੩. ਸਞ੍ਚਰਿਤ੍ਤਸਮੁਟ੍ਠਾਨਂ

੨੬੦. ਸਞ੍ਚਰੀ ਕੁਟਿ ਵਿਹਾਰੋ, ਧੋਵਨਞ੍ਚ ਪਟਿਗ੍ਗਹੋ;

ਵਿਞ੍ਞਤ੍ਤੁਤ੍ਤਰਿ ਅਭਿਹਟ੍ਠੁਂ, ਉਭਿਨ੍ਨਂ ਦੂਤਕੇਨ ਚ.

ਕੋਸਿਯਾ ਸੁਦ੍ਧਦ੍ਵੇਭਾਗਾ, ਛਬ੍ਬਸ੍ਸਾਨਿ ਨਿਸੀਦਨਂ;

ਰਿਞ੍ਚਨ੍ਤਿ ਰੂਪਿਕਾ ਚੇਵ, ਉਭੋ ਨਾਨਪ੍ਪਕਾਰਕਾ.

ਊਨਬਨ੍ਧਨਵਸ੍ਸਿਕਾ, ਸੁਤ੍ਤਂ ਵਿਕਪ੍ਪਨੇਨ ਚ;

ਦ੍ਵਾਰਦਾਨਸਿਬ੍ਬਾਨਿ [ਦ੍ਵਾਰਦਾਨਸਿਬ੍ਬਿਨੀ (ਸੀ. ਸ੍ਯਾ.)] ਚ, ਪੂਵਪਚ੍ਚਯਜੋਤਿ ਚ.

ਰਤਨਂ ਸੂਚਿ ਮਞ੍ਚੋ ਚ, ਤੂਲਂ ਨਿਸੀਦਨਕਣ੍ਡੁ ਚ;

ਵਸ੍ਸਿਕਾ ਚ ਸੁਗਤੇਨ, ਵਿਞ੍ਞਤ੍ਤਿ ਅਞ੍ਞਂ ਚੇਤਾਪਨਾ.

ਦ੍ਵੇ ਸਙ੍ਘਿਕਾ ਮਹਾਜਨਿਕਾ, ਦ੍ਵੇ ਪੁਗ੍ਗਲਲਹੁਕਾ ਗਰੁ;

ਦ੍ਵੇ ਵਿਘਾਸਾ ਸਾਟਿਕਾ ਚ, ਸਮਣਚੀਵਰੇਨ ਚ.

ਸਮਪਞ੍ਞਾਸਿਮੇ ਧਮ੍ਮਾ, ਛਹਿ ਠਾਨੇਹਿ ਜਾਯਰੇ;

ਕਾਯਤੋ ਨ ਵਾਚਾਚਿਤ੍ਤਾ, ਵਾਚਤੋ ਨ ਕਾਯਮਨਾ.

ਕਾਯਵਾਚਾ ਨ ਚ ਚਿਤ੍ਤਾ [ਨ ਚਿਤ੍ਤਤੋ (ਸੀ. ਸ੍ਯਾ.)], ਕਾਯਚਿਤ੍ਤਾ ਨ ਵਾਚਿਕਾ [ਨ ਵਾਚਤੋ (ਸੀ. ਸ੍ਯਾ.)];

ਵਾਚਾਚਿਤ੍ਤਾ ਨ ਕਾਯੇਨ, ਤੀਹਿ ਦ੍ਵਾਰੇਹਿ [ਤੀਹਿ ਠਾਨੇਹਿ (ਸ੍ਯਾ.)] ਜਾਯਰੇ.

ਛਸਮੁਟ੍ਠਾਨਿਕਾ ਏਤੇ, ਸਞ੍ਚਰਿਤ੍ਤੇਨ ਸਾਦਿਸਾ.

ਸਞ੍ਚਰਿਤ੍ਤਸਮੁਟ੍ਠਾਨਂ ਨਿਟ੍ਠਿਤਂ.