ਸਮੁਟ੍ਠਾਨਸੀਸਸਙ੍ਖੇਪੋ
ਸਮੁਟ੍ਠਾਨਸ੍ਸੁਦ੍ਦਾਨਂ
੨੫੭. ਅਨਿਚ੍ਚਾ ਸਬ੍ਬੇ ਸਙ੍ਖਾਰਾ, ਦੁਕ੍ਖਾਨਤ੍ਤਾ ਚ ਸਙ੍ਖਤਾ;
ਨਿਬ੍ਬਾਨਞ੍ਚੇਵ ਪਞ੍ਞਤ੍ਤਿ, ਅਨਤ੍ਤਾ ਇਤਿ ਨਿਚ੍ਛਯਾ.
ਬੁਦ੍ਧਚਨ੍ਦੇ ਅਨੁਪ੍ਪਨ੍ਨੇ, ਬੁਦ੍ਧਾਦਿਚ੍ਚੇ ਅਨੁਗ੍ਗਤੇ;
ਤੇਸਂ ਸਭਾਗਧਮ੍ਮਾਨਂ, ਨਾਮਮਤ੍ਤਂ ਨ ਨਾਯਤਿ.
ਦੁਕ੍ਕਰਂ ਵਿਵਿਧਂ ਕਤ੍ਵਾ, ਪੂਰਯਿਤ੍ਵਾਨ ਪਾਰਮੀ;
ਉਪ੍ਪਜ੍ਜਨ੍ਤਿ ਮਹਾਵੀਰਾ, ਚਕ੍ਖੁਭੂਤਾ ਸਬ੍ਰਹ੍ਮਕੇ.
ਤੇ ਦੇਸਯਨ੍ਤਿ ਸਦ੍ਧਮ੍ਮਂ, ਦੁਕ੍ਖਹਾਨਿਂ ਸੁਖਾਵਹਂ;
ਅਙ੍ਗੀਰਸੋ ਸਕ੍ਯਮੁਨਿ, ਸਬ੍ਬਭੂਤਾਨੁਕਮ੍ਪਕੋ.
ਸਬ੍ਬਸਤ੍ਤੁਤ੍ਤਮੋ ਸੀਹੋ, ਪਿਟਕੇ ਤੀਣਿ ਦੇਸਯਿ;
ਸੁਤ੍ਤਨ੍ਤਮਭਿਧਮ੍ਮਞ੍ਚ, ਵਿਨਯਞ੍ਚ ਮਹਾਗੁਣਂ.
ਏਵਂ ਨੀਯਤਿ ਸਦ੍ਧਮ੍ਮੋ, ਵਿਨਯੋ ਯਦਿ ਤਿਟ੍ਠਤਿ;
ਉਭਤੋ ਚ ਵਿਭਙ੍ਗਾਨਿ, ਖਨ੍ਧਕਾ ਯਾ ਚ ਮਾਤਿਕਾ.
ਮਾਲਾ ਸੁਤ੍ਤਗੁਣੇਨੇਵ, ਪਰਿਵਾਰੇਨ ਗਨ੍ਥਿਤਾ;
ਤਸ੍ਸੇਵ ਪਰਿਵਾਰਸ੍ਸ, ਸਮੁਟ੍ਠਾਨਂ ਨਿਯਤੋ ਕਤਂ.
ਸਮ੍ਭੇਦਂ ਨਿਦਾਨਂ ਚਞ੍ਞਂ, ਸੁਤ੍ਤੇ ਦਿਸ੍ਸਨ੍ਤਿ ਉਪਰਿ;
ਤਸ੍ਮਾ ਸਿਕ੍ਖੇ ਪਰਿਵਾਰਂ, ਧਮ੍ਮਕਾਮੋ ਸੁਪੇਸਲੋਤਿ.
ਤੇਰਸਸਮੁਟ੍ਠਾਨਂ
ਵਿਭਙ੍ਗੇ ਦ੍ਵੀਸੁ ਪਞ੍ਞਤ੍ਤਂ, ਉਦ੍ਦਿਸਨ੍ਤਿ ਉਪੋਸਥੇ;
ਪਵਕ੍ਖਾਮਿ ਸਮੁਟ੍ਠਾਨਂ, ਯਥਾਞਾਯਂ ਸੁਣਾਥ ਮੇ.
ਪਾਰਾਜਿਕਂ ਯਂ ਪਠਮਂ, ਦੁਤਿਯਞ੍ਚ ਤਤੋ ਪਰਂ;
ਸਞ੍ਚਰਿਤ੍ਤਾਨੁਭਾਸਨਞ੍ਚ, ਅਤਿਰੇਕਞ੍ਚ ਚੀਵਰਂ.
ਲੋਮਾਨਿ ਪਦਸੋਧਮ੍ਮੋ, ਭੂਤਂ ਸਂਵਿਧਾਨੇਨ ਚ;
ਥੇਯ੍ਯਦੇਸਨਚੋਰੀ ਚ, ਅਨਨੁਞ੍ਞਾਤਾਯ ਤੇਰਸ.
ਤੇਰਸੇਤੇ ਸਮੁਟ੍ਠਾਨ ਨਯਾ, ਵਿਞ੍ਞੂਹਿ ਚਿਨ੍ਤਿਤਾ.
ਏਕੇਕਸ੍ਮਿਂ ਸਮੁਟ੍ਠਾਨੇ, ਸਦਿਸਾ ਇਧ ਦਿਸ੍ਸਰੇ.
੧. ਪਠਮਪਾਰਾਜਿਕਸਮੁਟ੍ਠਾਨਂ
੨੫੮. ਮੇਥੁਨਂ ਸੁਕ੍ਕਸਂਸਗ੍ਗੋ, ਅਨਿਯਤਾ ਪਠਮਿਕਾ;
ਪੁਬ੍ਬੂਪਪਰਿਪਾਚਿਤਾ, ਰਹੋ ਭਿਕ੍ਖੁਨਿਯਾ ਸਹ.
ਸਭੋਜਨੇ ਰਹੋ ਦ੍ਵੇ ਚ, ਅਙ੍ਗੁਲਿ ਉਦਕੇ ਹਸਂ;
ਪਹਾਰੇ ਉਗ੍ਗਿਰੇ ਚੇਵ, ਤੇਪਞ੍ਞਾਸਾ ਚ ਸੇਖਿਯਾ.
ਅਧਕ੍ਖਗਾਮਾਵਸ੍ਸੁਤਾ, ਤਲਮਟ੍ਠਞ੍ਚ ਸੁਦ੍ਧਿਕਾ;
ਵਸ੍ਸਂਵੁਟ੍ਠਾ ਚ ਓਵਾਦਂ, ਨਾਨੁਬਨ੍ਧੇ ਪਵਤ੍ਤਿਨਿਂ.
ਛਸਤ੍ਤਤਿ ਇਮੇ ਸਿਕ੍ਖਾ, ਕਾਯਮਾਨਸਿਕਾ ਕਤਾ;
ਸਬ੍ਬੇ ਏਕਸਮੁਟ੍ਠਾਨਾ, ਪਠਮਂ ਪਾਰਾਜਿਕਂ ਯਥਾ.
ਪਠਮਪਾਰਾਜਿਕਸਮੁਟ੍ਠਾਨਂ ਨਿਟ੍ਠਿਤਂ.
੨. ਦੁਤਿਯਪਾਰਾਜਿਕਸਮੁਟ੍ਠਾਨਂ
੨੫੯. ਅਦਿਨ੍ਨਂ ਵਿਗ੍ਗਹੁਤ੍ਤਰਿ, ਦੁਟ੍ਠੁਲ੍ਲਾ ਅਤ੍ਤਕਾਮਿਨਂ;
ਅਮੂਲਾ ਅਞ੍ਞਭਾਗਿਯਾ, ਅਨਿਯਤਾ ਦੁਤਿਯਿਕਾ.
ਅਚ੍ਛਿਨ੍ਦੇ ਪਰਿਣਾਮਨੇ, ਮੁਸਾ ਓਮਸਪੇਸੁਣਾ;
ਦੁਟ੍ਠੁਲ੍ਲਾ ਪਥਵੀਖਣੇ, ਭੂਤਂ ਅਞ੍ਞਾਯ ਉਜ੍ਝਾਪੇ.
ਨਿਕ੍ਕਡ੍ਢਨਂ ਸਿਞ੍ਚਨਞ੍ਚ, ਆਮਿਸਹੇਤੁ ਭੁਤ੍ਤਾਵੀ;
ਏਹਿ ਅਨਾਦਰਿ ਭਿਂਸਾ, ਅਪਨਿਧੇ ਚ ਜੀਵਿਤਂ.
ਜਾਨਂ ਸਪ੍ਪਾਣਕਂ ਕਮ੍ਮਂ, ਊਨਸਂਵਾਸਨਾਸਨਾ;
ਸਹਧਮ੍ਮਿਕਵਿਲੇਖਾ, ਮੋਹੋ ਅਮੂਲਕੇਨ ਚ.
ਕੁਕ੍ਕੁਚ੍ਚਂ ਧਮ੍ਮਿਕਂ ਚੀਵਰਂ, ਦਤ੍ਵਾ [ਕੁਕ੍ਕੁਚ੍ਚਂ ਧਮ੍ਮਿਕਂ ਚੀਵਰਂ (ਸੀ.), ਕੁਕ੍ਕੁਚ੍ਚਂ ਧਮ੍ਮਿਕਂ ਦਤ੍ਵਾ (ਸ੍ਯਾ.)] ਪਰਿਣਾਮੇਯ੍ਯ ਪੁਗ੍ਗਲੇ;
ਕਿਂ ਤੇ ਅਕਾਲਂ ਅਚ੍ਛਿਨ੍ਦੇ, ਦੁਗ੍ਗਹੀ ਨਿਰਯੇਨ ਚ.
ਗਣਂ ਵਿਭਙ੍ਗਂ ਦੁਬ੍ਬਲਂ, ਕਥਿਨਾਫਾਸੁਪਸ੍ਸਯਂ;
ਅਕ੍ਕੋਸਚਣ੍ਡੀ ਮਚ੍ਛਰੀ, ਗਬ੍ਭਿਨੀ ਚ ਪਾਯਨ੍ਤਿਯਾ.
ਦ੍ਵੇਵਸ੍ਸਂ ਸਿਕ੍ਖਾ ਸਙ੍ਘੇਨ, ਤਯੋ ਚੇਵ ਗਿਹੀਗਤਾ;
ਕੁਮਾਰਿਭੂਤਾ ਤਿਸ੍ਸੋ ਚ, ਊਨਦ੍ਵਾਦਸਸਮ੍ਮਤਾ.
ਅਲਂ ਤਾਵ ਸੋਕਾਵਾਸਂ, ਛਨ੍ਦਾ ਅਨੁਵਸ੍ਸਾ ਚ ਦ੍ਵੇ;
ਸਿਕ੍ਖਾਪਦਾ ਸਤ੍ਤਤਿਮੇ, ਸਮੁਟ੍ਠਾਨਾ ਤਿਕਾ ਕਤਾ.
ਕਾਯਚਿਤ੍ਤੇਨ ਨ ਵਾਚਾ, ਵਾਚਾਚਿਤ੍ਤਂ ਨ ਕਾਯਿਕਂ;
ਤੀਹਿ ਦ੍ਵਾਰੇਹਿ ਜਾਯਨ੍ਤਿ, ਪਾਰਾਜਿਕਂ ਦੁਤਿਯਂ ਯਥਾ.
ਦੁਤਿਯਪਾਰਾਜਿਕਸਮੁਟ੍ਠਾਨਂ ਨਿਟ੍ਠਿਤਂ.
੩. ਸਞ੍ਚਰਿਤ੍ਤਸਮੁਟ੍ਠਾਨਂ
੨੬੦. ਸਞ੍ਚਰੀ ਕੁਟਿ ਵਿਹਾਰੋ, ਧੋਵਨਞ੍ਚ ਪਟਿਗ੍ਗਹੋ;
ਵਿਞ੍ਞਤ੍ਤੁਤ੍ਤਰਿ ਅਭਿਹਟ੍ਠੁਂ, ਉਭਿਨ੍ਨਂ ਦੂਤਕੇਨ ਚ.
ਕੋਸਿਯਾ ਸੁਦ੍ਧਦ੍ਵੇਭਾਗਾ, ਛਬ੍ਬਸ੍ਸਾਨਿ ਨਿਸੀਦਨਂ;
ਰਿਞ੍ਚਨ੍ਤਿ ਰੂਪਿਕਾ ਚੇਵ, ਉਭੋ ਨਾਨਪ੍ਪਕਾਰਕਾ.
ਊਨਬਨ੍ਧਨਵਸ੍ਸਿਕਾ, ਸੁਤ੍ਤਂ ਵਿਕਪ੍ਪਨੇਨ ਚ;
ਦ੍ਵਾਰਦਾਨਸਿਬ੍ਬਾਨਿ [ਦ੍ਵਾਰਦਾਨਸਿਬ੍ਬਿਨੀ (ਸੀ. ਸ੍ਯਾ.)] ਚ, ਪੂਵਪਚ੍ਚਯਜੋਤਿ ਚ.
ਰਤਨਂ ਸੂਚਿ ਮਞ੍ਚੋ ਚ, ਤੂਲਂ ਨਿਸੀਦਨਕਣ੍ਡੁ ਚ;
ਵਸ੍ਸਿਕਾ ਚ ਸੁਗਤੇਨ, ਵਿਞ੍ਞਤ੍ਤਿ ਅਞ੍ਞਂ ਚੇਤਾਪਨਾ.
ਦ੍ਵੇ ਸਙ੍ਘਿਕਾ ਮਹਾਜਨਿਕਾ, ਦ੍ਵੇ ਪੁਗ੍ਗਲਲਹੁਕਾ ਗਰੁ;
ਦ੍ਵੇ ਵਿਘਾਸਾ ਸਾਟਿਕਾ ਚ, ਸਮਣਚੀਵਰੇਨ ਚ.
ਸਮਪਞ੍ਞਾਸਿਮੇ ਧਮ੍ਮਾ, ਛਹਿ ਠਾਨੇਹਿ ਜਾਯਰੇ;
ਕਾਯਤੋ ਨ ਵਾਚਾਚਿਤ੍ਤਾ, ਵਾਚਤੋ ਨ ਕਾਯਮਨਾ.
ਕਾਯਵਾਚਾ ਨ ਚ ਚਿਤ੍ਤਾ [ਨ ਚਿਤ੍ਤਤੋ (ਸੀ. ਸ੍ਯਾ.)], ਕਾਯਚਿਤ੍ਤਾ ਨ ਵਾਚਿਕਾ [ਨ ਵਾਚਤੋ (ਸੀ. ਸ੍ਯਾ.)];
ਵਾਚਾਚਿਤ੍ਤਾ ਨ ਕਾਯੇਨ, ਤੀਹਿ ਦ੍ਵਾਰੇਹਿ [ਤੀਹਿ ਠਾਨੇਹਿ (ਸ੍ਯਾ.)] ਜਾਯਰੇ.
ਛਸਮੁਟ੍ਠਾਨਿਕਾ ਏਤੇ, ਸਞ੍ਚਰਿਤ੍ਤੇਨ ਸਾਦਿਸਾ.
ਸਞ੍ਚਰਿਤ੍ਤਸਮੁਟ੍ਠਾਨਂ ਨਿਟ੍ਠਿਤਂ.
੪. ਸਮਨੁਭਾਸਨਾਸਮੁਟ੍ਠਾਨਂ
੨੬੧. ਭੇਦਾਨੁਵਤ੍ਤਦੁਬ੍ਬਚ, ਦੂਸਦੁਟ੍ਠੁਲ੍ਲਦਿਟ੍ਠਿ ਚ;
ਛਨ੍ਦਂ ਉਜ੍ਜਗ੍ਘਿਕਾ ਦ੍ਵੇ ਚ, ਦ੍ਵੇ ਚ ਸਦ੍ਦਾ ਨ ਬ੍ਯਾਹਰੇ.
ਛਮਾ ਨੀਚਾਸਨੇ ਠਾਨਂ, ਪਚ੍ਛਤੋ ਉਪ੍ਪਥੇਨ ਚ;
ਵਜ੍ਜਾਨੁਵਤ੍ਤਿਗਹਣਾ, ਓਸਾਰੇ ਪਚ੍ਚਾਚਿਕ੍ਖਨਾ.
ਕਿਸ੍ਮਿਂ ਸਂਸਟ੍ਠਾ ਦ੍ਵੇ ਵਧਿ, ਵਿਸਿਬ੍ਬੇ ਦੁਕ੍ਖਿਤਾਯ ਚ;
ਪੁਨ ਸਂਸਟ੍ਠਾ ਨ ਵੂਪਸਮੇ, ਆਰਾਮਞ੍ਚ ਪਵਾਰਣਾ.
ਅਨ੍ਵਦ੍ਧਂ [ਅਨ੍ਵਦ੍ਧਮਾਸਂ (ਸੀ. ਸ੍ਯਾ.)] ਸਹ ਜੀਵਿਨਿਂ, ਦ੍ਵੇ ਚੀਵਰਂ ਅਨੁਬਨ੍ਧਨਾ;
ਸਤ੍ਤਤਿਂਸ ਇਮੇ ਧਮ੍ਮਾ, ਕਾਯਵਾਚਾਯ ਚਿਤ੍ਤਤੋ.
ਸਬ੍ਬੇ ਏਕਸਮੁਟ੍ਠਾਨਾ, ਸਮਨੁਭਾਸਨਾ ਯਥਾ.
ਸਮਨੁਭਾਸਨਾਸਮੁਟ੍ਠਾਨਂ ਨਿਟ੍ਠਿਤਂ.
੫. ਕਥਿਨਸਮੁਟ੍ਠਾਨਂ
੨੬੨. ਉਬ੍ਭਤਂ ਕਥਿਨਂ ਤੀਣਿ, ਪਠਮਂ ਪਤ੍ਤਭੇਸਜ੍ਜਂ;
ਅਚ੍ਚੇਕਂ ਚਾਪਿ ਸਾਸਙ੍ਕਂ, ਪਕ੍ਕਮਨ੍ਤੇਨ ਵਾ ਦੁਵੇ.
ਉਪਸ੍ਸਯਂ ਪਰਮ੍ਪਰਾ, ਅਨਤਿਰਿਤ੍ਤਂ ਨਿਮਨ੍ਤਨਾ;
ਵਿਕਪ੍ਪਂ ਰਞ੍ਞੋ ਵਿਕਾਲੇ, ਵੋਸਾਸਾਰਞ੍ਞਕੇਨ ਚ.
ਉਸ੍ਸਯਾਸਨ੍ਨਿਚਯਞ੍ਚ, ਪੁਰੇ ਪਚ੍ਛਾ ਵਿਕਾਲੇ ਚ;
ਪਞ੍ਚਾਹਿਕਾ ਸਙ੍ਕਮਨੀ, ਦ੍ਵੇਪਿ ਆਵਸਥੇਨ ਚ.
ਪਸਾਖੇ ਆਸਨੇ ਚੇਵ, ਤਿਂਸ ਏਕੂਨਕਾ ਇਮੇ;
ਕਾਯਵਾਚਾ ਨ ਚ ਚਿਤ੍ਤਾ [ਨ ਚਿਤ੍ਤਤੋ (ਸ੍ਯਾ.)], ਤੀਹਿ ਦ੍ਵਾਰੇਹਿ ਜਾਯਰੇ.
ਦ੍ਵਿਸਮੁਟ੍ਠਾਨਿਕਾ ਸਬ੍ਬੇ, ਕਥਿਨੇਨ ਸਹਾਸਮਾ.
ਕਥਿਨਸਮੁਟ੍ਠਾਨਂ ਨਿਟ੍ਠਿਤਂ.
੬. ਏਲ਼ਕਲੋਮਸਮੁਟ੍ਠਾਨਂ
੨੬੩. ਏਲ਼ਕਲੋਮਾ ਦ੍ਵੇ ਸੇਯ੍ਯਾ, ਆਹਚ੍ਚ ਪਿਣ੍ਡਭੋਜਨਂ;
ਗਣਵਿਕਾਲਸਨ੍ਨਿਧਿ, ਦਨ੍ਤਪੋਨੇਨ ਚੇਲਕਾ.
ਉਯ੍ਯੁਤ੍ਤਂ ਸੇਨਂ [ਉਯ੍ਯੁਤ੍ਤਂ ਵਸੇ (ਸ੍ਯਾ.)] ਉਯ੍ਯੋਧਿ, ਸੁਰਾ ਓਰੇਨ ਨ੍ਹਾਯਨਾ;
ਦੁਬ੍ਬਣ੍ਣੇ ਦ੍ਵੇ ਦੇਸਨਿਕਾ, ਲਸੁਣੁਪਤਿਟ੍ਠੇ ਨਚ੍ਚਨਾ.
ਨ੍ਹਾਨਮਤ੍ਥਰਣਂ ਸੇਯ੍ਯਾ, ਅਨ੍ਤੋਰਟ੍ਠੇ ਤਥਾ ਬਹਿ;
ਅਨ੍ਤੋਵਸ੍ਸਂ ਚਿਤ੍ਤਾਗਾਰਂ, ਆਸਨ੍ਦਿ ਸੁਤ੍ਤਕਨ੍ਤਨਾ.
ਵੇਯ੍ਯਾਵਚ੍ਚਂ ਸਹਤ੍ਥਾ ਚ, ਅਭਿਕ੍ਖੁਕਾਵਾਸੇਨ ਚ;
ਛਤ੍ਤਂ ਯਾਨਞ੍ਚ ਸਙ੍ਘਾਣਿਂ, ਅਲਙ੍ਕਾਰਂ ਗਨ੍ਧਵਾਸਿਤਂ.
ਭਿਕ੍ਖੁਨੀ ਸਿਕ੍ਖਮਾਨਾ ਚ, ਸਾਮਣੇਰੀ ਗਿਹਿਨਿਯਾ;
ਅਸਂਕਚ੍ਚਿਕਾ ਆਪਤ੍ਤਿ, ਚਤ੍ਤਾਰੀਸਾ ਚਤੁਤ੍ਤਰਿ.
ਕਾਯੇਨ ਨ ਵਾਚਾਚਿਤ੍ਤੇਨ, ਕਾਯਚਿਤ੍ਤੇਨ ਨ ਵਾਚਤੋ;
ਦ੍ਵਿਸਮੁਟ੍ਠਾਨਿਕਾ ਸਬ੍ਬੇ, ਸਮਾ ਏਲ਼ਕਲੋਮਿਕਾਤਿ.
ਏਲ਼ਕਲੋਮਸਮੁਟ੍ਠਾਨਂ ਨਿਟ੍ਠਿਤਂ.
੭. ਪਦਸੋਧਮ੍ਮਸਮੁਟ੍ਠਾਨਂ
੨੬੪. ਪਦਞ੍ਞਤ੍ਰ ਅਸਮ੍ਮਤਾ, ਤਥਾ ਅਤ੍ਥਙ੍ਗਤੇਨ ਚ;
ਤਿਰਚ੍ਛਾਨਵਿਜ੍ਜਾ ਦ੍ਵੇ ਵੁਤ੍ਤਾ, ਅਨੋਕਾਸੋ [ਅਨੋਕਾਸੇ (ਸੀ. ਸ੍ਯਾ.)] ਚ ਪੁਚ੍ਛਨਾ.
ਸਤ੍ਤ ਸਿਕ੍ਖਾਪਦਾ ਏਤੇ, ਵਾਚਾ ਨ ਕਾਯਚਿਤ੍ਤਤੋ [ਕਾਯਚਿਤ੍ਤਕਾ (ਕ.)];
ਵਾਚਾਚਿਤ੍ਤੇਨ ਜਾਯਨ੍ਤਿ, ਨ ਤੁ ਕਾਯੇਨ ਜਾਯਰੇ.
ਦ੍ਵਿਸਮੁਟ੍ਠਾਨਿਕਾ ਸਬ੍ਬੇ, ਪਦਸੋਧਮ੍ਮਸਦਿਸਾ.
ਪਦਸੋਧਮ੍ਮਸਮੁਟ੍ਠਾਨਂ ਨਿਟ੍ਠਿਤਂ.
੮. ਅਦ੍ਧਾਨਸਮੁਟ੍ਠਾਨਂ
੨੬੫. ਅਦ੍ਧਾਨਨਾਵਂ ਪਣੀਤਂ, ਮਾਤੁਗਾਮੇਨ ਸਂਹਰੇ;
ਧਞ੍ਞਂ ਨਿਮਨ੍ਤਿਤਾ ਚੇਵ, ਅਟ੍ਠ ਚ ਪਾਟਿਦੇਸਨੀ.
ਸਿਕ੍ਖਾ ਪਨ੍ਨਰਸ ਏਤੇ, ਕਾਯਾ ਨ ਵਾਚਾ ਨ ਮਨਾ;
ਕਾਯਵਾਚਾਹਿ ਜਾਯਨ੍ਤਿ, ਨ ਤੇ ਚਿਤ੍ਤੇਨ ਜਾਯਰੇ.
ਕਾਯਚਿਤ੍ਤੇਨ ਜਾਯਨ੍ਤਿ, ਨ ਤੇ ਜਾਯਨ੍ਤਿ ਵਾਚਤੋ;
ਕਾਯਵਾਚਾਹਿ ਚਿਤ੍ਤੇਨ, ਸਮੁਟ੍ਠਾਨਾ ਚਤੁਬ੍ਬਿਧਾ.
ਪਞ੍ਞਤ੍ਤਾ ਬੁਦ੍ਧਞਾਣੇਨ, ਅਦ੍ਧਾਨੇਨ ਸਹਾ ਸਮਾ [ਸਮਾਨਯਾ (ਸ੍ਯਾ.)].
ਅਦ੍ਧਾਨਸਮੁਟ੍ਠਾਨਂ ਨਿਟ੍ਠਿਤਂ.
੯. ਥੇਯ੍ਯਸਤ੍ਥਸਮੁਟ੍ਠਾਨਂ
੨੬੬. ਥੇਯ੍ਯਸਤ੍ਥਂ ਉਪਸ੍ਸੁਤਿ, ਸੂਪਵਿਞ੍ਞਾਪਨੇਨ ਚ;
ਰਤ੍ਤਿਛਨ੍ਨਞ੍ਚ ਓਕਾਸਂ, ਏਤੇ ਬ੍ਯੂਹੇਨ ਸਤ੍ਤਮਾ.
ਕਾਯਚਿਤ੍ਤੇਨ ਜਾਯਨ੍ਤਿ, ਨ ਤੇ ਜਾਯਨ੍ਤਿ ਵਾਚਤੋ;
ਤੀਹਿ ਦ੍ਵਾਰੇਹਿ ਜਾਯਨ੍ਤਿ, ਦ੍ਵਿਸਮੁਟ੍ਠਾਨਿਕਾ ਇਮੇ.
ਥੇਯ੍ਯਸਤ੍ਥਸਮੁਟ੍ਠਾਨਾ, ਦੇਸਿਤਾਦਿਚ੍ਚਬਨ੍ਧੁਨਾ.
ਥੇਯ੍ਯਸਤ੍ਥਸਮੁਟ੍ਠਾਨਂ ਨਿਟ੍ਠਿਤਂ.
੧੦. ਧਮ੍ਮਦੇਸਨਾਸਮੁਟ੍ਠਾਨਂ
੨੬੭. ਛਤ੍ਤਪਾਣਿਸ੍ਸ ਸਦ੍ਧਮ੍ਮਂ, ਨ ਦੇਸੇਨ੍ਤਿ ਤਥਾਗਤਾ;
ਏਵਮੇਵ [ਤਥੇਵ (ਸੀ. ਸ੍ਯਾ.)] ਦਣ੍ਡਪਾਣਿਸ੍ਸ, ਸਤ੍ਥਆਵੁਧਪਾਣਿਨਂ.
ਪਾਦੁਕੁਪਾਹਨਾ ਯਾਨਂ, ਸੇਯ੍ਯਪਲ੍ਲਤ੍ਥਿਕਾਯ ਚ;
ਵੇਠਿਤੋਗੁਣ੍ਠਿਤੋ ਚੇਵ, ਏਕਾਦਸਮਨੂਨਕਾ.
ਵਾਚਾਚਿਤ੍ਤੇਨ ਜਾਯਨ੍ਤਿ, ਨ ਤੇ ਜਾਯਨ੍ਤਿ ਕਾਯਤੋ;
ਸਬ੍ਬੇ ਏਕਸਮੁਟ੍ਠਾਨਾ, ਸਮਕਾ ਧਮ੍ਮਦੇਸਨੇ.
ਧਮ੍ਮਦੇਸਨਾਸਮੁਟ੍ਠਾਨਂ ਨਿਟ੍ਠਿਤਂ.
੧੧. ਭੂਤਾਰੋਚਨਸਮੁਟ੍ਠਾਨਂ
੨੬੮. ਭੂਤਂ ਕਾਯੇਨ ਜਾਯਤਿ, ਨ ਵਾਚਾ ਨ ਚ ਚਿਤ੍ਤਤੋ;
ਵਾਚਤੋ ਚ ਸਮੁਟ੍ਠਾਤਿ, ਨ ਕਾਯਾ ਨ ਚ ਚਿਤ੍ਤਤੋ.
ਕਾਯਵਾਚਾਯ ਜਾਯਤਿ, ਨ ਤੁ ਜਾਯਤਿ ਚਿਤ੍ਤਤੋ;
ਭੂਤਾਰੋਚਨਕਾ ਨਾਮ, ਤੀਹਿ ਠਾਨੇਹਿ ਜਾਯਤਿ.
ਭੂਤਾਰੋਚਨਸਮੁਟ੍ਠਾਨਂ ਨਿਟ੍ਠਿਤਂ.
੧੨. ਚੋਰਿਵੁਟ੍ਠਾਪਨਸਮੁਟ੍ਠਾਨਂ
੨੬੯. ਚੋਰੀ ਵਾਚਾਯ ਚਿਤ੍ਤੇਨ, ਨ ਤਂ ਜਾਯਤਿ ਕਾਯਤੋ;
ਜਾਯਤਿ ਤੀਹਿ ਦ੍ਵਾਰੇਹਿ, ਚੋਰਿਵੁਟ੍ਠਾਪਨਂ ਇਦਂ;