੭. ਮਹਾਪੇਸਕਾਰਸਿਕ੍ਖਾਪਦਂ

੬੪੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਿਸੋ ਪਵਾਸਂ ਗਚ੍ਛਨ੍ਤੋ ਪਜਾਪਤਿਂ ਏਤਦਵੋਚ – ‘‘ਸੁਤ੍ਤਂ ਧਾਰਯਿਤ੍ਵਾ ਅਮੁਕਸ੍ਸ ਤਨ੍ਤਵਾਯਸ੍ਸ ਦੇਹਿ, ਚੀਵਰਂ ਵਾਯਾਪੇਤ੍ਵਾ ਨਿਕ੍ਖਿਪ, ਆਗਤੋ ਅਯ੍ਯਂ ਉਪਨਨ੍ਦਂ ਚੀਵਰੇਨ ਅਚ੍ਛਾਦੇਸ੍ਸਾਮੀ’’ਤਿ. ਅਸ੍ਸੋਸਿ ਖੋ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਤਸ੍ਸ ਪੁਰਿਸਸ੍ਸ ਇਮਂ ਵਾਚਂ ਭਾਸਮਾਨਸ੍ਸ. ਅਥ ਖੋ ਸੋ ਭਿਕ੍ਖੁ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਮਹਾਪੁਞ੍ਞੋਸਿ ਤ੍ਵਂ, ਆਵੁਸੋ ਉਪਨਨ੍ਦ, ਅਮੁਕਸ੍ਮਿਂ ਓਕਾਸੇ ਅਞ੍ਞਤਰੋ ਪੁਰਿਸੋ ਪਵਾਸਂ ਗਚ੍ਛਨ੍ਤੋ ਪਜਾਪਤਿਂ ਏਤਦਵੋਚ – ‘‘ਸੁਤ੍ਤਂ ਧਾਰਯਿਤ੍ਵਾ ਅਮੁਕਸ੍ਸ ਤਨ੍ਤਵਾਯਸ੍ਸ ਦੇਹਿ, ਚੀਵਰਂ ਵਾਯਾਪੇਤ੍ਵਾ ਨਿਕ੍ਖਿਪ, ਆਗਤੋ ਅਯ੍ਯਂ ਉਪਨਨ੍ਦਂ ਚੀਵਰੇਨ ਅਚ੍ਛਾਦੇਸ੍ਸਾਮੀ’’ਤਿ. ‘‘ਅਤ੍ਥਾਵੁਸੋ, ਮਂ ਸੋ ਉਪਟ੍ਠਾਕੋ’’ਤਿ. ਸੋਪਿ ਖੋ ਤਨ੍ਤਵਾਯੋ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਉਪਟ੍ਠਾਕੋ ਹੋਤਿ. ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਯੇਨ ਸੋ ਤਨ੍ਤਵਾਯੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਤਨ੍ਤਵਾਯਂ ਏਤਦਵੋਚ – ‘‘ਇਦਂ ਖੋ, ਆਵੁਸੋ, ਚੀਵਰਂ ਮਂ ਉਦ੍ਦਿਸ੍ਸ ਵਿਯ੍ਯਤਿ; ਆਯਤਞ੍ਚ ਕਰੋਹਿ ਵਿਤ੍ਥਤਞ੍ਚ. ਅਪ੍ਪਿਤਞ੍ਚ ਸੁਵੀਤਞ੍ਚ ਸੁਪ੍ਪਵਾਯਿਤਞ੍ਚ ਸੁਵਿਲੇਖਿਤਞ੍ਚ ਸੁਵਿਤਚ੍ਛਿਤਞ੍ਚ ਕਰੋਹੀ’’ਤਿ. ‘‘ਏਤੇ ਖੋ ਮੇ, ਭਨ੍ਤੇ, ਸੁਤ੍ਤਂ ਧਾਰਯਿਤ੍ਵਾ ਅਦਂਸੁ; ਇਮਿਨਾ ਸੁਤ੍ਤੇਨ ਚੀਵਰਂ ਵਿਨਾਹੀ’’ਤਿ. ‘‘ਨ, ਭਨ੍ਤੇ, ਸਕ੍ਕਾ ਆਯਤਂ ਵਾ ਵਿਤ੍ਥਤਂ ਵਾ ਅਪ੍ਪਿਤਂ ਵਾ ਕਾਤੁਂ. ਸਕ੍ਕਾ ਚ ਖੋ, ਭਨ੍ਤੇ, ਸੁਵੀਤਞ੍ਚ ਸੁਪ੍ਪਵਾਯਿਤਞ੍ਚ ਸੁਵਿਲੇਖਿਤਞ੍ਚ ਸੁਵਿਤਚ੍ਛਿਤਞ੍ਚ ਕਾਤੁ’’ਨ੍ਤਿ. ‘‘ਇਙ੍ਘ ਤ੍ਵਂ, ਆਵੁਸੋ, ਆਯਤਞ੍ਚ ਕਰੋਹਿ ਵਿਤ੍ਥਤਞ੍ਚ ਅਪ੍ਪਿਤਞ੍ਚ. ਨ ਤੇਨ ਸੁਤ੍ਤੇਨ ਪਟਿਬਦ੍ਧਂ ਭਵਿਸ੍ਸਤੀ’’ਤਿ.

ਅਥ ਖੋ ਸੋ ਤਨ੍ਤਵਾਯੋ ਯਥਾਭਤਂ ਸੁਤ੍ਤਂ ਤਨ੍ਤੇ ਉਪਨੇਤ੍ਵਾ ਯੇਨ ਸਾ ਇਤ੍ਥੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਇਤ੍ਥਿਂ ਏਤਦਵੋਚ – ‘‘ਸੁਤ੍ਤੇਨ, ਅਯ੍ਯੇ, ਅਤ੍ਥੋ’’ਤਿ. ‘‘ਨਨੁ ਤ੍ਵਂ ਅਯ੍ਯੋ [ਅਯ੍ਯ (ਸ੍ਯਾ.)] ਮਯਾ ਵੁਤ੍ਤੋ – ‘ਇਮਿਨਾ ਸੁਤ੍ਤੇਨ ਚੀਵਰਂ ਵਿਨਾਹੀ’’’ਤਿ. ‘‘ਸਚ੍ਚਾਹਂ, ਅਯ੍ਯੇ, ਤਯਾ ਵੁਤ੍ਤੋ – ‘ਇਮਿਨਾ ਸੁਤ੍ਤੇਨ ਚੀਵਰਂ ਵਿਨਾਹੀ’ਤਿ. ਅਪਿਚ, ਮਂ ਅਯ੍ਯੋ ਉਪਨਨ੍ਦੋ ਏਵਮਾਹ – ‘ਇਙ੍ਘ ਤ੍ਵਂ, ਆਵੁਸੋ, ਆਯਤਞ੍ਚ ਕਰੋਹਿ ਵਿਤ੍ਥਤਞ੍ਚ ਅਪ੍ਪਿਤਞ੍ਚ, ਨ ਤੇਨ ਸੁਤ੍ਤੇਨ ਪਟਿਬਦ੍ਧਂ ਭਵਿਸ੍ਸਤੀ’’’ਤਿ. ਅਥ ਖੋ ਸਾ ਇਤ੍ਥੀ ਯਤ੍ਤਕਂਯੇਵ ਸੁਤ੍ਤਂ ਪਠਮਂ ਅਦਾਸਿ ਤਤ੍ਤਕਂ ਪਚ੍ਛਾ ਅਦਾਸਿ. ਅਸ੍ਸੋਸਿ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ – ‘‘ਸੋ ਕਿਰ ਪੁਰਿਸੋ ਪਵਾਸਤੋ ਆਗਤੋ’’ਤਿ. ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਯੇਨ ਤਸ੍ਸ ਪੁਰਿਸਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਸੋ ਪੁਰਿਸੋ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਪੁਰਿਸੋ ਪਜਾਪਤਿਂ ਏਤਦਵੋਚ – ‘‘ਵੀਤਂ ਤਂ ਚੀਵਰ’’ਨ੍ਤਿ? ‘‘ਆਮਾਯ੍ਯ, ਵੀਤਂ ਤਂ ਚੀਵਰ’’ਨ੍ਤਿ. ‘‘ਆਹਰ, ਅਯ੍ਯਂ ਉਪਨਨ੍ਦਂ ਚੀਵਰੇਨ ਅਚ੍ਛਾਦੇਸ੍ਸਾਮੀ’’ਤਿ. ਅਥ ਖੋ ਸਾ ਇਤ੍ਥੀ ਤਂ ਚੀਵਰਂ ਨੀਹਰਿਤ੍ਵਾ ਸਾਮਿਕਸ੍ਸ ਦਤ੍ਵਾ ਏਤਮਤ੍ਥਂ ਆਰੋਚੇਸਿ. ਅਥ ਖੋ ਸੋ ਪੁਰਿਸੋ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਚੀਵਰਂ ਦਤ੍ਵਾ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਮਹਿਚ੍ਛਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਅਸਨ੍ਤੁਟ੍ਠਾ. ਨਯਿਮੇ ਸੁਕਰਾ ਚੀਵਰੇਨ ਅਚ੍ਛਾਦੇਤੁਂ. ਕਥਞ੍ਹਿ ਨਾਮ ਅਯ੍ਯੋ ਉਪਨਨ੍ਦੋ ਮਯਾ ਪੁਬ੍ਬੇ ਅਪ੍ਪਵਾਰਿਤੋ ਤਨ੍ਤਵਾਯੇ [ਗਹਪਤਿਕਸ੍ਸ ਤਨ੍ਤਵਾਯੇ (ਕ.)] ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜਿਸ੍ਸਤੀ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਪੁਰਿਸਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪੁਬ੍ਬੇ ਅਪ੍ਪਵਾਰਿਤੋ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਪੁਬ੍ਬੇ ਅਪ੍ਪਵਾਰਿਤੋ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ‘‘ਞਾਤਕੋ ਤੇ, ਉਪਨਨ੍ਦ, ਅਞ੍ਞਾਤਕੋ’’ਤਿ? ‘‘ਅਞ੍ਞਾਤਕੋ, ਭਗਵਾ’’ਤਿ. ‘‘ਅਞ੍ਞਾਤਕੋ, ਮੋਘਪੁਰਿਸ, ਅਞ੍ਞਾਤਕਸ੍ਸ ਨ ਜਾਨਾਤਿ ਪਤਿਰੂਪਂ ਵਾ ਅਪ੍ਪਤਿਰੂਪਂ ਵਾ ਸਨ੍ਤਂ ਵਾ ਅਸਨ੍ਤਂ ਵਾ. ਤਤ੍ਥ ਨਾਮ ਤ੍ਵਂ, ਮੋਘਪੁਰਿਸ, ਪੁਬ੍ਬੇ ਅਪ੍ਪਵਾਰਿਤੋ ਅਞ੍ਞਾਤਕਸ੍ਸ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੬੪੨. ‘‘ਭਿਕ੍ਖੁਂ ਪਨੇਵ ਉਦ੍ਦਿਸ੍ਸ ਅਞ੍ਞਾਤਕੋ ਗਹਪਤਿ ਵਾ ਗਹਪਤਾਨੀ ਵਾ ਤਨ੍ਤਵਾਯੇਹਿ ਚੀਵਰਂ ਵਾਯਾਪੇਯ੍ਯ, ਤਤ੍ਰ ਚੇ ਸੋ ਭਿਕ੍ਖੁ ਪੁਬ੍ਬੇ ਅਪ੍ਪਵਾਰਿਤੋ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜੇਯ੍ਯ – ‘ਇਦਂ ਖੋ, ਆਵੁਸੋ, ਚੀਵਰਂ ਮਂ ਉਦ੍ਦਿਸ੍ਸ ਵਿਯ੍ਯਤਿ. ਆਯਤਞ੍ਚ ਕਰੋਥ ਵਿਤ੍ਥਤਞ੍ਚ. ਅਪ੍ਪਿਤਞ੍ਚ ਸੁਵੀਤਞ੍ਚ ਸੁਪ੍ਪਵਾਯਿਤਞ੍ਚ ਸੁਵਿਲੇਖਿਤਞ੍ਚ ਸੁਵਿਤਚ੍ਛਿਤਞ੍ਚ ਕਰੋਥ. ਅਪ੍ਪੇਵ ਨਾਮ ਮਯਮ੍ਪਿ ਆਯਸ੍ਮਨ੍ਤਾਨਂ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯਾਮਾ’ਤਿ. ਏਵਞ੍ਚ ਸੋ ਭਿਕ੍ਖੁ ਵਤ੍ਵਾ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯ ਅਨ੍ਤਮਸੋ ਪਿਣ੍ਡਪਾਤਮਤ੍ਤਮ੍ਪਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.

੬੪੩. ਭਿਕ੍ਖੁਂ ਪਨੇਵ ਉਦ੍ਦਿਸ੍ਸਾਤਿ ਭਿਕ੍ਖੁਸ੍ਸਤ੍ਥਾਯ ਭਿਕ੍ਖੁਂ ਆਰਮ੍ਮਣਂ ਕਰਿਤ੍ਵਾ ਭਿਕ੍ਖੁਂ ਅਚ੍ਛਾਦੇਤੁਕਾਮੋ.

ਅਞ੍ਞਾਤਕੋ ਨਾਮ ਮਾਤਿਤੋ ਵਾ ਪਿਤਿਤੋ ਵਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧੋ.

ਗਹਪਤਿ ਨਾਮ ਯੋ ਕੋਚਿ ਅਗਾਰਂ ਅਜ੍ਝਾਵਸਤਿ.

ਗਹਪਤਾਨੀ ਨਾਮ ਯਾ ਕਾਚਿ ਅਗਾਰਂ ਅਜ੍ਝਾਵਸਤਿ.

ਤਨ੍ਤਵਾਯੇਹੀਤਿ ਪੇਸਕਾਰੇਹਿ.

ਚੀਵਰਂ ਨਾਮ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰਂ ਵਿਕਪ੍ਪਨੁਪਗਂ ਪਚ੍ਛਿਮਂ.

ਵਾਯਾਪੇਯ੍ਯਾਤਿ ਵਿਨਾਪੇਤਿ.

ਤਤ੍ਰ ਚੇ ਸੋ ਭਿਕ੍ਖੂਤਿ ਯਂ ਭਿਕ੍ਖੁਂ ਉਦ੍ਦਿਸ੍ਸ ਚੀਵਰਂ ਵਿਯ੍ਯਤਿ ਸੋ ਭਿਕ੍ਖੁ.

ਪੁਬ੍ਬੇ ਅਪ੍ਪਵਾਰਿਤੋਤਿ ਪੁਬ੍ਬੇ ਅਵੁਤ੍ਤੋ ਹੋਤਿ – ‘‘ਕੀਦਿਸੇਨ ਤੇ, ਭਨ੍ਤੇ, ਚੀਵਰੇਨ ਅਤ੍ਥੋ, ਕੀਦਿਸਂ ਤੇ ਚੀਵਰਂ ਵਾਯਾਪੇਮੀ’’ਤਿ?

ਤਨ੍ਤਵਾਯੇ ਉਪਸਙ੍ਕਮਿਤ੍ਵਾਤਿ ਘਰਂ ਗਨ੍ਤ੍ਵਾ ਯਤ੍ਥ ਕਤ੍ਥਚਿ ਉਪਸਙ੍ਕਮਿਤ੍ਵਾ.

ਚੀਵਰੇ ਵਿਕਪ੍ਪਂ ਆਪਜ੍ਜੇਯ੍ਯਾਤਿ – ‘‘ਇਦਂ ਖੋ, ਆਵੁਸੋ, ਚੀਵਰਂ ਮਂ ਉਦ੍ਦਿਸ੍ਸ ਵਿਯ੍ਯਤਿ, ਆਯਤਞ੍ਚ ਕਰੋਥ ਵਿਤ੍ਥਤਞ੍ਚ. ਅਪ੍ਪਿਤਞ੍ਚ ਸੁਵੀਤਞ੍ਚ ਸੁਪ੍ਪਵਾਯਿਤਞ੍ਚ ਸੁਵਿਲੇਖਿਤਞ੍ਚ ਸੁਵਿਤਚ੍ਛਿਤਞ੍ਚ ਕਰੋਥ. ਅਪ੍ਪੇਵ ਨਾਮ ਮਯਮ੍ਪਿ ਆਯਸ੍ਮਨ੍ਤਾਨਂ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯਾਮਾ’’ਤਿ.

ਏਵਞ੍ਚ ਸੋ ਭਿਕ੍ਖੁ ਵਤ੍ਵਾ ਕਿਞ੍ਚਿਮਤ੍ਤਂ ਅਨੁਪਦਜ੍ਜੇਯ੍ਯ ਅਨ੍ਤਮਸੋ ਪਿਣ੍ਡਪਾਤਮਤ੍ਤਮ੍ਪੀਤਿ. ਪਿਣ੍ਡਪਾਤੋ ਨਾਮ ਯਾਗੁਪਿ ਭਤ੍ਤਮ੍ਪਿ ਖਾਦਨੀਯਮ੍ਪਿ ਚੁਣ੍ਣਪਿਣ੍ਡੋਪਿ ਦਨ੍ਤਕਟ੍ਠਮ੍ਪਿ ਦਸਿਕਸੁਤ੍ਤਮ੍ਪਿ, ਅਨ੍ਤਮਸੋ ਧਮ੍ਮਮ੍ਪਿ ਭਣਤਿ.

ਤਸ੍ਸ ਵਚਨੇਨ ਆਯਤਂ ਵਾ ਵਿਤ੍ਥਤਂ ਵਾ ਅਪ੍ਪਿਤਂ ਵਾ ਕਰੋਤਿ, ਪਯੋਗੇ ਦੁਕ੍ਕਟਂ. ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬਂ…ਪੇ… ਇਦਂ ਮੇ, ਭਨ੍ਤੇ, ਚੀਵਰਂ ਪੁਬ੍ਬੇ ਅਪ੍ਪਵਾਰਿਤੋ ਅਞ੍ਞਾਤਕਸ੍ਸ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਨ੍ਨਂ ਨਿਸ੍ਸਗ੍ਗਿਯਂ. ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਦਦੇਯ੍ਯੁਨ੍ਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.

੬੪੪. ਅਞ੍ਞਾਤਕੇ ਅਞ੍ਞਾਤਕਸਞ੍ਞੀ ਪੁਬ੍ਬੇ ਅਪ੍ਪਵਾਰਿਤੋ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਞ੍ਞਾਤਕੇ ਵੇਮਤਿਕੋ ਪੁਬ੍ਬੇ ਅਪ੍ਪਵਾਰਿਤੋ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਞ੍ਞਾਤਕੇ ਞਾਤਕਸਞ੍ਞੀ ਪੁਬ੍ਬੇ ਅਪ੍ਪਵਾਰਿਤੋ ਗਹਪਤਿਕਸ੍ਸ ਤਨ੍ਤਵਾਯੇ ਉਪਸਙ੍ਕਮਿਤ੍ਵਾ ਚੀਵਰੇ ਵਿਕਪ੍ਪਂ ਆਪਜ੍ਜਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਞਾਤਕੇ ਅਞਾਤਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਕੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਕੇ ਞਾਤਕਸਞ੍ਞੀ, ਅਨਾਪਤ੍ਤਿ.

੬੪੫. ਅਨਾਪਤ੍ਤਿ – ਞਾਤਕਾਨਂ, ਪਵਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਮਹਗ੍ਘਂ ਵਾਯਾਪੇਤੁਕਾਮਸ੍ਸ ਅਪ੍ਪਗ੍ਘਂ ਵਾਯਾਪੇਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਮਹਾਪੇਸਕਾਰਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ.