੩. ਪਾਚਿਤ੍ਤਿਯਾਦਿਪਞ੍ਹਾ

੪੮੧. ਅਧਿਟ੍ਠਿਤਂ ਰਜਨਾਯ ਰਤ੍ਤਂ;

ਕਪ੍ਪਕਤਮ੍ਪਿ ਸਨ੍ਤਂ;

ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਅਤ੍ਥਙ੍ਗਤੇ ਸੂਰਿਯੇ ਭਿਕ੍ਖੁ ਮਂਸਾਨਿ ਖਾਦਤਿ;

ਨ ਉਮ੍ਮਤ੍ਤਕੋ ਨ ਚ ਪਨ ਖਿਤ੍ਤਚਿਤ੍ਤੋ;

ਨ ਚਾਪਿ ਸੋ ਵੇਦਨਾਟ੍ਟੋ ਭਵੇਯ੍ਯ;

ਨ ਚਸ੍ਸ ਹੋਤਿ ਆਪਤ੍ਤਿ;

ਸੋ ਚ ਧਮ੍ਮੋ ਸੁਗਤੇਨ ਦੇਸਿਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਰਤ੍ਤਚਿਤ੍ਤੋ ਨ ਚ ਪਨ ਥੇਯ੍ਯਚਿਤ੍ਤੋ;

ਨ ਚਾਪਿ ਸੋ ਪਰਂ ਮਰਣਾਯ ਚੇਤਯਿ;

ਸਲਾਕਂ ਦੇਨ੍ਤਸ੍ਸ ਹੋਤਿ ਛੇਜ੍ਜਂ;

ਪਟਿਗ੍ਗਣ੍ਹਨ੍ਤਸ੍ਸ ਥੁਲ੍ਲਚ੍ਚਯਂ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਚਾਪਿ ਆਰਞ੍ਞਕਂ ਸਾਸਙ੍ਕਸਮ੍ਮਤਂ;

ਨ ਚਾਪਿ ਸਙ੍ਘੇਨ ਸਮ੍ਮੁਤਿ ਦਿਨ੍ਨਾ;

ਨ ਚਸ੍ਸ ਕਥਿਨਂ ਅਤ੍ਥਤਂ ਤਤ੍ਥੇਵ;

ਚੀਵਰਂ ਨਿਕ੍ਖਿਪਿਤ੍ਵਾ ਗਚ੍ਛੇਯ੍ਯ ਅਡ੍ਢਯੋਜਨਂ;

ਤਤ੍ਥੇਵ ਅਰੁਣਂ ਉਗ੍ਗਚ੍ਛਨ੍ਤਸ੍ਸ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਕਾਯਿਕਾਨਿ ਨ ਵਾਚਸਿਕਾਨਿ;

ਸਬ੍ਬਾਨਿ ਨਾਨਾਵਤ੍ਥੁਕਾਨਿ;

ਅਪੁਬ੍ਬਂ ਅਚਰਿਮਂ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਵਾਚਸਿਕਾਨਿ ਨ ਕਾਯਿਕਾਨਿ;

ਸਬ੍ਬਾਨਿ ਨਾਨਾਵਤ੍ਥੁਕਾਨਿ;

ਅਪੁਬ੍ਬਂ ਅਚਰਿਮਂ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਤਿਸ੍ਸਿਤ੍ਥਿਯੋ ਮੇਥੁਨਂ ਤਂ ਨ ਸੇਵੇ;

ਤਯੋ ਪੁਰਿਸੇ ਤਯੋ ਅਨਰਿਯਪਣ੍ਡਕੇ;

ਨ ਚਾਚਰੇ ਮੇਥੁਨਂ ਬ੍ਯਞ੍ਜਨਸ੍ਮਿਂ;

ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਮਾਤਰਂ ਚੀਵਰਂ ਯਾਚੇ, ਨੋ ਚ ਸਙ੍ਘੇ [ਨੋ ਸਂਘਸ੍ਸ (ਕ.), ਨੋ ਚ ਸਂਘਸ੍ਸ (ਸ੍ਯਾ.), ਨੋ ਚੇ ਸਂਘਸ੍ਸ (ਸੀ.)] ਪਰਿਣਤਂ;

ਕੇਨਸ੍ਸ ਹੋਤਿ ਆਪਤ੍ਤਿ, ਅਨਾਪਤ੍ਤਿ ਚ ਞਾਤਕੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਕੁਦ੍ਧੋ ਆਰਾਧਕੋ ਹੋਤਿ, ਕੁਦ੍ਧੋ ਹੋਤਿ ਗਰਹਿਯੋ;

ਅਥ ਕੋ ਨਾਮ ਸੋ ਧਮ੍ਮੋ, ਯੇਨ ਕੁਦ੍ਧੋ ਪਸਂਸਿਯੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਤੁਟ੍ਠੋ ਆਰਾਧਕੋ ਹੋਤਿ, ਤੁਟ੍ਠੋ ਹੋਤਿ ਗਰਹਿਯੋ;

ਅਥ ਕੋ ਨਾਮ ਸੋ ਧਮ੍ਮੋ, ਯੇਨ ਤੁਟ੍ਠੋ ਗਰਹਿਯੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਸਙ੍ਘਾਦਿਸੇਸਂ ਥੁਲ੍ਲਚ੍ਚਯਂ;

ਪਾਚਿਤ੍ਤਿਯਂ ਪਾਟਿਦੇਸਨੀਯਂ;

ਦੁਕ੍ਕਟਂ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਉਭੋ ਪਰਿਪੁਣ੍ਣਵੀਸਤਿਵਸ੍ਸਾ;

ਉਭਿਨ੍ਨਂ ਏਕੁਪਜ੍ਝਾਯੋ;

ਏਕਾਚਰਿਯੋ ਏਕਾ ਕਮ੍ਮਵਾਚਾ;

ਏਕੋ ਉਪਸਮ੍ਪਨ੍ਨੋ ਏਕੋ ਅਨੁਪਸਮ੍ਪਨ੍ਨੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਅਕਪ੍ਪਕਤਂ ਨਾਪਿ ਰਜਨਾਯ ਰਤ੍ਤਂ;

ਤੇਨ ਨਿਵਤ੍ਥੋ ਯੇਨ ਕਾਮਂ ਵਜੇਯ੍ਯ;

ਨ ਚਸ੍ਸ ਹੋਤਿ ਆਪਤ੍ਤਿ;

ਸੋ ਚ ਧਮ੍ਮੋ ਸੁਗਤੇਨ ਦੇਸਿਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਦੇਤਿ ਨ ਪਟਿਗ੍ਗਣ੍ਹਾਤਿ, ਪਟਿਗ੍ਗਹੋ ਤੇਨ ਨ ਵਿਜ੍ਜਤਿ;

ਆਪਜ੍ਜਤਿ ਗਰੁਕਂ ਨ ਲਹੁਕਂ, ਤਞ੍ਚ ਪਰਿਭੋਗਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਦੇਤਿ ਨ ਪਟਿਗ੍ਗਣ੍ਹਾਤਿ, ਪਟਿਗ੍ਗਹੋ ਤੇਨ ਨ ਵਿਜ੍ਜਤਿ;

ਆਪਜ੍ਜਤਿ ਲਹੁਕਂ ਨ ਗਰੁਕਂ, ਤਞ੍ਚ ਪਰਿਭੋਗਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਆਪਜ੍ਜਤਿ ਗਰੁਕਂ ਸਾਵਸੇਸਂ;

ਛਾਦੇਤਿ ਅਨਾਦਰਿਯਂ ਪਟਿਚ੍ਚ;

ਨ ਭਿਕ੍ਖੁਨੀ ਨੋ ਚ ਫੁਸੇਯ੍ਯ ਵਜ੍ਜਂ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਸੇਦਮੋਚਨਗਾਥਾ ਨਿਟ੍ਠਿਤਾ.