੧. ਕਾਯਿਕਾਦਿਆਪਤ੍ਤਿ

੪੭੪. ਕਤਿ ਆਪਤ੍ਤਿਯੋ ਕਾਯਿਕਾ, ਕਤਿ ਵਾਚਸਿਕਾ ਕਤਾ.

ਛਾਦੇਨ੍ਤਸ੍ਸ ਕਤਿ ਆਪਤ੍ਤਿਯੋ, ਕਤਿ ਸਂਸਗ੍ਗਪਚ੍ਚਯਾ.

ਛਾਪਤ੍ਤਿਯੋ ਕਾਯਿਕਾ, ਛ ਵਾਚਸਿਕਾ ਕਤਾ;

ਛਾਦੇਨ੍ਤਸ੍ਸ ਤਿਸ੍ਸੋ ਆਪਤ੍ਤਿਯੋ, ਪਞ੍ਚ ਸਂਸਗ੍ਗਪਚ੍ਚਯਾ.

ਅਰੁਣੁਗ੍ਗੇ ਕਤਿ ਆਪਤ੍ਤਿਯੋ, ਕਤਿ ਯਾਵਤਤਿਯਕਾ;

ਕਤੇਤ੍ਥ ਅਟ੍ਠ ਵਤ੍ਥੁਕਾ, ਕਤਿਹਿ ਸਬ੍ਬਸਙ੍ਗਹੋ.

ਅਰੁਣੁਗ੍ਗੇ ਤਿਸ੍ਸੋ ਆਪਤ੍ਤਿਯੋ, ਦ੍ਵੇ ਯਾਵਤਤਿਯਕਾ;

ਏਕੇਤ੍ਥ ਅਟ੍ਠ ਵਤ੍ਥੁਕਾ, ਏਕੇਨ ਸਬ੍ਬਸਙ੍ਗਹੋ.

ਵਿਨਯਸ੍ਸ ਕਤਿ ਮੂਲਾਨਿ, ਯਾਨਿ ਬੁਦ੍ਧੇਨ ਪਞ੍ਞਤ੍ਤਾ;

ਵਿਨਯਗਰੁਕਾ ਕਤਿ ਵੁਤ੍ਤਾ, ਦੁਟ੍ਠੁਲ੍ਲਚ੍ਛਾਦਨਾ ਕਤਿ.

ਵਿਨਯਸ੍ਸ ਦ੍ਵੇ ਮੂਲਾਨਿ, ਯਾਨਿ ਬੁਦ੍ਧੇਨ ਪਞ੍ਞਤ੍ਤਾ;

ਵਿਨਯਗਰੁਕਾ ਦ੍ਵੇ ਵੁਤ੍ਤਾ, ਦ੍ਵੇ ਦੁਟ੍ਠੁਲ੍ਲਚ੍ਛਾਦਨਾ.

ਗਾਮਨ੍ਤਰੇ ਕਤਿ ਆਪਤ੍ਤਿਯੋ, ਕਤਿ ਨਦਿਪਾਰਪਚ੍ਚਯਾ;

ਕਤਿਮਂਸੇਸੁ ਥੁਲ੍ਲਚ੍ਚਯਂ, ਕਤਿਮਂਸੇਸੁ ਦੁਕ੍ਕਟਂ.

ਗਾਮਨ੍ਤਰੇ ਚਤਸ੍ਸੋ ਆਪਤ੍ਤਿਯੋ, ਚਤਸ੍ਸੋ ਨਦਿਪਾਰਪਚ੍ਚਯਾ;

ਏਕਮਂਸੇ ਥੁਲ੍ਲਚ੍ਚਯਂ, ਨਵਮਂਸੇਸੁ ਦੁਕ੍ਕਟਂ.

ਕਤਿ ਵਾਚਸਿਕਾ ਰਤ੍ਤਿਂ, ਕਤਿ ਵਾਚਸਿਕਾ ਦਿਵਾ;

ਦਦਮਾਨਸ੍ਸ ਕਤਿ ਆਪਤ੍ਤਿਯੋ, ਪਟਿਗ੍ਗਣ੍ਹਨ੍ਤਸ੍ਸ ਕਿਤ੍ਤਕਾ.

ਦ੍ਵੇ ਵਾਚਸਿਕਾ ਰਤ੍ਤਿਂ, ਦ੍ਵੇ ਵਾਚਸਿਕਾ ਦਿਵਾ;

ਦਦਮਾਨਸ੍ਸ ਤਿਸ੍ਸੋ ਆਪਤ੍ਤਿਯੋ, ਚਤ੍ਤਾਰੋ ਚ ਪਟਿਗ੍ਗਹੇ.