੧. ਕੋਸਿਯਸਿਕ੍ਖਾਪਦਂ
੫੪੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਆਲ਼ਵਿਯਂ ਵਿਹਰਤਿ ਅਗ੍ਗਾਲ਼ਵੇ ਚੇਤਿਯੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਕੋਸਿਯਕਾਰਕੇ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਬਹੂ, ਆਵੁਸੋ, ਕੋਸਕਾਰਕੇ ਪਚਥ, ਅਮ੍ਹਾਕਮ੍ਪਿ ਦਸ੍ਸਥ, ਮਯਮ੍ਪਿ ਇਚ੍ਛਾਮ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਤੁ’’ਨ੍ਤਿ. ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਅਮ੍ਹੇ ਉਪਸਙ੍ਕਮਿਤ੍ਵਾ ਏਵਂ ਵਕ੍ਖਨ੍ਤਿ – ‘ਬਹੂ, ਆਵੁਸੋ, ਕੋਸਕਾਰਕੇ ਪਚਥ, ਅਮ੍ਹਾਕਮ੍ਪਿ ਦਸ੍ਸਥ, ਮਯਮ੍ਪਿ ਇਚ੍ਛਾਮ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਤੁ’ਨ੍ਤਿ! ਅਮ੍ਹਾਕਮ੍ਪਿ ਅਲਾਭਾ, ਅਮ੍ਹਾਕਮ੍ਪਿ ਦੁਲ੍ਲਦ੍ਧਂ, ਯੇ ਮਯਂ ਆਜੀਵਸ੍ਸ ਹੇਤੁ ਪੁਤ੍ਤਦਾਰਸ੍ਸ ਕਾਰਣਾ ਬਹੂ ਖੁਦ੍ਦਕੇ ਪਾਣੇ ਸਙ੍ਘਾਤਂ ਆਪਾਦੇਮਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਕੋਸਿਯਕਾਰਕੇ ਉਪਸਙ੍ਕਮਿਤ੍ਵਾ ਏਵਂ ਵਕ੍ਖਨ੍ਤਿ – ‘ਬਹੂ, ਆਵੁਸੋ, ਕੋਸਕਾਰਕੇ ਪਚਥ, ਅਮ੍ਹਾਕਮ੍ਪਿ ਦਸ੍ਸਥ, ਮਯਮ੍ਪਿ ਇਚ੍ਛਾਮ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਤੁ’’’ਨ੍ਤਿ! ਅਥ ਖੋ ਤੇ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਕੋਸਿਯਕਾਰਕੇ ਉਪਸਙ੍ਕਮਿਤ੍ਵਾ ਏਵਂ ਵਦੇਥ – ‘ਬਹੂ, ਆਵੁਸੋ, ਕੋਸਕਾਰਕੇ ਪਚਥ, ਅਮ੍ਹਾਕਮ੍ਪਿ ਦਸ੍ਸਥ, ਮਯਮ੍ਪਿ ਇਚ੍ਛਾਮ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਤੁ’’’ਨ੍ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਕੋਸਿਯਕਾਰਕੇ ਉਪਸਙ੍ਕਮਿਤ੍ਵਾ ਏਵਂ ਵਕ੍ਖਥ – ਬਹੂ, ਆਵੁਸੋ, ਕੋਸਕਾਰਕੇ ਪਚਥ, ਅਮ੍ਹਾਕਮ੍ਪਿ ਦਸ੍ਸਥ, ਮਯਮ੍ਪਿ ਇਚ੍ਛਾਮ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਤੁਨ੍ਤਿ. ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
੫੪੩. ‘‘ਯੋ ਪਨ ਭਿਕ੍ਖੁ ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਰਾਪੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.
੫੪੪. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.
ਸਨ੍ਥਤਂ ਨਾਮ ਸਨ੍ਥਰਿਤ੍ਵਾ ਕਤਂ ਹੋਤਿ ਅਵਾਯਿਮਂ.
ਕਾਰਾਪੇਯ੍ਯਾਤਿ ਏਕੇਨਪਿ ਕੋਸਿਯਂਸੁਨਾ ਮਿਸ੍ਸਿਤ੍ਵਾ ਕਰੋਤਿ ਵਾ ਕਾਰਾਪੇਤਿ ਵਾ, ਪਯੋਗੇ ਦੁਕ੍ਕਟਂ. ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬ…ਪੇ… ਇਦਂ ਮੇ, ਭਨ੍ਤੇ, ਕੋਸਿਯਮਿਸ੍ਸਕਂ ਸਨ੍ਥਤਂ ਕਾਰਾਪਿਤਂ ਨਿਸ੍ਸਗ੍ਗਿਯਂ. ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਦਦੇਯ੍ਯੁਨ੍ਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.
੫੪੫. ਅਤ੍ਤਨਾ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਤ੍ਤਨਾ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਪਰੇਹਿ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਪਰੇਹਿ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.
ਅਞ੍ਞਸ੍ਸਤ੍ਥਾਯ ਕਰੋਤਿ ਵਾ ਕਾਰਾਪੇਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਆਪਤ੍ਤਿ ਦੁਕ੍ਕਟਸ੍ਸ.
੫੪੬. ਅਨਾਪਤ੍ਤਿ ਵਿਤਾਨਂ ਵਾ ਭੂਮਤ੍ਥਰਣਂ ਵਾ ਸਾਣਿਪਾਕਾਰਂ ਵਾ ਭਿਸਿਂ ਵਾ ਬਿਬ੍ਬੋਹਨਂ ਵਾ ਕਰੋਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.
ਕੋਸਿਯਸਿਕ੍ਖਾਪਦਂ ਨਿਟ੍ਠਿਤਂ ਪਠਮਂ.