੧੦. ਕਯਵਿਕ੍ਕਯਸਿਕ੍ਖਾਪਦਂ

੫੯੩. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪਟ੍ਟੋ ਹੋਤਿ ਚੀਵਰਕਮ੍ਮਂ ਕਾਤੁਂ. ਸੋ ਪਟਪਿਲੋਤਿਕਾਨਂ ਸਙ੍ਘਾਟਿਂ ਕਰਿਤ੍ਵਾ ਸੁਰਤ੍ਤਂ ਸੁਪਰਿਕਮ੍ਮਕਤਂ ਕਤ੍ਵਾ ਪਾਰੁਪਿ. ਅਥ ਖੋ ਅਞ੍ਞਤਰੋ ਪਰਿਬ੍ਬਾਜਕੋ ਮਹਗ੍ਘਂ ਪਟਂ ਪਾਰੁਪਿਤ੍ਵਾ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਸੁਨ੍ਦਰਾ ਖੋ ਤ੍ਯਾਯਂ, ਆਵੁਸੋ, ਸਙ੍ਘਾਟਿ; ਦੇਹਿ ਮੇ ਪਟੇਨਾ’’ਤਿ. ‘‘ਜਾਨਾਹਿ, ਆਵੁਸੋ’’ਤਿ. ‘‘ਆਮਾਵੁਸੋ, ਜਾਨਾਮੀ’’ਤਿ. ‘‘ਹਨ੍ਦਾਵੁਸੋ’’ਤਿ, ਅਦਾਸਿ. ਅਥ ਖੋ ਸੋ ਪਰਿਬ੍ਬਾਜਕੋ ਤਂ ਸਙ੍ਘਾਟਿਂ ਪਾਰੁਪਿਤ੍ਵਾ ਪਰਿਬ੍ਬਾਜਕਾਰਾਮਂ ਅਗਮਾਸਿ. ਪਰਿਬ੍ਬਾਜਕਾ ਤਂ ਪਰਿਬ੍ਬਾਜਕਂ ਏਤਦਵੋਚੁਂ – ‘‘ਸੁਨ੍ਦਰਾ ਖੋ ਤ੍ਯਾਯਂ, ਆਵੁਸੋ, ਸਙ੍ਘਾਟਿ; ਕੁਤੋ ਤਯਾ ਲਦ੍ਧਾ’’ਤਿ? ‘‘ਤੇਨ ਮੇ, ਆਵੁਸੋ, ਪਟੇਨ ਪਰਿਵਤ੍ਤਿਤਾ’’ਤਿ. ‘‘ਕਤਿਹਿਪਿ ਤ੍ਯਾਯਂ, ਆਵੁਸੋ, ਸਙ੍ਘਾਟਿ ਭਵਿਸ੍ਸਤਿ, ਸੋਯੇਵ ਤੇ ਪਟੋ ਵਰੋ’’ਤਿ.

ਅਥ ਖੋ ਸੋ ਪਰਿਬ੍ਬਾਜਕੋ – ‘‘ਸਚ੍ਚਂ ਖੋ ਪਰਿਬ੍ਬਾਜਕਾ ਆਹਂਸੁ – ‘ਕਤਿਹਿਪਿ ਮ੍ਯਾਯਂ ਸਙ੍ਘਾਟਿ ਭਵਿਸ੍ਸਤਿ! ਸੋਯੇਵ ਮੇ ਪਟੋ ਵਰੋ’’’ਤਿ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਹਨ੍ਦ ਤੇ, ਆਵੁਸੋ, ਸਙ੍ਘਾਟਿ [ਸਙ੍ਘਾਟਿਂ (ਸ੍ਯਾ. ਕ.)]; ਦੇਹਿ ਮੇ ਪਟ’’ਨ੍ਤਿ. ‘‘ਨਨੁ ਤ੍ਵਂ, ਆਵੁਸੋ, ਮਯਾ ਵੁਤ੍ਤੋ – ‘ਜਾਨਾਹਿ, ਆਵੁਸੋ’ਤਿ! ਨਾਹ ਦਸ੍ਸਾਮੀ’’ਤਿ. ਅਥ ਖੋ ਸੋ ਪਰਿਬ੍ਬਾਜਕੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਗਿਹੀਪਿ ਨਂ ਗਿਹਿਸ੍ਸ ਵਿਪ੍ਪਟਿਸਾਰਿਸ੍ਸ ਦੇਨ੍ਤਿ, ਕਿਂ ਪਨ ਪਬ੍ਬਜਿਤੋ ਪਬ੍ਬਜਿਤਸ੍ਸ ਨ ਦਸ੍ਸਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਪਰਿਬ੍ਬਾਜਕਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪਰਿਬ੍ਬਾਜਕੇਨ ਸਦ੍ਧਿਂ ਕਯਵਿਕ੍ਕਯਂ ਸਮਾਪਜ੍ਜਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਪਰਿਬ੍ਬਾਜਕੇਨ ਸਦ੍ਧਿਂ ਕਯਵਿਕ੍ਕਯਂ ਸਮਾਪਜ੍ਜਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਪਰਿਬ੍ਬਾਜਕੇਨ ਸਦ੍ਧਿਂ ਕਯਵਿਕ੍ਕਯਂ ਸਮਾਪਜ੍ਜਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੫੯੪. ‘‘ਯੋ ਪਨ ਭਿਕ੍ਖੁ ਨਾਨਪ੍ਪਕਾਰਕਂ ਕਯਵਿਕ੍ਕਯਂ ਸਮਾਪਜ੍ਜੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.

੫੯੫. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਨਾਨਪ੍ਪਕਾਰਕਂ ਨਾਮ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾ, ਅਨ੍ਤਮਸੋ ਚੁਣ੍ਣਪਿਣ੍ਡੋਪਿ ਦਨ੍ਤਕਟ੍ਠਮ੍ਪਿ ਦਸਿਕਸੁਤ੍ਤਮ੍ਪਿ.

ਕਯਵਿਕ੍ਕਯਂ ਸਮਾਪਜ੍ਜੇਯ੍ਯਾਤਿ ਇਮਿਨਾ ਇਮਂ ਦੇਹਿ, ਇਮਿਨਾ ਇਮਂ ਆਹਰ, ਇਮਿਨਾ ਇਮਂ ਪਰਿਵਤ੍ਤੇਹਿ, ਇਮਿਨਾ ਇਮਂ ਚੇਤਾਪੇਹੀਤਿ. ਅਜ੍ਝਾਚਰਤਿ, ਆਪਤ੍ਤਿ ਦੁਕ੍ਕਟਸ੍ਸ. ਯਤੋ ਕਯਿਤਞ੍ਚ ਹੋਤਿ ਵਿਕ੍ਕਯਿਤਞ੍ਚ ਅਤ੍ਤਨੋ ਭਣ੍ਡਂ ਪਰਹਤ੍ਥਗਤਂ ਪਰਭਣ੍ਡਂ ਅਤ੍ਤਨੋ ਹਤ੍ਥਗਤਂ, ਨਿਸ੍ਸਗ੍ਗਿਯਂ ਹੋਤਿ. ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬਂ…ਪੇ… ਅਹਂ, ਭਨ੍ਤੇ, ਨਾਨਪ੍ਪਕਾਰਕਂ ਕਯਵਿਕ੍ਕਯਂ ਸਮਾਪਜ੍ਜਿਂ. ਇਦਂ ਮੇ ਨਿਸ੍ਸਗ੍ਗਿਯਂ. ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਦਦੇਯ੍ਯੁਨ੍ਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.

੫੯੬. ਕਯਵਿਕ੍ਕਯੇ ਕਯਵਿਕ੍ਕਯਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਕਯਵਿਕ੍ਕਯੇ ਵੇਮਤਿਕੋ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਕਯਵਿਕ੍ਕਯੇ ਨਕਯਵਿਕ੍ਕਯਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਨਕਯਵਿਕ੍ਕਯੇ ਕਯਵਿਕ੍ਕਯਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਨਕਯਵਿਕ੍ਕਯੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਨਕਯਵਿਕ੍ਕਯੇ ਨਕਯਵਿਕ੍ਕਯਸਞ੍ਞੀ, ਅਨਾਪਤ੍ਤਿ.

੫੯੭. ਅਨਾਪਤ੍ਤਿ – ਅਗ੍ਘਂ ਪੁਚ੍ਛਤਿ, ਕਪ੍ਪਿਯਕਾਰਕਸ੍ਸ ਆਚਿਕ੍ਖਤਿ, ‘‘ਇਦਂ ਅਮ੍ਹਾਕਂ ਅਤ੍ਥਿ, ਅਮ੍ਹਾਕਞ੍ਚ ਇਮਿਨਾ ਚ ਇਮਿਨਾ ਚ ਅਤ੍ਥੋ’’ਤਿ ਭਣਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਕਯਵਿਕ੍ਕਯਸਿਕ੍ਖਾਪਦਂ ਨਿਟ੍ਠਿਤਂ ਦਸਮਂ.

ਕੋਸਿਯਵਗ੍ਗੋ ਦੁਤਿਯੋ.

ਤਸ੍ਸੁਦ੍ਦਾਨਂ –

ਕੋਸਿਯਾ ਸੁਦ੍ਧਦ੍ਵੇਭਾਗਾ, ਛਬ੍ਬਸ੍ਸਾਨਿ ਨਿਸੀਦਨਂ;

ਦ੍ਵੇ ਚ ਲੋਮਾਨਿ ਉਗ੍ਗਣ੍ਹੇ, ਉਭੋ ਨਾਨਪ੍ਪਕਾਰਕਾਤਿ.