੩. ਹਸਧਮ੍ਮਸਿਕ੍ਖਾਪਦਂ

੩੩੫. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਸਤ੍ਤਰਸਵਗ੍ਗਿਯਾ ਭਿਕ੍ਖੂ ਅਚਿਰਵਤਿਯਾ ਨਦਿਯਾ ਉਦਕੇ ਕੀਲ਼ਨ੍ਤਿ. ਤੇਨ ਖੋ ਪਨ ਸਮਯੇਨ ਰਾਜਾ ਪਸੇਨਦਿ ਕੋਸਲੋ ਮਲ੍ਲਿਕਾਯ ਦੇਵਿਯਾ ਸਦ੍ਧਿਂ ਉਪਰਿਪਾਸਾਦਵਰਗਤੋ ਹੋਤਿ. ਅਦ੍ਦਸਾ ਖੋ ਰਾਜਾ ਪਸੇਨਦਿ ਕੋਸਲੋ ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਅਚਿਰਵਤਿਯਾ ਨਦਿਯਾ ਉਦਕੇ ਕੀਲ਼ਨ੍ਤੇ. ਦਿਸ੍ਵਾਨ ਮਲ੍ਲਿਕਂ ਦੇਵਿਂ ਏਤਦਵੋਚ – ‘‘ਏਤੇ ਤੇ, ਮਲ੍ਲਿਕੇ, ਅਰਹਨ੍ਤੋ ਉਦਕੇ ਕੀਲ਼ਨ੍ਤੀ’’ਤਿ. ‘‘ਨਿਸ੍ਸਂਸਯਂ ਖੋ, ਮਹਾਰਾਜ, ਭਗਵਤਾ ਸਿਕ੍ਖਾਪਦਂ ਅਪਞ੍ਞਤ੍ਤਂ. ਤੇ ਵਾ ਭਿਕ੍ਖੂ ਅਪ੍ਪਕਤਞ੍ਞੁਨੋ’’ਤਿ. ਅਥ ਖੋ ਰਞ੍ਞੋ ਪਸੇਨਦਿਸ੍ਸ ਕੋਸਲਸ੍ਸ ਏਤਦਹੋਸਿ – ‘‘ਕੇਨ ਨੁ ਖੋ ਅਹਂ ਉਪਾਯੇਨ ਭਗਵਤੋ ਚ ਨ ਆਰੋਚੇਯ੍ਯਂ, ਭਗਵਾ ਚ ਜਾਨੇਯ੍ਯ ਇਮੇ ਭਿਕ੍ਖੂ ਉਦਕੇ ਕੀਲ਼ਿਤਾ’’ਤਿ? ਅਥ ਖੋ ਰਾਜਾ ਪਸੇਨਦਿ ਕੋਸਲੋ ਸਤ੍ਤਰਸਵਗ੍ਗਿਯੇ ਭਿਕ੍ਖੂ ਪਕ੍ਕੋਸਾਪੇਤ੍ਵਾ ਮਹਨ੍ਤਂ ਗੁਲ਼ਪਿਣ੍ਡਂ ਅਦਾਸਿ – ‘‘ਇਮਂ, ਭਨ੍ਤੇ, ਗੁਲ਼ਪਿਣ੍ਡਂ ਭਗਵਤੋ ਦੇਥਾ’’ਤਿ. ਸਤ੍ਤਰਸਵਗ੍ਗਿਯਾ ਭਿਕ੍ਖੂ ਤਂ ਗੁਲ਼ਪਿਣ੍ਡਂ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਇਮਂ, ਭਨ੍ਤੇ, ਗੁਲ਼ਪਿਣ੍ਡਂ ਰਾਜਾ ਪਸੇਨਦਿ ਕੋਸਲੋ ਭਗਵਤੋ ਦੇਤੀ’’ਤਿ. ‘‘ਕਹਂ ਪਨ ਤੁਮ੍ਹੇ, ਭਿਕ੍ਖਵੇ, ਰਾਜਾ ਅਦ੍ਦਸਾ’’ਤਿ. ‘‘ਅਚਿਰਵਤਿਯਾ ਨਦਿਯਾ, ਭਗਵਾ, ਉਦਕੇ ਕੀਲ਼ਨ੍ਤੇ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਉਦਕੇ ਕੀਲ਼ਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੩੬. ‘‘ਉਦਕੇ ਹਸਧਮ੍ਮੇ [ਹਸ੍ਸਧਮ੍ਮੇ (ਸੀ. ਸ੍ਯਾ.)] ਪਾਚਿਤ੍ਤਿਯ’’ਨ੍ਤਿ.

੩੩੭. ਉਦਕੇ ਹਸਧਮ੍ਮੋ ਨਾਮ ਉਪਰਿਗੋਪ੍ਫਕੇ ਉਦਕੇ ਹਸਾਧਿਪ੍ਪਾਯੋ ਨਿਮੁਜ੍ਜਤਿ ਵਾ ਉਮ੍ਮੁਜ੍ਜਤਿ ਵਾ ਪਲਵਤਿ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੩੩੮. ਉਦਕੇ ਹਸਧਮ੍ਮੇ ਹਸਧਮ੍ਮਸਞ੍ਞੀ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਦਕੇ ਹਸਧਮ੍ਮੇ ਵੇਮਤਿਕੋ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਦਕੇ ਹਸਧਮ੍ਮੇ ਅਹਸਧਮ੍ਮਸਞ੍ਞੀ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਹੇਟ੍ਠਾਗੋਪ੍ਫਕੇ ਉਦਕੇ ਕੀਲ਼ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਉਦਕੇ ਨਾਵਾਯ ਕੀਲ਼ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਹਤ੍ਥੇਨ ਵਾ ਪਾਦੇਨ ਵਾ ਕਟ੍ਠੇਨ ਵਾ ਕਠਲਾਯ ਵਾ ਉਦਕਂ ਪਹਰਤਿ, ਆਪਤ੍ਤਿ ਦੁਕ੍ਕਟਸ੍ਸ. ਭਾਜਨਗਤਂ ਉਦਕਂ ਵਾ ਕਞ੍ਜਿਕਂ ਵਾ ਖੀਰਂ ਵਾ ਤਕ੍ਕਂ ਵਾ ਰਜਨਂ ਵਾ ਪਸ੍ਸਾਵਂ ਵਾ ਚਿਕ੍ਖਲ੍ਲਂ ਵਾ ਕੀਲ਼ਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਉਦਕੇ ਅਹਸਧਮ੍ਮੇ ਹਸਧਮ੍ਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਉਦਕੇ ਅਹਸਧਮ੍ਮੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਉਦਕੇ ਅਹਸਧਮ੍ਮੇ ਅਹਸਧਮ੍ਮਸਞ੍ਞੀ, ਅਨਾਪਤ੍ਤਿ.

੩੩੯. ਅਨਾਪਤ੍ਤਿ ਨ ਹਸਾਧਿਪ੍ਪਾਯੋ, ਸਤਿ ਕਰਣੀਯੇ ਉਦਕਂ ਓਤਰਿਤ੍ਵਾ ਨਿਮੁਜ੍ਜਤਿ ਵਾ ਉਮ੍ਮੁਜ੍ਜਤਿ ਵਾ ਪਲਵਤਿ ਵਾ, ਪਾਰਂ ਗਚ੍ਛਨ੍ਤੋ ਨਿਮੁਜ੍ਜਤਿ ਵਾ ਉਮ੍ਮੁਜ੍ਜਤਿ ਵਾ ਪਲਵਤਿ ਵਾ, ਆਪਦਾਸੁ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਹਸਧਮ੍ਮਸਿਕ੍ਖਾਪਦਂ ਨਿਟ੍ਠਿਤਂ ਤਤਿਯਂ.