ਕਥਿਨਭੇਦੋ

੧. ਕਥਿਨਅਤ੍ਥਤਾਦਿ

੪੦੩. ਕਸ੍ਸ ਕਥਿਨਂ [ਕਠਿਨਂ (ਸੀ. ਸ੍ਯਾ.)] ਅਨਤ੍ਥਤਂ? ਕਸ੍ਸ ਕਥਿਨਂ ਅਤ੍ਥਤਂ? ਕਿਨ੍ਤਿ ਕਥਿਨਂ ਅਨਤ੍ਥਤਂ? ਕਿਨ੍ਤਿ ਕਥਿਨਂ ਅਤ੍ਥਤਂ?

ਕਸ੍ਸ ਕਥਿਨਂ ਅਨਤ੍ਥਤਨ੍ਤਿ? ਦ੍ਵਿਨ੍ਨਂ ਪੁਗ੍ਗਲਾਨਂ ਅਨਤ੍ਥਤਂ ਹੋਤਿ ਕਥਿਨਂ – ਅਨਤ੍ਥਾਰਕਸ੍ਸ ਚ ਅਨਨੁਮੋਦਕਸ੍ਸ ਚ. ਇਮੇਸਂ ਦ੍ਵਿਨ੍ਨਂ ਪੁਗ੍ਗਲਾਨਂ ਅਨਤ੍ਥਤਂ ਹੋਤਿ ਕਥਿਨਂ.

ਕਸ੍ਸ ਕਥਿਨਂ ਅਤ੍ਥਤਨ੍ਤਿ? ਦ੍ਵਿਨ੍ਨਂ ਪੁਗ੍ਗਲਾਨਂ ਅਤ੍ਥਤਂ ਹੋਤਿ ਕਥਿਨਂ – ਅਤ੍ਥਾਰਕਸ੍ਸ ਚ ਅਨੁਮੋਦਕਸ੍ਸ ਚ. ਇਮੇਸਂ ਦ੍ਵਿਨ੍ਨਂ ਪੁਗ੍ਗਲਾਨਂ ਅਤ੍ਥਤਂ ਹੋਤਿ ਕਥਿਨਂ.

ਕਿਨ੍ਤਿ ਕਥਿਨਂ ਅਨਤ੍ਥਤਨ੍ਤਿ? ਚਤੁਵੀਸਤਿਯਾ ਆਕਾਰੇਹਿ ਅਨਤ੍ਥਤਂ ਹੋਤਿ ਕਥਿਨਂ, ਨ ਉਲ੍ਲਿਖਿਤਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਧੋਵਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਚੀਵਰਵਿਚਾਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਛੇਦਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਬਨ੍ਧਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਓਵਟ੍ਟਿਯਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਕਣ੍ਡੁਸਕਰਣਮਤ੍ਤੇਨ [ਨ ਗਣ੍ਡੁਸਕਰਣਮਤ੍ਤੇਨ (ਕ.)] ਅਤ੍ਥਤਂ ਹੋਤਿ ਕਥਿਨਂ, ਨ ਦਲ਼੍ਹੀਕਮ੍ਮਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਨੁਵਾਤਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਪਰਿਭਣ੍ਡਕਰਣਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਓਵਦ੍ਧੇਯ੍ਯਕਰਣਮਤ੍ਤੇਨ [ਨ ਓਵਟ੍ਟੇਯ੍ਯਕਰਣਮਤ੍ਤੇਨ (ਸੀ. ਸ੍ਯਾ.), ਨ ਓਵਦੇਯ੍ਯਕਰਣਮਤ੍ਤੇਨ (ਕ.)] ਅਤ੍ਥਤਂ ਹੋਤਿ ਕਥਿਨਂ, ਨ ਕਮ੍ਬਲਮਦ੍ਦਨਮਤ੍ਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਨਿਮਿਤ੍ਤਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਪਰਿਕਥਾਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਕੁਕ੍ਕੁਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਸਨ੍ਨਿਧਿਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਨਿਸ੍ਸਗ੍ਗਿਯੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਕਪ੍ਪਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਸਙ੍ਘਾਟਿਯਾ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਉਤ੍ਤਰਾਸਙ੍ਗੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਅਨ੍ਤਰਵਾਸਕੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨ ਸਮਣ੍ਡਲੀਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਨ ਅਞ੍ਞਤ੍ਰ ਪੁਗ੍ਗਲਸ੍ਸ ਅਤ੍ਥਾਰਾ ਅਤ੍ਥਤਂ ਹੋਤਿ ਕਥਿਨਂ, ਸਮ੍ਮਾ ਚੇ ਅਤ੍ਥਤਂ ਹੋਤਿ ਕਥਿਨਂ ਤਂ ਚੇ ਨਿਸ੍ਸੀਮਟ੍ਠੋ ਅਨੁਮੋਦਤਿ. ਏਵਮ੍ਪਿ ਅਨਤ੍ਥਤਂ ਹੋਤਿ ਕਥਿਨਂ.

ਨਿਮਿਤ੍ਤਕਮ੍ਮਂ ਨਾਮ ਨਿਮਿਤ੍ਤਂ ਕਰੋਤਿ – ‘‘ਇਮਿਨਾ ਦੁਸ੍ਸੇਨ ਕਥਿਨਂ ਅਤ੍ਥਰਿਸ੍ਸਾਮੀ’’ਤਿ. ਪਰਿਕਥਾ ਨਾਮ ਪਰਿਕਥਂ ਕਰੋਤਿ – ‘‘ਇਮਾਯ ਪਰਿਕਥਾਯ ਕਥਿਨਦੁਸ੍ਸਂ ਨਿਬ੍ਬਤ੍ਤੇਸ੍ਸਾਮੀ’’ਤਿ. ਕੁਕ੍ਕੁਕਤਂ ਨਾਮ ਅਨਾਦਿਯਦਾਨਂ ਵੁਚ੍ਚਤਿ. ਸਨ੍ਨਿਧਿ ਨਾਮ ਦ੍ਵੇ ਸਨ੍ਨਿਧਿਯੋ – ਕਰਣਸਨ੍ਨਿਧਿ ਵਾ ਨਿਚਯਸਨ੍ਨਿਧਿ ਵਾ. ਨਿਸ੍ਸਗ੍ਗਿਯਂ ਨਾਮ ਕਯਿਰਮਾਨੇ ਅਰੁਣਂ ਉਟ੍ਠਹਤਿ [ਉਦ੍ਰਿਯਤਿ (ਸੀ. ਸ੍ਯਾ.)]. ਇਮੇਹਿ ਚਤੁਵੀਸਤਿਯਾ ਆਕਾਰੇਹਿ ਅਨਤ੍ਥਤਂ ਹੋਤਿ ਕਥਿਨਂ.

ਕਿਨ੍ਤਿ ਕਥਿਨਂ ਅਤ੍ਥਤਨ੍ਤਿ? ਸਤ੍ਤਰਸਹਿ ਆਕਾਰੇਹਿ ਅਤ੍ਥਤਂ ਹੋਤਿ ਕਥਿਨਂ. ਅਹਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਹਤਕਪ੍ਪੇਨ ਅਤ੍ਥਤਂ ਹੋਤਿ ਕਥਿਨਂ, ਪਿਲੋਤਿਕਾਯ ਅਤ੍ਥਤਂ ਹੋਤਿ ਕਥਿਨਂ, ਪਂਸੁਕੂਲੇਨ ਅਤ੍ਥਤਂ ਹੋਤਿ ਕਥਿਨਂ, ਪਾਪਣਿਕੇਨ ਅਤ੍ਥਤਂ ਹੋਤਿ ਕਥਿਨਂ, ਅਨਿਮਿਤ੍ਤਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਪਰਿਕਥਾਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਕੁਕ੍ਕੁਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਸਨ੍ਨਿਧਿਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਅਨਿਸ੍ਸਗ੍ਗਿਯੇਨ ਅਤ੍ਥਤਂ ਹੋਤਿ ਕਥਿਨਂ, ਕਪ੍ਪਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਸਙ੍ਘਾਟਿਯਾ ਅਤ੍ਥਤਂ ਹੋਤਿ ਕਥਿਨਂ, ਉਤ੍ਤਰਾਸਙ੍ਗੇਨ ਅਤ੍ਥਤਂ ਹੋਤਿ ਕਥਿਨਂ, ਅਨ੍ਤਰਵਾਸਕੇਨ ਅਤ੍ਥਤਂ ਹੋਤਿ ਕਥਿਨਂ, ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾ ਤਦਹੇਵ ਸਞ੍ਛਿਨ੍ਨੇਨ ਸਮਣ੍ਡਲੀਕਤੇਨ ਅਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਾਰਾ ਅਤ੍ਥਤਂ ਹੋਤਿ ਕਥਿਨਂ, ਸਮ੍ਮਾ ਚੇ ਅਤ੍ਥਤਂ ਹੋਤਿ ਕਥਿਨਂ, ਤਂ ਚੇ ਸੀਮਟ੍ਠੋ ਅਨੁਮੋਦਤਿ, ਏਵਮ੍ਪਿ ਅਤ੍ਥਤਂ ਹੋਤਿ ਕਥਿਨਂ. ਇਮੇਹਿ ਸਤ੍ਤਰਸਹਿ ਆਕਾਰੇਹਿ ਅਤ੍ਥਤਂ ਹੋਤਿ ਕਥਿਨਂ.

ਸਹ ਕਥਿਨਸ੍ਸ ਅਤ੍ਥਾਰਾ ਕਤਿ ਧਮ੍ਮਾ ਜਾਯਨ੍ਤਿ? ਸਹ ਕਥਿਨਸ੍ਸ ਅਤ੍ਥਾਰਾ ਪਨ੍ਨਰਸ ਧਮ੍ਮਾ ਜਾਯਨ੍ਤਿ – ਅਟ੍ਠ ਮਾਤਿਕਾ, ਦ੍ਵੇ ਪਲਿਬੋਧਾ, ਪਞ੍ਚਾਨਿਸਂਸਾ. ਸਹ ਕਥਿਨਸ੍ਸ ਅਤ੍ਥਾਰਾ ਇਮੇ ਪਨ੍ਨਰਸ ਧਮ੍ਮਾ ਜਾਯਨ੍ਤਿ.

੨. ਕਥਿਨਅਨਨ੍ਤਰਪਚ੍ਚਯਾਦਿ

੪੦੪. ਪਯੋਗਸ੍ਸ ਕਤਮੇ ਧਮ੍ਮਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਪੁਰੇਜਾਤਪਚ੍ਚਯੇਨ ਪਚ੍ਚਯੋ, ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ, ਸਹਜਾਤਪਚ੍ਚਯੇਨ ਪਚ੍ਚਯੋ? ਪੁਬ੍ਬਕਰਣਸ੍ਸ ਕਤਮੇ ਧਮ੍ਮਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ…ਪੇ… ਪਚ੍ਚੁਦ੍ਧਾਰਸ੍ਸ ਕਤਮੇ ਧਮ੍ਮਾ… ਅਧਿਟ੍ਠਾਨਸ੍ਸ ਕਤਮੇ ਧਮ੍ਮਾ… ਅਤ੍ਥਾਰਸ੍ਸ ਕਤਮੇ ਧਮ੍ਮਾ… ਮਾਤਿਕਾਨਞ੍ਚ ਪਲਿਬੋਧਾਨਞ੍ਚ ਕਤਮੇ ਧਮ੍ਮਾ… ਵਤ੍ਥੁਸ੍ਸ ਕਤਮੇ ਧਮ੍ਮਾ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਪੁਰੇਜਾਤਪਚ੍ਚਯੇਨ ਪਚ੍ਚਯੋ, ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ, ਸਹਜਾਤਪਚ੍ਚਯੇਨ ਪਚ੍ਚਯੋ?

ਪੁਬ੍ਬਕਰਣਂ ਪਯੋਗਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਯੋਗੋ ਪੁਬ੍ਬਕਰਣਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. ਪੁਬ੍ਬਕਰਣਂ ਪਯੋਗਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ. ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ. ਪਚ੍ਚੁਦ੍ਧਾਰੋ ਪੁਬ੍ਬਕਰਣਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪੁਬ੍ਬਕਰਣਂ ਪਚ੍ਚੁਦ੍ਧਾਰਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. ਪਚ੍ਚੁਦ੍ਧਾਰੋ ਪੁਬ੍ਬਕਰਣਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ. ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ. ਅਧਿਟ੍ਠਾਨਂ ਪਚ੍ਚੁਦ੍ਧਾਰਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਪਚ੍ਚੁਦ੍ਧਾਰੋ ਅਧਿਟ੍ਠਾਨਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. ਅਧਿਟ੍ਠਾਨਂ ਪਚ੍ਚੁਦ੍ਧਾਰਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ. ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ. ਅਤ੍ਥਾਰੋ ਅਧਿਟ੍ਠਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਧਿਟ੍ਠਾਨਂ ਅਤ੍ਥਾਰਸ੍ਸ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. ਅਤ੍ਥਾਰੋ ਅਧਿਟ੍ਠਾਨਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ. ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ. ਮਾਤਿਕਾ ਚ ਪਲਿਬੋਧਾ ਚ ਅਤ੍ਥਾਰਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਅਤ੍ਥਾਰੋ ਮਾਤਿਕਾਨਞ੍ਚ ਪਲਿਬੋਧਾਨਞ੍ਚ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. ਮਾਤਿਕਾ ਚ ਪਲਿਬੋਧਾ ਚ ਅਤ੍ਥਾਰਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ. ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ. ਆਸਾ ਚ ਅਨਾਸਾ ਚ ਵਤ੍ਥੁਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਸਮਨਨ੍ਤਰਪਚ੍ਚਯੇਨ ਪਚ੍ਚਯੋ, ਨਿਸ੍ਸਯਪਚ੍ਚਯੇਨ ਪਚ੍ਚਯੋ, ਉਪਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਵਤ੍ਥੁ ਆਸਾਨਞ੍ਚ ਅਨਾਸਾਨਞ੍ਚ ਪੁਰੇਜਾਤਪਚ੍ਚਯੇਨ ਪਚ੍ਚਯੋ. ਆਸਾ ਚ ਅਨਾਸਾ ਚ ਵਤ੍ਥੁਸ੍ਸ ਪਚ੍ਛਾਜਾਤਪਚ੍ਚਯੇਨ ਪਚ੍ਚਯੋ. ਪਨ੍ਨਰਸ ਧਮ੍ਮਾ ਸਹਜਾਤਪਚ੍ਚਯੇਨ ਪਚ੍ਚਯੋ.

੩. ਪੁਬ੍ਬਕਰਣਨਿਦਾਨਾਦਿਵਿਭਾਗੋ

੪੦੫. ਪੁਬ੍ਬਕਰਣਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਂ, ਕਿਂਸਮ੍ਭਾਰਂ, ਕਿਂਸਮੁਟ੍ਠਾਨਂ? ਪਚ੍ਚੁਦ੍ਧਾਰੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋ, ਕਿਂਸਮ੍ਭਾਰੋ, ਕਿਂਸਮੁਟ੍ਠਾਨੋ? ਅਧਿਟ੍ਠਾਨਂ ਕਿਂਨਿਦਾਨਂ, ਕਿਂਸਮੁਦਯਂ, ਕਿਂਜਾਤਿਕਂ, ਕਿਂਪਭਵਂ, ਕਿਂਸਮ੍ਭਾਰਂ, ਕਿਂਸਮੁਟ੍ਠਾਨਂ? ਅਤ੍ਥਾਰੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋ, ਕਿਂਸਮ੍ਭਾਰੋ, ਕਿਂਸਮੁਟ੍ਠਾਨੋ? ਮਾਤਿਕਾ ਚ ਪਲਿਬੋਧਾ ਚ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾ, ਕਿਂਸਮ੍ਭਾਰਾ ਕਿਂਸਮੁਟ੍ਠਾਨਾ? ਆਸਾ ਚ ਅਨਾਸਾ ਚ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾ, ਕਿਂਸਮ੍ਭਾਰਾ, ਕਿਂਸਮੁਟ੍ਠਾਨਾ?

ਪੁਬ੍ਬਕਰਣਂ ਪਯੋਗਨਿਦਾਨਂ, ਪਯੋਗਸਮੁਦਯਂ, ਪਯੋਗਜਾਤਿਕਂ, ਪਯੋਗਪਭਵਂ, ਪਯੋਗਸਮ੍ਭਾਰਂ, ਪਯੋਗਸਮੁਟ੍ਠਾਨਂ. ਪਚ੍ਚੁਦ੍ਧਾਰੋ ਪੁਬ੍ਬਕਰਣਨਿਦਾਨੋ, ਪੁਬ੍ਬਕਰਣਸਮੁਦਯੋ, ਪੁਬ੍ਬਕਰਣਜਾਤਿਕੋ, ਪੁਬ੍ਬਕਰਣਪਭਵੋ, ਪੁਬ੍ਬਕਰਣਸਮ੍ਭਾਰੋ, ਪੁਬ੍ਬਕਰਣਸਮੁਟ੍ਠਾਨੋ. ਅਧਿਟ੍ਠਾਨਂ ਪਚ੍ਚੁਦ੍ਧਾਰਨਿਦਾਨਂ, ਪਚ੍ਚੁਦ੍ਧਾਰਸਮੁਦਯਂ, ਪਚ੍ਚੁਦ੍ਧਾਰਜਾਤਿਕਂ, ਪਚ੍ਚੁਦ੍ਧਾਰਪਭਵਂ, ਪਚ੍ਚੁਦ੍ਧਾਰਸਮ੍ਭਾਰਂ, ਪਚ੍ਚੁਦ੍ਧਾਰਸਮੁਟ੍ਠਾਨਂ. ਅਤ੍ਥਾਰੋ ਅਧਿਟ੍ਠਾਨਨਿਦਾਨੋ, ਅਧਿਟ੍ਠਾਨਸਮੁਦਯੋ, ਅਧਿਟ੍ਠਾਨਜਾਤਿਕੋ, ਅਧਿਟ੍ਠਾਨਪਭਵੋ, ਅਧਿਟ੍ਠਾਨਸਮ੍ਭਾਰੋ, ਅਧਿਟ੍ਠਾਨਸਮੁਟ੍ਠਾਨੋ. ਮਾਤਿਕਾ ਚ ਪਲਿਬੋਧਾ ਚ ਅਤ੍ਥਾਰਨਿਦਾਨਾ, ਅਤ੍ਥਾਰਸਮੁਦਯਾ, ਅਤ੍ਥਾਰਜਾਤਿਕਾ, ਅਤ੍ਥਾਰਪਭਵਾ, ਅਤ੍ਥਾਰਸਮ੍ਭਾਰਾ, ਅਤ੍ਥਾਰਸਮੁਟ੍ਠਾਨਾ. ਆਸਾ ਚ ਅਨਾਸਾ ਚ ਵਤ੍ਥੁਨਿਦਾਨਾ, ਵਤ੍ਥੁਸਮੁਦਯਾ, ਵਤ੍ਥੁਜਾਤਿਕਾ, ਵਤ੍ਥੁਪਭਵਾ, ਵਤ੍ਥੁਸਮ੍ਭਾਰਾ, ਵਤ੍ਥੁਸਮੁਟ੍ਠਾਨਾ.

੪੦੬. ਪਯੋਗੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋ, ਕਿਂਸਮ੍ਭਾਰੋ, ਕਿਂਸਮੁਟ੍ਠਾਨੋ, ਪੁਬ੍ਬਕਰਣਂ…ਪੇ… ਪਚ੍ਚੁਦ੍ਧਾਰੋ… ਅਧਿਟ੍ਠਾਨਂ… ਅਤ੍ਥਾਰੋ… ਮਾਤਿਕਾ ਚ ਪਲਿਬੋਧਾ ਚ… ਵਤ੍ਥੁ… ਆਸਾ ਚ ਅਨਾਸਾ ਚ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾ, ਕਿਂਸਮ੍ਭਾਰਾ, ਕਿਂਸਮੁਟ੍ਠਾਨਾ?

ਪਯੋਗੋ ਹੇਤੁਨਿਦਾਨੋ, ਹੇਤੁਸਮੁਦਯੋ, ਹੇਤੁਜਾਤਿਕੋ, ਹੇਤੁਪਭਵੋ, ਹੇਤੁਸਮ੍ਭਾਰੋ, ਹੇਤੁਸਮੁਟ੍ਠਾਨੋ. ਪੁਬ੍ਬਕਰਣਂ…ਪੇ… ਪਚ੍ਚੁਦ੍ਧਾਰੋ… ਅਧਿਟ੍ਠਾਨਂ… ਅਤ੍ਥਾਰੋ … ਮਾਤਿਕਾ ਚ ਪਲਿਬੋਧਾ ਚ… ਵਤ੍ਥੁ… ਆਸਾ ਚ ਅਨਾਸਾ ਚ ਹੇਤੁਨਿਦਾਨਾ, ਹੇਤੁਸਮੁਦਯਾ, ਹੇਤੁਜਾਤਿਕਾ, ਹੇਤੁਪਭਵਾ, ਹੇਤੁਸਮ੍ਭਾਰਾ, ਹੇਤੁਸਮੁਟ੍ਠਾਨਾ.

੪੦੭. ਪਯੋਗੋ ਕਿਂਨਿਦਾਨੋ, ਕਿਂਸਮੁਦਯੋ, ਕਿਂਜਾਤਿਕੋ, ਕਿਂਪਭਵੋ, ਕਿਂਸਮ੍ਭਾਰੋ, ਕਿਂਸਮੁਟ੍ਠਾਨੋ? ਪੁਬ੍ਬਕਰਣਂ…ਪੇ… ਪਚ੍ਚੁਦ੍ਧਾਰੋ… ਅਧਿਟ੍ਠਾਨਂ… ਅਤ੍ਥਾਰੋ… ਮਾਤਿਕਾ ਚ ਪਲਿਬੋਧਾ ਚ… ਵਤ੍ਥੁ… ਆਸਾ ਚ ਅਨਾਸਾ ਚ ਕਿਂਨਿਦਾਨਾ, ਕਿਂਸਮੁਦਯਾ, ਕਿਂਜਾਤਿਕਾ, ਕਿਂਪਭਵਾ, ਕਿਂਸਮ੍ਭਾਰਾ, ਕਿਂਸਮੁਟ੍ਠਾਨਾ?

ਪਯੋਗੋ ਪਚ੍ਚਯਨਿਦਾਨੋ, ਪਚ੍ਚਯਸਮੁਦਯੋ, ਪਚ੍ਚਯਜਾਤਿਕੋ, ਪਚ੍ਚਯਪਭਵੋ, ਪਚ੍ਚਯਸਮ੍ਭਾਰੋ, ਪਚ੍ਚਯਸਮੁਟ੍ਠਾਨੋ. ਪੁਬ੍ਬਕਰਣਂ…ਪੇ… ਪਚ੍ਚੁਦ੍ਧਾਰੋ… ਅਧਿਟ੍ਠਾਨਂ… ਅਤ੍ਥਾਰੋ… ਮਾਤਿਕਾ ਚ ਪਲਿਬੋਧਾ ਚ… ਵਤ੍ਥੁ… ਆਸਾ ਚ ਅਨਾਸਾ ਚ ਪਚ੍ਚਯਨਿਦਾਨਾ, ਪਚ੍ਚਯਸਮੁਦਯਾ, ਪਚ੍ਚਯਜਾਤਿਕਾ, ਪਚ੍ਚਯਪਭਵਾ, ਪਚ੍ਚਯਸਮ੍ਭਾਰਾ, ਪਚ੍ਚਯਸਮੁਟ੍ਠਾਨਾ.

੪੦੮. ਪੁਬ੍ਬਕਰਣਂ ਕਤਿਹਿ ਧਮ੍ਮੇਹਿ ਸਙ੍ਗਹਿਤਂ? ਪੁਬ੍ਬਕਰਣਂ ਸਤ੍ਤਹਿ ਧਮ੍ਮੇਹਿ ਸਙ੍ਗਹਿਤਂ. ਧੋਵਨੇਨ, ਵਿਚਾਰਣੇਨ, ਛੇਦਨੇਨ, ਬਨ੍ਧਨੇਨ, ਸਿਬ੍ਬਨੇਨ, ਰਜਨੇਨ, ਕਪ੍ਪਕਰਣੇਨ – ਪੁਬ੍ਬਕਰਣਂ ਇਮੇਹਿ ਸਤ੍ਤਹਿ ਧਮ੍ਮੇਹਿ ਸਙ੍ਗਹਿਤਂ.

ਪਚ੍ਚੁਦ੍ਧਾਰੋ ਕਤਿਹਿ ਧਮ੍ਮੇਹਿ ਸਙ੍ਗਹਿਤੋ? ਪਚ੍ਚੁਦ੍ਧਾਰੋ ਤੀਹਿ ਧਮ੍ਮੇਹਿ ਸਙ੍ਗਹਿਤੋ – ਸਙ੍ਘਾਟਿਯਾ, ਉਤ੍ਤਰਾਸਙ੍ਗੇਨ, ਅਨ੍ਤਰਵਾਸਕੇਨ.

ਅਧਿਟ੍ਠਾਨਂ ਕਤਿਹਿ ਧਮ੍ਮੇਹਿ ਸਙ੍ਗਹਿਤਂ? ਅਧਿਟ੍ਠਾਨਂ ਤੀਹਿ ਧਮ੍ਮੇਹਿ ਸਙ੍ਗਹਿਤਂ – ਸਙ੍ਘਾਟਿਯਾ, ਉਤ੍ਤਰਾਸਙ੍ਗੇਨ, ਅਨ੍ਤਰਵਾਸਕੇਨ.

ਅਤ੍ਥਾਰੋ ਕਤਿਹਿ ਧਮ੍ਮੇਹਿ ਸਙ੍ਗਹਿਤੋ? ਅਤ੍ਥਾਰੋ ਏਕੇਨ ਧਮ੍ਮੇਨ ਸਙ੍ਗਹਿਤੋ – ਵਚੀਭੇਦੇਨ.

ਕਥਿਨਸ੍ਸ ਕਤਿ ਮੂਲਾਨਿ, ਕਤਿ ਵਤ੍ਥੂਨਿ, ਕਤਿ ਭੂਮਿਯੋ? ਕਥਿਨਸ੍ਸ ਏਕਂ ਮੂਲਂ – ਸਙ੍ਘੋ; ਤੀਣਿ ਵਤ੍ਥੂਨਿ – ਸਙ੍ਘਾਟਿ, ਉਤ੍ਤਰਾਸਙ੍ਗੋ, ਅਨ੍ਤਰਵਾਸਕੋ, ਛ ਭੂਮਿਯੋ – ਖੋਮਂ, ਕਪ੍ਪਾਸਿਕਂ, ਕੋਸੇਯ੍ਯਂ, ਕਮ੍ਬਲਂ, ਸਾਣਂ, ਭਙ੍ਗਂ.

ਕਥਿਨਸ੍ਸ ਕੋ ਆਦਿ, ਕਿਂ ਮਜ੍ਝੇ, ਕਿਂ ਪਰਿਯੋਸਾਨਂ? ਕਥਿਨਸ੍ਸ ਪੁਬ੍ਬਕਰਣਂ ਆਦਿ, ਕ੍ਰਿਯਾ ਮਜ੍ਝੇ, ਅਤ੍ਥਾਰੋ ਪਰਿਯੋਸਾਨਂ.

੪੦੯. ਕਤਿਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਭਬ੍ਬੋ ਕਥਿਨਂ ਅਤ੍ਥਰਿਤੁਂ? ਕਤਿਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁਂ? ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਭਬ੍ਬੋ ਕਥਿਨਂ ਅਤ੍ਥਰਿਤੁਂ. ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁਂ. ਕਤਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਭਬ੍ਬੋ ਕਥਿਨਂ ਅਤ੍ਥਰਿਤੁਂ? ਪੁਬ੍ਬਕਰਣਂ ਨ ਜਾਨਾਤਿ, ਪਚ੍ਚੁਦ੍ਧਾਰਂ ਨ ਜਾਨਾਤਿ, ਅਧਿਟ੍ਠਾਨਂ ਨ ਜਾਨਾਤਿ, ਅਤ੍ਥਾਰਂ ਨ ਜਾਨਾਤਿ, ਮਾਤਿਕਂ ਨ ਜਾਨਾਤਿ, ਪਲਿਬੋਧਂ ਨ ਜਾਨਾਤਿ, ਉਦ੍ਧਾਰਂ ਨ ਜਾਨਾਤਿ, ਆਨਿਸਂਸਂ ਨ ਜਾਨਾਤਿ – ਇਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਅਭਬ੍ਬੋ ਕਥਿਨਂ ਅਤ੍ਥਰਿਤੁਂ. ਕਤਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁਂ? ਪੁਬ੍ਬਕਰਣਂ ਜਾਨਾਤਿ, ਪਚ੍ਚੁਦ੍ਧਾਰਂ ਜਾਨਾਤਿ, ਅਧਿਟ੍ਠਾਨਂ ਜਾਨਾਤਿ, ਅਤ੍ਥਾਰਂ ਜਾਨਾਤਿ, ਮਾਤਿਕਂ ਜਾਨਾਤਿ, ਪਲਿਬੋਧਂ ਜਾਨਾਤਿ, ਉਦ੍ਧਾਰਂ ਜਾਨਾਤਿ, ਆਨਿਸਂਸਂ ਜਾਨਾਤਿ – ਇਮੇਹਿ ਅਟ੍ਠਹਙ੍ਗੇਹਿ ਸਮਨ੍ਨਾਗਤੋ ਪੁਗ੍ਗਲੋ ਭਬ੍ਬੋ ਕਥਿਨਂ ਅਤ੍ਥਰਿਤੁਂ.

੪੧੦. ਕਤਿਨਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਨ ਰੁਹਨ੍ਤਿ? ਕਤਿਨਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਰੁਹਨ੍ਤਿ? ਤਿਣ੍ਣਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਨ ਰੁਹਨ੍ਤਿ. ਤਿਣ੍ਣਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਰੁਹਨ੍ਤਿ. ਕਤਮੇਸਂ ਤਿਣ੍ਣਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਨ ਰੁਹਨ੍ਤਿ? ਨਿਸ੍ਸੀਮਟ੍ਠੋ ਅਨੁਮੋਦਤਿ, ਅਨੁਮੋਦੇਨ੍ਤੋ ਨ ਵਾਚਂ ਭਿਨ੍ਦਤਿ, ਵਾਚਂ ਭਿਨ੍ਦਨ੍ਤੋ ਨ ਪਰਂ ਵਿਞ੍ਞਾਪੇਤਿ – ਇਮੇਸਂ ਤਿਣ੍ਣਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਨ ਰੁਹਨ੍ਤਿ. ਕਤਮੇਸਂ ਤਿਣ੍ਣਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਰੁਹਨ੍ਤਿ? ਸੀਮਟ੍ਠੋ ਅਨੁਮੋਦਤਿ, ਅਨੁਮੋਦੇਨ੍ਤੋ ਵਾਚਂ ਭਿਨ੍ਦਤਿ, ਵਾਚਂ ਭਿਨ੍ਦਨ੍ਤੋ ਪਰਂ ਵਿਞ੍ਞਾਪੇਤਿ – ਇਮੇਸਂ ਤਿਣ੍ਣਂ ਪੁਗ੍ਗਲਾਨਂ ਕਥਿਨਤ੍ਥਾਰਾ ਰੁਹਨ੍ਤਿ.

੪੧੧. ਕਤਿ ਕਥਿਨਤ੍ਥਾਰਾ ਨ ਰੁਹਨ੍ਤਿ? ਕਤਿ ਕਥਿਨਤ੍ਥਾਰਾ ਰੁਹਨ੍ਤਿ? ਤਯੋ ਕਥਿਨਤ੍ਥਾਰਾ ਨ ਰੁਹਨ੍ਤਿ. ਤਯੋ ਕਥਿਨਤ੍ਥਾਰਾ ਰੁਹਨ੍ਤਿ. ਕਤਮੇ ਤਯੋ ਕਥਿਨਤ੍ਥਾਰਾ ਨ ਰੁਹਨ੍ਤਿ? ਵਤ੍ਥੁਵਿਪਨ੍ਨਞ੍ਚੇਵ ਹੋਤਿ, ਕਾਲਵਿਪਨ੍ਨਞ੍ਚ, ਕਰਣਵਿਪਨ੍ਨਞ੍ਚ – ਇਮੇ ਤਯੋ ਕਥਿਨਤ੍ਥਾਰਾ ਨ ਰੁਹਨ੍ਤਿ. ਕਤਮੇ ਤਯੋ ਕਥਿਨਤ੍ਥਾਰਾ ਰੁਹਨ੍ਤਿ? ਵਤ੍ਥੁਸਮ੍ਪਨ੍ਨਞ੍ਚੇਵ ਹੋਤਿ, ਕਾਲਸਮ੍ਪਨ੍ਨਞ੍ਚ, ਕਰਣਸਮ੍ਪਨ੍ਨਞ੍ਚ – ਇਮੇ ਤਯੋ ਕਥਿਨਤ੍ਥਾਰਾ ਰੁਹਨ੍ਤਿ.

੪. ਕਥਿਨਾਦਿਜਾਨਿਤਬ੍ਬਵਿਭਾਗੋ

੪੧੨. ਕਥਿਨਂ ਜਾਨਿਤਬ੍ਬਂ, ਕਥਿਨਤ੍ਥਾਰੋ ਜਾਨਿਤਬ੍ਬੋ, ਕਥਿਨਸ੍ਸ ਅਤ੍ਥਾਰਮਾਸੋ ਜਾਨਿਤਬ੍ਬੋ, ਕਥਿਨਸ੍ਸ ਅਤ੍ਥਾਰਵਿਪਤ੍ਤਿ ਜਾਨਿਤਬ੍ਬਾ, ਕਥਿਨਸ੍ਸ ਅਤ੍ਥਾਰਸਮ੍ਪਤ੍ਤਿ ਜਾਨਿਤਬ੍ਬਾ, ਨਿਮਿਤ੍ਤਕਮ੍ਮਂ ਜਾਨਿਤਬ੍ਬਂ, ਪਰਿਕਥਾ ਜਾਨਿਤਬ੍ਬਾ, ਕੁਕ੍ਕੁਕਤਂ ਜਾਨਿਤਬ੍ਬਂ, ਸਨ੍ਨਿਧਿ ਜਾਨਿਤਬ੍ਬਾ, ਨਿਸ੍ਸਗ੍ਗਿਯਂ ਜਾਨਿਤਬ੍ਬਂ.

ਕਥਿਨਂ ਜਾਨਿਤਬ੍ਬਨ੍ਤਿ ਤੇਸਞ੍ਞੇਵ ਧਮ੍ਮਾਨਂ ਸਙ੍ਗਹੋ ਸਮਵਾਯੋ ਨਾਮਂ ਨਾਮਕਮ੍ਮਂ ਨਾਮਧੇਯ੍ਯਂ ਨਿਰੁਤ੍ਤਿ ਬ੍ਯਞ੍ਜਨਂ ਅਭਿਲਾਪੋ ਯਦਿਦਂ ਕਥਿਨਨ੍ਤਿ.

ਕਥਿਨਸ੍ਸ ਅਤ੍ਥਾਰਮਾਸੋ ਜਾਨਿਤਬ੍ਬੋਤਿ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ ਜਾਨਿਤਬ੍ਬੋ.

ਕਥਿਨਸ੍ਸ ਅਤ੍ਥਾਰਵਿਪਤ੍ਤਿ ਜਾਨਿਤਬ੍ਬਾਤਿ ਚਤੁਵੀਸਤਿਯਾ ਆਕਾਰੇਹਿ ਕਥਿਨਸ੍ਸ ਅਤ੍ਥਾਰਵਿਪਤ੍ਤਿ ਜਾਨਿਤਬ੍ਬਾ.

ਕਥਿਨਸ੍ਸ ਅਤ੍ਥਾਰਸਮ੍ਪਤ੍ਤਿ ਜਾਨਿਤਬ੍ਬਾਤਿ ਸਤ੍ਤਰਸਹਿ ਆਕਾਰੇਹਿ ਕਥਿਨਸ੍ਸ ਅਤ੍ਥਾਰਸਮ੍ਪਤ੍ਤਿ ਜਾਨਿਤਬ੍ਬਾ.

ਨਿਮਿਤ੍ਤਕਮ੍ਮਂ ਜਾਨਿਤਬ੍ਬਨ੍ਤਿ ਨਿਮਿਤ੍ਤਂ ਕਰੋਤਿ ਇਮਿਨਾ ਦੁਸ੍ਸੇਨ ਕਥਿਨਂ ਅਤ੍ਥਰਿਸ੍ਸਾਮੀਤਿ.

ਪਰਿਕਥਾ ਜਾਨਿਤਬ੍ਬਾਤਿ ਪਰਿਕਥਂ ਕਰੋਤਿ ਇਮਾਯ ਪਰਿਕਥਾਯ ਕਥਿਨਦੁਸ੍ਸਂ ਨਿਬ੍ਬਤ੍ਤੇਸ੍ਸਾਮੀਤਿ.

ਕੁਕ੍ਕੁਕਤਂ ਜਾਨਿਤਬ੍ਬਨ੍ਤਿ ਅਨਾਦਿਯਦਾਨਂ ਜਾਨਿਤਬ੍ਬਂ.

ਸਨ੍ਨਿਧਿ ਜਾਨਿਤਬ੍ਬਾਤਿ ਦ੍ਵੇ ਸਨ੍ਨਿਧਿਯੋ ਜਾਨਿਤਬ੍ਬਾ – ਕਰਣਸਨ੍ਨਿਧਿ ਵਾ ਨਿਚਯਸਨ੍ਨਿਧਿ ਵਾ.

ਨਿਸ੍ਸਗ੍ਗਿਯਂ ਜਾਨਿਤਬ੍ਬਨ੍ਤਿ ਕਰਿਯਮਾਨੇ ਅਰੁਣਂ ਉਟ੍ਠਹਤਿ.

ਕਥਿਨਤ੍ਥਾਰੋ ਜਾਨਿਤਬ੍ਬੋਤਿ ਸਚੇ ਸਙ੍ਘਸ੍ਸ ਕਥਿਨਦੁਸ੍ਸਂ ਉਪ੍ਪਨ੍ਨਂ ਹੋਤਿ, ਸਙ੍ਘੇਨ ਕਥਂ ਪਟਿਪਜ੍ਜਿਤਬ੍ਬਂ, ਅਤ੍ਥਾਰਕੇਨ ਕਥਂ ਪਟਿਪਜ੍ਜਿਤਬ੍ਬਂ, ਅਨੁਮੋਦਕੇਨ ਕਥਂ ਪਟਿਪਜ੍ਜਿਤਬ੍ਬਂ.

੪੧੩. ਸਙ੍ਘੇਨ ਞਤ੍ਤਿਦੁਤਿਯੇਨ ਕਮ੍ਮੇਨ ਕਥਿਨਤ੍ਥਾਰਕਸ੍ਸ ਭਿਕ੍ਖੁਨੋ ਦਾਤਬ੍ਬਂ, ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਤਦਹੇਵ ਧੋਵਿਤ੍ਵਾ ਵਿਮਜ੍ਜਿਤ੍ਵਾ ਵਿਚਾਰੇਤ੍ਵਾ ਛਿਨ੍ਦਿਤ੍ਵਾ ਸਿਬ੍ਬੇਤ੍ਵਾ ਰਜਿਤ੍ਵਾ ਕਪ੍ਪਂ ਕਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਸਚੇ ਸਙ੍ਘਾਟਿਯਾ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਿਕਾ ਸਙ੍ਘਾਟਿ ਪਚ੍ਚੁਦ੍ਧਰਿਤਬ੍ਬਾ, ਨਵਾ ਸਙ੍ਘਾਟਿ ਅਧਿਟ੍ਠਾਤਬ੍ਬਾ. ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀਤਿ ਵਾਚਾ ਭਿਨ੍ਦਿਤਬ੍ਬਾ. ਸਚੇ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਕੋ ਉਤ੍ਤਰਾਸਙ੍ਗੋ ਪਚ੍ਚੁਦ੍ਧਰਿਤਬ੍ਬੋ, ਨਵੋ ਉਤ੍ਤਰਾਸਙ੍ਗੋ ਅਧਿਟ੍ਠਾਤਬ੍ਬੋ. ਇਮਿਨਾ ਉਤ੍ਤਰਾਸਙ੍ਗੇਨ ਕਥਿਨਂ ਅਤ੍ਥਰਾਮੀਤਿ ਵਾਚਾ ਭਿਨ੍ਦਿਤਬ੍ਬਾ. ਸਚੇ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਕੋ ਅਨ੍ਤਰਵਾਸਕੋ ਪਚ੍ਚੁਦ੍ਧਰਿਤਬ੍ਬੋ, ਨਵੋ ਅਨ੍ਤਰਵਾਸਕੋ ਅਧਿਟ੍ਠਾਤਬ੍ਬੋ. ਇਮਿਨਾ ਅਨ੍ਤਰਵਾਸਕੇਨ ਕਥਿਨਂ ਅਤ੍ਥਰਾਮੀਤਿ ਵਾਚਾ ਭਿਨ੍ਦਿਤਬ੍ਬਾ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ. ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਮ੍ਬਹੁਲੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸੁ ਵਚਨੀਯਾ – ‘‘ਅਤ੍ਥਤਂ, ਭਨ੍ਤੇ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’’ਤਿ. ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ ਅਨੁਮੋਦਾਮਾ’’ਤਿ. ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਏਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਹੀ’’ਤਿ. ਤੇਨ ਅਨੁਮੋਦਕੇਨ ਭਿਕ੍ਖੁਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਤ੍ਥਤਂ, ਆਵੁਸੋ, ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮੀ’’ਤਿ.

੫. ਪੁਗ੍ਗਲਸ੍ਸੇਵਕਥਿਨਤ੍ਥਾਰੋ

੪੧੪. ਸਙ੍ਘੋ ਕਥਿਨਂ ਅਤ੍ਥਰਤਿ, ਗਣੋ ਕਥਿਨਂ ਅਤ੍ਥਰਤਿ, ਪੁਗ੍ਗਲੋ ਕਥਿਨਂ ਅਤ੍ਥਰਤੀਤਿ. ਨ ਸਙ੍ਘੋ ਕਥਿਨਂ ਅਤ੍ਥਰਤਿ, ਨ ਗਣੋ ਕਥਿਨਂ ਅਤ੍ਥਰਤਿ, ਪੁਗ੍ਗਲੋ ਕਥਿਨਂ ਅਤ੍ਥਰਤੀਤਿ. ਹਞ੍ਚਿ ਨ ਸਙ੍ਘੋ ਕਥਿਨਂ ਅਤ੍ਥਰਤਿ, ਨ ਗਣੋ ਕਥਿਨਂ ਅਤ੍ਥਰਤਿ, ਪੁਗ੍ਗਲੋ ਕਥਿਨਂ ਅਤ੍ਥਰਤਿ. ਸਙ੍ਘਸ੍ਸ ਅਨਤ੍ਥਤਂ ਹੋਤਿ ਕਥਿਨਂ, ਗਣਸ੍ਸ ਅਨਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਤਂ ਹੋਤਿ ਕਥਿਨਂ. ਸਙ੍ਘੋ ਪਾਤਿਮੋਕ੍ਖਂ ਉਦ੍ਦਿਸਤਿ ਗਣੋ ਪਾਤਿਮੋਕ੍ਖਂ ਉਦ੍ਦਿਸਤਿ ਪੁਗ੍ਗਲੋ ਪਾਤਿਮੋਕ੍ਖਂ ਉਦ੍ਦਿਸਤੀਤਿ ਨ ਸਙ੍ਘੋ ਪਾਤਿਮੋਕ੍ਖਂ ਉਦ੍ਦਿਸਤਿ, ਨ ਗਣੋ ਪਾਤਿਮੋਕ੍ਖਂ ਉਦ੍ਦਿਸਤਿ, ਪੁਗ੍ਗਲੋ ਪਾਤਿਮੋਕ੍ਖਂ ਉਦ੍ਦਿਸਤੀਤਿ. ਹਞ੍ਚਿ ਨ ਸਙ੍ਘੋ ਪਾਤਿਮੋਕ੍ਖਂ ਉਦ੍ਦਿਸਤਿ, ਨ ਗਣੋ ਪਾਤਿਮੋਕ੍ਖਂ ਉਦ੍ਦਿਸਤਿ, ਪੁਗ੍ਗਲੋ ਪਾਤਿਮੋਕ੍ਖਂ ਉਦ੍ਦਿਸਤਿ. ਸਙ੍ਘਸ੍ਸ ਅਨੁਦ੍ਦਿਟ੍ਠਂ ਹੋਤਿ ਪਾਤਿਮੋਕ੍ਖਂ, ਗਣਸ੍ਸ ਅਨੁਦ੍ਦਿਟ੍ਠਂ ਹੋਤਿ ਪਾਤਿਮੋਕ੍ਖਂ, ਪੁਗ੍ਗਲਸ੍ਸ ਉਦ੍ਦਿਟ੍ਠਂ ਹੋਤਿ ਪਾਤਿਮੋਕ੍ਖਂ. ਸਙ੍ਘਸ੍ਸ ਸਾਮਗ੍ਗਿਯਾ ਗਣਸ੍ਸ ਸਾਮਗ੍ਗਿਯਾ ਪੁਗ੍ਗਲਸ੍ਸ ਉਦ੍ਦੇਸਾ ਸਙ੍ਘਸ੍ਸ ਉਦ੍ਦਿਟ੍ਠਂ ਹੋਤਿ ਪਾਤਿਮੋਕ੍ਖਂ, ਗਣਸ੍ਸ ਉਦ੍ਦਿਟ੍ਠਂ ਹੋਤਿ ਪਾਤਿਮੋਕ੍ਖਂ, ਪੁਗ੍ਗਲਸ੍ਸ ਉਦ੍ਦਿਟ੍ਠਂ ਹੋਤਿ ਪਾਤਿਮੋਕ੍ਖਂ. ਏਵਮੇਵ ਨ ਸਙ੍ਘੋ ਕਥਿਨਂ ਅਤ੍ਥਰਤਿ, ਨ ਗਣੋ ਕਥਿਨਂ ਅਤ੍ਥਰਤਿ, ਪੁਗ੍ਗਲੋ ਕਥਿਨਂ ਅਤ੍ਥਰਤਿ. ਸਙ੍ਘਸ੍ਸ ਅਨੁਮੋਦਨਾਯ ਗਣਸ੍ਸ ਅਨੁਮੋਦਨਾਯ ਪੁਗ੍ਗਲਸ੍ਸ ਅਤ੍ਥਾਰਾ ਸਙ੍ਘਸ੍ਸ ਅਤ੍ਥਤਂ ਹੋਤਿ ਕਥਿਨਂ, ਗਣਸ੍ਸ ਅਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਤਂ ਹੋਤਿ ਕਥਿਨਨ੍ਤਿ.