੧੯. ਸਮਥਾਧਿਕਰਣਵਾਰੋ

੩੦੯. ਸਮਥਾ ਸਮਥੇਹਿ ਸਮ੍ਮਨ੍ਤਿ? ਸਮਥਾ ਅਧਿਕਰਣੇਹਿ ਸਮ੍ਮਨ੍ਤਿ? ਅਧਿਕਰਣਾ ਸਮਥੇਹਿ ਸਮ੍ਮਨ੍ਤਿ? ਅਧਿਕਰਣਾ ਅਧਿਕਰਣੇਹਿ ਸਮ੍ਮਨ੍ਤਿ?

ਸਿਯਾ ਸਮਥਾ ਸਮਥੇਹਿ ਸਮ੍ਮਨ੍ਤਿ, ਸਿਯਾ ਸਮਥਾ ਸਮਥੇਹਿ ਨ ਸਮ੍ਮਨ੍ਤਿ. ਸਿਯਾ ਸਮਥਾ ਅਧਿਕਰਣੇਹਿ ਸਮ੍ਮਨ੍ਤਿ, ਸਿਯਾ ਸਮਥਾ ਅਧਿਕਰਣੇਹਿ ਨ ਸਮ੍ਮਨ੍ਤਿ. ਸਿਯਾ ਅਧਿਕਰਣਾ ਸਮਥੇਹਿ ਸਮ੍ਮਨ੍ਤਿ, ਸਿਯਾ ਅਧਿਕਰਣਾ ਸਮਥੇਹਿ ਨ ਸਮ੍ਮਨ੍ਤਿ. ਸਿਯਾ ਅਧਿਕਰਣਾ ਅਧਿਕਰਣੇਹਿ ਸਮ੍ਮਨ੍ਤਿ, ਸਿਯਾ ਅਧਿਕਰਣਾ ਅਧਿਕਰਣੇਹਿ ਨ ਸਮ੍ਮਨ੍ਤਿ.

੩੧੦. ਕਥਂ ਸਿਯਾ ਸਮਥਾ ਸਮਥੇਹਿ ਸਮ੍ਮਨ੍ਤਿ, ਕਥਂ ਸਿਯਾ ਸਮਥਾ ਸਮਥੇਹਿ ਨ ਸਮ੍ਮਨ੍ਤਿ? ਯੇਭੁਯ੍ਯਸਿਕਾ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਸਤਿਵਿਨਯੇਨ ਨ ਸਮ੍ਮਤਿ, ਅਮੂਲ਼੍ਹਵਿਨਯੇਨ ਨ ਸਮ੍ਮਤਿ, ਪਟਿਞ੍ਞਾਤਕਰਣੇਨ ਨ ਸਮ੍ਮਤਿ, ਤਸ੍ਸਪਾਪਿਯਸਿਕਾਯ ਨ ਸਮ੍ਮਤਿ, ਤਿਣਵਤ੍ਥਾਰਕੇਨ ਨ ਸਮ੍ਮਤਿ.

ਸਤਿਵਿਨਯੋ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਅਮੂਲ਼੍ਹਵਿਨਯੇਨ ਨ ਸਮ੍ਮਤਿ, ਪਟਿਞ੍ਞਾਤਕਰਣੇਨ ਨ ਸਮ੍ਮਾਤਿ, ਤਸ੍ਸਪਾਪਿਯਸਿਕਾਯ ਨ ਸਮ੍ਮਤਿ, ਤਿਣਵਤ੍ਥਾਰਕੇਨ ਨ ਸਮ੍ਮਤਿ, ਯੇਭੁਯ੍ਯਸਿਕਾਯ ਨ ਸਮ੍ਮਤਿ.

ਅਮੂਲ਼੍ਹਵਿਨਯੋ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਪਟਿਞ੍ਞਾਤਕਰਣੇਨ ਨ ਸਮ੍ਮਤਿ, ਤਸ੍ਸਪਾਪਿਯਸਿਕਾਯ ਨ ਸਮ੍ਮਤਿ, ਤਿਣਵਤ੍ਥਾਰਕੇਨ ਨ ਸਮ੍ਮਤਿ, ਯੇਭੁਯ੍ਯਸਿਕਾਯ ਨ ਸਮ੍ਮਤਿ, ਸਤਿਵਿਨਯੇਨ ਨ ਸਮ੍ਮਤਿ.

ਪਟਿਞ੍ਞਾਤਕਰਣਂ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਤਸ੍ਸਪਾਪਿਯਸਿਕਾਯ ਨ ਸਮ੍ਮਤਿ, ਤਿਣਵਤ੍ਥਾਰਕੇਨ ਨ ਸਮ੍ਮਤਿ, ਯੇਭੁਯ੍ਯਸਿਕਾਯ ਨ ਸਮ੍ਮਤਿ, ਸਤਿਵਿਨਯੇਨ ਨ ਸਮ੍ਮਤਿ, ਅਮੂਲ਼੍ਹਵਿਨਯੇਨ ਨ ਸਮ੍ਮਤਿ.

ਤਸ੍ਸਪਾਪਿਯਸਿਕਾ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਤਿਣਵਤ੍ਥਾਰਕੇਨ ਨ ਸਮ੍ਮਤਿ, ਯੇਭੁਯ੍ਯਸਿਕਾਯ ਨ ਸਮ੍ਮਤਿ, ਸਤਿਵਿਨਯੇਨ ਨ ਸਮ੍ਮਤਿ, ਅਮੂਲ਼੍ਹਵਿਨਯੇਨ ਨ ਸਮ੍ਮਤਿ, ਪਟਿਞ੍ਞਾਤਕਰਣੇਨ ਨ ਸਮ੍ਮਤਿ.

ਤਿਣਵਤ੍ਥਾਰਕੋ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਯੇਭੁਯ੍ਯਸਿਕਾਯ ਨ ਸਮ੍ਮਤਿ, ਸਤਿਵਿਨਯੇਨ ਨ ਸਮ੍ਮਤਿ, ਅਮੂਲ਼੍ਹਵਿਨਯੇਨ ਨ ਸਮ੍ਮਤਿ, ਪਟਿਞ੍ਞਾਤਕਰਣੇਨ ਨ ਸਮ੍ਮਤਿ, ਤਸ੍ਸਪਾਪਿਯਸਿਕਾਯ ਨ ਸਮ੍ਮਤਿ. ਏਵਂ ਸਿਯਾ ਸਮਥਾ ਸਮਥੇਹਿ ਸਮ੍ਮਨ੍ਤਿ. ਏਵਂ ਸਿਯਾ ਸਮਥਾ ਸਮਥੇਹਿ ਨ ਸਮ੍ਮਨ੍ਤਿ.

੩੧੧. ਕਥਂ ਸਿਯਾ ਸਮਥਾ ਅਧਿਕਰਣੇਹਿ ਸਮ੍ਮਨ੍ਤਿ, ਕਥਂ ਸਿਯਾ ਸਮਥਾ ਅਧਿਕਰਣੇਹਿ ਨ ਸਮ੍ਮਨ੍ਤਿ? ਸਮ੍ਮੁਖਾਵਿਨਯੋ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਯੇਭੁਯ੍ਯਸਿਕਾ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਸਤਿਵਿਨਯੋ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਅਮੂਲ਼੍ਹਵਿਨਯੋ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਪਟਿਞ੍ਞਾਤਕਰਣਂ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਤਸ੍ਸਪਾਪਿਯਸਿਕਾ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਤਿਣਵਤ੍ਥਾਰਕੋ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ. ਏਵਂ ਸਿਯਾ ਸਮਥਾ ਅਧਿਕਰਣੇਹਿ ਸਮ੍ਮਨ੍ਤਿ. ਏਵਂ ਸਿਯਾ ਸਮਥਾ ਅਧਿਕਰਣੇਹਿ ਨ ਸਮ੍ਮਨ੍ਤਿ.

੩੧੨. ਕਥਂ ਸਿਯਾ ਅਧਿਕਰਣਾ ਸਮਥੇਹਿ ਸਮ੍ਮਨ੍ਤਿ, ਕਥਂ ਸਿਯਾ ਅਧਿਕਰਣਾ ਸਮਥੇਹਿ ਨ ਸਮ੍ਮਨ੍ਤਿ? ਵਿਵਾਦਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਯੇਭੁਯ੍ਯਸਿਕਾਯ ਚ ਸਮ੍ਮਤਿ; ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਤਸ੍ਸਪਾਪਿਯਸਿਕਾਯ ਚ ਤਿਣਵਤ੍ਥਾਰਕੇਨ ਚ ਨ ਸਮ੍ਮਤਿ.

ਅਨੁਵਾਦਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ ਸਮ੍ਮਤਿ; ਯੇਭੁਯ੍ਯਸਿਕਾਯ ਚ ਪਟਿਞ੍ਞਾਤਕਰਣੇਨ ਚ ਤਿਣਵਤ੍ਥਾਰਕੇਨ ਚ ਨ ਸਮ੍ਮਤਿ.

ਆਪਤ੍ਤਾਧਿਕਰਣਂ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਤਿਣਵਤ੍ਥਾਰਕੇਨ ਚ ਸਮ੍ਮਤਿ; ਯੇਭੁਯ੍ਯਸਿਕਾਯ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਤਸ੍ਸਪਾਪਿਯਸਿਕਾਯ ਚ ਨ ਸਮ੍ਮਤਿ.

ਕਿਚ੍ਚਾਧਿਕਰਣਂ ਸਮ੍ਮੁਖਾਵਿਨਯੇਨ ਸਮ੍ਮਤਿ; ਯੇਭੁਯ੍ਯਸਿਕਾਯ ਚ ਸਤਿਵਿਨਯੇਨ ਚ ਅਮੂਲ਼੍ਹਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ ਤਸ੍ਸਪਾਪਿਯਸਿਕਾਯ ਤਿਣਵਤ੍ਥਾਰਕੇਨ ਚ ਨ ਸਮ੍ਮਤਿ. ਏਵਂ ਸਿਯਾ ਅਧਿਕਰਣਾ ਸਮਥੇਹਿ ਸਮ੍ਮਨ੍ਤਿ. ਏਵਂ ਸਿਯਾ ਅਧਿਕਰਣਾ ਸਮਥੇਹਿ ਨ ਸਮ੍ਮਨ੍ਤਿ.

੩੧੩. ਕਥਂ ਸਿਯਾ ਅਧਿਕਰਣਾ ਅਧਿਕਰਣੇਹਿ ਸਮ੍ਮਨ੍ਤਿ? ਕਥਂ ਸਿਯਾ ਅਧਿਕਰਣਾ ਅਧਿਕਰਣੇਹਿ ਨ ਸਮ੍ਮਨ੍ਤਿ? ਵਿਵਾਦਾਧਿਕਰਣਂ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਅਨੁਵਾਦਾਧਿਕਰਣਂ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਆਪਤ੍ਤਾਧਿਕਰਣਂ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ.

ਕਿਚ੍ਚਾਧਿਕਰਣਂ ਵਿਵਾਦਾਧਿਕਰਣੇਨ ਨ ਸਮ੍ਮਤਿ, ਅਨੁਵਾਦਾਧਿਕਰਣੇਨ ਨ ਸਮ੍ਮਤਿ, ਆਪਤ੍ਤਾਧਿਕਰਣੇਨ ਨ ਸਮ੍ਮਤਿ; ਕਿਚ੍ਚਾਧਿਕਰਣੇਨ ਸਮ੍ਮਤਿ. ਏਵਂ ਸਿਯਾ ਅਧਿਕਰਣਾ ਅਧਿਕਰਣੇਹਿ ਸਮ੍ਮਨ੍ਤਿ. ਏਵਂ ਸਿਯਾ ਅਧਿਕਰਣਾ ਅਧਿਕਰਣੇਹਿ ਨ ਸਮ੍ਮਨ੍ਤਿ.

ਛਾਪਿ ਸਮਥਾ ਚਤ੍ਤਾਰੋਪਿ ਅਧਿਕਰਣਾ ਸਮ੍ਮੁਖਾਵਿਨਯੇਨ ਸਮ੍ਮਨ੍ਤਿ; ਸਮ੍ਮੁਖਾਵਿਨਯੋ ਨ ਕੇਨਚਿ ਸਮ੍ਮਤਿ.

ਸਮਥਾਧਿਕਰਣਵਾਰੋ ਨਿਟ੍ਠਿਤੋ ਏਕੂਨਵੀਸਤਿਮੋ.