ਚੂਲ਼ਸਙ੍ਗਾਮੋ

੧. ਅਨੁਵਿਜ੍ਜਕਸ੍ਸਪਟਿਪਤ੍ਤਿ

੩੬੫. [ਪਰਿ. ੪੨੧] ਸਙ੍ਗਾਮਾਵਚਰੇ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਨ੍ਤੇਨ ਨੀਚਚਿਤ੍ਤੇਨ ਸਙ੍ਘੋ ਉਪਸਙ੍ਕਮਿਤਬ੍ਬੋ ਰਜੋਹਰਣਸਮੇਨ ਚਿਤ੍ਤੇਨ; ਆਸਨਕੁਸਲੇਨ ਭਵਿਤਬ੍ਬਂ ਨਿਸਜ੍ਜਕੁਸਲੇਨ; ਥੇਰੇ ਭਿਕ੍ਖੂ ਅਨੁਪਖਜ੍ਜਨ੍ਤੇਨ, ਨਵੇ ਭਿਕ੍ਖੂ ਆਸਨੇਨ ਅਪ੍ਪਟਿਬਾਹਨ੍ਤੇਨ, ਯਥਾਪਤਿਰੂਪੇ ਆਸਨੇ ਨਿਸੀਦਿਤਬ੍ਬਂ; ਅਨਾਨਾਕਥਿਕੇਨ ਭਵਿਤਬ੍ਬਂ ਅਤਿਰਚ੍ਛਾਨਕਥਿਕੇਨ; ਸਾਮਂ ਵਾ ਧਮ੍ਮੋ ਭਾਸਿਤਬ੍ਬੋ ਪਰੋ ਵਾ ਅਜ੍ਝੇਸਿਤਬ੍ਬੋ ਅਰਿਯੋ ਵਾ ਤੁਣ੍ਹੀਭਾਵੋ ਨਾਤਿਮਞ੍ਞਿਤਬ੍ਬੋ.

ਸਙ੍ਘੇਨ ਅਨੁਮਤੇਨ ਪੁਗ੍ਗਲੇਨ ਅਨੁਵਿਜ੍ਜਕੇਨ ਅਨੁਵਿਜ੍ਜਿਤੁਕਾਮੇਨ ਨ ਉਪਜ੍ਝਾਯੋ ਪੁਚ੍ਛਿਤਬ੍ਬੋ, ਨ ਆਚਰਿਯੋ ਪੁਚ੍ਛਿਤਬ੍ਬੋ, ਨ ਸਦ੍ਧਿਵਿਹਾਰਿਕੋ ਪੁਚ੍ਛਿਤਬ੍ਬੋ, ਨ ਅਨ੍ਤੇਵਾਸਿਕੋ ਪੁਚ੍ਛਿਤਬ੍ਬੋ, ਨ ਸਮਾਨੁਪਜ੍ਝਾਯਕੋ ਪੁਚ੍ਛਿਤਬ੍ਬੋ, ਨ ਸਮਾਨਾਚਰਿਯਕੋ ਪੁਚ੍ਛਿਤਬ੍ਬੋ, ਨ ਜਾਤਿ ਪੁਚ੍ਛਿਤਬ੍ਬਾ, ਨ ਨਾਮਂ ਪੁਚ੍ਛਿਤਬ੍ਬਂ, ਨ ਗੋਤ੍ਤਂ ਪੁਚ੍ਛਿਤਬ੍ਬਂ, ਨ ਆਗਮੋ ਪੁਚ੍ਛਿਤਬ੍ਬੋ, ਨ ਕੁਲਪਦੇਸੋ ਪੁਚ੍ਛਿਤਬ੍ਬੋ, ਨ ਜਾਤਿਭੂਮਿ ਪੁਚ੍ਛਿਤਬ੍ਬਾ. ਤਂ ਕਿਂ ਕਾਰਣਾ? ਅਤ੍ਰਸ੍ਸ ਪੇਮਂ ਵਾ ਦੋਸੋ ਵਾ. ਪੇਮੇ ਵਾ ਸਤਿ ਦੋਸੇ ਵਾ, ਛਨ੍ਦਾਪਿ ਗਚ੍ਛੇਯ੍ਯ ਦੋਸਾਪਿ ਗਚ੍ਛੇਯ੍ਯ ਮੋਹਾਪਿ ਗਚ੍ਛੇਯ੍ਯ ਭਯਾਪਿ ਗਚ੍ਛੇਯ੍ਯ.

ਸਙ੍ਘੇਨ ਅਨੁਮਤੇਨ ਪੁਗ੍ਗਲੇਨ ਅਨੁਵਿਜ੍ਜਕੇਨ ਅਨੁਵਿਜ੍ਜਿਤੁਕਾਮੇਨ ਸਙ੍ਘਗਰੁਕੇਨ ਭਵਿਤਬ੍ਬਂ ਨੋ ਪੁਗ੍ਗਲਗਰੁਕੇਨ, ਸਦ੍ਧਮ੍ਮਗਰੁਕੇਨ ਭਵਿਤਬ੍ਬਂ ਨੋ ਆਮਿਸਗਰੁਕੇਨ, ਅਤ੍ਥਵਸਿਕੇਨ ਭਵਿਤਬ੍ਬਂ ਨੋ ਪਰਿਸਕਪ੍ਪਿਕੇਨ, ਕਾਲੇਨ ਅਨੁਵਿਜ੍ਜਿਤਬ੍ਬਂ ਨੋ ਅਕਾਲੇਨ, ਭੂਤੇਨ ਅਨੁਵਿਜ੍ਜਿਤਬ੍ਬਂ ਨੋ ਅਭੂਤੇਨ, ਸਣ੍ਹੇਨ ਅਨੁਵਿਜ੍ਜਿਤਬ੍ਬਂ ਨੋ ਫਰੁਸੇਨ, ਅਤ੍ਥਸਂਹਿਤੇਨ ਅਨੁਵਿਜ੍ਜਿਤਬ੍ਬਂ ਨੋ ਅਨਤ੍ਥਸਂਹਿਤੇਨ, ਮੇਤ੍ਤਾਚਿਤ੍ਤੇਨ ਅਨੁਵਿਜ੍ਜਿਤਬ੍ਬਂ ਨੋ ਦੋਸਨ੍ਤਰੇਨ, ਨ ਉਪਕਣ੍ਣਕਜਪ੍ਪਿਨਾ ਭਵਿਤਬ੍ਬਂ, ਨ ਜਿਮ੍ਹਂ ਪੇਕ੍ਖਿਤਬ੍ਬਂ, ਨ ਅਕ੍ਖਿ ਨਿਖਣਿਤਬ੍ਬਂ, ਨ ਭਮੁਕਂ ਉਕ੍ਖਿਪਿਤਬ੍ਬਂ, ਨ ਸੀਸਂ ਉਕ੍ਖਿਪਿਤਬ੍ਬਂ, ਨ ਹਤ੍ਥਵਿਕਾਰੋ ਕਾਤਬ੍ਬੋ, ਨ ਹਤ੍ਥਮੁਦ੍ਦਾ ਦਸ੍ਸੇਤਬ੍ਬਾ.

ਆਸਨਕੁਸਲੇਨ ਭਵਿਤਬ੍ਬਂ ਨਿਸਜ੍ਜਕੁਸਲੇਨ, ਯੁਗਮਤ੍ਤਂ ਪੇਕ੍ਖਨ੍ਤੇਨ ਅਤ੍ਥਂ ਅਨੁਵਿਧਿਯਨ੍ਤੇਨ ਸਕੇ ਆਸਨੇ ਨਿਸੀਦਿਤਬ੍ਬਂ, ਨ ਚ ਆਸਨਾ ਵੁਟ੍ਠਾਤਬ੍ਬਂ, ਨ ਵੀਤਿਹਾਤਬ੍ਬਂ, ਨ ਕੁਮ੍ਮਗ੍ਗੋ ਸੇਵਿਤਬ੍ਬੋ, ਨ ਬਾਹਾਵਿਕ੍ਖੇਪਕਂ [ਨ ਵਾਚਾ ਵਿਕ੍ਖੇਪਕਂ (ਸ੍ਯਾ.)] ਭਣਿਤਬ੍ਬਂ, ਅਤੁਰਿਤੇਨ ਭਵਿਤਬ੍ਬਂ ਅਸਾਹਸਿਕੇਨ, ਅਚਣ੍ਡਿਕਤੇਨ ਭਵਿਤਬ੍ਬਂ ਵਚਨਕ੍ਖਮੇ, ਮੇਤ੍ਤਾਚਿਤ੍ਤੇਨ ਭਵਿਤਬ੍ਬਂ ਹਿਤਾਨੁਕਮ੍ਪਿਨਾ, ਕਾਰੁਣਿਕੇਨ ਭਵਿਤਬ੍ਬਂ ਹਿਤਪਰਿਸਕ੍ਕਿਨਾ, ਅਸਮ੍ਫਪ੍ਪਲਾਪਿਨਾ ਭਵਿਤਬ੍ਬਂ ਪਰਿਯਨ੍ਤਭਾਣਿਨਾ, ਅਵੇਰਵਸਿਕੇਨ ਭਵਿਤਬ੍ਬਂ ਅਨਸੁਰੁਤ੍ਤੇਨ, ਅਤ੍ਤਾ ਪਰਿਗ੍ਗਹੇਤਬ੍ਬੋ, ਪਰੋ ਪਰਿਗ੍ਗਹੇਤਬ੍ਬੋ, ਚੋਦਕੋ ਪਰਿਗ੍ਗਹੇਤਬ੍ਬੋ, ਚੁਦਿਤਕੋ ਪਰਿਗ੍ਗਹੇਤਬ੍ਬੋ, ਅਧਮ੍ਮਚੋਦਕੋ ਪਰਿਗ੍ਗਹੇਤਬ੍ਬੋ, ਅਧਮ੍ਮਚੁਦਿਤਕੋ ਪਰਿਗ੍ਗਹੇਤਬ੍ਬੋ, ਧਮ੍ਮਚੋਦਕੋ ਪਰਿਗ੍ਗਹੇਤਬ੍ਬੋ, ਧਮ੍ਮਚੁਦਿਤਕੋ ਪਰਿਗ੍ਗਹੇਤਬ੍ਬੋ, ਵੁਤ੍ਤਂ ਅਹਾਪੇਨ੍ਤੇਨ ਅਵੁਤ੍ਤਂ ਅਪਕਾਸੇਨ੍ਤੇਨ ਓਤਿਣ੍ਣਾਨਿ ਪਦਬ੍ਯਞ੍ਜਨਾਨਿ ਸਾਧੁਕਂ ਪਰਿਗ੍ਗਹੇਤ੍ਵਾ ਪਰੋ ਪਟਿਪੁਚ੍ਛਿਤ੍ਵਾ ਯਥਾ ਪਟਿਞ੍ਞਾਯ ਕਾਰੇਤਬ੍ਬੋ, ਮਨ੍ਦੋ ਹਾਸੇਤਬ੍ਬੋ [ਵੇਪੋ ਪਹਾਸੇਤਬ੍ਬੋ (ਸ੍ਯਾ.)], ਭੀਰੂ ਅਸ੍ਸਾਸੇਤਬ੍ਬੋ, ਚਣ੍ਡੋ ਨਿਸੇਧੇਤਬ੍ਬੋ, ਅਸੁਚਿ ਵਿਭਾਵੇਤਬ੍ਬੋ, ਉਜੁਮਦ੍ਦਵੇਨ ਨ ਛਨ੍ਦਾਗਤਿਂ ਗਨ੍ਤਬ੍ਬਂ, ਨ ਦੋਸਾਗਤਿਂ ਗਨ੍ਤਬ੍ਬਂ, ਨ ਮੋਹਾਗਤਿਂ ਗਨ੍ਤਬ੍ਬਂ, ਨ ਭਯਾਗਤਿਂ ਗਨ੍ਤਬ੍ਬਂ, ਮਜ੍ਝਤ੍ਤੇਨ ਭਵਿਤਬ੍ਬਂ ਧਮ੍ਮੇਸੁ ਚ ਪੁਗ੍ਗਲੇਸੁ ਚ. ਏਵਞ੍ਚ ਪਨ ਅਨੁਵਿਜ੍ਜਕੋ ਅਨੁਵਿਜ੍ਜਮਾਨੋ ਸਤ੍ਥੁ ਚੇਵ ਸਾਸਨਕਰੋ ਹੋਤਿ, ਵਿਞ੍ਞੂਨਞ੍ਚ ਸਬ੍ਰਹ੍ਮਚਾਰੀਨਂ ਪਿਯੋ ਚ ਹੋਤਿ ਮਨਾਪੋ ਚ ਗਰੁ ਚ ਭਾਵਨੀਯੋ ਚ.

੩੬੬. ਸੁਤ੍ਤਂ ਸਂਸਨ੍ਦਨਤ੍ਥਾਯ, ਓਪਮ੍ਮਂ ਨਿਦਸ੍ਸਨਤ੍ਥਾਯ, ਅਤ੍ਥੋ ਵਿਞ੍ਞਾਪਨਤ੍ਥਾਯ, ਪਟਿਪੁਚ੍ਛਾ ਠਪਨਤ੍ਥਾਯ, ਓਕਾਸਕਮ੍ਮਂ ਚੋਦਨਤ੍ਥਾਯ, ਚੋਦਨਾ ਸਾਰਣਤ੍ਥਾਯ, ਸਾਰਣਾ ਸਵਚਨੀਯਤ੍ਥਾਯ, ਸਵਚਨੀਯਂ ਪਲਿਬੋਧਤ੍ਥਾਯ, ਪਲਿਬੋਧੋ ਵਿਨਿਚ੍ਛਯਤ੍ਥਾਯ, ਵਿਨਿਚ੍ਛਯੋ ਸਨ੍ਤੀਰਣਤ੍ਥਾਯ, ਸਨ੍ਤੀਰਣਂ ਠਾਨਾਠਾਨਗਮਨਤ੍ਥਾਯ, ਠਾਨਾਠਾਨਗਮਨਂ ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਤ੍ਥਾਯ, ਪੇਸਲਾਨਂ ਭਿਕ੍ਖੂਨਂ ਸਮ੍ਪਗ੍ਗਹਤ੍ਥਾਯ, ਸਙ੍ਘੋ ਸਮ੍ਪਰਿਗ੍ਗਹਸਮ੍ਪਟਿਚ੍ਛਨਤ੍ਥਾਯ, ਸਙ੍ਘੇਨ ਅਨੁਮਤਾ ਪੁਗ੍ਗਲਾ ਪਚ੍ਚੇਕਟ੍ਠਾਯਿਨੋ ਅਵਿਸਂਵਾਦਕਟ੍ਠਾਯਿਨੋ.

ਵਿਨਯੋ ਸਂਵਰਤ੍ਥਾਯ, ਸਂਵਰੋ ਅਵਿਪ੍ਪਟਿਸਾਰਤ੍ਥਾਯ, ਅਵਿਪ੍ਪਟਿਸਾਰੋ ਪਾਮੁਜ੍ਜਤ੍ਥਾਯ, ਪਾਮੁਜ੍ਜਂ ਪੀਤਤ੍ਥਾਯ, ਪੀਤਿ ਪਸ੍ਸਦ੍ਧਤ੍ਥਾਯ, ਪਸ੍ਸਦ੍ਧਿ ਸੁਖਤ੍ਥਾਯ, ਸੁਖਂ ਸਮਾਧਤ੍ਥਾਯ, ਸਮਾਧਿ ਯਥਾਭੂਤਞਾਣਦਸ੍ਸਨਤ੍ਥਾਯ, ਯਥਾਭੂਤਞਾਣਦਸ੍ਸਨਂ ਨਿਬ੍ਬਿਦਤ੍ਥਾਯ, ਨਿਬ੍ਬਿਦਾ ਵਿਰਾਗਤ੍ਥਾਯ, ਵਿਰਾਗੋ ਵਿਮੁਤ੍ਤਤ੍ਥਾਯ, ਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਤ੍ਥਾਯ, ਵਿਮੁਤ੍ਤਿਞਾਣਦਸ੍ਸਨਂ ਅਨੁਪਾਦਾਪਰਿਨਿਬ੍ਬਾਨਤ੍ਥਾਯ. ਏਤਦਤ੍ਥਾ ਕਥਾ, ਏਤਦਤ੍ਥਾ ਮਨ੍ਤਨਾ, ਏਤਦਤ੍ਥਾ ਉਪਨਿਸਾ, ਏਤਦਤ੍ਥਂ ਸੋਤਾਵਧਾਨਂ – ਯਦਿਦਂ ਅਨੁਪਾਦਾਚਿਤ੍ਤਸ੍ਸ ਵਿਮੋਕ੍ਖੋਤਿ.

੩੬੭. ਅਨੁਯੋਗਵਤ੍ਤਂ ਨਿਸਾਮਯ, ਕੁਸਲੇਨ ਬੁਦ੍ਧਿਮਤਾ ਕਤਂ;

ਸੁਵੁਤ੍ਤਂ ਸਿਕ੍ਖਾਪਦਾਨੁਲੋਮਿਕਂ, ਗਤਿਂ ਨ ਨਾਸੇਨ੍ਤੋ ਸਮ੍ਪਰਾਯਿਕਂ.

ਵਤ੍ਥੁਂ ਵਿਪਤ੍ਤਿਂ ਆਪਤ੍ਤਿਂ, ਨਿਦਾਨਂ ਆਕਾਰਅਕੋਵਿਦੋ;

ਪੁਬ੍ਬਾਪਰਂ ਨ ਜਾਨਾਤਿ, ਕਤਾਕਤਂ ਸਮੇਨ ਚ.

ਕਮ੍ਮਞ੍ਚ ਅਧਿਕਰਣਞ੍ਚ, ਸਮਥੇ ਚਾਪਿ ਅਕੋਵਿਦੋ;

ਰਤ੍ਤੋ ਦੁਟ੍ਠੋ ਚ ਮੂਲ਼੍ਹੋ ਚ, ਭਯਾ ਮੋਹਾ ਚ ਗਚ੍ਛਤਿ.

ਨ ਚ ਸਞ੍ਞਤ੍ਤਿਕੁਸਲੋ, ਨਿਜ੍ਝਤ੍ਤਿਯਾ ਚ ਅਕੋਵਿਦੋ;

ਲਦ੍ਧਪਕ੍ਖੋ ਅਹਿਰਿਕੋ, ਕਣ੍ਹਕਮ੍ਮੋ ਅਨਾਦਰੋ;

ਸ ਵੇ [ਸਚੇ (ਕ.)] ਤਾਦਿਸਕੋ ਭਿਕ੍ਖੁ, ਅਪ੍ਪਟਿਕ੍ਖੋਤਿ ਵੁਚ੍ਚਤਿ.

ਵਤ੍ਥੁਂ ਵਿਪਤ੍ਤਿਂ ਆਪਤ੍ਤਿਂ, ਨਿਦਾਨਂ ਆਕਾਰਕੋਵਿਦੋ;

ਪੁਬ੍ਬਾਪਰਞ੍ਚ ਜਾਨਾਤਿ, ਕਤਾਕਤਂ ਸਮੇਨ ਚ.

ਕਮ੍ਮਞ੍ਚ ਅਧਿਕਰਣਞ੍ਚ, ਸਮਥੇ ਚਾਪਿ ਕੋਵਿਦੋ;

ਅਰਤ੍ਤੋ ਅਦੁਟ੍ਠੋ ਅਮੂਲ਼੍ਹੋ, ਭਯਾ ਮੋਹਾ ਨ ਗਚ੍ਛਤਿ.

ਸਞ੍ਞਤ੍ਤਿਯਾ ਚ ਕੁਸਲੋ, ਨਿਜ੍ਝਤ੍ਤਿਯਾ ਚ ਕੋਵਿਦੋ;

ਲਦ੍ਧਪਕ੍ਖੋ ਹਿਰਿਮਨੋ, ਸੁਕ੍ਕਕਮ੍ਮੋ ਸਗਾਰਵੋ;

ਸ ਵੇ ਤਾਦਿਸਕੋ ਭਿਕ੍ਖੁ, ਸਪ੍ਪਟਿਕ੍ਖੋਤਿ ਵੁਚ੍ਚਤੀਤਿ.

ਚੂਲ਼ਸਙ੍ਗਾਮੋ ਨਿਟ੍ਠਿਤੋ.