੨੦. ਸਮੁਟ੍ਠਾਪਨਵਾਰੋ
੩੧੪. ਵਿਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ? ਵਿਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਨ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ; ਅਪਿਚ, ਵਿਵਾਦਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ. ਯਥਾ ਕਥਂ ਵਿਯ? [ਚੂਲ਼ਵ. ੨੧੫; ਪਰਿ. ੩੪੮ ਆਦਯੋ] ਇਧ ਭਿਕ੍ਖੂ ਵਿਵਦਨ੍ਤਿ – ‘‘ਧਮ੍ਮੋਤਿ ਵਾ, ਅਧਮ੍ਮੋਤਿ ਵਾ, ਵਿਨਯੋਤਿ ਵਾ, ਅਵਿਨਯੋਤਿ ਵਾ, ਅਭਾਸਿਤਂ ਅਲਪਿਤਂ ਤਥਾਗਤੇਨਾਤਿ ਵਾ, ਭਾਸਿਤਂ ਲਪਿਤਂ ਤਥਾਗਤੇਨਾਤਿ ਵਾ, ਅਨਾਚਿਣ੍ਣਂ ਤਥਾਗਤੇਨਾਤਿ ਵਾ, ਆਚਿਣ੍ਣਂ ਤਥਾਗਤੇਨਾਤਿ ਵਾ, ਅਪਞ੍ਞਤ੍ਤਂ ਤਥਾਗਤੇਨਾਤਿ ਵਾ, ਪਞ੍ਞਤ੍ਤਂ ਤਥਾਗਤੇਨਾਤਿ ਵਾ, ਆਪਤ੍ਤੀਤਿ ਵਾ, ਅਨਾਪਤ੍ਤੀਤਿ ਵਾ, ਲਹੁਕਾ ਆਪਤ੍ਤੀਤਿ ਵਾ, ਗਰੁਕਾ ਆਪਤ੍ਤੀਤਿ ਵਾ, ਸਾਵਸੇਸਾ ਆਪਤ੍ਤੀਤਿ ਵਾ, ਅਨਵਸੇਸਾ ਆਪਤ੍ਤੀਤਿ ਵਾ, ਦੁਟ੍ਠੁਲ੍ਲਾ ਆਪਤ੍ਤੀਤਿ ਵਾ ਅਦੁਟ੍ਠੁਲ੍ਲਾ ਆਪਤ੍ਤੀਤਿ ਵਾ’’. ਯਂ ਤਤ੍ਥ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਨਾਨਾਵਾਦੋ ਅਞ੍ਞਥਾਵਾਦੋ ਵਿਪਚ੍ਚਤਾਯ ਵੋਹਾਰੋ ਮੇਧਕਂ [ਮੇਧਗਂ (ਕ.)], ਇਦਂ ਵੁਚ੍ਚਤਿ ਵਿਵਾਦਾਧਿਕਰਣਂ. ਵਿਵਾਦਾਧਿਕਰਣੇ ਸਙ੍ਘੋ ਵਿਵਦਤਿ. ਵਿਵਾਦਾਧਿਕਰਣਂ ਵਿਵਦਮਾਨੋ ਅਨੁਵਦਤਿ. ਅਨੁਵਾਦਾਧਿਕਰਣਂ ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਵਿਵਾਦਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ.
੩੧੫. ਅਨੁਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ? ਅਨੁਵਾਦਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਨ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ; ਅਪਿਚ, ਅਨੁਵਾਦਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ. ਯਥਾ ਕਥਂ ਵਿਯ? [ਚੂਲ਼ਵ. ੨੧੫; ਪਰਿ. ੩੪੮ ਆਦਯੋ] ਇਧ ਭਿਕ੍ਖੂ ਭਿਕ੍ਖੁਂ ਅਨੁਵਦਨ੍ਤਿ ਸੀਲਵਿਪਤ੍ਤਿਯਾ ਵਾ ਆਚਾਰਵਿਪਤ੍ਤਿਯਾ ਵਾ ਦਿਟ੍ਠਿਵਿਪਤ੍ਤਿਯਾ ਵਾ ਆਜੀਵਵਿਪਤ੍ਤਿਯਾ ਵਾ. ਯੋ ਤਤ੍ਥ ਅਨੁਵਾਦੋ ਅਨੁਵਦਨਾ ਅਨੁਲ੍ਲਪਨਾ ਅਨੁਭਣਨਾ ਅਨੁਸਮ੍ਪਵਙ੍ਕਤਾ ਅਬ੍ਭੁਸ੍ਸਹਨਤਾ ਅਨੁਬਲਪ੍ਪਦਾਨਂ, ਇਦਂ ਵੁਚ੍ਚਤਿ ਅਨੁਵਾਦਾਧਿਕਰਣਂ. ਅਨੁਵਾਦਾਧਿਕਰਣੇ ਸਙ੍ਘੋ ਵਿਵਦਤਿ. ਵਿਵਾਦਾਧਿਕਰਣਂ ਵਿਵਦਮਾਨੋ ਅਨੁਵਦਤਿ. ਅਨੁਵਾਦਾਧਿਕਰਣਂ ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਅਨੁਵਾਦਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ.
੩੧੬. ਆਪਤ੍ਤਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ? ਆਪਤ੍ਤਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਨ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ; ਅਪਿਚ, ਆਪਤ੍ਤਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ. ਯਥਾ ਕਥਂ ਵਿਯ? ਪਞ੍ਚਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ, ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ, ਇਦਂ ਵੁਚ੍ਚਤਿ ਆਪਤ੍ਤਾਧਿਕਰਣਂ. ਆਪਤ੍ਤਾਧਿਕਰਣੇ ਸਙ੍ਘੋ ਵਿਵਦਤਿ. ਵਿਵਾਦਾਧਿਕਰਣਂ ਵਿਵਦਮਾਨੋ ਅਨੁਵਦਤਿ. ਅਨੁਵਾਦਾਧਿਕਰਣਂ ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਆਪਤ੍ਤਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ.
੩੧੭. ਕਿਚ੍ਚਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ? ਕਿਚ੍ਚਾਧਿਕਰਣਂ ਚਤੁਨ੍ਨਂ ਅਧਿਕਰਣਾਨਂ ਨ ਕਤਮਂ ਅਧਿਕਰਣਂ ਸਮੁਟ੍ਠਾਪੇਤਿ, ਅਪਿਚ ਕਿਚ੍ਚਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ. ਯਥਾ ਕਥਂ ਵਿਯ? ਯਾ ਸਙ੍ਘਸ੍ਸ ਕਿਚ੍ਚਯਤਾ ਕਰਣੀਯਤਾ ਅਪਲੋਕਨਕਮ੍ਮਂ ਞਤ੍ਤਿਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮਂ, ਇਦਂ ਵੁਚ੍ਚਤਿ ਕਿਚ੍ਚਾਧਿਕਰਣਂ. ਕਿਚ੍ਚਾਧਿਕਰਣੇ ਸਙ੍ਘੋ ਵਿਵਦਤਿ. ਵਿਵਾਦਾਧਿਕਰਣਂ ਵਿਵਦਮਾਨੋ ਅਨੁਵਦਤਿ. ਅਨੁਵਾਦਾਧਿਕਰਣਂ ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਕਿਚ੍ਚਾਧਿਕਰਣਪਚ੍ਚਯਾ ਚਤ੍ਤਾਰੋ ਅਧਿਕਰਣਾ ਜਾਯਨ੍ਤਿ.
ਸਮੁਟ੍ਠਾਪਨਵਾਰੋ ਨਿਟ੍ਠਿਤੋ ਵੀਸਤਿਮੋ.