੫. ਅਚੇਲਕਵਗ੍ਗੋ

੧. ਅਚੇਲਕਸਿਕ੍ਖਾਪਦਂ

੨੬੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਸਙ੍ਘਸ੍ਸ ਖਾਦਨੀਯਂ ਉਸ੍ਸਨ੍ਨਂ ਹੋਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਤੇਨਹਾਨਨ੍ਦ, ਵਿਘਾਸਾਦਾਨਂ ਪੂਵਂ ਦੇਹੀ’’ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਵਿਘਾਸਾਦੇ ਪਟਿਪਾਟਿਯਾ ਨਿਸੀਦਾਪੇਤ੍ਵਾ ਏਕੇਕਂ ਪੂਵਂ ਦੇਨ੍ਤੋ ਅਞ੍ਞਤਰਿਸ੍ਸਾ ਪਰਿਬ੍ਬਾਜਿਕਾਯ ਏਕਂ ਮਞ੍ਞਮਾਨੋ ਦ੍ਵੇ ਪੂਵੇ ਅਦਾਸਿ. ਸਾਮਨ੍ਤਾ ਪਰਿਬ੍ਬਾਜਿਕਾਯੋ ਤਂ ਪਰਿਬ੍ਬਾਜਿਕਂ ਏਤਦਵੋਚੁਂ – ‘‘ਜਾਰੋ ਤੇ ਏਸੋ ਸਮਣੋ’’ਤਿ. ‘‘ਨ ਮੇ ਸੋ ਸਮਣੋ ਜਾਰੋ, ਏਕਂ ਮਞ੍ਞਮਾਨੋ ਦ੍ਵੇ ਪੂਵੇ ਅਦਾਸੀ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਆਯਸ੍ਮਾ ਆਨਨ੍ਦੋ ਏਕੇਕਂ ਪੂਵਂ ਦੇਨ੍ਤੋ ਤਸ੍ਸਾਯੇਵ ਪਰਿਬ੍ਬਾਜਿਕਾਯ ਏਕਂ ਮਞ੍ਞਮਾਨੋ ਦ੍ਵੇ ਪੂਵੇ ਅਦਾਸਿ. ਸਾਮਨ੍ਤਾ ਪਰਿਬ੍ਬਾਜਿਕਾਯੋ ਤਂ ਪਰਿਬ੍ਬਾਜਿਕਂ ਏਤਦਵੋਚੁਂ – ‘‘ਜਾਰੋ ਤੇ ਏਸੋ ਸਮਣੋ’’ਤਿ. ‘‘ਨ ਮੇ ਸੋ ਸਮਣੋ ਜਾਰੋ, ਏਕਂ ਮਞ੍ਞਮਾਨੋ ਦ੍ਵੇ ਪੂਵੇ ਅਦਾਸੀ’’ਤਿ. ‘‘ਜਾਰੋ ਨ ਜਾਰੋ’’ਤਿ ਭਣ੍ਡਿਂਸੁ. ਅਞ੍ਞਤਰੋਪਿ ਆਜੀਵਕੋ ਪਰਿਵੇਸਨਂ ਅਗਮਾਸਿ. ਅਞ੍ਞਤਰੋ ਭਿਕ੍ਖੁ ਪਹੂਤੇਨ ਸਪ੍ਪਿਨਾ ਓਦਨਂ ਮਦ੍ਦਿਤ੍ਵਾ ਤਸ੍ਸ ਆਜੀਵਕਸ੍ਸ ਮਹਨ੍ਤਂ ਪਿਣ੍ਡਂ ਅਦਾਸਿ. ਅਥ ਖੋ ਸੋ ਆਜੀਵਕੋ ਤਂ ਪਿਣ੍ਡਂ ਆਦਾਯ ਅਗਮਾਸਿ. ਅਞ੍ਞਤਰੋ ਆਜੀਵਕੋ ਤਂ ਆਜੀਵਕਂ ਏਤਦਵੋਚ – ‘‘ਕੁਤੋ ਤਯਾ, ਆਵੁਸੋ, ਪਿਣ੍ਡੋ ਲਦ੍ਧੋ’’ਤਿ? ‘‘ਤਸ੍ਸਾਵੁਸੋ, ਸਮਣਸ੍ਸ ਗੋਤਮਸ੍ਸ ਮੁਣ੍ਡਗਹਪਤਿਕਸ੍ਸ ਪਰਿਵੇਸਨਾਯ ਲਦ੍ਧੋ’’ਤਿ.

ਅਸ੍ਸੋਸੁਂ ਖੋ ਉਪਾਸਕਾ ਤੇਸਂ ਆਜੀਵਕਾਨਂ ਇਮਂ ਕਥਾਸਲ੍ਲਾਪਂ. ਅਥ ਖੋ ਤੇ ਉਪਾਸਕਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਏਕਮਨ੍ਤਂ ਨਿਸਿਨ੍ਨਾ ਖੋ ਤੇ ਉਪਾਸਕਾ ਭਗਵਨ੍ਤਂ ਏਤਦਵੋਚੁਂ – ‘‘ਇਮੇ, ਭਨ੍ਤੇ, ਤਿਤ੍ਥਿਯਾ ਅਵਣ੍ਣਕਾਮਾ ਬੁਦ੍ਧਸ੍ਸ ਅਵਣ੍ਣਕਾਮਾ ਧਮ੍ਮਸ੍ਸ ਅਵਣ੍ਣਕਾਮਾ ਸਙ੍ਘਸ੍ਸ. ਸਾਧੁ, ਭਨ੍ਤੇ, ਅਯ੍ਯਾ ਤਿਤ੍ਥਿਯਾਨਂ ਸਹਤ੍ਥਾ ਨ ਦਦੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਤੇ ਉਪਾਸਕੇ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਤੇ ਉਪਾਸਕਾ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਮਿਂਸੁ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਿ ਦਸ ਅਤ੍ਥਵਸੇ ਪਟਿਚ੍ਚ – ਸਙ੍ਘਸੁਟ੍ਠੁਤਾਯ, ਸਙ੍ਘਫਾਸੁਤਾਯ …ਪੇ… ਸਦ੍ਧਮ੍ਮਟ੍ਠਿਤਿਯਾ, ਵਿਨਯਾਨੁਗ੍ਗਹਾਯ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੭੦. ‘‘ਯੋ ਪਨ ਭਿਕ੍ਖੁ ਅਚੇਲਕਸ੍ਸ ਵਾ ਪਰਿਬ੍ਬਾਜਕਸ੍ਸ ਵਾ ਪਰਿਬ੍ਬਾਜਿਕਾਯ ਵਾ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦਦੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੨੭੧. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਅਚੇਲਕੋ ਨਾਮ ਯੋ ਕੋਚਿ ਪਰਿਬ੍ਬਾਜਕਸਮਾਪਨ੍ਨੋ ਨਗ੍ਗੋ.

ਪਰਿਬ੍ਬਾਜਕੋ ਨਾਮ ਭਿਕ੍ਖੁਞ੍ਚ ਸਾਮਣੇਰਞ੍ਚ ਠਪੇਤ੍ਵਾ ਯੋ ਕੋਚਿ ਪਰਿਬ੍ਬਾਜਕਸਮਾਪਨ੍ਨੋ.

ਪਰਿਬ੍ਬਾਜਿਕਾ ਨਾਮ ਭਿਕ੍ਖੁਨਿਞ੍ਚ ਸਿਕ੍ਖਮਾਨਞ੍ਚ ਸਾਮਣੇਰਿਞ੍ਚ ਠਪੇਤ੍ਵਾ ਯਾ ਕਾਚਿ ਪਰਿਬ੍ਬਾਜਿਕਸਮਾਪਨ੍ਨਾ.

ਖਾਦਨੀਯਂ ਨਾਮ ਪਞ੍ਚ ਭੋਜਨਾਨਿ – ਉਦਕਦਨ੍ਤਪੋਨਂ ਠਪੇਤ੍ਵਾ ਅਵਸੇਸਂ ਖਾਦਨੀਯਂ ਨਾਮ.

ਭੋਜਨੀਯਂ ਨਾਮ ਪਞ੍ਚ ਭੋਜਨਾਨਿ – ਓਦਨੋ, ਕੁਮ੍ਮਾਸੋ, ਸਤ੍ਤੁ, ਮਚ੍ਛੋ, ਮਂਸਂ.

ਦਦੇਯ੍ਯਾਤਿ ਕਾਯੇਨ ਵਾ ਕਾਯਪਟਿਬਦ੍ਧੇਨ ਵਾ ਨਿਸ੍ਸਗ੍ਗਿਯੇਨ ਵਾ ਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੨੭੨. ਤਿਤ੍ਥਿਯੇ ਤਿਤ੍ਥਿਯਸਞ੍ਞੀ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਤਿਤ੍ਥਿਯੇ ਵੇਮਤਿਕੋ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਤਿਤ੍ਥਿਯੇ ਅਤਿਤ੍ਥਿਯਸਞ੍ਞੀ ਸਹਤ੍ਥਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਉਦਕਦਨ੍ਤਪੋਨਂ ਦੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਤਿਤ੍ਥਿਯੇ ਤਿਤ੍ਥਿਯਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਤਿਤ੍ਥਿਯੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਤਿਤ੍ਥਿਯੇ ਅਤਿਤ੍ਥਿਯਸਞ੍ਞੀ, ਅਨਾਪਤ੍ਤਿ.

੨੭੩. ਅਨਾਪਤ੍ਤਿ ਦਾਪੇਤਿ ਨ ਦੇਤਿ, ਉਪਨਿਕ੍ਖਿਪਿਤ੍ਵਾ ਦੇਤਿ, ਬਾਹਿਰਾਲੇਪਂ ਦੇਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਅਚੇਲਕਸਿਕ੍ਖਾਪਦਂ ਨਿਟ੍ਠਿਤਂ ਪਠਮਂ.

੨. ਉਯ੍ਯੋਜਨਸਿਕ੍ਖਾਪਦਂ

੨੭੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਭਾਤੁਨੋ ਸਦ੍ਧਿਵਿਹਾਰਿਕਂ ਭਿਕ੍ਖੁਂ ਏਤਦਵੋਚ – ‘‘ਏਹਾਵੁਸੋ, ਗਾਮਂ ਪਿਣ੍ਡਾਯ ਪਵਿਸਿਸ੍ਸਾਮਾ’’ਤਿ. ਤਸ੍ਸ ਅਦਾਪੇਤ੍ਵਾ ਉਯ੍ਯੋਜੇਸਿ – ‘‘ਗਚ੍ਛਾਵੁਸੋ, ਨ ਮੇ ਤਯਾ ਸਦ੍ਧਿਂ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤਿ, ਏਕਕਸ੍ਸ ਮੇ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤੀ’’ਤਿ. ਅਥ ਖੋ ਸੋ ਭਿਕ੍ਖੁ ਉਪਕਟ੍ਠੇ ਕਾਲੇ ਨਾਸਕ੍ਖਿ ਪਿਣ੍ਡਾਯ ਚਰਿਤੁਂ, ਪਟਿਕ੍ਕਮਨੇਪਿ ਭਤ੍ਤਵਿਸ੍ਸਗ੍ਗਂ ਨ ਸਮ੍ਭਾਵੇਸਿ, ਛਿਨ੍ਨਭਤ੍ਤੋ ਅਹੋਸਿ. ਅਥ ਖੋ ਸੋ ਭਿਕ੍ਖੁ ਆਰਾਮਂ ਗਨ੍ਤ੍ਵਾ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਭਿਕ੍ਖੁਂ – ‘ਏਹਾਵੁਸੋ, ਗਾਮਂ ਪਿਣ੍ਡਾਯ ਪਵਿਸਿਸ੍ਸਾਮਾ’ਤਿ ਤਸ੍ਸ ਅਦਾਪੇਤ੍ਵਾ ਉਯ੍ਯੋਜੇਸ੍ਸਤੀ’’ਤਿ …ਪੇ… ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਭਿਕ੍ਖੁਂ – ‘‘ਏਹਾਵੁਸੋ, ਗਾਮਂ ਪਿਣ੍ਡਾਯ ਪਵਿਸਿਸ੍ਸਾਮਾ’’ਤਿ ਤਸ੍ਸ ਅਦਾਪੇਤ੍ਵਾ ਉਯ੍ਯੋਜੇਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਭਿਕ੍ਖੁਂ – ‘‘ਏਹਾਵੁਸੋ, ਗਾਮਂ ਪਿਣ੍ਡਾਯ ਪਵਿਸਿਸ੍ਸਾਮਾ’’ਤਿ ਤਸ੍ਸ ਅਦਾਪੇਤ੍ਵਾ ਉਯ੍ਯੋਜੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੭੫. ‘‘ਯੋ ਪਨ ਭਿਕ੍ਖੁ ਭਿਕ੍ਖੁਂ – ‘‘ਏਹਾਵੁਸੋ, ਗਾਮਂ ਵਾ ਨਿਗਮਂ ਵਾ ਪਿਣ੍ਡਾਯ ਪਵਿਸਿਸ੍ਸਾਮਾ’ਤਿ ਤਸ੍ਸ ਦਾਪੇਤ੍ਵਾ ਵਾ ਅਦਾਪੇਤ੍ਵਾ ਵਾ ਉਯ੍ਯੋਜੇਯ੍ਯ – ‘ਗਚ੍ਛਾਵੁਸੋ, ਨ ਮੇ ਤਯਾ ਸਦ੍ਧਿਂ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤਿ, ਏਕਕਸ੍ਸ ਮੇ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤੀ’ਤਿ, ਏਤਦੇਵ ਪਚ੍ਚਯਂ ਕਰਿਤ੍ਵਾ ਅਨਞ੍ਞਂ, ਪਾਚਿਤ੍ਤਿਯ’’ਨ੍ਤਿ.

੨੭੬. ਯੋ ਪਨਾਤਿ ਯੋ, ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਭਿਕ੍ਖੁਨ੍ਤਿ ਅਞ੍ਞਂ ਭਿਕ੍ਖੁਂ.

ਏਹਾਵੁਸੋ, ਗਾਮਂ ਵਾ ਨਿਗਮਂ ਵਾਤਿ ਗਾਮੋਪਿ ਨਿਗਮੋਪਿ ਨਗਰਮ੍ਪਿ, ਗਾਮੋ ਚੇਵ ਨਿਗਮੋ ਚ.

ਤਸ੍ਸ ਦਾਪੇਤ੍ਵਾਤਿ ਯਾਗੁਂ ਵਾ ਭਤ੍ਤਂ ਵਾ ਖਾਦਨੀਯਂ ਵਾ ਭੋਜਨੀਯਂ ਵਾ ਦਾਪੇਤ੍ਵਾ.

ਅਦਾਪੇਤ੍ਵਾਤਿ ਨ ਕਿਞ੍ਚਿ ਦਾਪੇਤ੍ਵਾ.

ਉਯ੍ਯੋਜੇਯ੍ਯਾਤਿ ਮਾਤੁਗਾਮੇਨ ਸਦ੍ਧਿਂ ਹਸਿਤੁਕਾਮੋ ਕੀਲ਼ਿਤੁਕਾਮੋ ਰਹੋ ਨਿਸੀਦਿਤੁਕਾਮੋ ਅਨਾਚਾਰਂ ਆਚਰਿਤੁਕਾਮੋ ਏਵਂ ਵਦੇਤਿ – ‘‘ਗਚ੍ਛਾਵੁਸੋ, ਨ ਮੇ ਤਯਾ ਸਦ੍ਧਿਂ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤਿ, ਏਕਕਸ੍ਸ ਮੇ ਕਥਾ ਵਾ ਨਿਸਜ੍ਜਾ ਵਾ ਫਾਸੁ ਹੋਤੀ’’ਤਿ ਉਯ੍ਯੋਜੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦਸ੍ਸਨੂਪਚਾਰਂ ਵਾ ਸਵਨੂਪਚਾਰਂ ਵਾ ਵਿਜਹਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਵਿਜਹਿਤੇ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਏਤਦੇਵ ਪਚ੍ਚਯਂ ਕਰਿਤ੍ਵਾ ਅਨਞ੍ਞਨ੍ਤਿ ਨ ਅਞ੍ਞੋ ਕੋਚਿ ਪਚ੍ਚਯੋ ਹੋਤਿ ਉਯ੍ਯੋਜੇਤੁਂ.

੨੭੭. ਉਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞੀ ਉਯ੍ਯੋਜੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਪਸਮ੍ਪਨ੍ਨੇ ਵੇਮਤਿਕੋ ਉਯ੍ਯੋਜੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞੀ ਉਯ੍ਯੋਜੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਕਲਿਸਾਸਨਂ ਆਰੋਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨਂ ਉਯ੍ਯੋਜੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਕਲਿਸਾਸਨਂ ਆਰੋਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਪਸਮ੍ਪਨ੍ਨੇ ਅਨੁਪਸਮ੍ਪਨ੍ਨਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ.

੨੭੮. ਅਨਾਪਤ੍ਤਿ ‘‘ਉਭੋ ਏਕਤੋ ਨ ਯਾਪੇਸ੍ਸਾਮਾ’’ਤਿ ਉਯ੍ਯੋਜੇਤਿ, ‘‘ਮਹਗ੍ਘਂ ਭਣ੍ਡਂ ਪਸ੍ਸਿਤ੍ਵਾ ਲੋਭਧਮ੍ਮਂ ਉਪ੍ਪਾਦੇਸ੍ਸਤੀ’’ਤਿ ਉਯ੍ਯੋਜੇਤਿ, ‘‘ਮਾਤੁਗਾਮਂ ਪਸ੍ਸਿਤ੍ਵਾ ਅਨਭਿਰਤਿਂ ਉਪ੍ਪਾਦੇਸ੍ਸਤੀ’’ਤਿ ਉਯ੍ਯੋਜੇਤਿ, ‘‘ਗਿਲਾਨਸ੍ਸ ਵਾ ਓਹਿਯ੍ਯਕਸ੍ਸ ਵਾ ਵਿਹਾਰਪਾਲਸ੍ਸ ਵਾ ਯਾਗੁਂ ਵਾ ਭਤ੍ਤਂ ਵਾ ਖਾਦਨੀਯਂ ਵਾ ਭੋਜਨੀਯਂ ਵਾ ਨੀਹਰਾ’’ਤਿ ਉਯ੍ਯੋਜੇਤਿ, ਨ ਅਨਾਚਾਰਂ ਆਚਰਿਤੁਕਾਮੋ, ਸਤਿ ਕਰਣੀਯੇ ਉਯ੍ਯੋਜੇਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਉਯ੍ਯੋਜਨਸਿਕ੍ਖਾਪਦਂ ਨਿਟ੍ਠਿਤਂ ਦੁਤਿਯਂ.

੩. ਸਭੋਜਨਸਿਕ੍ਖਾਪਦਂ

੨੭੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਸਹਾਯਕਸ੍ਸ ਘਰਂ ਗਨ੍ਤ੍ਵਾ ਤਸ੍ਸ ਪਜਾਪਤਿਯਾ ਸਦ੍ਧਿਂ ਸਯਨਿਘਰੇ [ਸਯਨੀਘਰੇ (ਸ੍ਯਾ.)] ਨਿਸਜ੍ਜਂ ਕਪ੍ਪੇਸਿ. ਅਥ ਖੋ ਸੋ ਪੁਰਿਸੋ ਯੇਨਾਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਪੁਰਿਸੋ ਪਜਾਪਤਿਂ ਏਤਦਵੋਚ – ‘‘ਦਦੇਹਾਯ੍ਯਸ੍ਸ ਭਿਕ੍ਖ’’ਨ੍ਤਿ. ਅਥ ਖੋ ਸਾ ਇਤ੍ਥੀ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਭਿਕ੍ਖਂ ਅਦਾਸਿ. ਅਥ ਖੋ ਸੋ ਪੁਰਿਸੋ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਗਚ੍ਛਥ, ਭਨ੍ਤੇ, ਯਤੋ ਅਯ੍ਯਸ੍ਸ ਭਿਕ੍ਖਾ ਦਿਨ੍ਨਾ’’ਤਿ. ਅਥ ਖੋ ਸਾ ਇਤ੍ਥੀ ਸਲ੍ਲਕ੍ਖੇਤ੍ਵਾ – ‘‘ਪਰਿਯੁਟ੍ਠਿਤੋ ਅਯਂ ਪੁਰਿਸੋ’’ਤਿ, ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਨਿਸੀਦਥ, ਭਨ੍ਤੇ, ਮਾ ਅਗਮਿਤ੍ਥਾ’’ਤਿ. ਦੁਤਿਯਮ੍ਪਿ ਖੋ ਸੋ ਪੁਰਿਸੋ…ਪੇ… ਤਤਿਯਮ੍ਪਿ ਖੋ ਸੋ ਪੁਰਿਸੋ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਗਚ੍ਛਥ, ਭਨ੍ਤੇ, ਯਤੋ ਅਯ੍ਯਸ੍ਸ ਭਿਕ੍ਖਾ ਦਿਨ੍ਨਾ’’ਤਿ. ਤਤਿਯਮ੍ਪਿ ਖੋ ਸਾ ਇਤ੍ਥੀ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਏਤਦਵੋਚ – ‘‘ਨਿਸੀਦਥ, ਭਨ੍ਤੇ, ਮਾ ਅਗਮਿਤ੍ਥਾ’’ਤਿ.

ਅਥ ਖੋ ਸੋ ਪੁਰਿਸੋ ਨਿਕ੍ਖਮਿਤ੍ਵਾ ਭਿਕ੍ਖੂ ਉਜ੍ਝਾਪੇਸਿ – ‘‘ਅਯਂ, ਭਨ੍ਤੇ, ਅਯ੍ਯੋ ਉਪਨਨ੍ਦੋ ਮਯ੍ਹਂ ਪਜਾਪਤਿਯਾ ਸਦ੍ਧਿਂ ਸਯਨਿਘਰੇ ਨਿਸਿਨ੍ਨੋ. ਸੋ ਮਯਾ ਉਯ੍ਯੋਜੀਯਮਾਨੋ ਨ ਇਚ੍ਛਤਿ ਗਨ੍ਤੁਂ. ਬਹੁਕਿਚ੍ਚਾ ਮਯਂ ਬਹੁਕਰਣੀਯਾ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੮੦. ‘‘ਯੋ ਪਨ ਭਿਕ੍ਖੁ ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੨੮੧. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਸਭੋਜਨਂ ਨਾਮ ਕੁਲਂ ਇਤ੍ਥੀ ਚੇਵ ਹੋਤਿ ਪੁਰਿਸੋ ਚ, ਇਤ੍ਥੀ ਚ ਪੁਰਿਸੋ ਚ ਉਭੋ ਅਨਿਕ੍ਖਨ੍ਤਾ ਹੋਨ੍ਤਿ, ਉਭੋ ਅਵੀਤਰਾਗਾ.

ਅਨੁਪਖਜ੍ਜਾਤਿ ਅਨੁਪਵਿਸਿਤ੍ਵਾ.

ਨਿਸਜ੍ਜਂ ਕਪ੍ਪੇਯ੍ਯਾਤਿ ਮਹਲ੍ਲਕੇ ਘਰੇ ਪਿਟ੍ਠਸਙ੍ਘਾਟਸ੍ਸ [ਪਿਟ੍ਠਿਸਙ੍ਘਾਟਸ੍ਸ (ਸ੍ਯਾ.)] ਹਤ੍ਥਪਾਸਂ ਵਿਜਹਿਤ੍ਵਾ ਨਿਸੀਦਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਖੁਦ੍ਦਕੇ ਘਰੇ ਪਿਟ੍ਠਿਵਂਸਂ ਅਤਿਕ੍ਕਮਿਤ੍ਵਾ ਨਿਸੀਦਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੨੮੨. ਸਯਨਿਘਰੇ ਸਯਨਿਘਰਸਞ੍ਞੀ ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਸਯਨਿਘਰੇ ਵੇਮਤਿਕੋ ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਸਯਨਿਘਰੇ ਨਸਯਨਿਘਰਸਞ੍ਞੀ ਸਭੋਜਨੇ ਕੁਲੇ ਅਨੁਪਖਜ੍ਜ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਨਸਯਨਿਘਰੇ ਸਯਨਿਘਰਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਨਸਯਨਿਘਰੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਨਸਯਨਿਘਰੇ ਨਸਯਨਿਘਰਸਞ੍ਞੀ, ਅਨਾਪਤ੍ਤਿ.

੨੮੩. ਅਨਾਪਤ੍ਤਿ ਮਹਲ੍ਲਕੇ ਘਰੇ ਪਿਟ੍ਠਸਙ੍ਘਾਟਸ੍ਸ ਹਤ੍ਥਪਾਸਂ ਅਵਿਜਹਿਤ੍ਵਾ ਨਿਸੀਦਤਿ, ਖੁਦ੍ਦਕੇ ਘਰੇ ਪਿਟ੍ਠਿਵਂਸਂ ਅਨਤਿਕ੍ਕਮਿਤ੍ਵਾ ਨਿਸੀਦਤਿ, ਭਿਕ੍ਖੁ ਦੁਤਿਯੋ ਹੋਤਿ, ਉਭੋ ਨਿਕ੍ਖਨ੍ਤਾ ਹੋਨ੍ਤਿ, ਉਭੋ ਵੀਤਰਾਗਾ, ਨਸਯਨਿਘਰੇ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਸਭੋਜਨਸਿਕ੍ਖਾਪਦਂ ਨਿਟ੍ਠਿਤਂ ਤਤਿਯਂ.

੪. ਰਹੋਪਟਿਚ੍ਛਨ੍ਨਸਿਕ੍ਖਾਪਦਂ

੨੮੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਸਹਾਯਕਸ੍ਸ ਘਰਂ ਗਨ੍ਤ੍ਵਾ ਤਸ੍ਸ ਪਜਾਪਤਿਯਾ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਸਿ. ਅਥ ਖੋ ਸੋ ਪੁਰਿਸੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯੋ ਉਪਨਨ੍ਦੋ ਮਯ੍ਹਂ ਪਜਾਪਤਿਯਾ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਸ੍ਸਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਪੁਰਿਸਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਮਾਤੁਗਾਮੇਨ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਸ੍ਸਤੀਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਮਾਤੁਗਾਮੇਨ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਮਾਤੁਗਾਮੇਨ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੮੫. ‘‘ਯੋ ਪਨ ਭਿਕ੍ਖੁ ਮਾਤੁਗਾਮੇਨ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੨੮੬. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ ਨ ਪੇਤੀ ਨ ਤਿਰਚ੍ਛਾਨਗਤਾ, ਅਨ੍ਤਮਸੋ ਤਦਹੁਜਾਤਾਪਿ ਦਾਰਿਕਾ, ਪਗੇਵ ਮਹਤ੍ਤਰੀ.

ਸਦ੍ਧਿਨ੍ਤਿ ਏਕਤੋ.

[ਪਾਚਿ. ੨੦੦,੨੯੧; ਪਾਰਾ. ੪੪੫,੪੫੪] ਰਹੋ ਨਾਮ ਚਕ੍ਖੁਸ੍ਸ ਰਹੋ ਸੋਤਸ੍ਸ ਰਹੋ. ਚਕ੍ਖੁਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਅਕ੍ਖਿਂ ਵਾ ਨਿਖਣੀਯਮਾਨੇ ਭਮੁਕਂ ਵਾ ਉਕ੍ਖਿਪੀਯਮਾਨੇ ਸੀਸਂ ਵਾ ਉਕ੍ਖਿਪੀਯਮਾਨੇ ਪਸ੍ਸਿਤੁਂ. ਸੋਤਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਪਕਤਿਕਥਾ ਸੋਤੁਂ.

[ਪਾਰਾ. ੪੪੫] ਪਟਿਚ੍ਛਨ੍ਨਂ ਨਾਮ ਆਸਨਂ ਕੁਟ੍ਟੇਨ [ਕੁਡ੍ਡੇਨ (ਸੀ. ਸ੍ਯਾ.)] ਵਾ ਕਵਾਟੇਨ ਵਾ ਕਿਲਞ੍ਜੇਨ ਵਾ ਸਾਣਿਪਾਕਾਰੇਨ ਵਾ ਰੁਕ੍ਖੇਨ ਵਾ ਥਮ੍ਭੇਨ ਵਾ ਕੋਤ੍ਥਲ਼ਿਯਾ [ਕੋਟ੍ਠਲ਼ਿਯਾ (ਸੀ. ਸ੍ਯਾ.) ਕੋਤ੍ਥਲ਼ਿਕਾਯ (ਕ.)] ਵਾ, ਯੇਨ ਕੇਨਚਿ ਪਟਿਚ੍ਛਨ੍ਨਂ ਹੋਤਿ.

ਨਿਸਜ੍ਜਂ ਕਪ੍ਪੇਯ੍ਯਾਤਿ ਮਾਤੁਗਾਮੇ ਨਿਸਿਨ੍ਨੇ ਭਿਕ੍ਖੁ ਉਪਨਿਸਿਨ੍ਨੋ ਵਾ ਹੋਤਿ ਉਪਨਿਪਨ੍ਨੋ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਭਿਕ੍ਖੁ ਨਿਸਿਨ੍ਨੇ ਮਾਤੁਗਾਮੋ ਉਪਨਿਸਿਨ੍ਨੋ ਵਾ ਹੋਤਿ ਉਪਨਿਪਨ੍ਨੋ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਭੋ ਵਾ ਨਿਸਿਨ੍ਨਾ ਹੋਨ੍ਤਿ ਉਭੋ ਵਾ ਨਿਪਨ੍ਨਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੨੮੭. ਮਾਤੁਗਾਮੇ ਮਾਤੁਗਾਮਸਞ੍ਞੀ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਮਾਤੁਗਾਮੇ ਵੇਮਤਿਕੋ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਮਾਤੁਗਾਮੇ ਅਮਾਤੁਗਾਮਸਞ੍ਞੀ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਯਕ੍ਖਿਯਾ ਵਾ ਪੇਤਿਯਾ ਵਾ ਪਣ੍ਡਕੇਨ ਵਾ ਤਿਰਚ੍ਛਾਨਗਤਾਯ ਵਾ ਮਨੁਸ੍ਸਵਿਗ੍ਗਹਿਤ੍ਥਿਯਾ ਵਾ ਸਦ੍ਧਿਂ ਰਹੋ ਪਟਿਚ੍ਛਨ੍ਨੇ ਆਸਨੇ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਮਾਤੁਗਾਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਅਮਾਤੁਗਾਮਸਞ੍ਞੀ, ਅਨਾਪਤ੍ਤਿ.

੨੮੮. ਅਨਾਪਤ੍ਤਿ ਯੋ ਕੋਚਿ ਵਿਞ੍ਞੂ ਪੁਰਿਸੋ ਦੁਤਿਯੋ ਹੋਤਿ, ਤਿਟ੍ਠਤਿ ਨ ਨਿਸੀਦਤਿ, ਅਰਹੋਪੇਕ੍ਖੋ, ਅਞ੍ਞਵਿਹਿਤੋ ਨਿਸੀਦਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਰਹੋਪਟਿਚ੍ਛਨ੍ਨਸਿਕ੍ਖਾਪਦਂ ਨਿਟ੍ਠਿਤਂ ਚਤੁਤ੍ਥਂ.

੫. ਰਹੋਨਿਸਜ੍ਜਸਿਕ੍ਖਾਪਦਂ

੨੮੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਸਹਾਯਕਸ੍ਸ ਘਰਂ ਗਨ੍ਤ੍ਵਾ ਤਸ੍ਸ ਪਜਾਪਤਿਯਾ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸਿ. ਅਥ ਖੋ ਸੋ ਪੁਰਿਸੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਅਯ੍ਯੋ ਉਪਨਨ੍ਦੋ ਮਯ੍ਹਂ ਪਜਾਪਤਿਯਾ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸ੍ਸਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਪੁਰਿਸਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਾਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੯੦. ‘‘ਯੋ ਪਨ ਭਿਕ੍ਖੁ ਮਾਤੁਗਾਮੇਨ ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੨੯੧. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ ਨ ਪੇਤੀ ਨ ਤਿਰਚ੍ਛਾਨਗਤਾ, ਵਿਞ੍ਞੂ ਪਟਿਬਲਾ ਸੁਭਾਸਿਤਦੁਬ੍ਭਾਸਿਤਂ ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਜਾਨਿਤੁਂ.

ਸਦ੍ਧਿਨ੍ਤਿ ਏਕਤੋ.

ਏਕੋ ਏਕਾਯਾਤਿ ਭਿਕ੍ਖੁ ਚੇਵ ਹੋਤਿ ਮਾਤੁਗਾਮੋ ਚ.

[ਪਾਚਿ. ੨੦੦,੨੮੬; ਪਾਰਾ. ੪੪੫,੪੫੪] ਰਹੋ ਨਾਮ ਚਕ੍ਖੁਸ੍ਸ ਰਹੋ, ਸੋਤਸ੍ਸ ਰਹੋ. ਚਕ੍ਖੁਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਅਕ੍ਖਿਂ ਵਾ ਨਿਖਣੀਯਮਾਨੇ ਭਮੁਕਂ ਵਾ ਉਕ੍ਖਿਪੀਯਮਾਨੇ ਸੀਸਂ ਵਾ ਉਕ੍ਖਿਪੀਯਮਾਨੇ ਪਸ੍ਸਿਤੁਂ. ਸੋਤਸ੍ਸ ਰਹੋ ਨਾਮ ਨ ਸਕ੍ਕਾ ਹੋਤਿ ਪਕਤਿਕਥਾ ਸੋਤੁਂ.

੨੯੨. ਮਾਤੁਗਾਮੇ ਮਾਤੁਗਾਮਸਞ੍ਞੀ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਮਾਤੁਗਾਮੇ ਵੇਮਤਿਕੋ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਮਾਤੁਗਾਮੇ ਅਮਾਤੁਗਾਮਸਞ੍ਞੀ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਯਕ੍ਖਿਯਾ ਵਾ ਪੇਤਿਯਾ ਵਾ ਪਣ੍ਡਕੇਨ ਵਾ ਤਿਰਚ੍ਛਾਨਗਤਮਨੁਸ੍ਸਵਿਗ੍ਗਹਿਤ੍ਥਿਯਾ ਵਾ [ਤਿਰਚ੍ਛਾਨਗਤਾਯ ਵਾ ਮਨੁਸ੍ਸਵਿਗ੍ਗਹਿਤ੍ਥਿਯਾ ਵਾ (ਕ.)] ਸਦ੍ਧਿਂ ਏਕੋ ਏਕਾਯ ਰਹੋ ਨਿਸਜ੍ਜਂ ਕਪ੍ਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਮਾਤੁਗਾਮਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਮਾਤੁਗਾਮੇ ਅਮਾਤੁਗਾਮਸਞ੍ਞੀ, ਅਨਾਪਤ੍ਤਿ.

੨੯੩. ਅਨਾਪਤ੍ਤਿ ਯੋ ਕੋਚਿ ਵਿਞ੍ਞੂ ਪੁਰਿਸੋ ਦੁਤਿਯੋ ਹੋਤਿ, ਤਿਟ੍ਠਤਿ ਨ ਨਿਸੀਦਤਿ, ਅਰਹੋਪੇਕ੍ਖੋ ਅਞ੍ਞਵਿਹਿਤੋ ਨਿਸੀਦਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਰਹੋਨਿਸਜ੍ਜਸਿਕ੍ਖਾਪਦਂ ਨਿਟ੍ਠਿਤਂ ਪਞ੍ਚਮਂ.

੬. ਚਾਰਿਤ੍ਤਸਿਕ੍ਖਾਪਦਂ

੨੯੪. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਉਪਟ੍ਠਾਕਕੁਲਂ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਭਤ੍ਤੇਨ ਨਿਮਨ੍ਤੇਸਿ. ਅਞ੍ਞੇਪਿ ਭਿਕ੍ਖੂ ਭਤ੍ਤੇਨ ਨਿਮਨ੍ਤੇਸਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪੁਰੇਭਤ੍ਤਂ, ਕੁਲਾਨਿ ਪਯਿਰੁਪਾਸਤਿ. ਅਥ ਖੋ ਤੇ ਭਿਕ੍ਖੂ ਤੇ ਮਨੁਸ੍ਸੇ ਏਤਦਵੋਚੁਂ – ‘‘ਦੇਥਾਵੁਸੋ ਭਤ੍ਤ’’ਨ੍ਤਿ. ‘‘ਆਗਮੇਥ, ਭਨ੍ਤੇ, ਯਾਵਾਯ੍ਯੋ ਉਪਨਨ੍ਦੋ ਆਗਚ੍ਛਤੀ’’ਤਿ. ਦੁਤਿਯਮ੍ਪਿ ਖੋ ਤੇ ਭਿਕ੍ਖੂ…ਪੇ… ਤਤਿਯਮ੍ਪਿ ਖੋ ਤੇ ਭਿਕ੍ਖੂ ਤੇ ਮਨੁਸ੍ਸੇ ਏਤਦਵੋਚੁਂ – ‘‘ਦੇਥਾਵੁਸੋ, ਭਤ੍ਤਂ; ਪੁਰੇ ਕਾਲੋ ਅਤਿਕ੍ਕਮਤੀ’’ਤਿ. ‘‘ਯਮ੍ਪਿ ਮਯਂ, ਭਨ੍ਤੇ, ਭਤ੍ਤਂ ਕਰਿਮ੍ਹਾ ਅਯ੍ਯਸ੍ਸ ਉਪਨਨ੍ਦਸ੍ਸ ਕਾਰਣਾ. ਆਗਮੇਥ, ਭਨ੍ਤੇ, ਯਾਵਾਯ੍ਯੋ ਉਪਨਨ੍ਦੋ ਆਗਚ੍ਛਤੀ’’ਤਿ.

ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪੁਰੇਭਤ੍ਤਂ ਕੁਲਾਨਿ ਪਯਿਰੁਪਾਸਿਤ੍ਵਾ ਦਿਵਾ ਆਗਚ੍ਛਤਿ. ਭਿਕ੍ਖੂ ਨ ਚਿਤ੍ਤਰੂਪਂ ਭੁਞ੍ਜਿਂਸੁ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੯੫. [ਮਹਾਵ. ੨੭੭] ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਨਨ੍ਦਸ੍ਸ ਸਕ੍ਯਪੁਤ੍ਤਸ੍ਸ ਉਪਟ੍ਠਾਕਕੁਲਂ ਸਙ੍ਘਸ੍ਸਤ੍ਥਾਯ ਖਾਦਨੀਯਂ ਪਾਹੇਸਿ – ‘‘ਅਯ੍ਯਸ੍ਸ ਉਪਨਨ੍ਦਸ੍ਸ ਦਸ੍ਸੇਤ੍ਵਾ ਸਙ੍ਘਸ੍ਸ ਦਾਤਬ੍ਬ’’ਨ੍ਤਿ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਗਾਮਂ ਪਿਣ੍ਡਾਯ ਪਵਿਟ੍ਠੋ ਹੋਤਿ. ਅਥ ਖੋ ਤੇ ਮਨੁਸ੍ਸਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਪੁਚ੍ਛਿਂਸੁ – ‘‘ਕਹਂ, ਭਨ੍ਤੇ, ਅਯ੍ਯੋ ਉਪਨਨ੍ਦੋ’’ਤਿ? ‘‘ਏਸਾਵੁਸੋ, ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਗਾਮਂ ਪਿਣ੍ਡਾਯ ਪਵਿਟ੍ਠੋ’’ਤਿ. ‘‘ਇਦਂ, ਭਨ੍ਤੇ, ਖਾਦਨੀਯਂ ਅਯ੍ਯਸ੍ਸ ਉਪਨਨ੍ਦਸ੍ਸ ਦਸ੍ਸੇਤ੍ਵਾ ਸਙ੍ਘਸ੍ਸ ਦਾਤਬ੍ਬ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਪਟਿਗ੍ਗਹੇਤ੍ਵਾ ਨਿਕ੍ਖਿਪਥ ਯਾਵ ਉਪਨਨ੍ਦੋ ਆਗਚ੍ਛਤੀ’’ਤਿ.

ਅਥ ਖੋ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ – ‘‘ਭਗਵਤਾ ਪਟਿਕ੍ਖਿਤ੍ਤਂ ਪੁਰੇਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਤੁ’’ਨ੍ਤਿ ਪਚ੍ਛਾਭਤ੍ਤਂ ਕੁਲਾਨਿ ਪਯਿਰੁਪਾਸਿਤ੍ਵਾ ਦਿਵਾ ਪਟਿਕ੍ਕਮਿ, ਖਾਦਨੀਯਂ ਉਸ੍ਸਾਰਿਯਿਤ੍ਥ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਪਨਨ੍ਦੋ ਸਕ੍ਯਪੁਤ੍ਤੋ ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਉਪਨਨ੍ਦ, ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਸੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਪਚ੍ਛਾਭਤ੍ਤਂ ਕੁਲੇਸੁ ਚਾਰਿਤ੍ਤਂ ਆਪਜ੍ਜਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ ਭਿਕ੍ਖਵੇ ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੯੬. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚੀਵਰਦਾਨਸਮਯੇ ਕੁਕ੍ਕੁਚ੍ਚਾਯਨ੍ਤਾ ਕੁਲਾਨਿ ਨ ਪਯਿਰੁਪਾਸਨ੍ਤਿ. ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਦਾਨਸਮਯੇ ਕੁਲਾਨਿ ਪਯਿਰੁਪਾਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ. ਚੀਵਰਦਾਨਸਮਯੋ – ਅਯਂ ਤਤ੍ਥ ਸਮਯੋ’’ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੯੭. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਚੀਵਰਕਮ੍ਮਂ ਕਰੋਨ੍ਤਿ, ਅਤ੍ਥੋ ਚ ਹੋਤਿ ਸੂਚਿਯਾਪਿ ਸੁਤ੍ਤੇਨਪਿ ਸਤ੍ਥਕੇਨਪਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਕੁਲਾਨਿ ਨ ਪਯਿਰੁਪਾਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਕਾਰਸਮਯੇ ਕੁਲਾਨਿ ਪਯਿਰੁਪਾਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ. ਚੀਵਰਦਾਨਸਮਯੋ, ਚੀਵਰਕਾਰਸਮਯੋ – ਅਯਂ ਤਤ੍ਥ ਸਮਯੋ’’ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੯੮. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਗਿਲਾਨਾ ਹੋਨ੍ਤਿ, ਅਤ੍ਥੋ ਚ ਹੋਤਿ ਭੇਸਜ੍ਜੇਹਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਕੁਲਾਨਿ ਨ ਪਯਿਰੁਪਾਸਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਸਨ੍ਤਂ ਭਿਕ੍ਖੁਂ ਆਪੁਚ੍ਛਾ ਕੁਲਾਨਿ ਪਯਿਰੁਪਾਸਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੯੯. ‘‘ਯੋ ਪਨ ਭਿਕ੍ਖੁ ਨਿਮਨ੍ਤਿਤੋ ਸਭਤ੍ਤੋ ਸਮਾਨੋ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ. ਚੀਵਰਦਾਨਸਮਯੋ, ਚੀਵਰਕਾਰਸਮਯੋ – ਅਯਂ ਤਤ੍ਥ ਸਮਯੋ’’ਤਿ.

੩੦੦. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਨਿਮਨ੍ਤਿਤੋ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤੋ.

ਸਭਤ੍ਤੋ ਨਾਮ ਯੇਨ ਨਿਮਨ੍ਤਿਤੋ ਤੇਨ ਸਭਤ੍ਤੋ.

ਸਨ੍ਤਂ ਨਾਮ ਭਿਕ੍ਖੁਂ ਸਕ੍ਕਾ ਹੋਤਿ ਆਪੁਚ੍ਛਾ ਪਵਿਸਿਤੁਂ.

ਅਸਨ੍ਤਂ ਨਾਮ ਭਿਕ੍ਖੁਂ ਨ ਸਕ੍ਕਾ ਹੋਤਿ ਆਪੁਚ੍ਛਾ ਪਵਿਸਿਤੁਂ.

ਪੁਰੇਭਤ੍ਤਂ ਨਾਮ ਯੇਨ ਨਿਮਨ੍ਤਿਤੋ ਤਂ ਅਭੁਤ੍ਤਾਵੀ.

ਪਚ੍ਛਾਭਤ੍ਤਂ ਨਾਮ ਯੇਨ ਨਿਮਨ੍ਤਿਤੋ ਤਂ ਅਨ੍ਤਮਸੋ ਕੁਸਗ੍ਗੇਨਪਿ [ਅਰੁਣੁਗ੍ਗਮਨੇਪਿ (ਸੀ.)] ਭੁਤ੍ਤਂ ਹੋਤਿ.

ਕੁਲਂ ਨਾਮ ਚਤ੍ਤਾਰਿ ਕੁਲਾਨਿ – ਖਤ੍ਤਿਯਕੁਲਂ, ਬ੍ਰਾਹ੍ਮਣਕੁਲਂ, ਵੇਸ੍ਸਕੁਲਂ, ਸੁਦ੍ਦਕੁਲਂ.

ਕੁਲੇਸੁ ਚਾਰਿਤ੍ਤਂ ਆਪਜ੍ਜੇਯ੍ਯਾਤਿ ਅਞ੍ਞਸ੍ਸ ਘਰੂਪਚਾਰਂ ਓਕ੍ਕਮਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਪਠਮਂ ਪਾਦਂ ਉਮ੍ਮਾਰਂ ਅਤਿਕ੍ਕਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦੁਤਿਯਂ ਪਾਦਂ ਅਤਿਕ੍ਕਾਮੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਞ੍ਞਤ੍ਰ ਸਮਯਾਤਿ ਠਪੇਤ੍ਵਾ ਸਮਯਂ.

ਚੀਵਰਦਾਨਸਮਯੋ ਨਾਮ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਪਞ੍ਚ ਮਾਸਾ.

ਚੀਵਰਕਾਰਸਮਯੋ ਨਾਮ ਚੀਵਰੇ ਕਯਿਰਮਾਨੇ.

੩੦੧. ਨਿਮਨ੍ਤਿਤੇ ਨਿਮਨ੍ਤਿਤਸਞ੍ਞੀ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜਤਿ, ਅਞ੍ਞਤ੍ਰ ਸਮਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਨਿਮਨ੍ਤਿਤੇ ਵੇਮਤਿਕੋ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜਤਿ, ਅਞ੍ਞਤ੍ਰ ਸਮਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਨਿਮਨ੍ਤਿਤੇ ਅਨਿਮਨ੍ਤਿਤਸਞ੍ਞੀ ਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪੁਰੇਭਤ੍ਤਂ ਵਾ ਪਚ੍ਛਾਭਤ੍ਤਂ ਵਾ ਕੁਲੇਸੁ ਚਾਰਿਤ੍ਤਂ ਆਪਜ੍ਜਤਿ, ਅਞ੍ਞਤ੍ਰ ਸਮਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਨਿਮਨ੍ਤਿਤੇ ਨਿਮਨ੍ਤਿਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਨਿਮਨ੍ਤਿਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਨਿਮਨ੍ਤਿਤੇ ਅਨਿਮਨ੍ਤਿਤਸਞ੍ਞੀ, ਅਨਾਪਤ੍ਤਿ.

੩੦੨. ਅਨਾਪਤ੍ਤਿ ਸਮਯੇ, ਸਨ੍ਤਂ ਭਿਕ੍ਖੁਂ ਆਪੁਚ੍ਛਾ ਪਵਿਸਤਿ, ਅਸਨ੍ਤਂ ਭਿਕ੍ਖੁਂ ਅਨਾਪੁਚ੍ਛਾ ਪਵਿਸਤਿ, ਅਞ੍ਞਸ੍ਸ ਘਰੇਨ ਮਗ੍ਗੋ ਹੋਤਿ, ਘਰੂਪਚਾਰੇਨ ਮਗ੍ਗੋ ਹੋਤਿ, ਅਨ੍ਤਰਾਰਾਮਂ ਗਚ੍ਛਤਿ, ਭਿਕ੍ਖੁਨੁਪਸ੍ਸਯਂ ਗਚ੍ਛਤਿ, ਤਿਤ੍ਥਿਯਸੇਯ੍ਯਂ ਗਚ੍ਛਤਿ, ਪਟਿਕ੍ਕਮਨਂ ਗਚ੍ਛਤਿ, ਭਤ੍ਤਿਯਘਰਂ ਗਚ੍ਛਤਿ, ਆਪਦਾਸੁ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਚਾਰਿਤ੍ਤਸਿਕ੍ਖਾਪਦਂ ਨਿਟ੍ਠਿਤਂ ਛਟ੍ਠਂ.

੭. ਮਹਾਨਾਮਸਿਕ੍ਖਾਪਦਂ

੩੦੩. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ. ਤੇਨ ਖੋ ਪਨ ਸਮਯੇਨ ਮਹਾਨਾਮਸ੍ਸ ਸਕ੍ਕਸ੍ਸ ਭੇਸਜ੍ਜਂ ਉਸ੍ਸਨ੍ਨਂ ਹੋਤਿ. ਅਥ ਖੋ ਮਹਾਨਾਮੋ ਸਕ੍ਕੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮਹਾਨਾਮੋ ਸਕ੍ਕੋ ਭਗਵਨ੍ਤਂ ਏਤਦਵੋਚ – ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਂ ਚਤੁਮਾਸਂ [ਚਤੁਮ੍ਮਾਸਂ (ਸੀ.) ਚਾਤੁਮਾਸਂ (ਸ੍ਯਾ.)] ਭੇਸਜ੍ਜੇਨ ਪਵਾਰੇਤੁ’’ਨ੍ਤਿ. ‘‘ਸਾਧੁ ਸਾਧੁ, ਮਹਾਨਾਮ! ਤੇਨ ਹਿ ਤ੍ਵਂ, ਮਹਾਨਾਮ, ਸਙ੍ਘਂ ਚਤੁਮਾਸਂ ਭੇਸਜ੍ਜੇਨ ਪਵਾਰੇਹੀ’’ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਧਿਵਾਸੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਚਤੁਮਾਸਂ ਭੇਸਜ੍ਜਪ੍ਪਚ੍ਚਯਪਵਾਰਣਂ ਸਾਦਿਤੁਨ੍ਤਿ.

੩੦੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਮਹਾਨਾਮਂ ਸਕ੍ਕਂ ਪਰਿਤ੍ਤਂ ਭੇਸਜ੍ਜਂ ਵਿਞ੍ਞਾਪੇਨ੍ਤਿ. ਤਥੇਵ ਮਹਾਨਾਮਸ੍ਸ ਸਕ੍ਕਸ੍ਸ ਭੇਸਜ੍ਜਂ ਉਸ੍ਸਨ੍ਨਂ ਹੋਤਿ. ਦੁਤਿਯਮ੍ਪਿ ਖੋ ਮਹਾਨਾਮੋ ਸਕ੍ਕੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮਹਾਨਾਮੋ ਸਕ੍ਕੋ ਭਗਵਨ੍ਤਂ ਏਤਦਵੋਚ – ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਂ ਅਪਰਮ੍ਪਿ ਚਤੁਮਾਸਂ ਭੇਸਜ੍ਜੇਨ ਪਵਾਰੇਤੁ’’ਨ੍ਤਿ. ‘‘ਸਾਧੁ ਸਾਧੁ, ਮਹਾਨਾਮ! ਤੇਨ ਹਿ ਤ੍ਵਂ, ਮਹਾਨਾਮ, ਸਙ੍ਘਂ ਅਪਰਮ੍ਪਿ ਚਤੁਮਾਸਂ ਭੇਸਜ੍ਜੇਨ ਪਵਾਰੇਹੀ’’ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਧਿਵਾਸੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਪੁਨ ਪਵਾਰਣਮ੍ਪਿ ਸਾਦਿਤੁਨ੍ਤਿ.

੩੦੫. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਮਹਾਨਾਮਂ ਸਕ੍ਕਂ ਪਰਿਤ੍ਤਂਯੇਵ ਭੇਸਜ੍ਜਂ ਵਿਞ੍ਞਾਪੇਨ੍ਤਿ. ਤਥੇਵ ਮਹਾਨਾਮਸ੍ਸ ਸਕ੍ਕਸ੍ਸ ਭੇਸਜ੍ਜਂ ਉਸ੍ਸਨ੍ਨਂ ਹੋਤਿ. ਤਤਿਯਮ੍ਪਿ ਖੋ ਮਹਾਨਾਮੋ ਸਕ੍ਕੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮਹਾਨਾਮੋ ਸਕ੍ਕੋ ਭਗਵਨ੍ਤਂ ਏਤਦਵੋਚ – ‘‘ਇਚ੍ਛਾਮਹਂ, ਭਨ੍ਤੇ, ਸਙ੍ਘਂ ਯਾਵਜੀਵਂ ਭੇਸਜ੍ਜੇਨ ਪਵਾਰੇਤੁ’’ਨ੍ਤਿ. ‘‘ਸਾਧੁ ਸਾਧੁ, ਮਹਾਨਾਮ! ਤੇਨ ਹਿ ਤ੍ਵਂ, ਮਹਾਨਾਮ, ਸਙ੍ਘਂ ਯਾਵਜੀਵਂ ਭੇਸਜ੍ਜੇਨ ਪਵਾਰੇਹੀ’’ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਧਿਵਾਸੇਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਨਿਚ੍ਚਪਵਾਰਣਮ੍ਪਿ ਸਾਦਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਦੁਨ੍ਨਿਵਤ੍ਥਾ ਹੋਨ੍ਤਿ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ. ਮਹਾਨਾਮੋ ਸਕ੍ਕੋ ਵਤ੍ਤਾ ਹੋਤਿ – ‘‘ਕਿਸ੍ਸ ਤੁਮ੍ਹੇ, ਭਨ੍ਤੇ, ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ? ਨਨੁ ਨਾਮ ਪਬ੍ਬਜਿਤੇਨ ਸੁਨਿਵਤ੍ਥੇਨ ਭਵਿਤਬ੍ਬਂ ਸੁਪਾਰੁਤੇਨ ਆਕਪ੍ਪਸਮ੍ਪਨ੍ਨੇਨਾ’’ਤਿ? ਛਬ੍ਬਗ੍ਗਿਯਾ ਭਿਕ੍ਖੂ ਮਹਾਨਾਮੇ ਸਕ੍ਕੇ ਉਪਨਨ੍ਧਿਂਸੁ. ਅਥ ਖੋ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਮਯਂ ਉਪਾਯੇਨ ਮਹਾਨਾਮਂ ਸਕ੍ਕਂ ਮਙ੍ਕੁ ਕਰੇਯ੍ਯਾਮਾ’’ਤਿ? ਅਥ ਖੋ ਛਬ੍ਬਗ੍ਗਿਯਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਮਹਾਨਾਮੇਨ ਖੋ, ਆਵੁਸੋ, ਸਕ੍ਕੇਨ ਸਙ੍ਘੋ ਭੇਸਜ੍ਜੇਨ ਪਵਾਰਿਤੋ. ਹਨ੍ਦ ਮਯਂ, ਆਵੁਸੋ, ਮਹਾਨਾਮਂ ਸਕ੍ਕਂ ਸਪ੍ਪਿਂ ਵਿਞ੍ਞਾਪੇਮਾ’’ਤਿ. ਅਥ ਖੋ ਛਬ੍ਬਗ੍ਗਿਯਾ ਭਿਕ੍ਖੂ ਯੇਨ ਮਹਾਨਾਮੋ ਸਕ੍ਕੋ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਮਹਾਨਾਮਂ ਸਕ੍ਕਂ ਏਤਦਵੋਚੁਂ – ‘‘ਦੋਣੇਨ, ਆਵੁਸੋ, ਸਪ੍ਪਿਨਾ ਅਤ੍ਥੋ’’ਤਿ. ‘‘ਅਜ੍ਜਣ੍ਹੋ, ਭਨ੍ਤੇ, ਆਗਮੇਥ. ਮਨੁਸ੍ਸਾ ਵਜਂ ਗਤਾ ਸਪ੍ਪਿਂ ਆਹਰਿਤੁਂ. ਕਾਲਂ ਆਹਰਿਸ੍ਸਥਾ’’ਤਿ [ਕਾਲੇ ਹਰਿਸ੍ਸਥਾਤਿ (ਸ੍ਯਾ.)].

ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਛਬ੍ਬਗ੍ਗਿਯਾ ਭਿਕ੍ਖੂ ਮਹਾਨਾਮਂ ਸਕ੍ਕਂ ਏਤਦਵੋਚੁਂ – ‘‘ਦੋਣੇਨ, ਆਵੁਸੋ, ਸਪ੍ਪਿਨਾ ਅਤ੍ਥੋ’’ਤਿ. ‘‘ਅਜ੍ਜਣ੍ਹੋ, ਭਨ੍ਤੇ, ਆਗਮੇਥ. ਮਨੁਸ੍ਸਾ ਵਜਂ ਗਤਾ ਸਪ੍ਪਿਂ ਆਹਰਿਤੁਂ. ਕਾਲਂ ਆਹਰਿਸ੍ਸਥਾ’’ਤਿ. ‘‘ਕਿਂ ਪਨ ਤਯਾ, ਆਵੁਸੋ, ਅਦਾਤੁਕਾਮੇਨ ਪਵਾਰਿਤੇਨ, ਯਂ ਤ੍ਵਂ ਪਵਾਰੇਤ੍ਵਾ ਨ ਦੇਸੀ’’ਤਿ! ਅਥ ਖੋ ਮਹਾਨਾਮੋ ਸਕ੍ਕੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ – ‘ਅਜ੍ਜਣ੍ਹੋ, ਭਨ੍ਤੇ, ਆਗਮੇਥਾ’ਤਿ ਵੁਚ੍ਚਮਾਨਾ ਨਾਗਮੇਸ੍ਸਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਮਹਾਨਾਮਸ੍ਸ ਸਕ੍ਕਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਮਹਾਨਾਮੇਨ ਸਕ੍ਕੇਨ – ‘ਅਜ੍ਜਣ੍ਹੋ, ਭਨ੍ਤੇ, ਆਗਮੇਥਾ’ਤਿ ਵੁਚ੍ਚਮਾਨਾ ਨਾਗਮੇਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਮਹਾਨਾਮੇਨ ਸਕ੍ਕੇਨ – ‘‘ਅਜ੍ਜਣ੍ਹੋ, ਭਨ੍ਤੇ, ਆਗਮੇਥਾ’’ਤਿ ਵੁਚ੍ਚਮਾਨਾ ਨਾਗਮੇਥਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਮਹਾਨਾਮੇਨ ਸਕ੍ਕੇਨ – ‘‘ਅਜ੍ਜਣ੍ਹੋ, ਭਨ੍ਤੇ ਆਗਮੇਥਾ’’ਤਿ ਵੁਚ੍ਚਮਾਨਾ ਨਾਗਮੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੦੬. ‘‘ਅਗਿਲਾਨੇਨ ਭਿਕ੍ਖੁਨਾ ਚਤੁਮਾਸਪ੍ਪਚ੍ਚਯਪਵਾਰਣਾ ਸਾਦਿਤਬ੍ਬਾ, ਅਞ੍ਞਤ੍ਰ ਪੁਨਪਵਾਰਣਾਯ, ਅਞ੍ਞਤ੍ਰ ਨਿਚ੍ਚਪਵਾਰਣਾਯ; ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੩੦੭. ਅਗਿਲਾਨੇਨ ਭਿਕ੍ਖੁਨਾ ਚਤੁਮਾਸਪ੍ਪਚ੍ਚਯਪਵਾਰਣਾ ਸਾਦਿਤਬ੍ਬਾਤਿ ਗਿਲਾਨਪ੍ਪਚ੍ਚਯਪਵਾਰਣਾ ਸਾਦਿਤਬ੍ਬਾ.

ਪੁਨਪਵਾਰਣਾਪਿ ਸਾਦਿਤਬ੍ਬਾਤਿ ਯਦਾ ਗਿਲਾਨੋ ਭਵਿਸ੍ਸਾਮਿ ਤਦਾ ਵਿਞ੍ਞਾਪੇਸ੍ਸਾਮੀਤਿ.

ਨਿਚ੍ਚਪਵਾਰਣਾਪਿ ਸਾਦਿਤਬ੍ਬਾਤਿ ਯਦਾ ਗਿਲਾਨੋ ਭਵਿਸ੍ਸਾਮਿ ਤਦਾ ਵਿਞ੍ਞਾਪੇਸ੍ਸਾਮੀਤਿ.

ਤਤੋ ਚੇ ਉਤ੍ਤਰਿ ਸਾਦਿਯੇਯ੍ਯਾਤਿ ਅਤ੍ਥਿ ਪਵਾਰਣਾ ਭੇਸਜ੍ਜਪਰਿਯਨ੍ਤਾ ਨ ਰਤ੍ਤਿਪਰਿਯਨ੍ਤਾ, ਅਤ੍ਥਿ ਪਵਾਰਣਾ ਰਤ੍ਤਿਪਰਿਯਨ੍ਤਾ ਨ ਭੇਸਜ੍ਜਪਰਿਯਨ੍ਤਾ, ਅਤ੍ਥਿ ਪਵਾਰਣਾ ਭੇਸਜ੍ਜਪਰਿਯਨ੍ਤਾ ਚ ਰਤ੍ਤਿਪਰਿਯਨ੍ਤਾ ਚ, ਅਤ੍ਥਿ ਪਵਾਰਣਾ ਨੇਵ ਭੇਸਜ੍ਜਪਰਿਯਨ੍ਤਾ ਨ ਰਤ੍ਤਿਪਰਿਯਨ੍ਤਾ.

ਭੇਸਜ੍ਜਪਰਿਯਨ੍ਤਾ ਨਾਮ ਭੇਸਜ੍ਜਾਨਿ ਪਰਿਗ੍ਗਹਿਤਾਨਿ ਹੋਨ੍ਤਿ – ‘‘ਏਤ੍ਤਕੇਹਿ ਭੇਸਜ੍ਜੇਹਿ ਪਵਾਰੇਮੀ’’ਤਿ. ਰਤ੍ਤਿਪਰਿਯਨ੍ਤਾ ਨਾਮ ਰਤ੍ਤਿਯੋ ਪਰਿਗ੍ਗਹਿਤਾਯੋ ਹੋਨ੍ਤਿ – ‘‘ਏਤ੍ਤਕਾਸੁ ਰਤ੍ਤੀਸੁ ਪਵਾਰੇਮੀ’’ਤਿ. ਭੇਸਜ੍ਜਪਰਿਯਨ੍ਤਾ ਚ ਰਤ੍ਤਿਪਰਿਯਨ੍ਤਾ ਚ ਨਾਮ ਭੇਸਜ੍ਜਾਨਿ ਚ ਪਰਿਗ੍ਗਹਿਤਾਨਿ ਹੋਨ੍ਤਿ ਰਤ੍ਤਿਯੋ ਚ ਪਰਿਗ੍ਗਹਿਤਾਯੋ ਹੋਨ੍ਤਿ – ‘‘ਏਤ੍ਤਕੇਹਿ ਭੇਸਜ੍ਜੇਹਿ ਏਤ੍ਤਕਾਸੁ ਰਤ੍ਤੀਸੁ ਪਵਾਰੇਮੀ’’ਤਿ. ਨੇਵ ਭੇਸਜ੍ਜਪਰਿਯਨ੍ਤਾ ਨ ਰਤ੍ਤਿਪਰਿਯਨ੍ਤਾ ਨਾਮ ਭੇਸਜ੍ਜਾਨਿ ਚ ਅਪਰਿਗ੍ਗਹਿਤਾਨਿ ਹੋਨ੍ਤਿ ਰਤ੍ਤਿਯੋ ਚ ਅਪਰਿਗ੍ਗਹਿਤਾਯੋ ਹੋਨ੍ਤਿ.

੩੦੮. ਭੇਸਜ੍ਜਪਰਿਯਨ੍ਤੇ – ਯੇਹਿ ਭੇਸਜ੍ਜੇਹਿ ਪਵਾਰਿਤੋ ਹੋਤਿ ਤਾਨਿ ਭੇਸਜ੍ਜਾਨਿ ਠਪੇਤ੍ਵਾ ਅਞ੍ਞਾਨਿ ਭੇਸਜ੍ਜਾਨਿ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਰਤ੍ਤਿਪਰਿਯਨ੍ਤੇ – ਯਾਸੁ ਰਤ੍ਤੀਸੁ ਪਵਾਰਿਤੋ ਹੋਤਿ, ਤਾ ਰਤ੍ਤਿਯੋ ਠਪੇਤ੍ਵਾ ਅਞ੍ਞਾਸੁ ਰਤ੍ਤੀਸੁ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਭੇਸਜ੍ਜਪਰਿਯਨ੍ਤੇ ਚ ਰਤ੍ਤਿਪਰਿਯਨ੍ਤੇ ਚ – ਯੇਹਿ ਭੇਸਜ੍ਜੇਹਿ ਪਵਾਰਿਤੋ ਹੋਤਿ, ਤਾਨਿ ਭੇਸਜ੍ਜਾਨਿ ਠਪੇਤ੍ਵਾ ਯਾਸੁ ਰਤ੍ਤੀਸੁ ਪਵਾਰਿਤੋ ਹੋਤਿ, ਤਾ ਰਤ੍ਤਿਯੋ ਠਪੇਤ੍ਵਾ ਅਞ੍ਞਾਨਿ ਭੇਸਜ੍ਜਾਨਿ ਅਞ੍ਞਾਸੁ ਰਤ੍ਤੀਸੁ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਨੇਵ ਭੇਸਜ੍ਜਪਰਿਯਨ੍ਤੇ ਨ ਰਤ੍ਤਿਪਰਿਯਨ੍ਤੇ, ਅਨਾਪਤ੍ਤਿ.

੩੦੯. ਨ ਭੇਸਜ੍ਜੇਨ ਕਰਣੀਯੇਨ [ਕਰਣੀਯੇ (ਸੀ. ਸ੍ਯਾ.)] ਭੇਸਜ੍ਜਂ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਞ੍ਞੇਨ ਭੇਸਜ੍ਜੇਨ ਕਰਣੀਯੇਨ ਅਞ੍ਞਂ ਭੇਸਜ੍ਜਂ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਤਤੁਤ੍ਤਰਿ ਤਤੁਤ੍ਤਰਿਸਞ੍ਞੀ ਭੇਸਜ੍ਜਂ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਤਤੁਤ੍ਤਰਿ ਵੇਮਤਿਕੋ ਭੇਸਜ੍ਜਂ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਤਤੁਤ੍ਤਰਿ ਨਤਤੁਤ੍ਤਰਿਸਞ੍ਞੀ ਭੇਸਜ੍ਜਂ ਵਿਞ੍ਞਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਨਤਤੁਤ੍ਤਰਿ ਤਤੁਤ੍ਤਰਿਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਨਤਤੁਤ੍ਤਰਿ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਨਤਤੁਤ੍ਤਰਿ ਨਤਤੁਤ੍ਤਰਿਸਞ੍ਞੀ, ਅਨਾਪਤ੍ਤਿ.

੩੧੦. ਅਨਾਪਤ੍ਤਿ ਯੇਹਿ ਭੇਸਜ੍ਜੇਹਿ ਪਵਾਰਿਤੋ ਹੋਤਿ ਤਾਨਿ ਭੇਸਜ੍ਜਾਨਿ ਵਿਞ੍ਞਾਪੇਤਿ, ਯਾਸੁ ਰਤ੍ਤੀਸੁ ਪਵਾਰਿਤੋ ਹੋਤਿ ਤਾਸੁ ਰਤ੍ਤੀਸੁ ਵਿਞ੍ਞਾਪੇਤਿ, ‘‘ਇਮੇਹਿ ਤਯਾ ਭੇਸਜ੍ਜੇਹਿ ਪਵਾਰਿਤਾਮ੍ਹ, ਅਮ੍ਹਾਕਞ੍ਚ ਇਮਿਨਾ ਚ ਇਮਿਨਾ ਚ ਭੇਸਜ੍ਜੇਨ ਅਤ੍ਥੋ’’ਤਿ ਆਚਿਕ੍ਖਿਤ੍ਵਾ ਵਿਞ੍ਞਾਪੇਤਿ, ‘‘ਯਾਸੁ ਤਯਾ ਰਤ੍ਤੀਸੁ ਪਵਾਰਿਤਾਮ੍ਹ ਤਾਯੋ ਚ ਰਤ੍ਤਿਯੋ ਵੀਤਿਵਤ੍ਤਾ ਅਮ੍ਹਾਕਞ੍ਚ ਭੇਸਜ੍ਜੇਨ ਅਤ੍ਥੋ’’ਤਿ ਆਚਿਕ੍ਖਿਤ੍ਵਾ ਵਿਞ੍ਞਾਪੇਤਿ, ਞਾਤਕਾਨਂ ਪਵਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਮਹਾਨਾਮਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ.

੮. ਉਯ੍ਯੁਤ੍ਤਸੇਨਾਸਿਕ੍ਖਾਪਦਂ

੩੧੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਰਾਜਾ ਪਸੇਨਦਿ ਕੋਸਲੋ ਸੇਨਾਯ ਅਬ੍ਭੁਯ੍ਯਾਤੋ ਹੋਤਿ. ਛਬ੍ਬਗ੍ਗਿਯਾ ਭਿਕ੍ਖੂ ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਅਗਮਂਸੁ. ਅਦ੍ਦਸਾ ਖੋ ਰਾਜਾ ਪਸੇਨਦਿ ਕੋਸਲੋ ਛਬ੍ਬਗ੍ਗਿਯੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ. ਦਿਸ੍ਵਾਨ ਪਕ੍ਕੋਸਾਪੇਤ੍ਵਾ ਏਤਦਵੋਚ – ‘‘ਕਿਸ੍ਸ ਤੁਮ੍ਹੇ, ਭਨ੍ਤੇ, ਆਗਤਤ੍ਥਾ’’ਤਿ? ‘‘ਮਹਾਰਾਜਾਨਂ ਮਯਂ ਦਟ੍ਠੁਕਾਮਾ’’ [ਮਹਾਰਾਜ ਮਹਾਰਾਜਾਨਂ ਮਯਂ ਦਟ੍ਠੁਕਾਮਾ (ਕ.)] ਤਿ. ‘‘ਕਿਂ, ਭਨ੍ਤੇ, ਮਂ ਦਿਟ੍ਠੇਨ ਯੁਦ੍ਧਾਭਿਨਨ੍ਦਿਨਂ [ਯੁਦ੍ਧਾਭਿਨਨ੍ਦਿਨਾ (ਕ.)]; ਨਨੁ ਭਗਵਾ ਪਸ੍ਸਿਤਬ੍ਬੋ’’ਤਿ? ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਆਗਚ੍ਛਿਸ੍ਸਨ੍ਤਿ! ਅਮ੍ਹਾਕਮ੍ਪਿ ਅਲਾਭਾ, ਅਮ੍ਹਾਕਮ੍ਪਿ ਦੁਲ੍ਲਦ੍ਧਂ, ਯੇ ਮਯਂ ਆਜੀਵਸ੍ਸ ਹੇਤੁ ਪੁਤ੍ਤਦਾਰਸ੍ਸ ਕਾਰਣਾ ਸੇਨਾਯ ਆਗਚ੍ਛਾਮਾ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛਿਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛਥਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਯੋ ਪਨ ਭਿਕ੍ਖੁ ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੩੧੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਮਾਤੁਲੋ ਸੇਨਾਯ ਗਿਲਾਨੋ ਹੋਤਿ. ਸੋ ਤਸ੍ਸ ਭਿਕ੍ਖੁਨੋ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਅਹਞ੍ਹਿ ਸੇਨਾਯ ਗਿਲਾਨੋ. ਆਗਚ੍ਛਤੁ ਭਦਨ੍ਤੋ. ਇਚ੍ਛਾਮਿ ਭਦਨ੍ਤਸ੍ਸ ਆਗਤ’’ਨ੍ਤਿ. ਅਥ ਖੋ ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ – ‘ਨ ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਨ੍ਤਬ੍ਬ’ਨ੍ਤਿ. ਅਯਞ੍ਚ ਮੇ ਮਾਤੁਲੋ ਸੇਨਾਯ ਗਿਲਾਨੋ. ਕਥਂ ਨੁ ਖੋ ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਤਥਾਰੂਪਪ੍ਪਚ੍ਚਯਾ ਸੇਨਾਯ ਗਨ੍ਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੧੩. ‘‘ਯੋ ਪਨ ਭਿਕ੍ਖੁ ਉਯ੍ਯੁਤ੍ਤਂ ਸੇਨਂ ਦਸ੍ਸਨਾਯ ਗਚ੍ਛੇਯ੍ਯ, ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾ, ਪਾਚਿਤ੍ਤਿਯ’’ਨ੍ਤਿ.

੩੧੪. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਉਯ੍ਯੁਤ੍ਤਾ ਨਾਮ ਸੇਨਾ ਗਾਮਤੋ ਨਿਕ੍ਖਮਿਤ੍ਵਾ ਨਿਵਿਟ੍ਠਾ ਵਾ ਹੋਤਿ ਪਯਾਤਾ ਵਾ.

ਸੇਨਾ ਨਾਮ ਹਤ੍ਥੀ ਅਸ੍ਸਾ ਰਥਾ ਪਤ੍ਤੀ. ਦ੍ਵਾਦਸਪੁਰਿਸੋ ਹਤ੍ਥੀ, ਤਿਪੁਰਿਸੋ ਅਸ੍ਸੋ, ਚਤੁਪੁਰਿਸੋ ਰਥੋ, ਚਤ੍ਤਾਰੋ ਪੁਰਿਸਾ ਸਰਹਤ੍ਥਾ ਪਤ੍ਤਿ. ਦਸ੍ਸਨਾਯ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਯਤ੍ਥ ਠਿਤੋ ਪਸ੍ਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਦਸ੍ਸਨੂਪਚਾਰਂ ਵਿਜਹਿਤ੍ਵਾ ਪੁਨਪ੍ਪੁਨਂ ਪਸ੍ਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾਤਿ ਠਪੇਤ੍ਵਾ ਤਥਾਰੂਪਪ੍ਪਚ੍ਚਯਂ.

੩੧੫. ਉਯ੍ਯੁਤ੍ਤੇ ਉਯ੍ਯੁਤ੍ਤਸਞ੍ਞੀ ਦਸ੍ਸਨਾਯ ਗਚ੍ਛਤਿ, ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਯ੍ਯੁਤ੍ਤੇ ਵੇਮਤਿਕੋ ਦਸ੍ਸਨਾਯ ਗਚ੍ਛਤਿ, ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਉਯ੍ਯੁਤ੍ਤੇ ਅਨੁਯ੍ਯੁਤ੍ਤਸਞ੍ਞੀ ਦਸ੍ਸਨਾਯ ਗਚ੍ਛਤਿ, ਅਞ੍ਞਤ੍ਰ ਤਥਾਰੂਪਪ੍ਪਚ੍ਚਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਏਕਮੇਕਂ ਦਸ੍ਸਨਾਯ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਯਤ੍ਥ ਠਿਤੋ ਪਸ੍ਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦਸ੍ਸਨੂਪਚਾਰਂ ਵਿਜਹਿਤ੍ਵਾ ਪੁਨਪ੍ਪੁਨਂ ਪਸ੍ਸਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਯ੍ਯੁਤ੍ਤੇ ਉਯ੍ਯੁਤ੍ਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਯ੍ਯੁਤ੍ਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਯ੍ਯੁਤ੍ਤੇ ਅਨੁਯ੍ਯੁਤ੍ਤਸਞ੍ਞੀ, ਅਨਾਪਤ੍ਤਿ.

੩੧੬. ਅਨਾਪਤ੍ਤਿ ਆਰਾਮੇ ਠਿਤੋ ਪਸ੍ਸਤਿ, ਭਿਕ੍ਖੁਸ੍ਸ ਠਿਤੋਕਾਸਂ ਵਾ ਨਿਸਿਨ੍ਨੋਕਾਸਂ ਵਾ ਨਿਪਨ੍ਨੋਕਾਸਂ ਵਾ ਆਗਚ੍ਛਤਿ, ਪਟਿਪਥਂ ਗਚ੍ਛਨ੍ਤੋ ਪਸ੍ਸਤਿ, ਤਥਾਰੂਪਪ੍ਪਚ੍ਚਯਾ, ਆਪਦਾਸੁ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਉਯ੍ਯੁਤ੍ਤਸੇਨਾਸਿਕ੍ਖਾਪਦਂ ਨਿਟ੍ਠਿਤਂ ਅਟ੍ਠਮਂ.

੯. ਸੇਨਾਵਾਸਸਿਕ੍ਖਾਪਦਂ

੩੧੭. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਸਤਿ ਕਰਣੀਯੇ ਸੇਨਂ ਗਨ੍ਤ੍ਵਾ ਅਤਿਰੇਕਤਿਰਤ੍ਤਂ ਸੇਨਾਯ ਵਸਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਸੇਨਾਯ ਵਸਿਸ੍ਸਨ੍ਤਿ! ਅਮ੍ਹਾਕਮ੍ਪਿ ਅਲਾਭਾ, ਅਮ੍ਹਾਕਮ੍ਪਿ ਦੁਲ੍ਲਦ੍ਧਂ, ਯੇ ਮਯਂ ਆਜੀਵਸ੍ਸ ਹੇਤੁ ਪੁਤ੍ਤਦਾਰਸ੍ਸ ਕਾਰਣਾ ਸੇਨਾਯ ਪਟਿਵਸਾਮਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਤਿਰੇਕਤਿਰਤ੍ਤਂ ਸੇਨਾਯ ਵਸਿਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਅਤਿਰੇਕਤਿਰਤ੍ਤਂ ਸੇਨਾਯ ਵਸਥਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਅਤਿਰੇਕਤਿਰਤ੍ਤਂ ਸੇਨਾਯ ਵਸਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੧੮. ‘‘ਸਿਯਾ ਚ ਤਸ੍ਸ ਭਿਕ੍ਖੁਨੋ ਕੋਚਿਦੇਵ ਪਚ੍ਚਯੋ ਸੇਨਂ ਗਮਨਾਯ, ਦਿਰਤ੍ਤਤਿਰਤ੍ਤਂ ਤੇਨ ਭਿਕ੍ਖੁਨਾ ਸੇਨਾਯ ਵਸਿਤਬ੍ਬਂ. ਤਤੋ ਚੇ ਉਤ੍ਤਰਿਂ ਵਸੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੩੧੯. ਸਿਯਾ ਚ ਤਸ੍ਸ ਭਿਕ੍ਖੁਨੋ ਕੋਚਿਦੇਵ ਪਚ੍ਚਯੋ ਸੇਨਂ ਗਮਨਾਯਾਤਿ ਸਿਯਾ ਪਚ੍ਚਯੋ ਸਿਯਾ ਕਰਣੀਯਂ.

ਦਿਰਤ੍ਤਤਿਰਤ੍ਤਂ ਤੇਨ ਭਿਕ੍ਖੁਨਾ ਸੇਨਾਯ ਵਸਿਤਬ੍ਬਨ੍ਤਿ ਦ੍ਵੇਤਿਸ੍ਸੋ ਰਤ੍ਤਿਯੋ ਵਸਿਤਬ੍ਬਂ.

ਤਤੋ ਚੇ ਉਤ੍ਤਰਿ ਵਸੇਯ੍ਯਾਤਿ ਚਤੁਤ੍ਥੇ ਦਿਵਸੇ ਅਤ੍ਥਙ੍ਗਤੇ ਸੂਰਿਯੇ ਸੇਨਾਯ ਵਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੩੨੦. ਅਤਿਰੇਕਤਿਰਤ੍ਤੇ ਅਤਿਰੇਕਸਞ੍ਞੀ ਸੇਨਾਯ ਵਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਤਿਰੇਕਤਿਰਤ੍ਤੇ ਵੇਮਤਿਕੋ ਸੇਨਾਯ ਵਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਤਿਰੇਕਤਿਰਤ੍ਤੇ ਊਨਕਸਞ੍ਞੀ ਸੇਨਾਯ ਵਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਊਨਕਤਿਰਤ੍ਤੇ ਅਤਿਰੇਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਤਿਰਤ੍ਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਤਿਰਤ੍ਤੇ ਊਨਕਸਞ੍ਞੀ, ਅਨਾਪਤ੍ਤਿ.

੩੨੧. ਅਨਾਪਤ੍ਤਿ ਦ੍ਵੇਤਿਸ੍ਸੋ ਰਤ੍ਤਿਯੋ ਵਸਤਿ, ਊਨਕਦ੍ਵੇਤਿਸ੍ਸੋ ਰਤ੍ਤਿਯੋ ਵਸਤਿ, ਦ੍ਵੇ ਰਤ੍ਤਿਯੋ ਵਸਿਤ੍ਵਾ ਤਤਿਯਾਯ ਰਤ੍ਤਿਯਾ ਪੁਰਾਰੁਣਾ ਨਿਕ੍ਖਮਿਤ੍ਵਾ ਪੁਨ ਵਸਤਿ, ਗਿਲਾਨੋ ਵਸਤਿ, ਗਿਲਾਨਸ੍ਸ ਕਰਣੀਯੇਨ ਵਸਤਿ, ਸੇਨਾ ਵਾ ਪਟਿਸੇਨਾਯ ਰੁਦ੍ਧਾ ਹੋਤਿ, ਕੇਨਚਿ ਪਲਿਬੁਦ੍ਧੋ ਹੋਤਿ, ਆਪਦਾਸੁ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਸੇਨਾਵਾਸਸਿਕ੍ਖਾਪਦਂ ਨਿਟ੍ਠਿਤਂ ਨਵਮਂ.

੧੦. ਉਯ੍ਯੋਧਿਕਸਿਕ੍ਖਾਪਦਂ

੩੨੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਦਿਰਤ੍ਤਤਿਰਤ੍ਤਂ ਸੇਨਾਯ ਵਸਮਾਨਾ ਉਯ੍ਯੋਧਿਕਮ੍ਪਿ ਬਲਗ੍ਗਮ੍ਪਿ ਸੇਨਾਬ੍ਯੂਹਮ੍ਪਿ ਅਨੀਕਦਸ੍ਸਨਮ੍ਪਿ ਗਚ੍ਛਨ੍ਤਿ. ਅਞ੍ਞਤਰੋਪਿ ਛਬ੍ਬਗ੍ਗਿਯੋ ਭਿਕ੍ਖੁ ਉਯ੍ਯੋਧਿਕਂ ਗਨ੍ਤ੍ਵਾ ਕਣ੍ਡੇਨ ਪਟਿਵਿਦ੍ਧੋ ਹੋਤਿ. ਮਨੁਸ੍ਸਾ ਤਂ ਭਿਕ੍ਖੁਂ ਉਪ੍ਪਣ੍ਡੇਸੁਂ – ‘‘ਕਚ੍ਚਿ, ਭਨ੍ਤੇ, ਸੁਯੁਦ੍ਧਂ ਅਹੋਸਿ, ਕਤਿ ਤੇ ਲਕ੍ਖਾਨਿ ਲਦ੍ਧਾਨੀ’’ਤਿ? ਸੋ ਭਿਕ੍ਖੁ ਤੇਹਿ ਮਨੁਸ੍ਸੇਹਿ ਉਪ੍ਪਣ੍ਡੀਯਮਾਨੋ ਮਙ੍ਕੁ ਅਹੋਸਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਉਯ੍ਯੋਧਿਕਂ ਦਸ੍ਸਨਾਯ ਆਗਚ੍ਛਿਸ੍ਸਨ੍ਤਿ! ਅਮ੍ਹਾਕਮ੍ਪਿ ਅਲਾਭਾ, ਅਮ੍ਹਾਕਮ੍ਪਿ ਦੁਲ੍ਲਦ੍ਧਂ, ਯੇ ਮਯਂ ਆਜੀਵਸ੍ਸ ਹੇਤੁ ਪੁਤ੍ਤਦਾਰਸ੍ਸ ਕਾਰਣਾ ਉਯ੍ਯੋਧਿਕਂ ਆਗਚ੍ਛਾਮਾ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਉਯ੍ਯੋਧਿਕਂ ਦਸ੍ਸਨਾਯ ਗਚ੍ਛਿਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਉਯ੍ਯੋਧਿਕਂ ਦਸ੍ਸਨਾਯ ਗਚ੍ਛਥਾਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਉਯ੍ਯੋਧਿਕਂ ਦਸ੍ਸਨਾਯ ਗਚ੍ਛਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੨੩. ‘‘ਦਿਰਤ੍ਤਤਿਰਤ੍ਤਂ ਚੇ ਭਿਕ੍ਖੁ ਸੇਨਾਯ ਵਸਮਾਨੋ ਉਯ੍ਯੋਧਿਕਂ ਵਾ ਬਲਗ੍ਗਂ ਵਾ ਸੇਨਾਬ੍ਯੂਹਂ ਵਾ ਅਨੀਕਦਸ੍ਸਨਂ ਵਾ ਗਚ੍ਛੇਯ੍ਯ, ਪਾਚਿਤ੍ਤਿਯ’’ਨ੍ਤਿ.

੩੨੪. ਦਿਰਤ੍ਤਤਿਰਤ੍ਤਂ ਚੇ ਭਿਕ੍ਖੁ ਸੇਨਾਯ ਵਸਮਾਨੋਤਿ ਦ੍ਵੇਤਿਸ੍ਸੋ ਰਤ੍ਤਿਯੋ ਵਸਮਾਨੋ.

ਉਯ੍ਯੋਧਿਕਂ ਨਾਮ ਯਤ੍ਥ ਸਮ੍ਪਹਾਰੋ ਦਿਸ੍ਸਤਿ.

ਬਲਗ੍ਗਂ ਨਾਮ ਏਤ੍ਤਕਾ ਹਤ੍ਥੀ, ਏਤ੍ਤਕਾ ਅਸ੍ਸਾ, ਏਤ੍ਤਕਾ ਰਥਾ, ਏਤ੍ਤਕਾ ਪਤ੍ਤੀ.

ਸੇਨਾਬ੍ਯੂਹਂ ਨਾਮ ਇਤੋ ਹਤ੍ਥੀ ਹੋਨ੍ਤੁ, ਇਤੋ ਅਸ੍ਸਾ ਹੋਨ੍ਤੁ, ਇਤੋ ਰਥਾ ਹੋਨ੍ਤੁ, ਇਤੋ ਪਤ੍ਤਿਕਾ ਹੋਨ੍ਤੁ.

ਅਨੀਕਂ ਨਾਮ ਹਤ੍ਥਾਨੀਕਂ, ਅਸ੍ਸਾਨੀਕਂ, ਰਥਾਨੀਕਂ, ਪਤ੍ਤਾਨੀਕਂ. ਤਯੋ ਹਤ੍ਥੀ ਪਚ੍ਛਿਮਂ ਹਤ੍ਥਾਨੀਕਂ, ਤਯੋ ਅਸ੍ਸਾ ਪਚ੍ਛਿਮਂ ਅਸ੍ਸਾਨੀਕਂ, ਤਯੋ ਰਥਾ ਪਚ੍ਛਿਮਂ ਰਥਾਨੀਕਂ, ਚਤ੍ਤਾਰੋ ਪੁਰਿਸਾ ਸਰਹਤ੍ਥਾ ਪਤ੍ਤੀ ਪਚ੍ਛਿਮਂ ਪਤ੍ਤਾਨੀਕਂ. ਦਸ੍ਸਨਾਯ ਗਚ੍ਛਤਿ, ਆਪਤ੍ਤਿ ਦੁਕ੍ਕਟਸ੍ਸ. ਯਤ੍ਥ ਠਿਤੋ ਪਸ੍ਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਦਸ੍ਸਨੂਪਚਾਰਂ ਵਿਜਹਿਤ੍ਵਾ ਪੁਨਪ੍ਪੁਨਂ ਪਸ੍ਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.