ਸੇਦਮੋਚਨਗਾਥਾ

੧. ਅਵਿਪ੍ਪਵਾਸਪਞ੍ਹਾ

੪੭੯. ਅਸਂਵਾਸੋ ਭਿਕ੍ਖੂਹਿ ਚ ਭਿਕ੍ਖੁਨੀਹਿ ਚ;

ਸਮ੍ਭੋਗੋ ਏਕਚ੍ਚੋ ਤਹਿਂ ਨ ਲਬ੍ਭਤਿ;

ਅਵਿਪ੍ਪਵਾਸੇਨ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਅਵਿਸ੍ਸਜ੍ਜਿਯਂ ਅਵੇਭਙ੍ਗਿਯਂ;

ਪਞ੍ਚ ਵੁਤ੍ਤਾ ਮਹੇਸਿਨਾ;

ਵਿਸ੍ਸਜ੍ਜਨ੍ਤਸ੍ਸ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਦਸ ਪੁਗ੍ਗਲੇ ਨ ਵਦਾਮਿ, ਏਕਾਦਸ ਵਿਵਜ੍ਜਿਯ;

ਵੁਡ੍ਢਂ ਵਨ੍ਦਨ੍ਤਸ੍ਸ ਆਪਤ੍ਤਿ, ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਉਕ੍ਖਿਤ੍ਤਕੋ ਨ ਚ ਪਨ ਪਾਰਿਵਾਸਿਕੋ;

ਨ ਸਙ੍ਘਭਿਨ੍ਨੋ ਨ ਚ ਪਨ ਪਕ੍ਖਸਙ੍ਕਨ੍ਤੋ;

ਸਮਾਨਸਂਵਾਸਕਭੂਮਿਯਾ ਠਿਤੋ;

ਕਥਂ ਨੁ ਸਿਕ੍ਖਾਯ ਅਸਾਧਾਰਣੋ ਸਿਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਉਪੇਤਿ ਧਮ੍ਮਂ ਪਰਿਪੁਚ੍ਛਮਾਨੋ, ਕੁਸਲਂ ਅਤ੍ਥੂਪਸਞ੍ਹਿਤਂ;

ਨ ਜੀਵਤਿ ਨ ਮਤੋ ਨ ਨਿਬ੍ਬੁਤੋ, ਤਂ ਪੁਗ੍ਗਲਂ ਕਤਮਂ ਵਦਨ੍ਤਿ ਬੁਦ੍ਧਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਉਬ੍ਭਕ੍ਖਕੇ ਨ ਵਦਾਮਿ, ਅਧੋ ਨਾਭਿਂ ਵਿਵਜ੍ਜਿਯ;

ਮੇਥੁਨਧਮ੍ਮਪਚ੍ਚਯਾ, ਕਥਂ ਪਾਰਾਜਿਕੋ ਸਿਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਰੋਤਿ;

ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ;

ਸਾਰਮ੍ਭਂ ਅਪਰਿਕ੍ਕਮਨਂ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਰੋਤਿ;

ਦੇਸਿਤਵਤ੍ਥੁਕਂ ਪਮਾਣਿਕਂ;

ਅਨਾਰਮ੍ਭਂ ਸਪਰਿਕ੍ਕਮਨਂ ਆਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਕਾਯਿਕਂ ਕਿਞ੍ਚਿ ਪਯੋਗਮਾਚਰੇ;

ਨ ਚਾਪਿ ਵਾਚਾਯ ਪਰੇ ਭਣੇਯ੍ਯ;

ਆਪਜ੍ਜੇਯ੍ਯ ਗਰੁਕਂ ਛੇਜ੍ਜਵਤ੍ਥੁਂ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਕਾਯਿਕਂ ਵਾਚਸਿਕਞ੍ਚ ਕਿਞ੍ਚਿ;

ਮਨਸਾਪਿ ਸਨ੍ਤੋ ਨ ਕਰੇਯ੍ਯ ਪਾਪਂ;

ਸੋ ਨਾਸਿਤੋ ਕਿਨ੍ਤਿ ਸੁਨਾਸਿਤੋ ਭਵੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਅਨਾਲਪਨ੍ਤੋ ਮਨੁਜੇਨ ਕੇਨਚਿ;

ਵਾਚਾਗਿਰਂ ਨੋ ਚ ਪਰੇ ਭਣੇਯ੍ਯ;

ਆਪਜ੍ਜੇਯ੍ਯ ਵਾਚਸਿਕਂ ਨ ਕਾਯਿਕਂ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਸਿਕ੍ਖਾਪਦਾ ਬੁਦ੍ਧਵਰੇਨ ਵਣ੍ਣਿਤਾ;

ਸਙ੍ਘਾਦਿਸੇਸਾ ਚਤੁਰੋ ਭਵੇਯ੍ਯੁਂ;

ਆਪਜ੍ਜੇਯ੍ਯ ਏਕਪਯੋਗੇਨ ਸਬ੍ਬੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਉਭੋ ਏਕਤੋ ਉਪਸਮ੍ਪਨ੍ਨਾ;

ਉਭਿਨ੍ਨਂ ਹਤ੍ਥਤੋ ਚੀਵਰਂ ਪਟਿਗ੍ਗਣ੍ਹੇਯ੍ਯ;

ਸਿਯਾ ਆਪਤ੍ਤਿਯੋ ਨਾਨਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਚਤੁਰੋ ਜਨਾ ਸਂਵਿਧਾਯ;

ਗਰੁਭਣ੍ਡਂ ਅਵਾਹਰੁਂ;

ਤਯੋ ਪਾਰਾਜਿਕਾ ਏਕੋ ਨ ਪਾਰਾਜਿਕੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

੨. ਪਾਰਾਜਿਕਾਦਿਪਞ੍ਹਾ

੪੮੦. ਇਤ੍ਥੀ ਚ ਅਬ੍ਭਨ੍ਤਰੇ ਸਿਯਾ,

ਭਿਕ੍ਖੁ ਚ ਬਹਿਦ੍ਧਾ ਸਿਯਾ;

ਛਿਦ੍ਦਂ ਤਸ੍ਮਿਂ ਘਰੇ ਨਤ੍ਥਿ;

ਮੇਥੁਨਧਮ੍ਮਪਚ੍ਚਯਾ;

ਕਥਂ ਪਾਰਾਜਿਕੋ ਸਿਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਤੇਲਂ ਮਧੁਂ ਫਾਣਿਤਞ੍ਚਾਪਿ ਸਪ੍ਪਿਂ;

ਸਾਮਂ ਗਹੇਤ੍ਵਾਨ ਨਿਕ੍ਖਿਪੇਯ੍ਯ;

ਅਵੀਤਿਵਤ੍ਤੇ ਸਤ੍ਤਾਹੇ;

ਸਤਿ ਪਚ੍ਚਯੇ ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨਿਸ੍ਸਗ੍ਗਿਯੇਨ ਆਪਤ੍ਤਿ;

ਸੁਦ੍ਧਕੇਨ ਪਾਚਿਤ੍ਤਿਯਂ;

ਆਪਜ੍ਜਨ੍ਤਸ੍ਸ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਭਿਕ੍ਖੂ ਸਿਯਾ ਵੀਸਤਿਯਾ ਸਮਾਗਤਾ;

ਕਮ੍ਮਂ ਕਰੇਯ੍ਯੁਂ ਸਮਗ੍ਗਸਞ੍ਞਿਨੋ;

ਭਿਕ੍ਖੁ ਸਿਯਾ ਦ੍ਵਾਦਸਯੋਜਨੇ ਠਿਤੋ;

ਕਮ੍ਮਞ੍ਚ ਤਂ ਕੁਪ੍ਪੇਯ੍ਯ ਵਗ੍ਗਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਪਦਵੀਤਿਹਾਰਮਤ੍ਤੇਨ ਵਾਚਾਯ ਭਣਿਤੇਨ ਚ;

ਸਬ੍ਬਾਨਿ ਗਰੁਕਾਨਿ ਸਪ੍ਪਟਿਕਮ੍ਮਾਨਿ;

ਚਤੁਸਟ੍ਠਿ ਆਪਤ੍ਤਿਯੋ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨਿਵਤ੍ਥੋ ਅਨ੍ਤਰਵਾਸਕੇਨ;

ਦਿਗੁਣਂ ਸਙ੍ਘਾਟਿਂ ਪਾਰੁਤੋ;

ਸਬ੍ਬਾਨਿ ਤਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਚਾਪਿ ਞਤ੍ਤਿ ਨ ਚ ਪਨ ਕਮ੍ਮਵਾਚਾ;

ਨ ਚੇਹਿ ਭਿਕ੍ਖੂਤਿ ਜਿਨੋ ਅਵੋਚ;

ਸਰਣਗਮਨਮ੍ਪਿ ਨ ਤਸ੍ਸ ਅਤ੍ਥਿ;

ਉਪਸਮ੍ਪਦਾ ਚਸ੍ਸ ਅਕੁਪ੍ਪਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਇਤ੍ਥਿਂ ਹਨੇ ਨ ਮਾਤਰਂ, ਪੁਰਿਸਞ੍ਚ ਨ ਪਿਤਰਂ ਹਨੇ;

ਹਨੇਯ੍ਯ ਅਨਰਿਯਂ ਮਨ੍ਦੋ, ਤੇਨ ਚਾਨਨ੍ਤਰਂ ਫੁਸੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਇਤ੍ਥਿਂ ਹਨੇ ਚ ਮਾਤਰਂ, ਪੁਰਿਸਞ੍ਚ ਪਿਤਰਂ ਹਨੇ;

ਮਾਤਰਂ ਪਿਤਰਂ ਹਨ੍ਤ੍ਵਾ, ਨ ਤੇਨਾਨਨ੍ਤਰਂ ਫੁਸੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਅਚੋਦਯਿਤ੍ਵਾ ਅਸ੍ਸਾਰਯਿਤ੍ਵਾ;

ਅਸਮ੍ਮੁਖੀਭੂਤਸ੍ਸ ਕਰੇਯ੍ਯ ਕਮ੍ਮਂ;

ਕਤਞ੍ਚ ਕਮ੍ਮਂ ਸੁਕਤਂ ਭਵੇਯ੍ਯ;

ਕਾਰਕੋ ਚ ਸਙ੍ਘੋ ਅਨਾਪਤ੍ਤਿਕੋ ਸਿਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਚੋਦਯਿਤ੍ਵਾ ਸਾਰਯਿਤ੍ਵਾ;

ਸਮ੍ਮੁਖੀਭੂਤਸ੍ਸ ਕਰੇਯ੍ਯ ਕਮ੍ਮਂ;

ਕਤਞ੍ਚ ਕਮ੍ਮਂ ਅਕਤਂ ਭਵੇਯ੍ਯ;

ਕਾਰਕੋ ਚ ਸਙ੍ਘੋ ਸਾਪਤ੍ਤਿਕੋ ਸਿਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਛਿਨ੍ਦਨ੍ਤਸ੍ਸ ਆਪਤ੍ਤਿ, ਛਿਨ੍ਦਨ੍ਤਸ੍ਸ ਅਨਾਪਤ੍ਤਿ;

ਛਾਦੇਨ੍ਤਸ੍ਸ ਆਪਤ੍ਤਿ, ਛਾਦੇਨ੍ਤਸ੍ਸ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਸਚ੍ਚਂ ਭਣਨ੍ਤੋ ਗਰੁਕਂ, ਮੁਸਾ ਚ ਲਹੁ ਭਾਸਤੋ;

ਮੁਸਾ ਭਣਨ੍ਤੋ ਗਰੁਕਂ, ਸਚ੍ਚਞ੍ਚ ਲਹੁ ਭਾਸਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

੩. ਪਾਚਿਤ੍ਤਿਯਾਦਿਪਞ੍ਹਾ

੪੮੧. ਅਧਿਟ੍ਠਿਤਂ ਰਜਨਾਯ ਰਤ੍ਤਂ;

ਕਪ੍ਪਕਤਮ੍ਪਿ ਸਨ੍ਤਂ;

ਪਰਿਭੁਞ੍ਜਨ੍ਤਸ੍ਸ ਆਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਅਤ੍ਥਙ੍ਗਤੇ ਸੂਰਿਯੇ ਭਿਕ੍ਖੁ ਮਂਸਾਨਿ ਖਾਦਤਿ;

ਨ ਉਮ੍ਮਤ੍ਤਕੋ ਨ ਚ ਪਨ ਖਿਤ੍ਤਚਿਤ੍ਤੋ;

ਨ ਚਾਪਿ ਸੋ ਵੇਦਨਾਟ੍ਟੋ ਭਵੇਯ੍ਯ;

ਨ ਚਸ੍ਸ ਹੋਤਿ ਆਪਤ੍ਤਿ;

ਸੋ ਚ ਧਮ੍ਮੋ ਸੁਗਤੇਨ ਦੇਸਿਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਰਤ੍ਤਚਿਤ੍ਤੋ ਨ ਚ ਪਨ ਥੇਯ੍ਯਚਿਤ੍ਤੋ;

ਨ ਚਾਪਿ ਸੋ ਪਰਂ ਮਰਣਾਯ ਚੇਤਯਿ;

ਸਲਾਕਂ ਦੇਨ੍ਤਸ੍ਸ ਹੋਤਿ ਛੇਜ੍ਜਂ;

ਪਟਿਗ੍ਗਣ੍ਹਨ੍ਤਸ੍ਸ ਥੁਲ੍ਲਚ੍ਚਯਂ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਨ ਚਾਪਿ ਆਰਞ੍ਞਕਂ ਸਾਸਙ੍ਕਸਮ੍ਮਤਂ;

ਨ ਚਾਪਿ ਸਙ੍ਘੇਨ ਸਮ੍ਮੁਤਿ ਦਿਨ੍ਨਾ;

ਨ ਚਸ੍ਸ ਕਥਿਨਂ ਅਤ੍ਥਤਂ ਤਤ੍ਥੇਵ;

ਚੀਵਰਂ ਨਿਕ੍ਖਿਪਿਤ੍ਵਾ ਗਚ੍ਛੇਯ੍ਯ ਅਡ੍ਢਯੋਜਨਂ;

ਤਤ੍ਥੇਵ ਅਰੁਣਂ ਉਗ੍ਗਚ੍ਛਨ੍ਤਸ੍ਸ ਅਨਾਪਤ੍ਤਿ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਕਾਯਿਕਾਨਿ ਨ ਵਾਚਸਿਕਾਨਿ;

ਸਬ੍ਬਾਨਿ ਨਾਨਾਵਤ੍ਥੁਕਾਨਿ;

ਅਪੁਬ੍ਬਂ ਅਚਰਿਮਂ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਵਾਚਸਿਕਾਨਿ ਨ ਕਾਯਿਕਾਨਿ;

ਸਬ੍ਬਾਨਿ ਨਾਨਾਵਤ੍ਥੁਕਾਨਿ;

ਅਪੁਬ੍ਬਂ ਅਚਰਿਮਂ ਆਪਜ੍ਜੇਯ੍ਯ ਏਕਤੋ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਤਿਸ੍ਸਿਤ੍ਥਿਯੋ ਮੇਥੁਨਂ ਤਂ ਨ ਸੇਵੇ;

ਤਯੋ ਪੁਰਿਸੇ ਤਯੋ ਅਨਰਿਯਪਣ੍ਡਕੇ;

ਨ ਚਾਚਰੇ ਮੇਥੁਨਂ ਬ੍ਯਞ੍ਜਨਸ੍ਮਿਂ;

ਛੇਜ੍ਜਂ ਸਿਯਾ ਮੇਥੁਨਧਮ੍ਮਪਚ੍ਚਯਾ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਮਾਤਰਂ ਚੀਵਰਂ ਯਾਚੇ, ਨੋ ਚ ਸਙ੍ਘੇ [ਨੋ ਸਂਘਸ੍ਸ (ਕ.), ਨੋ ਚ ਸਂਘਸ੍ਸ (ਸ੍ਯਾ.), ਨੋ ਚੇ ਸਂਘਸ੍ਸ (ਸੀ.)] ਪਰਿਣਤਂ;

ਕੇਨਸ੍ਸ ਹੋਤਿ ਆਪਤ੍ਤਿ, ਅਨਾਪਤ੍ਤਿ ਚ ਞਾਤਕੇ;

ਪਞ੍ਹਾ ਮੇਸਾ ਕੁਸਲੇਹਿ ਚਿਨ੍ਤਿਤਾ.

ਕੁਦ੍ਧੋ ਆਰਾਧਕੋ ਹੋਤਿ, ਕੁਦ੍ਧੋ ਹੋਤਿ ਗਰਹਿਯੋ;