. ਅਤ੍ਥਾਪਤ੍ਤਿ ਕਾਲ਼ੇ ਆਪਜ੍ਜਤਿ, ਨੋ ਜੁਣ੍ਹੇ; ਅਤ੍ਥਾਪਤ੍ਤਿ ਜੁਣ੍ਹੇ ਆਪਜ੍ਜਤਿ, ਨੋ ਕਾਲ਼ੇ; ਅਤ੍ਥਾਪਤ੍ਤਿ ਕਾਲ਼ੇ ਚੇਵ ਆਪਜ੍ਜਤਿ ਜੁਣ੍ਹੇ ਚ. ਅਤ੍ਥਿ ਕਾਲ਼ੇ ਕਪ੍ਪਤਿ, ਨੋ ਜੁਣ੍ਹੇ; ਅਤ੍ਥਿ ਜੁਣ੍ਹੇ ਕਪ੍ਪਤਿ, ਨੋ ਕਾਲ਼ੇ; ਅਤ੍ਥਿ ਕਾਲ਼ੇ ਚੇਵ ਕਪ੍ਪਤਿ ਜੁਣ੍ਹੇ ਚ. ਅਤ੍ਥਾਪਤ੍ਤਿ ਹੇਮਨ੍ਤੇ ਆਪਜ੍ਜਤਿ, ਨੋ ਗਿਮ੍ਹੇ ਨੋ ਵਸ੍ਸੇ; ਅਤ੍ਥਾਪਤ੍ਤਿ ਗਿਮ੍ਹੇ ਆਪਜ੍ਜਤਿ, ਨੋ ਹੇਮਨ੍ਤੇ ਨੋ ਵਸ੍ਸੇ; ਅਤ੍ਥਾਪਤ੍ਤਿ ਵਸ੍ਸੇ ਆਪਜ੍ਜਤਿ, ਨੋ ਹੇਮਨ੍ਤੇ ਨੋ ਗਿਮ੍ਹੇ. ਅਤ੍ਥਾਪਤ੍ਤਿ ਸਙ੍ਘੋ ਆਪਜ੍ਜਤਿ, ਨ ਗਣੋ ਨ ਪੁਗ੍ਗਲੋ; ਅਤ੍ਥਾਪਤ੍ਤਿ ਗਣੋ ਆਪਜ੍ਜਤਿ, ਨ ਸਙ੍ਘੋ ਨ ਪੁਗ੍ਗਲੋ; ਅਤ੍ਥਾਪਤ੍ਤਿ ਪੁਗ੍ਗਲੋ ਆਪਜ੍ਜਤਿ, ਨ ਸਙ੍ਘੋ ਨ ਗਣੋ. ਅਤ੍ਥਿ ਸਙ੍ਘਸ੍ਸ ਕਪ੍ਪਤਿ, ਨ ਗਣਸ੍ਸ ਨ ਪੁਗ੍ਗਲਸ੍ਸ; ਅਤ੍ਥਿ ਗਣਸ੍ਸ ਕਪ੍ਪਤਿ, ਨ ਸਙ੍ਘਸ੍ਸ ਨ ਪੁਗ੍ਗਲਸ੍ਸ; ਅਤ੍ਥਿ ਪੁਗ੍ਗਲਸ੍ਸ ਕਪ੍ਪਤਿ, ਨ ਸਙ੍ਘਸ੍ਸ ਨ ਗਣਸ੍ਸ. ਤਿਸ੍ਸੋ ਛਾਦਨਾ ਵਤ੍ਥੁਂ ਛਾਦੇਤਿ, ਨੋ ਆਪਤ੍ਤਿਂ; ਆਪਤ੍ਤਿਂ ਛਾਦੇਤਿ, ਨੋ ਵਤ੍ਥੁਂ; ਵਤ੍ਥੁਞ੍ਚੇਵ ਛਾਦੇਤਿ ਆਪਤ੍ਤਿਞ੍ਚ. ਤਿਸ੍ਸੋ ਪਟਿਚ੍ਛਾਦਿਯੋ – ਜਨ੍ਤਾਘਰਪਟਿਚ੍ਛਾਦਿ, ਉਦਕਪਟਿਚ੍ਛਾਦਿ, ਵਤ੍ਥਪਟਿਚ੍ਛਾਦਿ. [ਅ. ਨਿ. ੩.੧੩੨] ਤੀਣਿ ਪਟਿਚ੍ਛਨ੍ਨਾਨਿ ਵਹਨ੍ਤਿ, ਨੋ ਵਿਵਟਾਨਿ – ਮਾਤੁਗਾਮੋ ਪਟਿਚ੍ਛਨ੍ਨੋ ਵਹਤਿ, ਨੋ ਵਿਵਟੋ; ਬ੍ਰਾਹ੍ਮਣਾਨਂ ਮਨ੍ਤਾ ਪਟਿਚ੍ਛਨ੍ਨਾ ਵਹਨ੍ਤਿ, ਨੋ ਵਿਵਟਾ; ਮਿਚ੍ਛਾਦਿਟ੍ਠਿ ਪਟਿਚ੍ਛਨ੍ਨਾ ਵਹਤਿ, ਨੋ ਵਿਵਟਾ. ਤੀਣਿ ਵਿਵਟਾਨਿ ਵਿਰੋਚਨ੍ਤਿ, ਨੋ ਪਟਿਚ੍ਛਨ੍ਨਾਨਿ – ਚਨ੍ਦਮਣ੍ਡਲਂ ਵਿਵਟਂ ਵਿਰੋਚਤਿ, ਨੋ ਪਟਿਚ੍ਛਨ੍ਨਂ; ਸੂਰਿਯਮਣ੍ਡਲਂ ਵਿਵਟਂ ਵਿਰੋਚਤਿ, ਨੋ ਪਟਿਚ੍ਛਨ੍ਨਂ; ਤਥਾਗਤਪ੍ਪਵੇਦਿਤੋ ਧਮ੍ਮਵਿਨਯੋ ਵਿਵਟੋ ਵਿਰੋਚਤਿ, ਨੋ ਪਟਿਚ੍ਛਨ੍ਨੋ. ਤਯੋ ਸੇਨਾਸਨਗ੍ਗਾਹਾ – ਪੁਰਿਮਕੋ, ਪਚ੍ਛਿਮਕੋ, ਅਨ੍ਤਰਾਮੁਤ੍ਤਕੋ. ਅਤ੍ਥਾਪਤ੍ਤਿ ਗਿਲਾਨੋ ਆਪਜ੍ਜਤਿ, ਨੋ ਅਗਿਲਾਨੋ; ਅਤ੍ਥਾਪਤ੍ਤਿ ਅਗਿਲਾਨੋ ਆਪਜ੍ਜਤਿ, ਨੋ ਗਿਲਾਨੋ; ਅਤ੍ਥਾਪਤ੍ਤਿ ਗਿਲਾਨੋ ਚੇਵ ਆਪਜ੍ਜਤਿ ਅਗਿਲਾਨੋ ਚ.

ਤੀਣਿ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਤੀਣਿ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਤਯੋ ਪਰਿਵਾਸਾ – ਪਟਿਚ੍ਛਨ੍ਨਪਰਿਵਾਸੋ, ਅਪ੍ਪਟਿਚ੍ਛਨ੍ਨਪਰਿਵਾਸੋ, ਸੁਦ੍ਧਨ੍ਤਪਰਿਵਾਸੋ. ਤਯੋ ਮਾਨਤ੍ਤਾ – ਪਟਿਚ੍ਛਨ੍ਨਮਾਨਤ੍ਤਂ, ਅਪ੍ਪਟਿਚ੍ਛਨ੍ਨਮਾਨਤ੍ਤਂ, ਪਕ੍ਖਮਾਨਤ੍ਤਂ. ਤਯੋ ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ – ਸਹਵਾਸੋ, ਵਿਪ੍ਪਵਾਸੋ, ਅਨਾਰੋਚਨਾ. ਅਤ੍ਥਾਪਤ੍ਤਿ ਅਨ੍ਤੋ ਆਪਜ੍ਜਤਿ, ਨੋ ਬਹਿ; ਅਤ੍ਥਾਪਤ੍ਤਿ ਬਹਿ ਆਪਜ੍ਜਤਿ, ਨੋ ਅਨ੍ਤੋ; ਅਤ੍ਥਾਪਤ੍ਤਿ ਅਨ੍ਤੋ ਚੇਵ ਆਪਜ੍ਜਤਿ ਬਹਿ ਚ. ਅਤ੍ਥਾਪਤ੍ਤਿ ਅਨ੍ਤੋਸੀਮਾਯ ਆਪਜ੍ਜਤਿ, ਨੋ ਬਹਿਸੀਮਾਯ; ਅਤ੍ਥਾਪਤ੍ਤਿ ਬਹਿਸੀਮਾਯ ਆਪਜ੍ਜਤਿ, ਨੋ ਅਨ੍ਤੋਸੀਮਾਯ; ਅਤ੍ਥਾਪਤ੍ਤਿ ਅਨ੍ਤੋਸੀਮਾਯ ਚੇਵ ਆਪਜ੍ਜਤਿ ਬਹਿਸੀਮਾਯ ਚ. ਤੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਕਾਯੇਨ ਆਪਜ੍ਜਤਿ, ਵਾਚਾਯ ਆਪਜ੍ਜਤਿ, ਕਾਯੇਨ ਵਾਚਾਯ ਆਪਜ੍ਜਤਿ. ਅਪਰੇਹਿਪਿ ਤੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ. ਤੀਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਕਾਯੇਨ ਵੁਟ੍ਠਾਤਿ, ਵਾਚਾਯ ਵੁਟ੍ਠਾਤਿ, ਕਾਯੇਨ ਵਾਚਾਯ ਵੁਟ੍ਠਾਤਿ. ਅਪਰੇਹਿਪਿ ਤੀਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ. ਤੀਣਿ ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ. ਤੀਣਿ ਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ.

[ਚੂਲ਼ਵ. ੬] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਤਜ੍ਜਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. [ਚੂਲ਼ਵ. ੧੫] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਨਿਯਸ੍ਸਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. [ਚੂਲ਼ਵ. ੨੭] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਕੁਲਦੂਕਕੋ ਹੋਤਿ ਪਾਪਸਮਾਚਾਰੋ ਪਾਪਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਪਟਿਸਾਰਣੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿ ਬਹੁਲੋ ਅਨਪਦਾਨੋ ਗਿਹੀ ਅਕ੍ਕੋਸਤਿ ਪਰਿਭਾਸਤਿ. [ਚੂਲ਼ਵ. ੫੦] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. [ਚੂਲ਼ਵ. ੫੯] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਟਿਕਾਤੁਂ. [ਚੂਲ਼ਵ. ੬੯] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਨ ਇਚ੍ਛਤਿ ਪਾਪਿਕਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤੁਂ.

ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਆਗਾਲ਼੍ਹਾਯ ਚੇਤੇਯ੍ਯ – ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਦਵੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਦਵੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਦਵੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਅਨਾਚਾਰੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਅਨਾਚਾਰੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਅਨਾਚਾਰੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਉਪਘਾਤਿਕੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਉਪਘਾਤਿਕੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਉਪਘਾਤਿਕੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਮਿਚ੍ਛਾਜੀਵੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਮਿਚ੍ਛਾਜੀਵੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਮਿਚ੍ਛਾਜੀਵੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਆਪਤ੍ਤਿਂ ਆਪਨ੍ਨੋ ਕਮ੍ਮਕਤੋ ਉਪਸਮ੍ਪਾਦੇਤਿ, ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਯਾਯ ਆਪਤ੍ਤਿਯਾ ਸਙ੍ਘੇਨ ਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ.

ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਸਙ੍ਘਮਜ੍ਝੇ ਉਪੋਸਥਂ ਠਪੇਨ੍ਤਸ੍ਸ – ‘‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਉਪੋਸਥੋ ਕਾਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਸਙ੍ਘਮਜ੍ਝੇ ਪਵਾਰਣਂ ਠਪੇਨ੍ਤਸ੍ਸ – ‘‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨ ਕਾਚਿ ਸਙ੍ਘਸਮ੍ਮੁਤਿ ਦਾਤਬ੍ਬਾ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਸਙ੍ਘੇ ਨ ਵੋਹਰਿਤਬ੍ਬਂ [ਸਂਘੋ ਨ ਵੋਹਰਿਤਬ੍ਬੋ (ਸ੍ਯਾ.)] – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਨ ਕਿਸ੍ਮਿਂ ਚਿ ਪਚ੍ਚੇਕਟ੍ਠਾਨੇ ਠਪੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਸ੍ਸਾਯ ਨ ਵਤ੍ਥਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਸ੍ਸਯੋ ਨ ਦਾਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਓਕਾਸਕਮ੍ਮਂ ਕਾਰਾਪੇਨ੍ਤਸ੍ਸ ਨਾਲਂ ਓਕਾਸਕਮ੍ਮਂ ਕਾਤੁਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਸਵਚਨੀਯਂ ਨਾਦਾਤਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋ ਨ ਪੁਚ੍ਛਿਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਵਿਨਯੋ ਨ ਪੁਚ੍ਛਿਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋ ਨ ਵਿਸ੍ਸਜ੍ਜੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਵਿਨਯੋ ਨ ਵਿਸ੍ਸਜ੍ਜੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਅਨੁਯੋਗੋ ਨ ਦਾਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਸਦ੍ਧਿਂ ਵਿਨਯੋ ਨ ਸਾਕਚ੍ਛਿਤਬ੍ਬੋ [ਸਾਕਚ੍ਛਾਤਬ੍ਬੋ (ਕ.)] – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ ਨ ਨਿਸ੍ਸਯੋ ਦਾਤਬ੍ਬੋ ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ.

ਤਯੋ ਉਪੋਸਥਾ – ਚਾਤੁਦ੍ਦਸਿਕੋ, ਪਨ੍ਨਰਸਿਕੋ, ਸਾਮਗ੍ਗਿਉਪੋਸਥੋ. ਅਪਰੇਪਿ ਤਯੋ ਉਪੋਸਥਾ – ਸਙ੍ਘੇਉਪੋਸਥੋ, ਗਣੇਉਪੋਸਥੋ, ਪੁਗ੍ਗਲੇਉਪੋਸਥੋ. ਅਪਰੇਪਿ ਤਯੋ ਉਪੋਸਥਾ – ਸੁਤ੍ਤੁਦ੍ਦੇਸੋਉਪੋਸਥੋ, ਪਾਰਿਸੁਦ੍ਧਿਉਪੋਸਥੋ, ਅਧਿਟ੍ਠਾਨੁਪੋਸਥੋ. ਤਿਸ੍ਸੋ ਪਵਾਰਣਾ – ਚਾਤੁਦ੍ਦਸਿਕਾ, ਪਨ੍ਨਰਸਿਕਾ, ਸਾਮਗ੍ਗਿਪਵਾਰਣਾ. ਅਪਰਾਪਿ ਤਿਸ੍ਸੋ ਪਵਾਰਣਾ – ਸਙ੍ਘੇਪਵਾਰਣਾ, ਗਣੇਪਵਾਰਣਾ, ਪੁਗ੍ਗਲੇਪਵਾਰਣਾ. ਅਪਰਾਪਿ ਤਿਸ੍ਸੋ ਪਵਾਰਣਾ – ਤੇਵਾਚਿਕਾਪਵਾਰਣਾ, ਦ੍ਵੇਵਾਚਿਕਾਪਵਾਰਣਾ, ਸਮਾਨਵਸ੍ਸਿਕਾਪਵਾਰਣਾ.

ਤਯੋ ਆਪਾਯਿਕਾ ਨੇਰਯਿਕਾ – ਇਦਮਪ੍ਪਹਾਯ, ਯੋ ਚ ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋ, ਯੋ ਚ ਸੁਦ੍ਧਂ ਬ੍ਰਹ੍ਮਚਾਰਿਂ ਪਰਿਸੁਦ੍ਧਬ੍ਰਹ੍ਮਚਰਿਯਂ ਚਰਨ੍ਤਂ ਅਮੂਲਕੇਨ ਅਬ੍ਰਹ੍ਮਚਰਿਯੇਨ ਅਨੁਦ੍ਧਂਸੇਤਿ, ਯੋ ਚਾਯਂ ਏਵਂਵਾਦੀ ਏਵਂਦਿਟ੍ਠਿ [ਏਵਂਦਿਟ੍ਠੀ (ਸੀ.)] – ‘‘ਨਤ੍ਥਿ ਕਾਮੇਸੁ ਦੋਸੋ’’ਤਿ ਸੋ ਕਾਮੇਸੁ ਪਾਤਬ੍ਯਤਂ ਆਪਜ੍ਜਤਿ. [ਅ. ਨਿ. ੩.੭੦] ਤੀਣਿ ਅਕੁਸਲਮੂਲਾਨਿ – ਲੋਭੋ ਅਕੁਸਲਮੂਲਂ, ਦੋਸੋ ਅਕੁਸਲਮੂਲਂ, ਮੋਹੋ ਅਕੁਸਲਮੂਲਂ. [ਅ. ਨਿ. ੩.੭੦] ਤੀਣਿ ਕੁਸਲਮੂਲਾਨਿ – ਅਲੋਭੋ ਕੁਸਲਮੂਲਂ, ਅਦੋਸੋ ਕੁਸਲਮੂਲਂ, ਅਮੋਹੋ ਕੁਸਲਮੂਲਂ. ਤੀਣਿ ਦੁਚ੍ਚਰਿਤਾਨਿ – ਕਾਯਦੁਚ੍ਚਰਿਤਂ, ਵਚੀਦੁਚ੍ਚਰਿਤਂ, ਮਨੋਦੁਚ੍ਚਰਿਤਂ. ਤੀਣਿ ਸੁਚਰਿਤਾਨਿ – ਕਾਯਸੁਚਰਿਤਂ, ਵਚੀਸੁਚਰਿਤਂ, ਮਨੋਸੁਚਰਿਤਂ. ਤਯੋ ਅਤ੍ਥਵਸੇ ਪਟਿਚ੍ਚ ਭਗਵਤਾ ਕੁਲੇਸੁ ਤਿਕਭੋਜਨਂ ਪਞ੍ਞਤ੍ਤਂ – ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯ, ਪੇਸਲਾਨਂ ਭਿਕ੍ਖੂਨਂ ਫਾਸੁਵਿਹਾਰਾਯ, ‘‘ਮਾ ਪਾਪਿਚ੍ਛਾ ਪਕ੍ਖਂ ਨਿਸ੍ਸਾਯ ਸਙ੍ਘਂ ਭਿਨ੍ਦੇਯ੍ਯੁ’’ਨ੍ਤਿ ਕੁਲਾਨੁਦ੍ਦਯਤਾਯ ਚ. [ਚੂਲ਼ਵ. ੩੫੦] ਤੀਹਿ ਅਸਦ੍ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦੇਵਦਤ੍ਤੋ ਆਪਾਯਿਕੋ ਨੇਰਯਿਕੋ ਕਪ੍ਪਟ੍ਠੋ ਅਤੇਕਿਚ੍ਛੋ ਪਾਪਿਚ੍ਛਤਾ ਪਾਪਮਿਤ੍ਤਤਾ ਓਰਮਤ੍ਤਕੇਨ ਵਿਸੇਸਾਧਿਗਮੇਨ ਅਨ੍ਤਰਾ ਵੋਸਾਨਂ ਆਪਾਦਿ. ਤਿਸ੍ਸੋ ਸਮ੍ਮੁਤਿਯੋ – ਦਣ੍ਡਸਮ੍ਮੁਤਿ, ਸਿਕ੍ਕਾਸਮ੍ਮੁਤਿ, ਦਣ੍ਡਸਿਕ੍ਕਾਸਮ੍ਮੁਤਿ. ਤਿਸ੍ਸੋ ਪਾਦੁਕਾ ਧੁਵਟ੍ਠਾਨਿਕਾ ਅਸਙ੍ਕਮਨੀਯਾ – ਵਚ੍ਚਪਾਦੁਕਾ, ਪਸ੍ਸਾਵਪਾਦੁਕਾ, ਆਚਮਨਪਾਦੁਕਾ. ਤਿਸ੍ਸੋ ਪਾਦਘਂਸਨਿਯੋ – ਸਕ੍ਖਰਂ, ਕਥਲਾ, ਸਮੁਦ੍ਦਫੇਣਕੋਤਿ.

ਤਿਕਂ ਨਿਟ੍ਠਿਤਂ.

ਤਸ੍ਸੁਦ੍ਦਾਨਂ –

ਤਿਟ੍ਠਨ੍ਤੇ ਕਾਲੇ ਰਤ੍ਤਿਞ੍ਚ, ਦਸ ਪਞ੍ਚ ਕੁਸਲੇਨ;

ਵੇਦਨਾ ਚੋਦਨਾ ਵਤ੍ਥੁ, ਸਲਾਕਾ ਦ੍ਵੇ ਪਟਿਕ੍ਖਿਪਾ.

ਪਞ੍ਞਤ੍ਤਿ ਅਪਰੇ ਦ੍ਵੇ ਚ, ਬਾਲੋ ਕਾਲ਼ੇ ਚ ਕਪ੍ਪਤਿ;

ਹੇਮਨ੍ਤੇ ਸਙ੍ਘੋ ਸਙ੍ਘਸ੍ਸ, ਛਾਦਨਾ ਚ ਪਟਿਚ੍ਛਾਦਿ.

ਪਟਿਚ੍ਛਨ੍ਨਾ ਵਿਵਟਾ ਚ, ਸੇਨਾਸਨਗਿਲਾਯਨਾ;

ਪਾਤਿਮੋਕ੍ਖਂ ਪਰਿਵਾਸਂ, ਮਾਨਤ੍ਤਾ ਪਾਰਿਵਾਸਿਕਾ.

ਅਨ੍ਤੋ ਅਨ੍ਤੋ ਚ ਸੀਮਾਯ, ਆਪਜ੍ਜਤਿ ਪੁਨਾਪਰੇ;

ਵੁਟ੍ਠਾਤਿ ਅਪਰੇ ਚੇਵ, ਅਮੂਲ਼੍ਹਵਿਨਯਾ ਦੁਵੇ.

ਤਜ੍ਜਨੀਯਾ ਨਿਯਸ੍ਸਾ ਚ, ਪਬ੍ਬਾਜਪਟਿਸਾਰਣੀ;

ਅਦਸ੍ਸਨਾ ਪਟਿਕਮ੍ਮੇ, ਅਨਿਸ੍ਸਗ੍ਗੇ ਚ ਦਿਟ੍ਠਿਯਾ.

ਆਗਾਲ਼੍ਹਕਮ੍ਮਾਧਿਸੀਲੇ, ਦਵਾਨਾਚਾਰ ਘਾਤਿਕਾ;

ਆਜੀਵਾਪਨ੍ਨਾ ਤਾਦਿਸਿਕਾ, ਅਵਣ੍ਣੁਪੋਸਥੇਨ ਚ.

ਪਵਾਰਣਾ ਸਮ੍ਮੁਤਿ ਚ, ਵੋਹਾਰਪਚ੍ਚੇਕੇਨ ਚ;

ਨ ਵਤ੍ਥਬ੍ਬਂ ਨ ਦਾਤਬ੍ਬਂ, ਓਕਾਸਂ ਨ ਕਰੇ ਤਥਾ.

ਨ ਕਰੇ ਸਵਚਨੀਯਂ, ਨ ਪੁਚ੍ਛਿਤਬ੍ਬਕਾ ਦੁਵੇ;

ਨ ਵਿਸ੍ਸਜ੍ਜੇ ਦੁਵੇ ਚੇਵ, ਅਨੁਯੋਗਮ੍ਪਿ ਨੋ ਦਦੇ.

ਸਾਕਚ੍ਛਾ ਉਪਸਮ੍ਪਦਾ, ਨਿਸ੍ਸਯਸਾਮਣੇਰਾ ਚ;

ਉਪੋਸਥਤਿਕਾ ਤੀਣਿ, ਪਵਾਰਣਤਿਕਾ ਤਯੋ.

ਆਪਾਯਿਕਾ ਅਕੁਸਲਾ, ਕੁਸਲਾ ਚਰਿਤਾ ਦੁਵੇ;

ਤਿਕਭੋਜਨਸਦ੍ਧਮ੍ਮੇ, ਸਮ੍ਮੁਤਿ ਪਾਦੁਕੇਨ ਚ;

ਪਾਦਘਂਸਨਿਕਾ ਚੇਵ, ਉਦ੍ਦਾਨਂ ਤਿਕਕੇ ਇਦਨ੍ਤਿ.