੨. ਦੇਸਨਾਗਾਮਿਨਿਯਾਦਿਆਪਤ੍ਤਿ

੪੭੫. ਕਤਿ ਦੇਸਨਾਗਾਮਿਨਿਯੋ, ਕਤਿ ਸਪ੍ਪਟਿਕਮ੍ਮਾ ਕਤਾ;

ਕਤੇਤ੍ਥ ਅਪ੍ਪਟਿਕਮ੍ਮਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ.

ਪਞ੍ਚ ਦੇਸਨਾਗਾਮਿਨਿਯੋ, ਛ ਸਪ੍ਪਟਿਕਮ੍ਮਾ ਕਤਾ;

ਏਕੇਤ੍ਥ ਅਪ੍ਪਟਿਕਮ੍ਮਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ.

ਵਿਨਯਗਰੁਕਾ ਕਤਿ ਵੁਤ੍ਤਾ, ਕਾਯਵਾਚਸਿਕਾਨਿ ਚ;

ਕਤਿ ਵਿਕਾਲੇ ਧਞ੍ਞਰਸੋ, ਕਤਿ ਞਤ੍ਤਿਚਤੁਤ੍ਥੇਨ ਸਮ੍ਮੁਤਿ.

ਵਿਨਯਗਰੁਕਾ ਦ੍ਵੇ ਵੁਤ੍ਤਾ, ਕਾਯਵਾਚਸਿਕਾਨਿ ਚ;

ਏਕੋ ਵਿਕਾਲੇ ਧਞ੍ਞਰਸੋ, ਏਕਾ ਞਤ੍ਤਿਚਤੁਤ੍ਥੇਨ ਸਮ੍ਮੁਤਿ.

ਪਾਰਾਜਿਕਾ ਕਾਯਿਕਾ ਕਤਿ, ਕਤਿ ਸਂਵਾਸਕਭੂਮਿਯੋ;

ਕਤਿਨਂ ਰਤ੍ਤਿਚ੍ਛੇਦੋ, ਪਞ੍ਞਤ੍ਤਾ ਦ੍ਵਙ੍ਗੁਲਾ ਕਤਿ.

ਪਾਰਾਜਿਕਾ ਕਾਯਿਕਾ ਦ੍ਵੇ, ਦ੍ਵੇ ਸਂਵਾਸਕਭੂਮਿਯੋ;

ਦ੍ਵਿਨ੍ਨਂ ਰਤ੍ਤਿਚ੍ਛੇਦੋ, ਪਞ੍ਞਤ੍ਤਾ ਦ੍ਵਙ੍ਗੁਲਾ ਦੁਵੇ.

ਕਤਤ੍ਤਾਨਂ ਵਧਿਤ੍ਵਾਨ, ਕਤਿਹਿ ਸਙ੍ਘੋ ਭਿਜ੍ਜਤਿ;

ਕਤੇਤ੍ਥ ਪਠਮਾਪਤ੍ਤਿਕਾ, ਞਤ੍ਤਿਯਾ ਕਰਣਾ ਕਤਿ.

ਦ੍ਵੇ ਅਤ੍ਤਾਨਂ ਵਧਿਤ੍ਵਾਨ, ਦ੍ਵੀਹਿ ਸਙ੍ਘੋ ਭਿਜ੍ਜਤਿ;

ਦ੍ਵੇਤ੍ਥ ਪਠਮਾਪਤ੍ਤਿਕਾ, ਞਤ੍ਤਿਯਾ ਕਰਣਾ ਦੁਵੇ.

ਪਾਣਾਤਿਪਾਤੇ ਕਤਿ ਆਪਤ੍ਤਿਯੋ, ਵਾਚਾ ਪਾਰਾਜਿਕਾ ਕਤਿ;

ਓਭਾਸਨਾ ਕਤਿ ਵੁਤ੍ਤਾ, ਸਞ੍ਚਰਿਤ੍ਤੇਨ ਵਾ ਕਤਿ.

ਪਾਣਾਤਿਪਾਤੇ ਤਿਸ੍ਸੋ ਆਪਤ੍ਤਿਯੋ;

ਵਾਚਾ ਪਾਰਾਜਿਕਾ ਤਯੋ;

ਓਭਾਸਨਾ ਤਯੋ ਵੁਤ੍ਤਾ;

ਸਞ੍ਚਰਿਤ੍ਤੇਨ ਵਾ ਤਯੋ.

ਕਤਿ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ, ਕਤਿ ਕਮ੍ਮਾਨਂ ਸਙ੍ਗਹਾ;

ਨਾਸਿਤਕਾ ਕਤਿ ਵੁਤ੍ਤਾ, ਕਤਿਨਂ ਏਕਵਾਚਿਕਾ.

ਤਯੋ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ, ਤਯੋ ਕਮ੍ਮਾਨਂ ਸਙ੍ਗਹਾ;

ਨਾਸਿਤਕਾ ਤਯੋ ਵੁਤ੍ਤਾ, ਤਿਣ੍ਣਨ੍ਨਂ ਏਕਵਾਚਿਕਾ.

ਅਦਿਨ੍ਨਾਦਾਨੇ ਕਤਿ ਆਪਤ੍ਤਿਯੋ, ਕਤਿ ਮੇਥੁਨਪਚ੍ਚਯਾ;

ਛਿਨ੍ਦਨ੍ਤਸ੍ਸ ਕਤਿ ਆਪਤ੍ਤਿਯੋ, ਕਤਿ ਛਡ੍ਡਿਤਪਚ੍ਚਯਾ.

ਅਦਿਨ੍ਨਾਦਾਨੇ ਤਿਸ੍ਸੋ ਆਪਤ੍ਤਿਯੋ, ਚਤਸ੍ਸੋ ਮੇਥੁਨਪਚ੍ਚਯਾ;

ਛਿਨ੍ਦਨ੍ਤਸ੍ਸ ਤਿਸ੍ਸੋ ਆਪਤ੍ਤਿਯੋ, ਪਞ੍ਚ ਛਡ੍ਡਿਤਪਚ੍ਚਯਾ.

ਭਿਕ੍ਖੁਨੋਵਾਦਕਵਗ੍ਗਸ੍ਮਿਂ, ਪਾਚਿਤ੍ਤਿਯੇਨ ਦੁਕ੍ਕਟਾ;

ਕਤੇਤ੍ਥ ਨਵਕਾ ਵੁਤ੍ਤਾ, ਕਤਿਨਂ ਚੀਵਰੇਨ ਚ.

ਭਿਕ੍ਖੁਨੋਵਾਦਕਵਗ੍ਗਸ੍ਮਿਂ, ਪਾਚਿਤ੍ਤਿਯੇਨ ਦੁਕ੍ਕਟਾ ਕਤਾ;

ਚਤੁਰੇਤ੍ਥ ਨਵਕਾ ਵੁਤ੍ਤਾ, ਦ੍ਵਿਨ੍ਨਂ ਚੀਵਰੇਨ ਚ.

ਭਿਕ੍ਖੁਨੀਨਞ੍ਚ ਅਕ੍ਖਾਤਾ, ਪਾਟਿਦੇਸਨਿਯਾ ਕਤਿ;

ਭੁਞ੍ਜਨ੍ਤਾਮਕਧਞ੍ਞੇਨ, ਪਾਚਿਤ੍ਤਿਯੇਨ ਦੁਕ੍ਕਟਾ ਕਤਿ.

ਭਿਕ੍ਖੁਨੀਨਞ੍ਚ ਅਕ੍ਖਾਤਾ, ਅਟ੍ਠ ਪਾਟਿਦੇਸਨੀਯਾ ਕਤਾ;

ਭੁਞ੍ਜਨ੍ਤਾਮਕਧਞ੍ਞੇਨ, ਪਾਚਿਤ੍ਤਿਯੇਨ ਦੁਕ੍ਕਟਾ ਕਤਾ.

ਗਚ੍ਛਨ੍ਤਸ੍ਸ ਕਤਿ ਆਪਤ੍ਤਿਯੋ, ਠਿਤਸ੍ਸ ਚਾਪਿ ਕਿਤ੍ਤਕਾ;

ਨਿਸਿਨ੍ਨਸ੍ਸ ਕਤਿ ਆਪਤ੍ਤਿਯੋ, ਨਿਪਨ੍ਨਸ੍ਸਾਪਿ ਕਿਤ੍ਤਕਾ.

ਗਚ੍ਛਨ੍ਤਸ੍ਸ ਚਤਸ੍ਸੋ ਆਪਤ੍ਤਿਯੋ, ਠਿਤਸ੍ਸ ਚਾਪਿ ਤਤ੍ਤਕਾ;

ਨਿਸਿਨ੍ਨਸ੍ਸ ਚਤਸ੍ਸੋ ਆਪਤ੍ਤਿਯੋ, ਨਿਪਨ੍ਨਸ੍ਸਾਪਿ ਤਤ੍ਤਕਾ.