੧੪. ਕਥਿਨਤ੍ਥਾਰਵਗ੍ਗੋ

੪੬੫. ‘‘ਕਤਿ ਨੁ ਖੋ, ਭਨ੍ਤੇ, ਆਨਿਸਂਸਾ ਕਥਿਨਤ੍ਥਾਰੇ’’ਤਿ? ‘‘ਪਞ੍ਚਿਮੇ, ਉਪਾਲਿ, ਆਨਿਸਂਸਾ ਕਥਿਨਤ੍ਥਾਰੇ. ਕਤਮੇ ਪਞ੍ਚ? ਅਨਾਮਨ੍ਤਚਾਰੋ, ਅਸਮਾਦਾਨਚਾਰੋ, ਗਣਭੋਜਨਂ, ਯਾਵਦਤ੍ਥਚੀਵਰਂ, ਯੋ ਚ ਤਤ੍ਥ ਚੀਵਰੁਪ੍ਪਾਦੋ ਸੋ ਨੇਸਂ ਭਵਿਸ੍ਸਤਿ – ਇਮੇ ਖੋ, ਉਪਾਲਿ, ਪਞ੍ਚ ਆਨਿਸਂਸਾ ਕਥਿਨਤ੍ਥਾਰੇ’’ਤਿ.

੪੬੬. ‘‘ਕਤਿ ਨੁ ਖੋ, ਭਨ੍ਤੇ, ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ’’ਤਿ? ‘‘ਪਞ੍ਚਿਮੇ, ਉਪਾਲਿ, ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ. ਕਤਮੇ ਪਞ੍ਚ? ਦੁਕ੍ਖਂ ਸੁਪਤਿ, ਦੁਕ੍ਖਂ ਪਟਿਬੁਜ੍ਝਤਿ, ਪਾਪਕਂ ਸੁਪਿਨਂ ਪਸ੍ਸਤਿ, ਦੇਵਤਾ ਨ ਰਕ੍ਖਨ੍ਤਿ, ਅਸੁਚਿ ਮੁਚ੍ਚਤਿ – ਇਮੇ ਖੋ, ਉਪਾਲਿ, ਪਞ੍ਚ ਆਦੀਨਵਾ ਮੁਟ੍ਠਸ੍ਸਤਿਸ੍ਸ ਅਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ. ਪਞ੍ਚਿਮੇ, ਉਪਾਲਿ, ਆਨਿਸਂਸਾ ਉਪਟ੍ਠਿਤਸ੍ਸਤਿਸ੍ਸ ਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ. ਕਤਮੇ ਪਞ੍ਚ? ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਦੇਵਤਾ ਰਕ੍ਖਨ੍ਤਿ, ਅਸੁਚਿ ਨ ਮੁਚ੍ਚਤਿ – ਇਮੇ ਖੋ, ਉਪਾਲਿ, ਪਞ੍ਚ ਆਨਿਸਂਸਾ ਉਪਟ੍ਠਿਤਸ੍ਸਤਿਸ੍ਸ ਸਮ੍ਪਜਾਨਸ੍ਸ ਨਿਦ੍ਦਂ ਓਕ੍ਕਮਤੋ’’ਤਿ.

੪੬੭. ‘‘ਕਤਿ ਨੁ ਖੋ, ਭਨ੍ਤੇ, ਅਵਨ੍ਦਿਯਾ’’ਤਿ? ‘‘ਪਞ੍ਚਿਮੇ, ਉਪਾਲਿ, ਅਵਨ੍ਦਿਯਾ. ਕਤਮੇ ਪਞ੍ਚ? ਅਨ੍ਤਰਘਰਂ ਪਵਿਟ੍ਠੋ ਅਵਨ੍ਦਿਯੋ, ਰਚ੍ਛਗਤੋ ਅਵਨ੍ਦਿਯੋ, ਓਤਮਸਿਕੋ ਅਵਨ੍ਦਿਯੋ, ਅਸਮਨ੍ਨਾਹਰਨ੍ਤੋ ਅਵਨ੍ਦਿਯੋ, ਸੁਤ੍ਤੋ ਅਵਨ੍ਦਿਯੋ – ਇਮੇ ਖੋ, ਉਪਾਲਿ, ਪਞ੍ਚ ਅਵਨ੍ਦਿਯਾ.

‘‘ਅਪਰੇਪਿ, ਉਪਾਲਿ, ਪਞ੍ਚ ਅਵਨ੍ਦਿਯਾ. ਕਤਮੇ ਪਞ੍ਚ? ਯਾਗੁਪਾਨੇ ਅਵਨ੍ਦਿਯੋ, ਭਤ੍ਤਗ੍ਗੇ ਅਵਨ੍ਦਿਯੋ, ਏਕਾਵਤ੍ਤੋ ਅਵਨ੍ਦਿਯੋ, ਅਞ੍ਞਵਿਹਿਤੋ ਅਵਨ੍ਦਿਯੋ, ਨਗ੍ਗੋ ਅਵਨ੍ਦਿਯੋ – ਇਮੇ ਖੋ, ਉਪਾਲਿ, ਪਞ੍ਚ ਅਵਨ੍ਦਿਯਾ.

‘‘ਅਪਰੇਪਿ, ਉਪਾਲਿ, ਪਞ੍ਚ ਅਵਨ੍ਦਿਯਾ. ਕਤਮੇ ਪਞ੍ਚ? ਖਾਦਨ੍ਤੋ ਅਵਨ੍ਦਿਯੋ, ਭੁਞ੍ਜਨ੍ਤੋ ਅਵਨ੍ਦਿਯੋ, ਉਚ੍ਚਾਰਂ ਕਰੋਨ੍ਤੋ ਅਵਨ੍ਦਿਯੋ, ਪਸ੍ਸਾਵਂ ਕਰੋਨ੍ਤੋ ਅਵਨ੍ਦਿਯੋ, ਉਕ੍ਖਿਤ੍ਤਕੋ ਅਵਨ੍ਦਿਯੋ – ਇਮੇ ਖੋ, ਉਪਾਲਿ, ਪਞ੍ਚ ਅਵਨ੍ਦਿਯਾ.

‘‘ਅਪਰੇਪਿ, ਉਪਾਲਿ, ਪਞ੍ਚ ਅਵਨ੍ਦਿਯਾ. ਕਤਮੇ ਪਞ੍ਚ? ਪੁਰੇ ਉਪਸਮ੍ਪਨ੍ਨੇਨ ਪਚ੍ਛਾ ਉਪਸਮ੍ਪਨ੍ਨੋ ਅਵਨ੍ਦਿਯੋ, ਅਨੁਪਸਮ੍ਪਨ੍ਨੋ ਅਵਨ੍ਦਿਯੋ, ਨਾਨਾਸਂਵਾਸਕੋ ਵੁਡ੍ਢਤਰੋ ਅਧਮ੍ਮਵਾਦੀ ਅਵਨ੍ਦਿਯੋ, ਮਾਤੁਗਾਮੋ ਅਵਨ੍ਦਿਯੋ, ਪਣ੍ਡਕੋ ਅਵਨ੍ਦਿਯੋ – ਇਮੇ ਖੋ, ਉਪਾਲਿ, ਪਞ੍ਚ ਅਵਨ੍ਦਿਯਾ.

‘‘ਅਪਰੇਪਿ, ਉਪਾਲਿ, ਪਞ੍ਚ ਅਵਨ੍ਦਿਯਾ. ਕਤਮੇ ਪਞ੍ਚ? ਪਾਰਿਵਾਸਿਕੋ ਅਵਨ੍ਦਿਯੋ, ਮੂਲਾਯਪਟਿਕਸ੍ਸਨਾਰਹੋ ਅਵਨ੍ਦਿਯੋ, ਮਾਨਤ੍ਤਾਰਹੋ ਅਵਨ੍ਦਿਯੋ, ਮਾਨਤ੍ਤਚਾਰਿਕੋ ਅਵਨ੍ਦਿਯੋ, ਅਬ੍ਭਾਨਾਰਹੋ ਅਵਨ੍ਦਿਯੋ – ਇਮੇ ਖੋ, ਉਪਾਲਿ, ਪਞ੍ਚ ਅਵਨ੍ਦਿਯਾ’’ਤਿ.

੪੬੮. ‘‘ਕਤਿ ਨੁ ਖੋ, ਭਨ੍ਤੇ, ਵਨ੍ਦਿਯਾ’’ਤਿ? ‘‘ਪਞ੍ਚਿਮੇ, ਉਪਾਲਿ, ਵਨ੍ਦਿਯਾ. ਕਤਮੇ ਪਞ੍ਚ? ਪਚ੍ਛਾ ਉਪਸਮ੍ਪਨ੍ਨੇਨ ਪੁਰੇ ਉਪਸਮ੍ਪਨ੍ਨੋ ਵਨ੍ਦਿਯੋ, ਨਾਨਾਸਂਵਾਸਕੋ ਵੁਡ੍ਢਤਰੋ ਧਮ੍ਮਵਾਦੀ ਵਨ੍ਦਿਯੋ, ਆਚਰਿਯੋ ਵਨ੍ਦਿਯੋ, ਉਪਜ੍ਝਾਯੋ ਵਨ੍ਦਿਯੋ, ਸਦੇਵਕੇ ਲੋਕੇ ਸਮਾਰਕੇ ਸਬ੍ਰਹ੍ਮਕੇ ਸਸ੍ਸਮਣਬ੍ਰਾਹ੍ਮਣਿਯਾ ਪਜਾਯ ਸਦੇਵਮਨੁਸ੍ਸਾਯ ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਨ੍ਦਿਯੋ – ਇਮੇ ਖੋ, ਉਪਾਲਿ, ਪਞ੍ਚ ਵਨ੍ਦਿਯਾ’’ਤਿ.

੪੬੯. ‘‘ਨਵਕਤਰੇਨ, ਭਨ੍ਤੇ, ਭਿਕ੍ਖੁਨਾ ਵੁਡ੍ਢਤਰਸ੍ਸ ਭਿਕ੍ਖੁਨੋ ਪਾਦੇ ਵਨ੍ਦਨ੍ਤੇਨ ਕਤਿ ਧਮ੍ਮੇ ਅਜ੍ਝਤ੍ਤਂ ਉਪਟ੍ਠਾਪੇਤ੍ਵਾ ਪਾਦਾ ਵਨ੍ਦਿਤਬ੍ਬਾ’’ਤਿ? ‘‘ਨਵਕਤਰੇਨੁਪਾਲਿ, ਭਿਕ੍ਖੁਨਾ ਵੁਡ੍ਢਤਰਸ੍ਸ ਭਿਕ੍ਖੁਨੋ ਪਾਦੇ ਵਨ੍ਦਨ੍ਤੇਨ ਪਞ੍ਚ ਧਮ੍ਮੇ ਅਜ੍ਝਤ੍ਤਂ ਉਪਟ੍ਠਾਪੇਤ੍ਵਾ ਪਾਦਾ ਵਨ੍ਦਿਤਬ੍ਬਾ. ਕਤਮੇ ਪਞ੍ਚ? ਨਵਕਤਰੇਨੁਪਾਲਿ, ਭਿਕ੍ਖੁਨਾ ਵੁਡ੍ਢਤਰਸ੍ਸ ਭਿਕ੍ਖੁਨੋ ਪਾਦੇ ਵਨ੍ਦਨ੍ਤੇਨ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ, ਅਞ੍ਜਲਿਂ ਪਗ੍ਗਹੇਤ੍ਵਾ, ਉਭੋਹਿ ਪਾਣਿਤਲੇਹਿ ਪਾਦਾਨਿ ਪਰਿਸਮ੍ਬਾਹਨ੍ਤੇਨ, ਪੇਮਞ੍ਚ ਗਾਰਵਞ੍ਚ ਉਪਟ੍ਠਾਪੇਤ੍ਵਾ ਪਾਦਾ ਵਨ੍ਦਿਤਬ੍ਬਾ – ਨਵਕਤਰੇਨੁਪਾਲਿ ਭਿਕ੍ਖੁਨਾ ਵੁਡ੍ਢਤਰਸ੍ਸ ਭਿਕ੍ਖੁਨੋ ਪਾਦੇ ਵਨ੍ਦਨ੍ਤੇਨ ਇਮੇ ਪਞ੍ਚ ਧਮ੍ਮੇ ਅਜ੍ਝਤ੍ਤਂ ਉਪਟ੍ਠਾਪੇਤ੍ਵਾ ਪਾਦਾ ਵਨ੍ਦਿਤਬ੍ਬਾ’’ਤਿ.

ਕਥਿਨਤ੍ਥਾਰਵਗ੍ਗੋ ਨਿਟ੍ਠਿਤੋ ਚੁਦ੍ਦਸਮੋ.

ਤਸ੍ਸੁਦ੍ਦਾਨਂ –

ਕਥਿਨਤ੍ਥਾਰਨਿਦ੍ਦਾ ਚ, ਅਨ੍ਤਰਾ ਯਾਗੁਖਾਦਨੇ;

ਪੁਰੇ ਚ ਪਾਰਿਵਾਸਿ ਚ, ਵਨ੍ਦਿਯੋ ਵਨ੍ਦਿਤਬ੍ਬਕਨ੍ਤਿ.

ਉਪਾਲਿਪਞ੍ਚਕਂ ਨਿਟ੍ਠਿਤਂ.