੪. ਕਥਿਨਾਦਿਜਾਨਿਤਬ੍ਬਵਿਭਾਗੋ

੪੧੨. ਕਥਿਨਂ ਜਾਨਿਤਬ੍ਬਂ, ਕਥਿਨਤ੍ਥਾਰੋ ਜਾਨਿਤਬ੍ਬੋ, ਕਥਿਨਸ੍ਸ ਅਤ੍ਥਾਰਮਾਸੋ ਜਾਨਿਤਬ੍ਬੋ, ਕਥਿਨਸ੍ਸ ਅਤ੍ਥਾਰਵਿਪਤ੍ਤਿ ਜਾਨਿਤਬ੍ਬਾ, ਕਥਿਨਸ੍ਸ ਅਤ੍ਥਾਰਸਮ੍ਪਤ੍ਤਿ ਜਾਨਿਤਬ੍ਬਾ, ਨਿਮਿਤ੍ਤਕਮ੍ਮਂ ਜਾਨਿਤਬ੍ਬਂ, ਪਰਿਕਥਾ ਜਾਨਿਤਬ੍ਬਾ, ਕੁਕ੍ਕੁਕਤਂ ਜਾਨਿਤਬ੍ਬਂ, ਸਨ੍ਨਿਧਿ ਜਾਨਿਤਬ੍ਬਾ, ਨਿਸ੍ਸਗ੍ਗਿਯਂ ਜਾਨਿਤਬ੍ਬਂ.

ਕਥਿਨਂ ਜਾਨਿਤਬ੍ਬਨ੍ਤਿ ਤੇਸਞ੍ਞੇਵ ਧਮ੍ਮਾਨਂ ਸਙ੍ਗਹੋ ਸਮਵਾਯੋ ਨਾਮਂ ਨਾਮਕਮ੍ਮਂ ਨਾਮਧੇਯ੍ਯਂ ਨਿਰੁਤ੍ਤਿ ਬ੍ਯਞ੍ਜਨਂ ਅਭਿਲਾਪੋ ਯਦਿਦਂ ਕਥਿਨਨ੍ਤਿ.

ਕਥਿਨਸ੍ਸ ਅਤ੍ਥਾਰਮਾਸੋ ਜਾਨਿਤਬ੍ਬੋਤਿ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ ਜਾਨਿਤਬ੍ਬੋ.

ਕਥਿਨਸ੍ਸ ਅਤ੍ਥਾਰਵਿਪਤ੍ਤਿ ਜਾਨਿਤਬ੍ਬਾਤਿ ਚਤੁਵੀਸਤਿਯਾ ਆਕਾਰੇਹਿ ਕਥਿਨਸ੍ਸ ਅਤ੍ਥਾਰਵਿਪਤ੍ਤਿ ਜਾਨਿਤਬ੍ਬਾ.

ਕਥਿਨਸ੍ਸ ਅਤ੍ਥਾਰਸਮ੍ਪਤ੍ਤਿ ਜਾਨਿਤਬ੍ਬਾਤਿ ਸਤ੍ਤਰਸਹਿ ਆਕਾਰੇਹਿ ਕਥਿਨਸ੍ਸ ਅਤ੍ਥਾਰਸਮ੍ਪਤ੍ਤਿ ਜਾਨਿਤਬ੍ਬਾ.

ਨਿਮਿਤ੍ਤਕਮ੍ਮਂ ਜਾਨਿਤਬ੍ਬਨ੍ਤਿ ਨਿਮਿਤ੍ਤਂ ਕਰੋਤਿ ਇਮਿਨਾ ਦੁਸ੍ਸੇਨ ਕਥਿਨਂ ਅਤ੍ਥਰਿਸ੍ਸਾਮੀਤਿ.

ਪਰਿਕਥਾ ਜਾਨਿਤਬ੍ਬਾਤਿ ਪਰਿਕਥਂ ਕਰੋਤਿ ਇਮਾਯ ਪਰਿਕਥਾਯ ਕਥਿਨਦੁਸ੍ਸਂ ਨਿਬ੍ਬਤ੍ਤੇਸ੍ਸਾਮੀਤਿ.

ਕੁਕ੍ਕੁਕਤਂ ਜਾਨਿਤਬ੍ਬਨ੍ਤਿ ਅਨਾਦਿਯਦਾਨਂ ਜਾਨਿਤਬ੍ਬਂ.

ਸਨ੍ਨਿਧਿ ਜਾਨਿਤਬ੍ਬਾਤਿ ਦ੍ਵੇ ਸਨ੍ਨਿਧਿਯੋ ਜਾਨਿਤਬ੍ਬਾ – ਕਰਣਸਨ੍ਨਿਧਿ ਵਾ ਨਿਚਯਸਨ੍ਨਿਧਿ ਵਾ.

ਨਿਸ੍ਸਗ੍ਗਿਯਂ ਜਾਨਿਤਬ੍ਬਨ੍ਤਿ ਕਰਿਯਮਾਨੇ ਅਰੁਣਂ ਉਟ੍ਠਹਤਿ.

ਕਥਿਨਤ੍ਥਾਰੋ ਜਾਨਿਤਬ੍ਬੋਤਿ ਸਚੇ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ ਹੋਤਿ, ਸਙ੍ਘੇਨ ਕਥਂ ਪਟਿਪਜ੍ਜਿਤਬ੍ਬਂ, ਅਤ੍ਥਾਰਕੇਨ ਕਥਂ ਪਟਿਪਜ੍ਜਿਤਬ੍ਬਂ, ਅਨੁਮੋਦਕੇਨ ਕਥਂ ਪਟਿਪਜ੍ਜਿਤਬ੍ਬਂ.

੪੧੩. ਸਙ੍ਘੇਨ ਞਤ੍ਤਿਦੁਤਿਯੇਨ ਕਮ੍ਮੇਨ ਕਥਿਨਤ੍ਥਾਰਕਸ੍ਸ ਭਿਕ੍ਖੁਨੋ ਦਾਤਬ੍ਬਂ, ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਤਦਹੇਵ ਧੋਵਿਤ੍ਵਾ ਵਿਮਜ੍ਜਿਤ੍ਵਾ ਵਿਚਾਰੇਤ੍ਵਾ ਛਿਨ੍ਦਿਤ੍ਵਾ ਸਿਬ੍ਬੇਤ੍ਵਾ ਰਜਿਤ੍ਵਾ ਕਪ੍ਪਂ ਕਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਸਚੇ ਸਙ੍ਘਾਟਿਯਾ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਿਕਾ ਸਙ੍ਘਾਟਿ ਪਚ੍ਚੁਦ੍ਧਰਿਤਬ੍ਬਾ, ਨਵਾ ਸਙ੍ਘਾਟਿ ਅਧਿਟ੍ਠਾਤਬ੍ਬਾ. ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀਤਿ ਵਾਚਾ ਭਿਨ੍ਦਿਤਬ੍ਬਾ. ਸਚੇ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਕੋ ਉਤ੍ਤਰਾਸਙ੍ਗੋ ਪਚ੍ਚੁਦ੍ਧਰਿਤਬ੍ਬੋ, ਨਵੋ ਉਤ੍ਤਰਾਸਙ੍ਗੋ ਅਧਿਟ੍ਠਾਤਬ੍ਬੋ. ਇਮਿਨਾ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਾਮੀਤਿ ਵਾਚਾ ਭਿਨ੍ਦਿਤਬ੍ਬਾ. ਸਚੇ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਕੋ ਅਨ੍ਤਰਵਾਸਕੋ ਪਚ੍ਚੁਦ੍ਧਰਿਤਬ੍ਬੋ, ਨਵੋ ਅਨ੍ਤਰਵਾਸਕੋ ਅਧਿਟ੍ਠਾਤਬ੍ਬੋ. ਇਮਿਨਾ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਾਮੀਤਿ ਵਾਚਾ ਭਿਨ੍ਦਿਤਬ੍ਬਾ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ. ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਮ੍ਬਹੁਲੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸੁ ਵਚਨੀਯਾ – ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ. ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ ਅਨੁਮੋਦਾਮਾ’’ਤਿ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਹੀ’’ਤਿ. ਤੇਨ ਅਨੁਮੋਦਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮੀ’’ਤਿ.