੪. ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਂ

੨੯੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਸਾਵਤ੍ਥਿਯਂ ਕੁਲੂਪਕੋ ਹੋਤਿ, ਬਹੁਕਾਨਿ ਕੁਲਾਨਿ ਉਪਸਙ੍ਕਮਤਿ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਮਤਪਤਿਕਾ ਅਭਿਰੂਪਾ ਹੋਤਿ ਦਸ੍ਸਨੀਯਾ ਪਾਸਾਦਿਕਾ. ਅਥ ਖੋ ਆਯਸ੍ਮਾ ਉਦਾਯੀ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਸ੍ਸਾ ਇਤ੍ਥਿਯਾ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਸਾ ਇਤ੍ਥੀ ਯੇਨਾਯਸ੍ਮਾ ਉਦਾਯੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਦਾਯਿਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਤਂ ਇਤ੍ਥਿਂ ਆਯਸ੍ਮਾ ਉਦਾਯੀ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਸਾ ਇਤ੍ਥੀ ਆਯਸ੍ਮਤਾ ਉਦਾਯਿਨਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਆਯਸ੍ਮਨ੍ਤਂ ਉਦਾਯਿਂ ਏਤਦਵੋਚ – ‘‘ਵਦੇਯ੍ਯਾਥ, ਭਨ੍ਤੇ, ਯੇਨ ਅਤ੍ਥੋ. ਪਟਿਬਲਾ ਮਯਂ ਅਯ੍ਯਸ੍ਸ ਦਾਤੁਂ ਯਦਿਦਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰ’’ਨ੍ਤਿ.

‘‘ਨ ਖੋ ਤੇ, ਭਗਿਨਿ, ਅਮ੍ਹਾਕਂ ਦੁਲ੍ਲਭਾ ਯਦਿਦਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾ. ਅਪਿਚ, ਯੋ ਅਮ੍ਹਾਕਂ ਦੁਲ੍ਲਭੋ ਤਂ ਦੇਹੀ’’ਤਿ. ‘‘ਕਿਂ, ਭਨ੍ਤੇ’’ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ‘‘ਅਤ੍ਥੋ, ਭਨ੍ਤੇ’’ਤਿ? ‘‘ਅਤ੍ਥੋ, ਭਗਿਨੀ’’ਤਿ. ‘‘ਏਹਿ, ਭਨ੍ਤੇ’’ਤਿ, ਓਵਰਕਂ ਪਵਿਸਿਤ੍ਵਾ ਸਾਟਕਂ ਨਿਕ੍ਖਿਪਿਤ੍ਵਾ ਮਞ੍ਚਕੇ ਉਤ੍ਤਾਨਾ ਨਿਪਜ੍ਜਿ. ਅਥ ਖੋ ਆਯਸ੍ਮਾ ਉਦਾਯੀ ਯੇਨ ਸਾ ਇਤ੍ਥੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ – ‘‘ਕੋ ਇਮਂ ਵਸਲਂ ਦੁਗ੍ਗਨ੍ਧਂ ਆਮਸਿਸ੍ਸਤੀ’’ਤਿ, ਨਿਟ੍ਠੁਹਿਤ੍ਵਾ ਪਕ੍ਕਾਮਿ. ਅਥ ਖੋ ਸਾ ਇਤ੍ਥੀ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਦੁਸ੍ਸੀਲਾ ਮੁਸਾਵਾਦਿਨੋ. ਇਮੇ ਹਿ ਨਾਮ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਪਟਿਜਾਨਿਸ੍ਸਨ੍ਤਿ! ਨਤ੍ਥਿ ਇਮੇਸਂ ਸਾਮਞ੍ਞਂ ਨਤ੍ਥਿ ਇਮੇਸਂ ਬ੍ਰਹ੍ਮਞ੍ਞਂ, ਨਟ੍ਠਂ ਇਮੇਸਂ ਸਾਮਞ੍ਞਂ ਨਟ੍ਠਂ ਇਮੇਸਂ ਬ੍ਰਹ੍ਮਞ੍ਞਂ, ਕੁਤੋ ਇਮੇਸਂ ਸਾਮਞ੍ਞਂ ਕੁਤੋ ਇਮੇਸਂ ਬ੍ਰਹ੍ਮਞ੍ਞਂ, ਅਪਗਤਾ ਇਮੇ ਸਾਮਞ੍ਞਾ ਅਪਗਤਾ ਇਮੇ ਬ੍ਰਹ੍ਮਞ੍ਞਾ. ਕਥਞ੍ਹਿ ਨਾਮ ਸਮਣੋ ਉਦਾਯੀ ਮਂ ਸਾਮਂ ਮੇਥੁਨਧਮ੍ਮਂ ਯਾਚਿਤ੍ਵਾ, ‘ਕੋ ਇਮਂ ਵਸਲਂ ਦੁਗ੍ਗਨ੍ਧਂ ਆਮਸਿਸ੍ਸਤੀ’’ਤਿ ਨਿਟ੍ਠੁਹਿਤ੍ਵਾ ਪਕ੍ਕਮਿਸ੍ਸਤਿ! ਕਿਂ ਮੇ ਪਾਪਕਂ ਕਿਂ ਮੇ ਦੁਗ੍ਗਨ੍ਧਂ, ਕਸ੍ਸਾਹਂ ਕੇਨ ਹਾਯਾਮੀ’’ਤਿ? ਅਞ੍ਞਾਪਿ ਇਤ੍ਥਿਯੋ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਦੁਸ੍ਸੀਲਾ ਮੁਸਾਵਾਦਿਨੋ…ਪੇ… ਕਥਞ੍ਹਿ ਨਾਮ ਸਮਣੋ ਉਦਾਯੀ ਇਮਿਸ੍ਸਾ ਸਾਮਂ ਮੇਥੁਨਧਮ੍ਮਂ ਯਾਚਿਤ੍ਵਾ, ‘ਕੋ ਇਮਂ ਵਸਲਂ ਦੁਗ੍ਗਨ੍ਧਂ ਆਮਸਿਸ੍ਸਤੀ’ਤਿ ਨਿਟ੍ਠੁਹਿਤ੍ਵਾ ਪਕ੍ਕਮਿਸ੍ਸਤਿ! ਕਿਂ ਇਮਿਸ੍ਸਾ ਪਾਪਕਂ ਕਿਂ ਇਮਿਸ੍ਸਾ ਦੁਗ੍ਗਨ੍ਧਂ, ਕਸ੍ਸਾਯਂ ਕੇਨ ਹਾਯਤੀ’’ਤਿ? ਅਸ੍ਸੋਸੁਂ ਖੋ ਭਿਕ੍ਖੂ ਤਾਸਂ ਇਤ੍ਥੀਨਂ ਉਜ੍ਝਾਯਨ੍ਤੀਨਂ ਖਿਯ੍ਯਨ੍ਤੀਨਂ ਵਿਪਾਚੇਨ੍ਤੀਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਦਾਯੀ ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਿਸ੍ਸਤੀ’’ਤਿ!

ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਦਾਯਿਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਉਦਾਯਿਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਉਦਾਯਿ, ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਿਸ੍ਸਸਿ! ਨਨੁ ਮਯਾ, ਮੋਘਪੁਰਿਸ, ਅਨੇਕਪਰਿਯਾਯੇਨ ਵਿਰਾਗਾਯ ਧਮ੍ਮੋ ਦੇਸਿਤੋ ਨੋ ਸਰਾਗਾਯ…ਪੇ… ਕਾਮਪਰਿਲ਼ਾਹਾਨਂ ਵੂਪਸਮੋ ਅਕ੍ਖਾਤੋ? ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੯੧. ‘‘ਯੋ ਪਨ ਭਿਕ੍ਖੁ ਓਤਿਣ੍ਣੋ ਵਿਪਰਿਣਤੇਨ ਚਿਤ੍ਤੇਨ ਮਾਤੁਗਾਮਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸੇਯ੍ਯ – ‘ਏਤਦਗ੍ਗਂ, ਭਗਿਨਿ, ਪਾਰਿਚਰਿਯਾਨਂ ਯਾ ਮਾਦਿਸਂ ਸੀਲਵਨ੍ਤਂ ਕਲ੍ਯਾਣਧਮ੍ਮਂ ਬ੍ਰਹ੍ਮਚਾਰਿਂ ਏਤੇਨ ਧਮ੍ਮੇਨ ਪਰਿਚਰੇਯ੍ਯਾਤਿ ਮੇਥੁਨੁਪਸਂਹਿਤੇਨ’, ਸਙ੍ਘਾਦਿਸੇਸੋ’’ਤਿ.

੨੯੨. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਓਤਿਣ੍ਣੋ ਨਾਮ ਸਾਰਤ੍ਤੋ ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋ.

ਵਿਪਰਿਣਤਨ੍ਤਿ ਰਤ੍ਤਮ੍ਪਿ ਚਿਤ੍ਤਂ ਵਿਪਰਿਣਤ੍ਤਂ, ਦੁਟ੍ਠਮ੍ਪਿ ਚਿਤ੍ਤਂ ਵਿਪਰਿਣਤਂ, ਮੂਲ਼੍ਹਮ੍ਪਿ ਚਿਤ੍ਤਂ ਵਿਪਰਿਣਤਂ. ਅਪਿਚ, ਰਤ੍ਤਂ ਚਿਤ੍ਤਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਂ ਵਿਪਰਿਣਤਨ੍ਤਿ.

ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ, ਨ ਪੇਤੀ, ਨ ਤਿਰਚ੍ਛਾਨਗਤਾ. ਵਿਞ੍ਞੂ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁਂ.

ਮਾਤੁਗਾਮਸ੍ਸ ਸਨ੍ਤਿਕੇਤਿ ਮਾਤੁਗਾਮਸ੍ਸ ਸਾਮਨ੍ਤਾ, ਮਾਤੁਗਾਮਸ੍ਸ ਅਵਿਦੂਰੇ.

ਅਤ੍ਤਕਾਮਨ੍ਤਿ ਅਤ੍ਤਨੋ ਕਾਮਂ ਅਤ੍ਤਨੋ ਹੇਤੁਂ ਅਤ੍ਤਨੋ ਅਧਿਪ੍ਪਾਯਂ ਅਤ੍ਤਨੋ ਪਾਰਿਚਰਿਯਂ.

ਏਤਦਗ੍ਗਨ੍ਤਿ ਏਤਂ ਅਗ੍ਗਂ ਏਤਂ ਸੇਟ੍ਠਂ ਏਤਂ ਮੋਕ੍ਖਂ ਏਤਂ ਉਤ੍ਤਮਂ ਏਤਂ ਪਵਰਂ.

ਯਾਤਿ ਖਤ੍ਤਿਯੀ [ਖਤ੍ਤਿਯਾ (ਸ੍ਯਾ.)] ਵਾ ਬ੍ਰਾਹ੍ਮਣੀ ਵਾ ਵੇਸ੍ਸੀ ਵਾ ਸੁਦ੍ਦੀ ਵਾ.

ਮਾਦਿਸਨ੍ਤਿ ਖਤ੍ਤਿਯਂ ਵਾ ਬ੍ਰਾਹ੍ਮਣਂ ਵਾ ਵੇਸ੍ਸਂ ਵਾ ਸੁਦ੍ਦਂ ਵਾ.

ਸੀਲਵਨ੍ਤਨ੍ਤਿ ਪਾਣਾਤਿਪਾਤਾ ਪਟਿਵਿਰਤਂ, ਅਦਿਨ੍ਨਾਦਾਨਾ ਪਟਿਵਿਰਤਂ, ਮੁਸਾਵਾਦਾ ਪਟਿਵਿਰਤਂ.

ਬ੍ਰਹ੍ਮਚਾਰਿਨ੍ਤਿ ਮੇਥੁਨਧਮ੍ਮਾ ਪਟਿਵਿਰਤਂ.

ਕਲ੍ਯਾਣਧਮ੍ਮੋ ਨਾਮ ਤੇਨ ਚ ਸੀਲੇਨ ਤੇਨ ਚ ਬ੍ਰਹ੍ਮਚਰਿਯੇਨ ਕਲ੍ਯਾਣਧਮ੍ਮੋ ਹੋਤਿ.

ਏਤੇਨ ਧਮ੍ਮੇਨਾਤਿ ਮੇਥੁਨਧਮ੍ਮੇਨ.

ਪਰਿਚਰੇਯ੍ਯਾਤਿ ਅਭਿਰਮੇਯ੍ਯ.

ਮੇਥੁਨੁਪਸਂਹਿਤੇਨਾਤਿ ਮੇਥੁਨਧਮ੍ਮਪ੍ਪਟਿਸਂਯੁਤ੍ਤੇਨ.

ਸਙ੍ਘਾਦਿਸੇਸੋਤਿ…ਪੇ… ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.

੨੯੩. ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਇਤ੍ਥੀ ਚ ਹੋਤਿ ਵੇਮਤਿਕੋ…ਪੇ… ਪਣ੍ਡਕਸਞ੍ਞੀ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਪਣ੍ਡਕੋ ਚ ਹੋਤਿ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਪਣ੍ਡਕੋ ਚ ਹੋਤਿ ਵੇਮਤਿਕੋ…ਪੇ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ… ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਪੁਰਿਸੋ ਚ ਹੋਤਿ…ਪੇ… ਤਿਰਚ੍ਛਾਨਗਤੋ ਚ ਹੋਤਿ ਤਿਰਚ੍ਛਾਨਗਤਸਞ੍ਞੀ…ਪੇ… ਵੇਮਤਿਕੋ ਇਤ੍ਥਿਸਞ੍ਞੀ… ਪਣ੍ਡਕਸਞ੍ਞੀ… ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਤਿਰਚ੍ਛਾਨਗਤਸ੍ਸ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਸਨ੍ਤਿਕੇ ਅਤ੍ਤਕਾਮਪਾਰਿਚਰਿਯਾਯ ਵਣ੍ਣਂ ਭਾਸਤਿ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ….

੨੯੪. ਅਨਾਪਤ੍ਤਿ ‘‘ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਨ ਉਪਟ੍ਠਹਾ’’ਤਿ ਭਣਤਿ, ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾਤਿ.

ਵਿਨੀਤਵਤ੍ਥੁਉਦ੍ਦਾਨਗਾਥਾ

ਕਥਂ ਵਞ੍ਝਾ ਲਭੇ ਪੁਤ੍ਤਂ, ਪਿਯਾ ਚ ਸੁਭਗਾ ਸਿਯਂ;

ਕਿਂ ਦਜ੍ਜਂ ਕੇਨੁਪਟ੍ਠੇਯ੍ਯਂ, ਕਥਂ ਗਚ੍ਛੇਯ੍ਯਂ ਸੁਗ੍ਗਤਿਨ੍ਤਿ.

ਵਿਨੀਤਵਤ੍ਥੁ

੨੯੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਵਞ੍ਝਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕਥਾਹਂ, ਭਨ੍ਤੇ, ਵਿਜਾਯੇਯ੍ਯ’’ਨ੍ਤਿ? ‘‘ਤੇਨ ਹਿ, ਭਗਿਨਿ, ਅਗ੍ਗਦਾਨਂ ਦੇਹੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਵਿਜਾਯਿਨੀ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕਥਾਹਂ, ਭਨ੍ਤੇ, ਪੁਤ੍ਤਂ ਲਭੇਯ੍ਯ’’ਨ੍ਤਿ? ‘‘ਤੇਨ ਹਿ, ਭਗਿਨਿ, ਅਗ੍ਗਦਾਨਂ ਦੇਹੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕਥਾਹਂ, ਭਨ੍ਤੇ, ਸਾਮਿਕਸ੍ਸ ਪਿਯਾ ਅਸ੍ਸ’’ਨ੍ਤਿ? ‘‘ਤੇਨ ਹਿ, ਭਗਿਨਿ, ਅਗ੍ਗਦਾਨਂ ਦੇਹੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕਥਾਹਂ, ਭਨ੍ਤੇ, ਸੁਭਗਾ ਅਸ੍ਸ’’ਨ੍ਤਿ? ‘‘ਤੇਨ ਹਿ, ਭਗਿਨਿ, ਅਗ੍ਗਦਾਨਂ ਦੇਹੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕ੍ਯਾਹਂ, ਭਨ੍ਤੇ, ਅਯ੍ਯਸ੍ਸ ਦਜ੍ਜਾਮੀ’’ਤਿ? ‘‘ਅਗ੍ਗਦਾਨਂ, ਭਗਿਨੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕੇਨਾਹਂ, ਭਨ੍ਤੇ, ਅਯ੍ਯਂ ਉਪਟ੍ਠੇਮੀ’’ਤਿ? ‘‘ਅਗ੍ਗਦਾਨੇਨ, ਭਗਿਨੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਾ ਇਤ੍ਥੀ ਕੁਲੂਪਕਂ ਭਿਕ੍ਖੁਂ ਏਤਦਵੋਚ – ‘‘ਕਥਾਹਂ,

ਭਨ੍ਤੇ, ਸੁਗਤਿਂ ਗਚ੍ਛੇਯ੍ਯ’’ਨ੍ਤਿ? ‘‘ਤੇਨ ਹਿ, ਭਗਿਨਿ, ਅਗ੍ਗਦਾਨਂ ਦੇਹੀ’’ਤਿ. ‘‘ਕਿਂ, ਭਨ੍ਤੇ, ਅਗ੍ਗਦਾਨ’’ਨ੍ਤਿ? ‘‘ਮੇਥੁਨਧਮ੍ਮ’’ਨ੍ਤਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਅਤ੍ਤਕਾਮਪਾਰਿਚਰਿਯਸਿਕ੍ਖਾਪਦਂ ਨਿਟ੍ਠਿਤਂ ਚਤੁਤ੍ਥਂ.