੨. ਦੁਤਿਯਅਨਿਯਤਸਿਕ੍ਖਾਪਦਂ

੪੫੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ – ‘‘ਭਗਵਤਾ ਪਟਿਕ੍ਖਿਤ੍ਤਂ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਪਟਿਚ੍ਛਨ੍ਨੇ ਆਸਨੇ ਅਲਂਕਮ੍ਮਨਿਯੇ ਨਿਸਜ੍ਜਂ ਕਪ੍ਪੇਤੁ’’ਨ੍ਤਿ ਤਸ੍ਸਾਯੇਵ ਕੁਮਾਰਿਕਾਯ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸਿ ਕਾਲਯੁਤ੍ਤਂ ਸਮੁਲ੍ਲਪਨ੍ਤੋ ਕਾਲਯੁਤ੍ਤਂ ਧਮ੍ਮਂ ਭਣਨ੍ਤੋ. ਦੁਤਿਯਮ੍ਪਿ ਖੋ ਵਿਸਾਖਾ ਮਿਗਾਰਮਾਤਾ ਨਿਮਨ੍ਤਿਤਾ ਤਂ ਕੁਲਂ ਅਗਮਾਸਿ. ਅਦ੍ਦਸਾ ਖੋ ਵਿਸਾਖਾ ਮਿਗਾਰਮਾਤਾ ਆਯਸ੍ਮਨ੍ਤਂ ਉਦਾਯਿਂ ਤਸ੍ਸਾਯੇਵ ਕੁਮਾਰਿਕਾਯ ਸਦ੍ਧਿਂ ਏਕਂ ਏਕਾਯ ਰਹੋ ਨਿਸਿਨ੍ਨਂ. ਦਿਸ੍ਵਾਨ ਆਯਸ੍ਮਨ੍ਤਂ ਉਦਾਯਿਂ ਏਤਦਵੋਚ – ‘‘ਇਦਂ, ਭਨ੍ਤੇ, ਨਚ੍ਛਨ੍ਨਂ ਨਪ੍ਪਤਿਰੂਪਂ ਯਂ ਅਯ੍ਯੋ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਤਿ. ਕਿਞ੍ਚਾਪਿ, ਭਨ੍ਤੇ, ਅਯ੍ਯੋ ਅਨਤ੍ਥਿਕੋ ਤੇਨ ਧਮ੍ਮੇਨ, ਅਪਿਚ ਦੁਸ੍ਸਦ੍ਧਾਪਯਾ ਅਪ੍ਪਸਨ੍ਨਾ ਮਨੁਸ੍ਸਾ’’ਤਿ. ਏਵਮ੍ਪਿ ਖੋ ਆਯਸ੍ਮਾ ਉਦਾਯੀ ਵਿਸਾਖਾਯ ਮਿਗਾਰਮਾਤੁਯਾ ਵੁਚ੍ਚਮਾਨੋ ਨਾਦਿਯਿ. ਅਥ ਖੋ ਵਿਸਾਖਾ ਮਿਗਾਰਮਾਤਾ ਨਿਕ੍ਖਮਿਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਦਾਯੀ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਦਾਯਿਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ …ਪੇ… ‘‘ਸਚ੍ਚਂ ਕਿਰ ਤ੍ਵਂ, ਉਦਾਯਿ, ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੪੫੩. ‘‘ਨ ਹੇਵ ਖੋ ਪਨ ਪਟਿਚ੍ਛਨ੍ਨਂ ਆਸਨਂ ਹੋਤਿ ਨਾਲਂ ਕਮ੍ਮਨਿਯਂ, ਅਲਞ੍ਚ ਖੋ ਹੋਤਿ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿਤੁਂ. ਯੋ ਪਨ ਭਿਕ੍ਖੁ ਤਥਾਰੂਪੇ ਆਸਨੇ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਯ੍ਯ, ਤਮੇਨਂ ਸਦ੍ਧੇਯ੍ਯਵਚਸਾ ਉਪਾਸਿਕਾ ਦਿਸ੍ਵਾ ਦ੍ਵਿਨ੍ਨਂ ਧਮ੍ਮਾਨਂ ਅਞ੍ਞਤਰੇਨ ਵਦੇਯ੍ਯ – ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ. ਨਿਸਜ੍ਜਂ ਭਿਕ੍ਖੁ ਪਟਿਜਾਨਮਾਨੋ ਦ੍ਵਿਨ੍ਨਂ ਧਮ੍ਮਾਨਂ ਅਞ੍ਞਤਰੇਨ ਕਾਰੇਤਬ੍ਬੋ – ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ. ਯੇਨ ਵਾ ਸਾ ਸਦ੍ਧੇਯ੍ਯਵਚਸਾ ਉਪਾਸਿਕਾ ਵਦੇਯ੍ਯ ਤੇਨ ਸੋ ਭਿਕ੍ਖੁ ਕਾਰੇਤਬ੍ਬੋ. ਅਯਮ੍ਪਿ ਧਮ੍ਮੋ ਅਨਿਯਤੋ’’ਤਿ.

੪੫੪. ਨ ਹੇਵ ਖੋ ਪਨ ਪਟਿਚ੍ਛਨ੍ਨਂ ਆਸਨਂ ਹੋਤੀਤਿ ਅਪ੍ਪਟਿਚ੍ਛਨ੍ਨਂ ਹੋਤਿ ਕੁਟ੍ਟੇਨ ਵਾ ਕਵਾਟੇਨ ਵਾ ਕਿਲਞ੍ਜੇਨ ਵਾ ਸਾਣਿਪਾਕਾਰੇਨ ਵਾ ਰੁਕ੍ਖੇਨ ਵਾ ਥਮ੍ਭੇਨ ਵਾ ਕੋਤ੍ਥਲ਼ਿਯਾ ਵਾ ਯੇਨ ਕੇਨਚਿ ਅਪ੍ਪਟਿਚ੍ਛਨ੍ਨਂ ਹੋਤਿ.

ਨਾਲਂ ਕਮ੍ਮਨਿਯਨ੍ਤਿ ਨ ਸਕ੍ਕਾ ਹੋਤਿ ਮੇਥੁਨਂ ਧਮ੍ਮਂ ਪਟਿਸੇਵਿਤੁਂ.

ਅਲਞ੍ਚ ਖੋ ਹੋਤਿ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿਤੁਨ੍ਤਿ ਸਕ੍ਕਾ ਹੋਤਿ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿਤੁਂ.

ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਤਥਾਰੂਪੇ ਆਸਨੇਤਿ ਏਵਰੂਪੇ ਆਸਨੇ.

ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ ਨ ਪੇਤੀ ਨ ਤਿਰਚ੍ਛਾਨਗਤਾ, ਵਿਞ੍ਞੂ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁਂ.

ਸਦ੍ਧਿਨ੍ਤਿ ਏਕਤੋ.

ਏਕੋ ਏਕਾਯਾਤਿ ਭਿਕ੍ਖੁ ਚੇਵ ਹੋਤਿ ਮਾਤੁਗਾਮੋ ਚ.

ਰਹੋ ਨਾਮ ਚਕ੍ਖੁਸ੍ਸ ਰਹੋ, ਸੋਤਸ੍ਸ ਰਹੋ. ਚਕ੍ਖੁਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਅਕ੍ਖਿਂ ਵਾ ਨਿਖਣੀਯਮਾਨੇ ਭਮੁਕਂ ਵਾ ਉਕ੍ਖਿਪੀਯਮਾਨੇ ਸੀਸਂ ਵਾ ਉਕ੍ਖਿਪੀਯਮਾਨੇ ਪਸ੍ਸਿਤੁਂ. ਸੋਤਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਪਕਤਿਕਥਾ ਸੋਤੁਂ.

ਨਿਸਜ੍ਜਂ ਕਪ੍ਪੇਯ੍ਯਾਤਿ ਮਾਤੁਗਾਮੇ ਨਿਸਿਨ੍ਨੇ ਭਿਕ੍ਖੁ ਉਪਨਿਸਿਨ੍ਨੋ ਵਾ ਹੋਤਿ ਉਪਨਿਪਨ੍ਨੋ ਵਾ. ਭਿਕ੍ਖੁ ਨਿਸਿਨ੍ਨੇ ਮਾਤੁਗਾਮੋ ਉਪਨਿਸਿਨ੍ਨੋ ਵਾ ਹੋਤਿ ਉਪਨਿਪਨ੍ਨੋ ਵਾ. ਉਭੋ ਵਾ ਨਿਸਿਨ੍ਨਾ ਹੋਨ੍ਤਿ ਉਭੋ ਵਾ ਨਿਪਨ੍ਨਾ.

ਸਦ੍ਧੇਯ੍ਯਵਚਸਾ ਨਾਮ ਆਗਤਫਲਾ ਅਭਿਸਮੇਤਾਵਿਨੀ ਵਿਞ੍ਞਾਤਸਾਸਨਾ.

ਉਪਾਸਿਕਾ ਨਾਮ ਬੁਦ੍ਧਂ ਸਰਣਂ ਗਤਾ, ਧਮ੍ਮਂ ਸਰਣਂ ਗਤਾ, ਸਙ੍ਘਂ ਸਰਣਂ ਗਤਾ.

ਦਿਸ੍ਵਾਤਿ ਪਸ੍ਸਿਤ੍ਵਾ.

ਦ੍ਵਿਨ੍ਨਂ ਧਮ੍ਮਾਨਂ ਅਞ੍ਞਤਰੇਨ ਵਦੇਯ੍ਯ ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ. ਨਿਸਜ੍ਜਂ ਭਿਕ੍ਖੁ ਪਟਿਜਾਨਮਾਨੋ ਦ੍ਵਿਨ੍ਨਂ ਧਮ੍ਮਾਨਂ ਅਞ੍ਞਤਰੇਨ ਕਾਰੇਤਬ੍ਬੋ – ਸਙ੍ਘਾਦਿਸੇਸੇਨ ਵਾ ਪਾਚਿਤ੍ਤਿਯੇਨ ਵਾ. ਯੇਨ ਵਾ ਸਾ ਸਦ੍ਧੇਯ੍ਯਵਚਸਾ ਉਪਾਸਿਕਾ ਵਦੇਯ੍ਯ, ਤੇਨ ਸੋ ਭਿਕ੍ਖੁ ਕਾਰੇਤਬ੍ਬੋ.

੪੫੫. ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯੋ ਮਯਾ ਦਿਟ੍ਠੋ ਨਿਸਿਨ੍ਨੋ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤੋ’’ਤਿ, ਸੋ ਚ ਤਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯੋ ਮਯਾ ਦਿਟ੍ਠੋ ਨਿਸਿਨ੍ਨੋ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤੋ’’ਤਿ, ਸੋ ਚੇ ਏਵਂ ਵਦੇਯ੍ਯ – ‘‘ਸਚ੍ਚਾਹਂ ਨਿਸਿਨ੍ਨੋ, ਨੋ ਚ ਖੋ ਕਾਯਸਂਸਗ੍ਗਂ ਸਮਾਪਜ੍ਜਿ’’ਨ੍ਤਿ, ਨਿਸਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਸਿਨ੍ਨੋ, ਅਪਿਚ ਖੋ ਨਿਪਨ੍ਨੋਤਿ, ਨਿਪਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਸਿਨ੍ਨੋ, ਅਪਿਚ ਖੋ ਠਿਤੋਤਿ, ਨ ਕਾਰੇਤਬ੍ਬੋ.

ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯੋ ਮਯਾ ਦਿਟ੍ਠੋ ਨਿਪਨ੍ਨੋ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਨ੍ਤੋ’’ਤਿ, ਸੋ ਚ ਤਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ…ਪੇ… ਸਚ੍ਚਾਹਂ ਨਿਪਨ੍ਨੋ, ਨੋ ਚ ਖੋ ਕਾਯਸਂਸਗ੍ਗਂ ਸਮਾਪਜ੍ਜਿਨ੍ਤਿ, ਨਿਪਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਪਨ੍ਨੋ, ਅਪਿਚ ਖੋ ਨਿਸਿਨ੍ਨੋਤਿ, ਨਿਸਜ੍ਜਾਯ ਕਾਰੇਤਬ੍ਬੋ …ਪੇ… ਨਾਹਂ ਨਿਪਨ੍ਨੋ, ਅਪਿਚ ਖੋ ਠਿਤੋਤਿ, ਨ ਕਾਰੇਤਬ੍ਬੋ.

ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯਸ੍ਸ ਮਯਾ ਸੁਤਂ ਨਿਸਿਨ੍ਨਸ੍ਸ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਨ੍ਤਸ੍ਸਾ’’ਤਿ, ਸੋ ਚ ਤਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯਸ੍ਸ ਮਯਾ ਸੁਤਂ ਨਿਸਿਨ੍ਨਸ੍ਸ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਨ੍ਤਸ੍ਸਾ’’ਤਿ, ਸੋ ਚੇ ਏਵਂ ਵਦੇਯ੍ਯ – ‘‘ਸਚ੍ਚਾਹਂ ਨਿਸਿਨ੍ਨੋ, ਨੋ ਚ ਖੋ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿ’’ਨ੍ਤਿ, ਨਿਸਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਸਿਨ੍ਨੋ, ਅਪਿਚ ਖੋ ਨਿਪਨ੍ਨੋਤਿ, ਨਿਪਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਸਿਨ੍ਨੋ, ਅਪਿਚ ਖੋ ਠਿਤੋਤਿ, ਨ ਕਾਰੇਤਬ੍ਬੋ.

ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯਸ੍ਸ ਮਯਾ ਸੁਤਂ ਨਿਪਨ੍ਨਸ੍ਸ ਮਾਤੁਗਾਮਂ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਨ੍ਤਸ੍ਸਾ’’ਤਿ, ਸੋ ਚ ਤਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ…ਪੇ… ਸਚ੍ਚਾਹਂ ਨਿਪਨ੍ਨੋ ਨੋ ਚ ਖੋ ਦੁਟ੍ਠੁਲ੍ਲਾਹਿ ਵਾਚਾਹਿ ਓਭਾਸਿਨ੍ਤਿ, ਨਿਪਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਪਨ੍ਨੋ, ਅਪਿਚ ਖੋ ਨਿਸਿਨ੍ਨੋਤਿ, ਨਿਸਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਪਨ੍ਨੋ, ਅਪਿਚ ਖੋ ਠਿਤੋਤਿ, ਨ ਕਾਰੇਤਬ੍ਬੋ.

੪੫੬. ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯੋ ਮਯਾ ਦਿਟ੍ਠੋ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਿਨ੍ਨੋ’’ਤਿ, ਸੋ ਚ ਤਂ ਪਟਿਜਾਨਾਤਿ, ਨਿਸਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਸਿਨ੍ਨੋ, ਅਪਿਚ ਖੋ ਨਿਪਨ੍ਨੋਤਿ, ਨਿਪਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਸਿਨ੍ਨੋ, ਅਪਿਚ ਖੋ ਠਿਤੋਤਿ, ਨ ਕਾਰੇਤਬ੍ਬੋ.

ਸਾ ਚੇ ਏਵਂ ਵਦੇਯ੍ਯ – ‘‘ਅਯ੍ਯੋ ਮਯਾ ਦਿਟ੍ਠੋ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਪਨ੍ਨੋ’’ਤਿ, ਸੋ ਚ ਤਂ ਪਟਿਜਾਨਾਤਿ, ਨਿਪਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਪਨ੍ਨੋ, ਅਪਿਚ ਖੋ ਨਿਸਿਨ੍ਨੋਤਿ, ਨਿਸਜ੍ਜਾਯ ਕਾਰੇਤਬ੍ਬੋ…ਪੇ… ਨਾਹਂ ਨਿਪਨ੍ਨੋ, ਅਪਿਚ ਖੋ ਠਿਤੋਤਿ, ਨ ਕਾਰੇਤਬ੍ਬੋ.

ਅਯਮ੍ਪੀਤਿ ਪੁਰਿਮਂ ਉਪਾਦਾਯ ਵੁਚ੍ਚਤਿ.

ਅਨਿਯਤੋਤਿ ਨ ਨਿਯਤੋ, ਸਙ੍ਘਾਦਿਸੇਸੋ ਵਾ ਪਾਚਿਤ੍ਤਿਯਂ ਵਾ.

੪੫੭. ਗਮਨਂ ਪਟਿਜਾਨਾਤਿ ਨਿਸਜ੍ਜਂ ਪਟਿਜਾਨਾਤਿ ਆਪਤ੍ਤਿਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਗਮਨਂ ਪਟਿਜਾਨਾਤਿ ਨਿਸਜ੍ਜਂ ਨ ਪਟਿਜਾਨਾਤਿ ਆਪਤ੍ਤਿਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਗਮਨਂ ਪਟਿਜਾਨਾਤਿ ਨਿਸਜ੍ਜਂ ਪਟਿਜਾਨਾਤਿ ਆਪਤ੍ਤਿਂ ਨ ਪਟਿਜਾਨਾਤਿ, ਨਿਸਜ੍ਜਾਯ ਕਾਰੇਤਬ੍ਬੋ. ਗਮਨਂ ਪਟਿਜਾਨਾਤਿ ਨਿਸਜ੍ਜਂ ਨ ਪਟਿਜਾਨਾਤਿ ਆਪਤ੍ਤਿਂ ਨ ਪਟਿਜਾਨਾਤਿ, ਨ ਕਾਰੇਤਬ੍ਬੋ.

ਗਮਨਂ ਨ ਪਟਿਜਾਨਾਤਿ ਨਿਸਜ੍ਜਂ ਪਟਿਜਾਨਾਤਿ ਆਪਤ੍ਤਿਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਗਮਨਂ ਨ ਪਟਿਜਾਨਾਤਿ ਨਿਸਜ੍ਜਂ ਨ ਪਟਿਜਾਨਾਤਿ ਆਪਤ੍ਤਿਂ ਪਟਿਜਾਨਾਤਿ, ਆਪਤ੍ਤਿਯਾ ਕਾਰੇਤਬ੍ਬੋ. ਗਮਨਂ ਨ ਪਟਿਜਾਨਾਤਿ ਨਿਸਜ੍ਜਂ ਪਟਿਜਾਨਾਤਿ ਆਪਤ੍ਤਿਂ ਨ ਪਟਿਜਾਨਾਤਿ, ਨਿਸਜ੍ਜਾਯ ਕਾਰੇਤਬ੍ਬੋ. ਗਮਨਂ ਨ ਪਟਿਜਾਨਾਤਿ ਨਿਸਜ੍ਜਂ ਨ ਪਟਿਜਾਨਾਤਿ ਆਪਤ੍ਤਿਂ ਨ ਪਟਿਜਾਨਾਤਿ, ਨ ਕਾਰੇਤਬ੍ਬੋਤਿ.

ਦੁਤਿਯੋ ਅਨਿਯਤੋ ਨਿਟ੍ਠਿਤੋ.

੪੫੮. ਉਦ੍ਦਿਟ੍ਠਾ ਖੋ ਆਯਸ੍ਮਨ੍ਤੋ ਦ੍ਵੇ ਅਨਿਯਤਾ ਧਮ੍ਮਾ. ਤਤ੍ਥਾਯਸ੍ਮਨ੍ਤੇ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਦੁਤਿਯਮ੍ਪਿ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਤਤਿਯਮ੍ਪਿ ਪੁਚ੍ਛਾਮਿ – ‘‘ਕਚ੍ਚਿਤ੍ਥ ਪਰਿਸੁਦ੍ਧਾ’’? ਪਰਿਸੁਦ੍ਧੇਤ੍ਥਾਯਸ੍ਮਨ੍ਤੋ; ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀਤਿ.

ਤਸ੍ਸੁਦ੍ਦਾਨਂ –

ਅਲਂ ਕਮ੍ਮਨਿਯਞ੍ਚੇਵ, ਤਥੇਵ ਚ ਨਹੇਵ ਖੋ;

ਅਨਿਯਤਾ ਸੁਪਞ੍ਞਤ੍ਤਾ, ਬੁਦ੍ਧਸੇਟ੍ਠੇਨ ਤਾਦਿਨਾਤਿ.

ਅਨਿਯਤਕਣ੍ਡਂ ਨਿਟ੍ਠਿਤਂ.