੯. ਦੁਤਿਯਦੁਟ੍ਠਦੋਸਸਿਕ੍ਖਾਪਦਂ

੩੯੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਮੇਤ੍ਤਿਯਭੂਮਜਕਾ ਭਿਕ੍ਖੂ ਗਿਜ੍ਝਕੂਟਾ ਪਬ੍ਬਤਾ ਓਰੋਹਨ੍ਤਾ ਅਦ੍ਦਸਂਸੁ ਛਗਲਕਂ [ਛਕਲਕਂ (ਸ੍ਯਾ.)] ਅਜਿਕਾਯ ਵਿਪ੍ਪਟਿਪਜ੍ਜਨ੍ਤਂ. ਦਿਸ੍ਵਾਨ ਏਵਮਾਹਂਸੁ – ‘‘ਹਨ੍ਦ ਮਯਂ, ਆਵੁਸੋ, ਇਮਂ ਛਗਲਕਂ ਦਬ੍ਬਂ ਮਲ੍ਲਪੁਤ੍ਤਂ ਨਾਮ ਕਰੋਮ. ਇਮਂ ਅਜਿਕਂ ਮੇਤ੍ਤਿਯਂ ਨਾਮ ਭਿਕ੍ਖੁਨਿਂ ਕਰੋਮ. ਏਵਂ ਮਯਂ ਵੋਹਰਿਸ੍ਸਾਮ. ਪੁਬ੍ਬੇ ਮਯਂ, ਆਵੁਸੋ, ਦਬ੍ਬਂ ਮਲ੍ਲਪੁਤ੍ਤਂ ਸੁਤੇਨ ਅਵੋਚੁਮ੍ਹਾ. ਇਦਾਨਿ ਪਨ ਅਮ੍ਹੇਹਿ ਸਾਮਂ ਦਿਟ੍ਠੋ ਮੇਤ੍ਤਿਯਾਯ ਭਿਕ੍ਖੁਨਿਯਾ ਵਿਪ੍ਪਟਿਪਜ੍ਜਨ੍ਤੋ’’ਤਿ. ਤੇ ਤਂ ਛਗਲਕਂ ਦਬ੍ਬਂ ਮਲ੍ਲਪੁਤ੍ਤਂ ਨਾਮ ਅਕਂਸੁ. ਤਂ ਅਜਿਕਂ ਮੇਤ੍ਤਿਯਂ ਨਾਮ ਭਿਕ੍ਖੁਨਿਂ ਅਕਂਸੁ. ਤੇ ਭਿਕ੍ਖੂਨਂ ਆਰੋਚੇਸੁਂ – ‘‘ਪੁਬ੍ਬੇ ਮਯਂ, ਆਵੁਸੋ, ਦਬ੍ਬਂ ਮਲ੍ਲਪੁਤ੍ਤਂ ਸੁਤੇਨ ਅਵੋਚੁਮ੍ਹਾ. ਇਦਾਨਿ ਪਨ ਅਮ੍ਹੇਹਿ ਸਾਮਂ ਦਿਟ੍ਠੋ ਮੇਤ੍ਤਿਯਾਯ ਭਿਕ੍ਖੁਨਿਯਾ ਵਿਪ੍ਪਟਿਪਜ੍ਜਨ੍ਤੋ’’ਤਿ. ਭਿਕ੍ਖੂ ਏਵਮਾਹਂਸੁ – ‘‘ਮਾਵੁਸੋ, ਏਵਂ ਅਵਚੁਤ੍ਥ. ਨਾਯਸ੍ਮਾ ਦਬ੍ਬੋ ਮਲ੍ਲਪੁਤ੍ਤੋ ਏਵਂ ਕਰਿਸ੍ਸਤੀ’’ਤਿ.

ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਪਟਿਪੁਚ੍ਛਿ – ‘‘ਸਰਸਿ ਤ੍ਵਂ, ਦਬ੍ਬ, ਏਵਰੂਪਂ ਕਤ੍ਤਾ ਯਥਯਿਮੇ ਭਿਕ੍ਖੂ ਆਹਂਸੂ’’ਤਿ? ‘‘ਯਥਾ ਮਂ, ਭਨ੍ਤੇ, ਭਗਵਾ ਜਾਨਾਤੀ’’ਤਿ. ਦੁਤਿਯਮ੍ਪਿ ਖੋ ਭਗਵਾ…ਪੇ… ਤਤਿਯਮ੍ਪਿ ਖੋ ਭਗਵਾ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਏਤਦਵੋਚ – ‘‘ਸਰਸਿ ਤ੍ਵਂ, ਦਬ੍ਬ, ਏਵਰੂਪਂ ਕਤ੍ਤਾ ਯਥਯਿਮੇ ਭਿਕ੍ਖੂ ਆਹਂਸੂ’’ਤਿ? ‘‘ਯਥਾ ਮਂ, ਭਨ੍ਤੇ, ਭਗਵਾ ਜਾਨਾਤੀ’’ਤਿ. ‘‘ਨ ਖੋ, ਦਬ੍ਬ, ਦਬ੍ਬਾ ਏਵਂ ਨਿਬ੍ਬੇਠੇਨ੍ਤਿ. ਸਚੇ ਤਯਾ ਕਤਂ ਕਤਨ੍ਤਿ ਵਦੇਹਿ, ਸਚੇ ਤਯਾ ਅਕਤਂ ਅਕਤਨ੍ਤਿ ਵਦੇਹੀ’’ਤਿ. ‘‘ਯਤੋ ਅਹਂ, ਭਨ੍ਤੇ, ਜਾਤੋ ਨਾਭਿਜਾਨਾਮਿ ਸੁਪਿਨਨ੍ਤੇਨਪਿ ਮੇਥੁਨਧਮ੍ਮਂ ਪਟਿਸੇਵਿਤਾ, ਪਗੇਵ ਜਾਗਰੋ’’ਤਿ! ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖੁਵੇ, ਇਮੇ ਭਿਕ੍ਖੂ ਅਨੁਯੁਞ੍ਜਥਾ’’ਤਿ. ਇਦਂ ਵਤ੍ਵਾ ਭਗਵਾ ਉਟ੍ਠਾਯਾਸਨਾ ਵਿਹਾਰਂ ਪਾਵਿਸਿ.

ਅਥ ਖੋ ਤੇ ਭਿਕ੍ਖੂ ਮੇਤ੍ਤਿਯਭੂਮਜਕੇ ਭਿਕ੍ਖੂ ਅਨੁਯੁਞ੍ਜਿਂਸੁ. ਤੇ ਭਿਕ੍ਖੂਹਿ ਅਨੁਯੁਞ੍ਜੀਯਮਾਨਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ – ‘‘ਕਿਂ ਪਨ ਤੁਮ੍ਹੇ, ਆਵੁਸੋ, ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਥਾ’’ਤਿ? ‘‘ਏਵਮਾਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਮੇਤ੍ਤਿਯਭੂਮਜਕਾ ਭਿਕ੍ਖੂ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਮੇਤ੍ਤਿਯਭੂਮਜਕੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਥਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਦਬ੍ਬਂ ਮਲ੍ਲਪੁਤ੍ਤਂ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੯੨. ‘‘ਯੋ ਪਨ ਭਿਕ੍ਖੁ ਭਿਕ੍ਖੁਂ ਦੁਟ੍ਠੋ ਦੋਸੋ ਅਪ੍ਪਤੀਤੋ ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸ ਕਿਞ੍ਚਿਦੇਸਂ ਲੇਸਮਤ੍ਤਂ ਉਪਾਦਾਯ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਯ੍ਯ – ‘ਅਪ੍ਪੇਵ ਨਾਮ ਨਂ ਇਮਮ੍ਹਾ ਬ੍ਰਹ੍ਮਚਰਿਯਾ ਚਾਵੇਯ੍ਯ’ਨ੍ਤਿ. ਤਤੋ ਅਪਰੇਨ ਸਮਯੇਨ ਸਮਨੁਗ੍ਗਾਹੀਯਮਾਨੋ ਵਾ ਅਸਮਨੁਗ੍ਗਾਹੀਯਮਾਨੋ ਵਾ ਅਞ੍ਞਭਾਗਿਯਞ੍ਚੇਵ ਤਂ ਅਧਿਕਰਣਂ ਹੋਤਿ ਕੋਚਿਦੇਸੋ ਲੇਸਮਤ੍ਤੋ ਉਪਾਦਿਨ੍ਨੋ, ਭਿਕ੍ਖੁ ਚ ਦੋਸਂ ਪਤਿਟ੍ਠਾਤਿ, ਸਙ੍ਘਾਦਿਸੇਸੋ’’ਤਿ.

੩੯੩. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਭਿਕ੍ਖੁਨ੍ਤਿ ਅਞ੍ਞਂ ਭਿਕ੍ਖੁਂ.

ਦੁਟ੍ਠੋ ਦੋਸੋਤਿ ਕੁਪਿਤੋ ਅਨਤ੍ਤਮਨੋ ਅਨਭਿਰਦ੍ਧੋ ਆਹਤਚਿਤ੍ਤੋ ਖਿਲਜਾਤੋ.

ਅਪ੍ਪਤੀਤੋਤਿ ਤੇਨ ਚ ਕੋਪੇਨ, ਤੇਨ ਚ ਦੋਸੇਨ, ਤਾਯ ਚ ਅਨਤ੍ਤਮਨਤਾਯ, ਤਾਯ ਚ ਅਨਭਿਰਦ੍ਧਿਯਾ ਅਪ੍ਪਤੀਤੋ ਹੋਤਿ.

ਅਞ੍ਞਭਾਗਿਯਸ੍ਸ ਅਧਿਕਰਣਸ੍ਸਾਤਿ ਆਪਤ੍ਤਞ੍ਞਭਾਗਿਯਂ ਵਾ ਹੋਤਿ ਅਧਿਕਰਣਞ੍ਞਭਾਗਿਯਂ ਵਾ. ਕਥਂ ਅਧਿਕਰਣਂ ਅਧਿਕਰਣਸ੍ਸ ਅਞ੍ਞਭਾਗਿਯਂ? ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਸ੍ਸ ਆਪਤ੍ਤਾਧਿਕਰਣਸ੍ਸ ਕਿਚ੍ਚਾਧਿਕਰਣਸ੍ਸ ਅਞ੍ਞਭਾਗਿਯਂ. ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਕਿਚ੍ਚਾਧਿਕਰਣਸ੍ਸ ਵਿਵਾਦਾਧਿਕਰਣਸ੍ਸ ਅਞ੍ਞਭਾਗਿਯਂ. ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਸ੍ਸ ਵਿਵਾਦਾਧਿਕਰਣਸ੍ਸ ਅਨੁਵਾਦਾਧਿਕਰਣਸ੍ਸ ਅਞ੍ਞਭਾਗਿਯਂ. ਕਿਚ੍ਚਾਧਿਕਰਣਂ ਵਿਵਾਦਾਧਿਕਰਣਸ੍ਸ ਅਨੁਵਾਦਾਧਿਕਰਣਸ੍ਸ ਆਪਤ੍ਤਾਧਿਕਰਣਸ੍ਸ ਅਞ੍ਞਭਾਗਿਯਂ. ਏਵਂ ਅਧਿਕਰਣਂ ਅਧਿਕਰਣਸ੍ਸ ਅਞ੍ਞਭਾਗਿਯਂ.

ਕਥਂ ਅਧਿਕਰਣਂ ਅਧਿਕਰਣਸ੍ਸ ਤਬ੍ਭਾਗਿਯਂ? ਵਿਵਾਦਾਧਿਕਰਣਂ ਵਿਵਾਦਾਧਿਕਰਣਸ੍ਸ ਤਬ੍ਭਾਗਿਯਂ. ਅਨੁਵਾਦਾਧਿਕਰਣਂ ਅਨੁਵਾਦਾਧਿਕਰਣਸ੍ਸ ਤਬ੍ਭਾਗਿਯਂ. ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਸਿਯਾ ਤਬ੍ਭਾਗਿਯਂ ਸਿਯਾ ਅਞ੍ਞਭਾਗਿਯਂ.

ਕਥਂ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਅਞ੍ਞਭਾਗਿਯਂ? ਮੇਥੁਨਧਮ੍ਮਪਾਰਾਜਿਕਾਪਤ੍ਤਿ ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿਯਾ ਮਨੁਸ੍ਸਵਿਗ੍ਗਹਪਾਰਾਜਿਕਾਪਤ੍ਤਿਯਾ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਾਪਤ੍ਤਿਯਾ ਅਞ੍ਞਭਾਗਿਯਾ. ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿ ਮਨੁਸ੍ਸਵਿਗ੍ਗਹਪਾਰਾਜਿਕਾਪਤ੍ਤਿਯਾ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਾਪਤ੍ਤਿਯਾ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ ਅਞ੍ਞਭਾਗਿਯਾ. ਮਨੁਸ੍ਸਵਿਗ੍ਗਹਪਾਰਾਜਿਕਾਪਤ੍ਤਿ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਾਪਤ੍ਤਿਯਾ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿਯਾ ਅਞ੍ਞਭਾਗਿਯਾ. ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਾਪਤ੍ਤਿ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿਯਾ ਮਨੁਸ੍ਸਵਿਗ੍ਗਹਪਾਰਾਜਿਕਾਪਤ੍ਤਿਯਾ ਅਞ੍ਞਭਾਗਿਯਾ. ਏਵਂ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਅਞ੍ਞਭਾਗਿਯਂ.

ਕਥਂ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਤਬ੍ਭਾਗਿਯਂ? ਮੇਥੁਨਧਮ੍ਮਪਾਰਾਜਿਕਾਪਤ੍ਤਿ ਮੇਥੁਨਧਮ੍ਮਪਾਰਾਜਿਕਾਪਤ੍ਤਿਯਾ ਤਬ੍ਭਾਗਿਯਾ. ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿ ਅਦਿਨ੍ਨਾਦਾਨਪਾਰਾਜਿਕਾਪਤ੍ਤਿਯਾ ਤਬ੍ਭਾਗਿਯਾ. ਮਨੁਸ੍ਸਵਿਗ੍ਗਹਪਾਰਾਜਿਕਾਪਤ੍ਤਿ ਮਨੁਸ੍ਸਵਿਗ੍ਗਹਪਾਰਾਜਿਕਾਪਤ੍ਤਿਯਾ ਤਬ੍ਭਾਗਿਯਾ. ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਾਪਤ੍ਤਿ ਉਤ੍ਤਰਿਮਨੁਸ੍ਸਧਮ੍ਮਪਾਰਾਜਿਕਾਪਤ੍ਤਿਯਾ ਤਬ੍ਭਾਗਿਯਾ. ਏਵਂ ਆਪਤ੍ਤਾਧਿਕਰਣਂ ਆਪਤ੍ਤਾਧਿਕਰਣਸ੍ਸ ਤਬ੍ਭਾਗਿਯਂ.

ਕਿਚ੍ਚਾਧਿਕਰਣਂ ਕਿਚ੍ਚਾਧਿਕਰਣਸ੍ਸ ਤਬ੍ਭਾਗਿਯਂ. ਏਵਂ ਅਧਿਕਰਣਂ ਅਧਿਕਰਣਸ੍ਸ ਤਬ੍ਭਾਗਿਯਂ.

੩੯੪. ਕਿਞ੍ਚਿ ਦੇਸਂ ਲੇਸਮਤ੍ਤਂ ਉਪਾਦਾਯਾਤਿ ਲੇਸੋ ਨਾਮ ਦਸ ਲੇਸਾ – ਜਾਤਿਲੇਸੋ, ਨਾਮਲੇਸੋ, ਗੋਤ੍ਤਲੇਸੋ, ਲਿਙ੍ਗਲੇਸੋ, ਆਪਤ੍ਤਿਲੇਸੋ, ਪਤ੍ਤਲੇਸੋ, ਚੀਵਰਲੇਸੋ, ਉਪਜ੍ਝਾਯਲੇਸੋ, ਆਚਰਿਯਲੇਸੋ, ਸੇਨਾਸਨਲੇਸੋ.

੩੯੫. ਜਾਤਿਲੇਸੋ ਨਾਮ ਖਤ੍ਤਿਯੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਖਤ੍ਤਿਯਂ ਪਸ੍ਸਿਤ੍ਵਾ ਚੋਦੇਤਿ – ‘‘ਖਤ੍ਤਿਯੋ ਮਯਾ ਦਿਟ੍ਠੋ [ਏਤ੍ਥ ‘‘ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ’’ਤਿ ਪਾਠੋ ਊਨੋ ਮਞ੍ਞੇ, ਅਟ੍ਠਕਥਾਯਂ ਹਿ ‘‘ਖਤ੍ਤਿਯੋ ਮਯਾ ਦਿਟ੍ਠੋ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ’’ਤਿ ਦਿਸ੍ਸਤਿ]. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ, ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਬ੍ਰਾਹ੍ਮਣੋ ਦਿਟ੍ਠੋ ਹੋਤਿ…ਪੇ… ਵੇਸ੍ਸੋ ਦਿਟ੍ਠੋ ਹੋਤਿ…ਪੇ… ਸੁਦ੍ਦੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਸੁਦ੍ਦਂ ਪਸ੍ਸਿਤ੍ਵਾ ਚੋਦੇਤਿ – ‘‘ਸੁਦ੍ਦੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੩੯੬. ਨਾਮਲੇਸੋ ਨਾਮ ਬੁਦ੍ਧਰਕ੍ਖਿਤੋ ਦਿਟ੍ਠੋ ਹੋਤਿ…ਪੇ… ਧਮ੍ਮਰਕ੍ਖਿਤੋ ਦਿਟ੍ਠੋ ਹੋਤਿ…ਪੇ… ਸਙ੍ਘਰਕ੍ਖਿਤੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਸਙ੍ਘਰਕ੍ਖਿਤਂ ਪਸ੍ਸਿਤ੍ਵਾ ਚੋਦੇਤਿ – ‘‘ਸਙ੍ਘਰਕ੍ਖਿਤੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੩੯੭. ਗੋਤ੍ਤਲੇਸੋ ਨਾਮ ਗੋਤਮੋ ਦਿਟ੍ਠੋ ਹੋਤਿ…ਪੇ… ਮੋਗ੍ਗਲ੍ਲਾਨੋ ਦਿਟ੍ਠੋ ਹੋਤਿ…ਪੇ… ਕਚ੍ਚਾਯਨੋ ਦਿਟ੍ਠੋ ਹੋਤਿ…ਪੇ… ਵਾਸਿਟ੍ਠੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਵਾਸਿਟ੍ਠਂ ਪਸ੍ਸਿਤ੍ਵਾ ਚੋਦੇਤਿ – ‘‘ਵਾਸਿਟ੍ਠੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੩੯੮. ਲਿਙ੍ਗਲੇਸੋ ਨਾਮ ਦੀਘੋ ਦਿਟ੍ਠੋ ਹੋਤਿ…ਪੇ… ਰਸ੍ਸੋ ਦਿਟ੍ਠੋ ਹੋਤਿ…ਪੇ… ਕਣ੍ਹੋ ਦਿਟ੍ਠੋ ਹੋਤਿ…ਪੇ… ਓਦਾਤੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਓਦਾਤਂ ਪਸ੍ਸਿਤ੍ਵਾ ਚੋਦੇਤਿ – ‘‘ਓਦਾਤੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੩੯੯. ਆਪਤ੍ਤਿਲੇਸੋ ਨਾਮ ਲਹੁਕਂ ਆਪਤ੍ਤਿਂ ਆਪਜ੍ਜਨ੍ਤੋ ਦਿਟ੍ਠੋ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦੇਤਿ – ‘‘ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੦. ਪਤ੍ਤਲੇਸੋ ਨਾਮ ਲੋਹਪਤ੍ਤਧਰੋ ਦਿਟ੍ਠੋ ਹੋਤਿ…ਪੇ… ਸਾਟਕਪਤ੍ਤਧਰੋ ਦਿਟ੍ਠੋ ਹੋਤਿ…ਪੇ… ਸੁਮ੍ਭਕਪਤ੍ਤਧਰੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਸੁਮ੍ਭਕਪਤ੍ਤਧਰਂ ਪਸ੍ਸਿਤ੍ਵਾ ਚੋਦੇਤਿ – ‘‘ਸੁਮ੍ਭਕਪਤ੍ਤਧਰੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੧. ਚੀਵਰਲੇਸੋ ਨਾਮ ਪਂਸੁਕੂਲਿਕੋ ਦਿਟ੍ਠੋ ਹੋਤਿ…ਪੇ… ਗਹਪਤਿਚੀਵਰਧਰੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਗਹਪਤਿਚੀਵਰਧਰਂ ਪਸ੍ਸਿਤ੍ਵਾ ਚੋਦੇਤਿ – ‘‘ਗਹਪਤਿਚੀਵਰਧਰੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੨. ਉਪਜ੍ਝਾਯਲੇਸੋ ਨਾਮ ਇਤ੍ਥਨ੍ਨਾਮਸ੍ਸ ਸਦ੍ਧਿਵਿਹਾਰਿਕੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਇਤ੍ਥਨ੍ਨਾਮਸ੍ਸ ਸਦ੍ਧਿਵਿਹਾਰਿਕਂ ਪਸ੍ਸਿਤ੍ਵਾ ਚੋਦੇਤਿ – ‘‘ਇਤ੍ਥਨ੍ਨਾਮਸ੍ਸ ਸਦ੍ਧਿਵਿਹਾਰਿਕੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੩. ਆਚਰਿਯਲੇਸੋ ਨਾਮ ਇਤ੍ਥਨ੍ਨਾਮਸ੍ਸ ਅਨ੍ਤੇਵਾਸਿਕੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਇਤ੍ਥਨ੍ਨਾਮਸ੍ਸ ਅਨ੍ਤੇਵਾਸਿਕਂ ਪਸ੍ਸਿਤ੍ਵਾ ਚੋਦੇਤਿ – ‘‘ਇਤ੍ਥਨ੍ਨਾਮਸ੍ਸ ਅਨ੍ਤੇਵਾਸਿਕੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ’’…ਪੇ… ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੪. ਸੇਨਾਸਨਲੇਸੋ ਨਾਮ ਇਤ੍ਥਨ੍ਨਾਮਸੇਨਾਸਨਵਾਸਿਕੋ ਦਿਟ੍ਠੋ ਹੋਤਿ ਪਾਰਾਜਿਕਂ ਧਮ੍ਮਂ ਅਜ੍ਝਾਪਜ੍ਜਨ੍ਤੋ. ਅਞ੍ਞਂ ਇਤ੍ਥਨ੍ਨਾਮਸੇਨਾਸਨਵਾਸਿਕਂ ਪਸ੍ਸਿਤ੍ਵਾ ਚੋਦੇਤਿ – ‘‘ਇਤ੍ਥਨ੍ਨਾਮਸੇਨਾਸਨਵਾਸਿਕੋ ਮਯਾ ਦਿਟ੍ਠੋ. ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋਸਿ, ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ, ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੫. ਪਾਰਾਜਿਕੇਨ ਧਮ੍ਮੇਨਾਤਿ ਚਤੁਨ੍ਨਂ ਅਞ੍ਞਤਰੇਨ.

ਅਨੁਦ੍ਧਂਸੇਯ੍ਯਾਤਿ ਚੋਦੇਤਿ ਵਾ ਚੋਦਾਪੇਤਿ ਵਾ.

ਅਪ੍ਪੇਵ ਨਾਮ ਨਂ ਇਮਮ੍ਹਾ ਬ੍ਰਹ੍ਮਚਰਿਯਾਚਾਵੇਯ੍ਯਨ੍ਤਿ ਭਿਕ੍ਖੁਭਾਵਾ ਚਾਵੇਯ੍ਯਂ, ਸਮਣਧਮ੍ਮਾ ਚਾਵੇਯ੍ਯਂ, ਸੀਲਕ੍ਖਨ੍ਧਾ ਚਾਵੇਯ੍ਯਂ, ਤਪੋਗੁਣਾ ਚਾਵੇਯ੍ਯਂ.

ਤਤੋ ਅਪਰੇਨ ਸਮਯੇਨਾਤਿ ਯਸ੍ਮਿਂ ਖਣੇ ਅਨੁਦ੍ਧਂਸਿਤੋ ਹੋਤਿ, ਤਂ ਖਣਂ ਤਂ ਲਯਂ ਤਂ ਮੁਹੁਤ੍ਤਂ ਵੀਤਿਵਤ੍ਤੇ.

ਸਮਨੁਗ੍ਗਾਹੀਯਮਾਨੋਤਿ ਯੇਨ ਵਤ੍ਥੁਨਾ ਅਨੁਦ੍ਧਂਸਿਤੋ ਹੋਤਿ ਤਸ੍ਮਿਂ ਵਤ੍ਥੁਸ੍ਮਿਂ ਸਮਨੁਗ੍ਗਾਹੀਯਮਾਨੋ.

ਅਸਮਨੁਗ੍ਗਾਹੀਯਮਾਨੋਤਿ ਨ ਕੇਨਚਿ ਵੁਚ੍ਚਮਾਨੋ.

ਅਧਿਕਰਣਂ ਨਾਮ ਚਤ੍ਤਾਰਿ ਅਧਿਕਰਣਾਨਿ – ਵਿਵਾਦਾਧਿਕਰਣਂ, ਅਨੁਵਾਦਾਧਿਕਰਣਂ, ਆਪਤ੍ਤਾਧਿਕਰਣਂ, ਕਿਚ੍ਚਾਧਿਕਰਣਂ.

ਕੋਚਿ ਦੇਸੋ ਲੇਸਮਤ੍ਤੋ ਉਪਾਦਿਨ੍ਨੋਤਿ ਤੇਸਂ ਦਸਨ੍ਨਂ ਲੇਸਾਨਂ ਅਞ੍ਞਤਰੋ ਲੇਸੋ ਉਪਾਦਿਨ੍ਨੋ ਹੋਤਿ.

ਭਿਕ੍ਖੁ ਚ ਦੋਸਂ ਪਤਿਟ੍ਠਾਤੀਤਿ ਤੁਚ੍ਛਕਂ ਮਯਾ ਭਣਿਤਂ, ਮੁਸਾ ਮਯਾ ਭਣਿਤਂ, ਅਭੂਤਂ ਮਯਾ ਭਣਿਤਂ, ਅਜਾਨਨ੍ਤੇਨ ਮਯਾ ਭਣਿਤਂ.

ਸਙ੍ਘਾਦਿਸੇਸੋਤਿ …ਪੇ… ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.

੪੦੬. ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਸਙ੍ਘਾਦਿਸੇਸੇ ਸਙ੍ਘਾਦਿਸੇਸਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦੇਤਿ – ‘‘ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ, ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ, ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਸਙ੍ਘਾਦਿਸੇਸੇ ਥੁਲ੍ਲਚ੍ਚਯਦਿਟ੍ਠਿ ਹੋਤਿ…ਪੇ… ਪਾਚਿਤ੍ਤਿਯਦਿਟ੍ਠਿ ਹੋਤਿ… ਪਾਟਿਦੇਸਨੀਯਦਿਟ੍ਠਿ ਹੋਤਿ… ਦੁਕ੍ਕਟਦਿਟ੍ਠਿ ਹੋਤਿ… ਦੁਬ੍ਭਾਸਿਤਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦੇਤਿ – ‘‘ਅਸ੍ਸਮਣੋਸਿ’’…ਪੇ… ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਥੁਲ੍ਲਚ੍ਚਯਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ ਥੁਲ੍ਲਚ੍ਚਯੇ ਥੁਲ੍ਲਚ੍ਚਯਦਿਟ੍ਠਿ ਹੋਤਿ…ਪੇ… ਥੁਲ੍ਲਚ੍ਚਯੇ ਪਾਚਿਤ੍ਤਿਯਦਿਟ੍ਠਿ ਹੋਤਿ… ਪਾਟਿਦੇਸਨੀਯਦਿਟ੍ਠਿ ਹੋਤਿ… ਦੁਕ੍ਕਟਦਿਟ੍ਠਿ ਹੋਤਿ… ਦੁਬ੍ਭਾਸਿਤਦਿਟ੍ਠਿ ਹੋਤਿ… ਸਙ੍ਘਾਦਿਸੇਸਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦੇਤਿ – ‘‘ਅਸ੍ਸਮਣੋਸਿ’’ …ਪੇ… ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਪਾਚਿਤ੍ਤਿਯਂ…ਪੇ… ਪਾਟਿਦੇਸਨੀਯਂ… ਦੁਕ੍ਕਟਂ… ਦੁਬ੍ਭਾਸਿਤਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਦੁਬ੍ਭਾਸਿਤੇ ਦੁਬ੍ਭਾਸਿਤਦਿਟ੍ਠਿ ਹੋਤਿ…ਪੇ… ਦੁਬ੍ਭਾਸਿਤੇ ਸਙ੍ਘਾਦਿਸੇਸਦਿਟ੍ਠਿ ਹੋਤਿ… ਥੁਲ੍ਲਚ੍ਚਯਦਿਟ੍ਠਿ ਹੋਤਿ… ਪਾਚਿਤ੍ਤਿਯਦਿਟ੍ਠਿ ਹੋਤਿ… ਪਾਟਿਦੇਸਨੀਯਦਿਟ੍ਠਿ ਹੋਤਿ… ਦੁਕ੍ਕਟਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦੇਤਿ – ‘‘ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ, ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ, ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਏਕੇਕਂ ਮੂਲਂ ਕਾਤੁਨ ਚਕ੍ਕਂ ਬਨ੍ਧਿਤਬ੍ਬਂ.

੪੦੭. ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ ਸਙ੍ਘਾਦਿਸੇਸੇ ਸਙ੍ਘਾਦਿਸੇਸਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦਾਪੇਤਿ – ‘‘ਅਸ੍ਸਮਣੋਸਿ’’…ਪੇ… ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਸਙ੍ਘਾਦਿਸੇਸਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ, ਸਙ੍ਘਾਦਿਸੇਸੇ ਥੁਲ੍ਲਚ੍ਚਯਦਿਟ੍ਠਿ ਹੋਤਿ…ਪੇ… ਪਾਚਿਤ੍ਤਿਯਦਿਟ੍ਠਿ ਹੋਤਿ… ਪਾਟਿਦੇਸਨੀਯਦਿਟ੍ਠਿ ਹੋਤਿ… ਦੁਕ੍ਕਟਦਿਟ੍ਠਿ ਹੋਤਿ… ਦੁਬ੍ਭਾਸਿਤਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦਾਪੇਤਿ – ‘‘ਅਸ੍ਸਮਣੋਸਿ’’…ਪੇ… ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਥੁਲ੍ਲਚ੍ਚਯਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ ਥੁਲ੍ਲਚ੍ਚਯੇ ਥੁਲ੍ਲਚ੍ਚਯਦਿਟ੍ਠਿ ਹੋਤਿ…ਪੇ… ਥੁਲ੍ਲਚ੍ਚਯੇ ਪਾਚਿਤ੍ਤਿਯਦਿਟ੍ਠਿ ਹੋਤਿ… ਪਾਟਿਦੇਸਨੀਯਦਿਟ੍ਠਿ ਹੋਤਿ… ਦੁਕ੍ਕਟਦਿਟ੍ਠਿ ਹੋਤਿ… ਦੁਬ੍ਭਾਸਿਤਦਿਟ੍ਠਿ ਹੋਤਿ… ਸਙ੍ਘਾਦਿਸੇਸਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦਾਪੇਤਿ – ‘‘ਅਸ੍ਸਮਣੋਸਿ’’…ਪੇ… ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਪਾਚਿਤ੍ਤਿਯਂ…ਪੇ… ਪਾਟਿਦੇਸਨੀਯਂ… ਦੁਕ੍ਕਟਂ… ਦੁਬ੍ਭਾਸਿਤਂ ਅਜ੍ਝਾਪਜ੍ਜਨ੍ਤੋ ਦਿਟ੍ਠੋ ਹੋਤਿ ਦੁਬ੍ਭਾਸਿਤੇ ਦੁਬ੍ਭਾਸਿਤਦਿਟ੍ਠਿ ਹੋਤਿ…ਪੇ… ਦੁਬ੍ਭਾਸਿਤੇ ਸਙ੍ਘਾਦਿਸੇਸਦਿਟ੍ਠਿ ਹੋਤਿ… ਥੁਲ੍ਲਚ੍ਚਯਦਿਟ੍ਠਿ ਹੋਤਿ… ਪਾਚਿਤ੍ਤਿਯਦਿਟ੍ਠਿ ਹੋਤਿ… ਪਾਟਿਦੇਸਨੀਯਦਿਟ੍ਠਿ ਹੋਤਿ… ਦੁਕ੍ਕਟਦਿਟ੍ਠਿ ਹੋਤਿ. ਤਞ੍ਚੇ ਪਾਰਾਜਿਕੇਨ ਚੋਦਾਪੇਤਿ – ‘‘ਅਸ੍ਸਮਣੋਸਿ, ਅਸਕ੍ਯਪੁਤ੍ਤਿਯੋਸਿ, ਨਤ੍ਥਿ ਤਯਾ ਸਦ੍ਧਿਂ ਉਪੋਸਥੋ ਵਾ ਪਵਾਰਣਾ ਵਾ ਸਙ੍ਘਕਮ੍ਮਂ ਵਾ’’ਤਿ, ਏਵਮ੍ਪਿ ਆਪਤ੍ਤਞ੍ਞਭਾਗਿਯਂ ਹੋਤਿ ਲੇਸੋ ਚ ਉਪਾਦਿਨ੍ਨੋ, ਆਪਤ੍ਤਿ ਵਾਚਾਯ, ਵਾਚਾਯ ਸਙ੍ਘਾਦਿਸੇਸਸ੍ਸ.

੪੦੮. ਅਨਾਪਤ੍ਤਿ ਤਥਾਸਞ੍ਞੀ ਚੋਦੇਤਿ ਵਾ ਚੋਦਾਪੇਤਿ ਵਾ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਦੁਤਿਯਦੁਟ੍ਠਦੋਸਸਿਕ੍ਖਾਪਦਂ ਨਿਟ੍ਠਿਤਂ ਨਵਮਂ.