੪. ਕਾਣਮਾਤੁਸਿਕ੍ਖਾਪਦਂ

੨੩੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਕਾਣਮਾਤਾ ਉਪਾਸਿਕਾ ਸਦ੍ਧਾ ਹੋਤਿ ਪਸਨ੍ਨਾ. ਕਾਣਾ ਗਾਮਕੇ ਅਞ੍ਞਤਰਸ੍ਸ ਪੁਰਿਸਸ੍ਸ ਦਿਨ੍ਨਾ ਹੋਤਿ. ਅਥ ਖੋ ਕਾਣਾ ਮਾਤੁਘਰਂ ਅਗਮਾਸਿ ਕੇਨਚਿਦੇਵ ਕਰਣੀਯੇਨ. ਅਥ ਖੋ ਕਾਣਾਯ ਸਾਮਿਕੋ ਕਾਣਾਯ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਤੁ ਕਾਣਾ, ਇਚ੍ਛਾਮਿ ਕਾਣਾਯ ਆਗਤ’’ਨ੍ਤਿ. ਅਥ ਖੋ ਕਾਣਮਾਤਾ ਉਪਾਸਿਕਾ ‘‘ਕਿਸ੍ਮਿਂ ਵਿਯ ਰਿਤ੍ਤਹਤ੍ਥਂ ਗਨ੍ਤੁ’’ਨ੍ਤਿ ਪੂਵਂ [ਪੂਪਂ (ਣ੍ਵਾਦਿ)] ਪਚਿ. ਪਕ੍ਕੇ ਪੂਵੇ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਕਾਣਮਾਤਾਯ ਉਪਾਸਿਕਾਯ ਨਿਵੇਸਨਂ ਪਾਵਿਸਿ. ਅਥ ਖੋ ਕਾਣਮਾਤਾ ਉਪਾਸਿਕਾ ਤਸ੍ਸ ਭਿਕ੍ਖੁਨੋ ਪੂਵਂ ਦਾਪੇਸਿ. ਸੋ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਪੂਵਂ ਦਾਪੇਸਿ. ਸੋਪਿ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਪੂਵਂ ਦਾਪੇਸਿ. ਯਥਾਪਟਿਯਤ੍ਤਂ ਪੂਵਂ ਪਰਿਕ੍ਖਯਂ ਅਗਮਾਸਿ. ਦੁਤਿਯਮ੍ਪਿ ਖੋ ਕਾਣਾਯ ਸਾਮਿਕੋ ਕਾਣਾਯ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਤੁ ਕਾਣਾ, ਇਚ੍ਛਾਮਿ ਕਾਣਾਯ ਆਗਤ’’ਨ੍ਤਿ. ਦੁਤਿਯਮ੍ਪਿ ਖੋ ਕਾਣਮਾਤਾ ਉਪਾਸਿਕਾ ‘‘ਕਿਸ੍ਮਿਂ ਵਿਯ ਰਿਤ੍ਤਹਤ੍ਤਂ ਗਨ੍ਤੁ’’ਨ੍ਤਿ ਪੂਵਂ ਪਚਿ. ਪਕ੍ਕੇ ਪੂਵੇ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਕਾਣਮਾਤਾਯ ਉਪਾਸਿਕਾਯ ਨਿਵੇਸਨਂ ਪਾਵਿਸਿ. ਅਥ ਖੋ ਕਾਣਮਾਤਾ ਉਪਾਸਿਕਾ ਤਸ੍ਸ ਭਿਕ੍ਖੁਨੋ ਪੂਵਂ ਦਾਪੇਸਿ. ਸੋ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਪੂਵਂ ਦਾਪੇਸਿ. ਸੋਪਿ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਪੂਵਂ ਦਾਪੇਸਿ. ਯਥਾਪਟਿਯਤ੍ਤਂ ਪੂਵਂ ਪਰਿਕ੍ਖਯਂ ਅਗਮਾਸਿ. ਤਤਿਯਮ੍ਪਿ ਖੋ ਕਾਣਾਯ ਸਾਮਿਕੋ ਕਾਣਾਯ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਤੁ ਕਾਣਾ, ਇਚ੍ਛਾਮਿ ਕਾਣਾਯ ਆਗਤਂ. ਸਚੇ ਕਾਣਾ ਨਾਗਚ੍ਛਿਸ੍ਸਤਿ, ਅਹਂ ਅਞ੍ਞਂ ਪਜਾਪਤਿਂ ਆਨੇਸ੍ਸਾਮੀ’’ਤਿ. ਤਤਿਯਮ੍ਪਿ ਖੋ ਕਾਣਮਾਤਾ ਉਪਾਸਿਕਾ ਕਿਸ੍ਮਿਂ ਵਿਯ ਰਿਤ੍ਤਹਤ੍ਥਂ ਗਨ੍ਤੁਨ੍ਤਿ ਪੂਵਂ ਪਚਿ. ਪਕ੍ਕੇ ਪੂਵੇ ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਕਾਣਮਾਤਾਯ ਉਪਾਸਿਕਾਯ ਨਿਵੇਸਨਂ ਪਾਵਿਸਿ. ਅਥ ਖੋ ਕਾਣਮਾਤਾ ਉਪਾਸਿਕਾ ਤਸ੍ਸ ਭਿਕ੍ਖੁਨੋ ਪੂਵਂ ਦਾਪੇਸਿ. ਸੋ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਪੂਵਂ ਦਾਪੇਸਿ. ਸੋਪਿ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਪੂਵਂ ਦਾਪੇਸਿ. ਯਥਾਪਟਿਯਤ੍ਤਂ ਪੂਵਂ ਪਰਿਕ੍ਖਯਂ ਅਗਮਾਸਿ. ਅਥ ਖੋ ਕਾਣਾਯ ਸਾਮਿਕੋ ਅਞ੍ਞਂ ਪਜਾਪਤਿਂ ਆਨੇਸਿ.

ਅਸ੍ਸੋਸਿ ਖੋ ਕਾਣਾ – ‘‘ਤੇਨ ਕਿਰ ਪੁਰਿਸੇਨ ਅਞ੍ਞਾ ਪਜਾਪਤਿ ਆਨੀਤਾ’’ਤਿ. ਸਾ ਰੋਦਨ੍ਤੀ ਅਟ੍ਠਾਸਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਕਾਣਮਾਤਾਯ ਉਪਾਸਿਕਾਯ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਕਾਣਮਾਤਾ ਉਪਾਸਿਕਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਕਾਣਮਾਤਰਂ ਉਪਾਸਿਕਂ ਭਗਵਾ ਏਤਦਵੋਚ – ‘‘ਕਿਸ੍ਸਾਯਂ ਕਾਣਾ ਰੋਦਤੀ’’ਤਿ? ਅਥ ਖੋ ਕਾਣਮਾਤਾ ਉਪਾਸਿਕਾ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਥ ਖੋ ਭਗਵਾ ਕਾਣਮਾਤਰਂ ਉਪਾਸਿਕਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

੨੩੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਸਤ੍ਥੋ ਰਾਜਗਹਾ ਪਟਿਯਾਲੋਕਂ ਗਨ੍ਤੁਕਾਮੋ ਹੋਤਿ. ਅਞ੍ਞਤਰੋ ਪਿਣ੍ਡਚਾਰਿਕੋ ਭਿਕ੍ਖੁ ਤਂ ਸਤ੍ਥਂ ਪਿਣ੍ਡਾਯ ਪਾਵਿਸਿ. ਅਞ੍ਞਤਰੋ ਉਪਾਸਕੋ ਤਸ੍ਸ ਭਿਕ੍ਖੁਨੋ ਸਤ੍ਤੁਂ ਦਾਪੇਸਿ. ਸੋ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਸਤ੍ਤੁਂ ਦਾਪੇਸਿ. ਸੋ ਨਿਕ੍ਖਮਿਤ੍ਵਾ ਅਞ੍ਞਸ੍ਸ ਆਚਿਕ੍ਖਿ. ਤਸ੍ਸਪਿ ਸਤ੍ਤੁਂ ਦਾਪੇਸਿ. ਯਥਾਪਟਿਯਤ੍ਤਂ ਪਾਥੇਯ੍ਯਂ ਪਰਿਕ੍ਖਯਂ ਅਗਮਾਸਿ. ਅਥ ਖੋ ਸੋ ਉਪਾਸਕੋ ਤੇ ਮਨੁਸ੍ਸੇ ਏਤਦਵੋਚ – ‘‘ਅਜ੍ਜਣ੍ਹੋ, ਅਯ੍ਯਾ, ਆਗਮੇਥ, ਯਥਾਪਟਿਯਤ੍ਤਂ ਪਾਥੇਯ੍ਯਂ ਅਯ੍ਯਾਨਂ ਦਿਨ੍ਨਂ. ਪਾਥੇਯ੍ਯਂ ਪਟਿਯਾਦੇਸ੍ਸਾਮੀ’’ਤਿ. ‘‘ਨਾਯ੍ਯੋ [ਨਾਯ੍ਯ (ਸ੍ਯਾ.)] ਸਕ੍ਕਾ ਆਗਮੇਤੁਂ, ਪਯਾਤੋ ਸਤ੍ਥੋ’’ਤਿ ਅਗਮਂਸੁ. ਅਥ ਖੋ ਤਸ੍ਸ ਉਪਾਸਕਸ੍ਸ ਪਾਥੇਯ੍ਯਂ ਪਟਿਯਾਦੇਤ੍ਵਾ ਪਚ੍ਛਾ ਗਚ੍ਛਨ੍ਤਸ੍ਸ ਚੋਰਾ ਅਚ੍ਛਿਨ੍ਦਿਂਸੁ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨ ਮਤ੍ਤਂ ਜਾਨਿਤ੍ਵਾ ਪਟਿਗ੍ਗਹੇਸ੍ਸਨ੍ਤਿ! ਅਯਂ ਇਮੇਸਂ ਦਤ੍ਵਾ ਪਚ੍ਛਾ ਗਚ੍ਛਨ੍ਤੋ ਚੋਰੇਹਿ ਅਚ੍ਛਿਨ੍ਨੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਿ ਦਸ ਅਤ੍ਥਵਸੇ ਪਟਿਚ੍ਚ – ਸਙ੍ਘਸੁਟ੍ਠੁਤਾਯ, ਸਙ੍ਘਫਾਸੁਤਾਯ…ਪੇ… ਵਿਨਯਾਨੁਗ੍ਗਹਾਯ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੩੨. ‘‘ਭਿਕ੍ਖੁਂ ਪਨੇਵ ਕੁਲਂ ਉਪਗਤਂ ਪੂਵੇਹਿ ਵਾ ਮਨ੍ਥੇਹਿ ਵਾ ਅਭਿਹਟ੍ਠੁਂ ਪਵਾਰੇਯ੍ਯ, ਆਕਙ੍ਖਮਾਨੇਨ ਭਿਕ੍ਖੁਨਾ ਦ੍ਵਤ੍ਤਿਪਤ੍ਤਪੂਰਾ ਪਟਿਗ੍ਗਹੇਤਬ੍ਬਾ ਤਤੋ ਚੇ ਉਤ੍ਤਰਿ ਪਟਿਗ੍ਗਣ੍ਹੇਯ੍ਯ ਪਾਚਿਤ੍ਤਿਯਂ. ਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਹੇਤ੍ਵਾ ਤਤੋ ਨੀਹਰਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਿਭਜਿਤਬ੍ਬਂ. ਅਯਂ ਤਤ੍ਥ ਸਾਮੀਚੀ’’ਤਿ.

੨੩੩. ਭਿਕ੍ਖੁਂ ਪਨੇਵ ਕੁਲਂ ਉਪਗਤਨ੍ਤਿ ਕੁਲਂ ਨਾਮ ਚਤ੍ਤਾਰਿ ਕੁਲਾਨਿ – ਖਤ੍ਤਿਯਕੁਲਂ, ਬ੍ਰਾਹ੍ਮਣਕੁਲਂ, ਵੇਸ੍ਸਕੁਲਂ, ਸੁਦ੍ਦਕੁਲਂ.

ਉਪਗਤਨ੍ਤਿ ਤਤ੍ਥ ਗਤਂ.

ਪੂਵਂ ਨਾਮ ਯਂਕਿਞ੍ਚਿ ਪਹੇਣਕਤ੍ਥਾਯ ਪਟਿਯਤ੍ਤਂ.

ਮਨ੍ਥਂ ਨਾਮ ਯਂਕਿਞ੍ਚਿ ਪਾਥੇਯ੍ਯਤ੍ਥਾਯ ਪਟਿਯਤ੍ਤਂ.

ਅਭਿਹਟ੍ਠੁਂ ਪਵਾਰੇਯ੍ਯਾਤਿ ਯਾਵਤਕਂ ਇਚ੍ਛਸਿ ਤਾਵਤਕਂ ਗਣ੍ਹਾਹੀਤਿ.

ਆਕਙ੍ਖਮਾਨੇਨਾਤਿ ਇਚ੍ਛਮਾਨੇਨ.

ਦ੍ਵਤ੍ਤਿਪਤ੍ਤਪੂਰਾ ਪਟਿਗ੍ਗਹੇਤਬ੍ਬਾਤਿ ਦ੍ਵੇਤਯੋ ਪਤ੍ਤਪੂਰਾ ਪਟਿਗ੍ਗਹੇਤਬ੍ਬਾ.

ਤਤੋ ਚੇ ਉਤ੍ਤਰਿ ਪਟਿਗਣ੍ਹੇਯ੍ਯਾਤਿ ਤਤੁਤ੍ਤਰਿ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਹੇਤ੍ਵਾ ਤਤੋ ਨਿਕ੍ਖਮਨ੍ਤੇਨ ਭਿਕ੍ਖੁਂ ਪਸ੍ਸਿਤ੍ਵਾ ਆਚਿਕ੍ਖਿਤਬ੍ਬਂ – ‘‘ਅਮੁਤ੍ਰ ਮਯਾ ਦ੍ਵਤ੍ਤਿਪਤ੍ਤਪੂਰਾ ਪਟਿਗ੍ਗਹਿਤਾ, ਮਾ ਖੋ ਤਤ੍ਥ ਪਟਿਗ੍ਗਣ੍ਹੀ’’ਤਿ. ਸਚੇ ਪਸ੍ਸਿਤ੍ਵਾ ਨ ਆਚਿਕ੍ਖਤਿ, ਆਪਤ੍ਤਿ ਦੁਕ੍ਕਟਸ੍ਸ. ਸਚੇ ਆਚਿਕ੍ਖਿਤੇ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਤਤੋ ਨੀਹਰਿਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਿਭਜਿਤਬ੍ਬਨ੍ਤਿ ਪਟਿਕ੍ਕਮਨਂ ਨੀਹਰਿਤ੍ਵਾ ਸਂਵਿਭਜਿਤਬ੍ਬਂ.

ਅਯਂ ਤਤ੍ਥ ਸਾਮੀਚੀਤਿ ਅਯਂ ਤਤ੍ਥ ਅਨੁਧਮ੍ਮਤਾ.

੨੩੪. ਅਤਿਰੇਕਦ੍ਵਤ੍ਤਿਪਤ੍ਤਪੂਰੇ ਅਤਿਰੇਕਸਞ੍ਞੀ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਤਿਰੇਕਦ੍ਵਤ੍ਤਿਪਤ੍ਤਪੂਰੇ ਵੇਮਤਿਕੋ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਤਿਰੇਕਦ੍ਵਤ੍ਤਿਪਤ੍ਤਪੂਰੇ ਊਨਕਸਞ੍ਞੀ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਊਨਕਦ੍ਵਤ੍ਤਿਪਤ੍ਤਪੂਰੇ ਅਤਿਰੇਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਦ੍ਵਤ੍ਤਿਪਤ੍ਤਪੂਰੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਦ੍ਵਤ੍ਤਿਪਤ੍ਤਪੂਰੇ ਊਨਕਸਞ੍ਞੀ, ਅਨਾਪਤ੍ਤਿ.

੨੩੫. ਅਨਾਪਤ੍ਤਿ ਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਣ੍ਹਾਤਿ, ਊਨਕਦ੍ਵਤ੍ਤਿਪਤ੍ਤਪੂਰੇ ਪਟਿਗ੍ਗਣ੍ਹਾਤਿ, ਨ ਪਹੇਣਕਤ੍ਥਾਯ ਨ ਪਾਥੇਯ੍ਯਤ੍ਥਾਯ ਪਟਿਯਤ੍ਤਂ ਦੇਨ੍ਤਿ, ਪਹੇਣਕਤ੍ਥਾਯ ਵਾ ਪਾਥੇਯ੍ਯਤ੍ਥਾਯ ਵਾ ਪਟਿਯਤ੍ਤਸੇਸਕਂ ਦੇਨ੍ਤਿ, ਗਮਨੇ ਪਟਿਪ੍ਪਸ੍ਸਦ੍ਧੇ ਦੇਨ੍ਤਿ, ਞਾਤਕਾਨਂ ਪਵਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਕਾਣਮਾਤੁਸਿਕ੍ਖਾਪਦਂ ਨਿਟ੍ਠਿਤਂ ਚਤੁਤ੍ਥਂ.