੩. ਪਰਮ੍ਪਰਭੋਜਨਸਿਕ੍ਖਾਪਦਂ

੨੨੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਵੇਸਾਲਿਯਂ ਪਣੀਤਾਨਂ ਭਤ੍ਤਾਨਂ ਭਤ੍ਤਪਟਿਪਾਟਿ ਅਧਿਟ੍ਠਿਤਾ ਹੋਤਿ. ਅਥ ਖੋ ਅਞ੍ਞਤਰਸ੍ਸ ਦਲਿਦ੍ਦਸ੍ਸ ਕਮ੍ਮਕਾਰਸ੍ਸ [ਕਮ੍ਮਕਰਸ੍ਸ (ਸੀ.)] ਏਤਦਹੋਸਿ – ‘‘ਨ ਖੋ ਇਦਂ ਓਰਕਂ ਭਵਿਸ੍ਸਤਿ ਯਥਯਿਮੇ ਮਨੁਸ੍ਸਾ ਸਕ੍ਕਚ੍ਚਂ ਭਤ੍ਤਂ ਕਰੋਨ੍ਤਿ; ਯਂਨੂਨਾਹਮ੍ਪਿ ਭਤ੍ਤਂ ਕਰੇਯ੍ਯ’’ਨ੍ਤਿ. ਅਥ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਯੇਨ ਕਿਰਪਤਿਕੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਕਿਰਪਤਿਕਂ ਏਤਦਵੋਚ – ‘‘ਇਚ੍ਛਾਮਹਂ, ਅਯ੍ਯਪੁਤ੍ਤ, ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਭਤ੍ਤਂ ਕਾਤੁਂ. ਦੇਹਿ ਮੇ ਵੇਤਨ’’ਨ੍ਤਿ. ਸੋਪਿ ਖੋ ਕਿਰਪਤਿਕੋ ਸਦ੍ਧੋ ਹੋਤਿ ਪਸਨ੍ਨੋ. ਅਥ ਖੋ ਸੋ ਕਿਰਪਤਿਕੋ ਤਸ੍ਸ ਦਲਿਦ੍ਦਸ੍ਸ ਕਮ੍ਮਕਾਰਸ੍ਸ ਅਬ੍ਭਾਤਿਰੇਕਂ [ਅਤਿਰੇਕਂ (ਸ੍ਯਾ.)] ਵੇਤਨਂ ਅਦਾਸਿ. ਅਥ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਭਗਵਨ੍ਤਂ ਏਤਦਵੋਚ – ‘‘ਅਧਿਵਾਸੇਤੁ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ‘‘ਮਹਾ ਖੋ, ਆਵੁਸੋ, ਭਿਕ੍ਖੁਸਙ੍ਘੋ. ਜਾਨਾਹੀ’’ਤਿ. ‘‘ਹੋਤੁ [ਹੋਤੁ ਮੇ (ਕ.)] ਭਨ੍ਤੇ, ਮਹਾ ਭਿਕ੍ਖੁਸਙ੍ਘੋ. ਬਹੂ ਮੇ ਬਦਰਾ ਪਟਿਯਤ੍ਤਾ ਬਦਰਮਿਸ੍ਸੇਨ ਪੇਯ੍ਯਾ ਪਰਿਪੂਰਿਸ੍ਸਨ੍ਤੀ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਅਥ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਸ੍ਸੋਸੁਂ ਖੋ ਭਿਕ੍ਖੂ – ‘‘ਦਲਿਦ੍ਦੇਨ ਕਿਰ ਕਮ੍ਮਕਾਰੇਨ ਸ੍ਵਾਤਨਾਯ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ, ਬਦਰਮਿਸ੍ਸੇਨ ਪੇਯ੍ਯਾ ਪਰਿਪੂਰਿਸ੍ਸਨ੍ਤੀ’’ਤਿ. ਤੇ ਕਾਲਸ੍ਸੇਵ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਂਸੁ. ਅਸ੍ਸੋਸੁਂ ਖੋ ਮਨੁਸ੍ਸਾ – ‘‘ਦਲਿਦ੍ਦੇਨ ਕਿਰ ਕਮ੍ਮਕਾਰੇਨ ਬੁਦ੍ਧਪ੍ਪਮੁਖੋ ਭਿਕ੍ਖੁਸਙ੍ਘੋ ਨਿਮਨ੍ਤਿਤੋ’’ਤਿ. ਤੇ ਦਲਿਦ੍ਦਸ੍ਸ ਕਮ੍ਮਕਾਰਸ੍ਸ ਪਹੂਤਂ ਖਾਦਨੀਯਂ ਭੋਜਨੀਯਂ ਅਭਿਹਰਿਂਸੁ. ਅਥ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ.

ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਤਸ੍ਸ ਦਲਿਦ੍ਦਸ੍ਸ ਕਮ੍ਮਕਾਰਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਭਤ੍ਤਗ੍ਗੇ ਭਿਕ੍ਖੂ ਪਰਿਵਿਸਤਿ. ਭਿਕ੍ਖੂ ਏਵਮਾਹਂਸੁ – ‘‘ਥੋਕਂ, ਆਵੁਸੋ, ਦੇਹਿ. ਥੋਕਂ, ਆਵੁਸੋ, ਦੇਹੀ’’ਤਿ. ‘‘ਮਾ ਖੋ ਤੁਮ੍ਹੇ, ਭਨ੍ਤੇ, ‘ਅਯਂ ਦਲਿਦ੍ਦੋ ਕਮ੍ਮਕਾਰੋ’ਤਿ ਥੋਕਂ ਥੋਕਂ ਪਟਿਗ੍ਗਣ੍ਹਿਤ੍ਥ. ਪਹੂਤਂ ਮੇ ਖਾਦਨੀਯਂ ਭੋਜਨੀਯਂ ਪਟਿਯਤ੍ਤਂ.

ਪਟਿਗ੍ਗਣ੍ਹਥ, ਭਨ੍ਤੇ, ਯਾਵਦਤ੍ਥ’’ਨ੍ਤਿ. ‘‘ਨ ਖੋ ਮਯਂ, ਆਵੁਸੋ, ਏਤਂਕਾਰਣਾ ਥੋਕਂ ਥੋਕਂ ਪਟਿਗ੍ਗਣ੍ਹਾਮ. ਅਪਿਚ, ਮਯਂ ਕਾਲਸ੍ਸੇਵ ਪਿਣ੍ਡਾਯ ਚਰਿਤ੍ਵਾ ਭੁਞ੍ਜਿਮ੍ਹਾ; ਤੇਨ ਮਯਂ ਥੋਕਂ ਥੋਕਂ ਪਟਿਗ੍ਗਣ੍ਹਾਮਾ’’ਤਿ.

ਅਥ ਖੋ ਸੋ ਦਲਿਦ੍ਦੋ ਕਮ੍ਮਕਾਰੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਮਯਾ ਨਿਮਨ੍ਤਿਤਾ ਅਞ੍ਞਤ੍ਰ ਭੁਞ੍ਜਿਸ੍ਸਨ੍ਤਿ! ਨ ਚਾਹਂ ਪਟਿਬਲੋ ਯਾਵਦਤ੍ਥਂ ਦਾਤੁ’’ਨ੍ਤਿ? ਅਸ੍ਸੋਸੁਂ ਖੋ ਭਿਕ੍ਖੂ ਤਸ੍ਸ ਦਲਿਦ੍ਦਸ੍ਸ ਕਮ੍ਮਕਾਰਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਅਞ੍ਞਤ੍ਰ ਨਿਮਨ੍ਤਿਤਾ ਅਞ੍ਞਤ੍ਰ ਭੁਞ੍ਜਿਸ੍ਸਨ੍ਤੀ’’ਤਿ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਅਞ੍ਞਤ੍ਰ ਨਿਮਨ੍ਤਿਤਾ ਅਞ੍ਞਤ੍ਰ ਭੁਞ੍ਜਨ੍ਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਅਞ੍ਞਤ੍ਰ ਨਿਮਨ੍ਤਿਤਾ ਅਞ੍ਞਤ੍ਰ ਭੁਞ੍ਜਿਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਪਰਮ੍ਪਰਭੋਜਨੇ ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੨੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਗਿਲਾਨੋ ਹੋਤਿ. ਅਞ੍ਞਤਰੋ ਭਿਕ੍ਖੁ ਪਿਣ੍ਡਪਾਤਂ ਆਦਾਯ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਭੁਞ੍ਜਾਹਿ, ਆਵੁਸੋ’’ਤਿ. ‘‘ਅਲਂ, ਆਵੁਸੋ, ਅਤ੍ਥਿ ਮੇ ਭਤ੍ਤਪਚ੍ਚਾਸਾ’’ਤਿ. ਤਸ੍ਸ ਭਿਕ੍ਖੁਨੋ ਪਿਣ੍ਡਪਾਤੋ ਉਸ੍ਸੂਰੇ [ਉਸ੍ਸੂਰੇਨ (ਕ.)] ਆਹਰੀਯਿਤ੍ਥ. ਸੋ ਭਿਕ੍ਖੁ ਨ ਚਿਤ੍ਤਰੂਪਂ ਭੁਞ੍ਜਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਗਿਲਾਨੇਨ ਭਿਕ੍ਖੁਨਾ ਪਰਮ੍ਪਰਭੋਜਨਂ ਭੁਞ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਪਰਮ੍ਪਰਭੋਜਨੇ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ. ਗਿਲਾਨਸਮਯੋ – ਅਯਂ ਤਤ੍ਥ ਸਮਯੋ’’ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੨੩. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਚੀਵਰਦਾਨਸਮਯੇ ਸਚੀਵਰਭਤ੍ਤਂ ਪਟਿਯਾਦੇਤ੍ਵਾ [ਪਟਿਯਾਦਾਪੇਤ੍ਵਾ (ਇਤਿਪਿ)] ਭਿਕ੍ਖੂ ਨਿਮਨ੍ਤੇਨ੍ਤਿ – ‘‘ਭੋਜੇਤ੍ਵਾ ਚੀਵਰੇਨ ਅਚ੍ਛਾਦੇਸ੍ਸਾਮਾ’’ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਧਿਵਾਸੇਨ੍ਤਿ – ‘‘ਪਟਿਕ੍ਖਿਤ੍ਤਂ ਭਗਵਤਾ ਪਰਮ੍ਪਰਭੋਜਨ’’ਨ੍ਤਿ. ਚੀਵਰਂ ਪਰਿਤ੍ਤਂ ਉਪ੍ਪਜ੍ਜਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਦਾਨਸਮਯੇ ਪਰਮ੍ਪਰਭੋਜਨਂ ਭੁਞ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

‘‘ਪਰਮ੍ਪਰਭੋਜਨੇ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ. ਗਿਲਾਨਸਮਯੋ, ਚੀਵਰਦਾਨਸਮਯੋ – ਅਯਂ ਤਤ੍ਥ ਸਮਯੋ’’ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੨੪. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਚੀਵਰਕਾਰਕੇ ਭਿਕ੍ਖੂ ਭਤ੍ਤੇਨ ਨਿਮਨ੍ਤੇਨ੍ਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨਾਧਿਵਾਸੇਨ੍ਤਿ – ‘‘ਪਟਿਕ੍ਖਿਤ੍ਤਂ ਭਗਵਤਾ ਪਰਮ੍ਪਰਭੋਜਨ’’ਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਚੀਵਰਕਾਰਸਮਯੇ ਪਰਮ੍ਪਰਭੋਜਨਂ ਭੁਞ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੨੫. ‘‘ਪਰਮ੍ਪਰਭੋਜਨੇ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ. ਗਿਲਾਨਸਮਯੋ, ਚੀਵਰਦਾਨਸਮਯੋ, ਚੀਵਰਕਾਰਸਮਯੋ – ਅਯਂ ਤਤ੍ਥ ਸਮਯੋ’’ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੨੨੬. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਆਯਸ੍ਮਤਾ ਆਨਨ੍ਦੇਨ ਪਚ੍ਛਾਸਮਣੇਨ ਯੇਨ ਅਞ੍ਞਤਰਂ ਕੁਲਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਤੇ ਮਨੁਸ੍ਸਾ ਭਗਵਤੋ ਚ ਆਯਸ੍ਮਤੋ ਚ ਆਨਨ੍ਦਸ੍ਸ ਭੋਜਨਂ ਅਦਂਸੁ. ਆਯਸ੍ਮਾ ਆਨਨ੍ਦੋ ਕੁਕ੍ਕੁਚ੍ਚਾਯਨ੍ਤੋ ਨ ਪਟਿਗ੍ਗਣ੍ਹਾਤਿ. ‘‘ਗਣ੍ਹਾਹਿ [ਪਤਿਗਣ੍ਹਾਹਿ (ਸੀ.)], ਆਨਨ੍ਦਾ’’ਤਿ. ‘‘ਅਲਂ, ਭਗਵਾ, ਅਤ੍ਥਿ ਮੇ ਭਤ੍ਤਪਚ੍ਚਾਸਾ’’ਤਿ. ‘‘ਤੇਨਹਾਨਨ੍ਦ, ਵਿਕਪ੍ਪੇਤ੍ਵਾ ਗਣ੍ਹਾਹੀ’’ਤਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਵਿਕਪ੍ਪੇਤ੍ਵਾ [ਭਤ੍ਤਪਚ੍ਚਾਸਂ ਵਿਕਪ੍ਪੇਤ੍ਵਾ (ਸ੍ਯਾ.)] ਪਰਮ੍ਪਰਭੋਜਨਂ ਭੁਞ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਵਿਕਪ੍ਪੇਤਬ੍ਬਂ – ‘ਮਯ੍ਹਂ ਭਤ੍ਤਪਚ੍ਚਾਸਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’’ਤਿ.

੨੨੭. ਪਰਮ੍ਪਰਭੋਜਨਂ ਨਾਮ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰੇਨ ਭੋਜਨੇਨ ਨਿਮਨ੍ਤਿਤੋ, ਤਂ ਠਪੇਤ੍ਵਾ ਅਞ੍ਞਂ ਪਞ੍ਚਨ੍ਨਂ ਭੋਜਨਾਨਂ ਅਞ੍ਞਤਰਂ ਭੋਜਨਂ ਭੁਞ੍ਜਤਿ, ਏਤਂ ਪਰਮ੍ਪਰਭੋਜਨਂ ਨਾਮ.

ਅਞ੍ਞਤ੍ਰ ਸਮਯਾਤਿ ਠਪੇਤ੍ਵਾ ਸਮਯਂ.

ਗਿਲਾਨਸਮਯੋ ਨਾਮ ਨ ਸਕ੍ਕੋਤਿ ਏਕਾਸਨੇ ਨਿਸਿਨ੍ਨੋ ਯਾਵਦਤ੍ਥਂ ਭੁਞ੍ਜਿਤੁਂ. ‘‘ਗਿਲਾਨਸਮਯੋ’’ਤਿ ਭੁਞ੍ਜਿਤਬ੍ਬਂ.

ਚੀਵਰਦਾਨਸਮਯੋ ਨਾਮ ਅਨਤ੍ਥਤੇ ਕਥਿਨੇ ਵਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਪਞ੍ਚ ਮਾਸਾ. ‘‘ਚੀਵਰਦਾਨਸਮਯੋ’’ਤਿ ਭੁਞ੍ਜਿਤਬ੍ਬਂ.

ਚੀਵਰਕਾਰਸਮਯੋ ਨਾਮ ਚੀਵਰੇ ਕਯਿਰਮਾਨੇ. ‘‘ਚੀਵਰਕਾਰਸਮਯੋ’’ਤਿ ਭੁਞ੍ਜਿਤਬ੍ਬਂ.

‘‘ਅਞ੍ਞਤ੍ਰ ਸਮਯਾ ਭੁਞ੍ਜਿਸ੍ਸਾਮੀ’’ਤਿ ਪਟਿਗ੍ਗਣ੍ਹਾਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਜ੍ਝੋਹਾਰੇ ਅਜ੍ਝੋਹਾਰੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

੨੨੮. ਪਰਮ੍ਪਰਭੋਜਨੇ ਪਰਮ੍ਪਰਭੋਜਨਸਞ੍ਞੀ, ਅਞ੍ਞਤ੍ਰ ਸਮਯਾ, ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਪਰਮ੍ਪਰਭੋਜਨੇ ਵੇਮਤਿਕੋ, ਅਞ੍ਞਤ੍ਰ ਸਮਯਾ, ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਪਰਮ੍ਪਰਭੋਜਨੇ ਨਪਰਮ੍ਪਰਭੋਜਨਸਞ੍ਞੀ, ਅਞ੍ਞਤ੍ਰ ਸਮਯਾ, ਭੁਞ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਨਪਰਮ੍ਪਰਭੋਜਨੇ ਪਰਮ੍ਪਰਭੋਜਨਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਨਪਰਮ੍ਪਰਭੋਜਨੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਨਪਰਮ੍ਪਰਭੋਜਨੇ ਨਪਰਮ੍ਪਰਭੋਜਨਸਞ੍ਞੀ, ਅਨਾਪਤ੍ਤਿ.

੨੨੯. ਅਨਾਪਤ੍ਤਿ ਸਮਯੇ, ਵਿਕਪ੍ਪੇਤ੍ਵਾ ਭੁਞ੍ਜਤਿ, ਦ੍ਵੇ ਤਯੋ ਨਿਮਨ੍ਤਨੇ ਏਕਤੋ ਭੁਞ੍ਜਤਿ, ਨਿਮਨ੍ਤਨਪਟਿਪਾਟਿਯਾ ਭੁਞ੍ਜਤਿ, ਸਕਲੇਨ ਗਾਮੇਨ ਨਿਮਨ੍ਤਿਤੋ ਤਸ੍ਮਿਂ ਗਾਮੇ ਯਤ੍ਥ ਕਤ੍ਥਚਿ ਭੁਞ੍ਜਤਿ, ਸਕਲੇਨ ਪੂਗੇਨ ਨਿਮਨ੍ਤਿਤੋ ਤਸ੍ਮਿਂ ਪੂਗੇ ਯਤ੍ਥ ਕਤ੍ਥਚਿ ਭੁਞ੍ਜਤਿ, ਨਿਮਨ੍ਤਿਯਮਾਨੋ ਭਿਕ੍ਖਂ ਗਹੇਸ੍ਸਾਮੀਤਿ ਭਣਤਿ, ਨਿਚ੍ਚਭਤ੍ਤੇ, ਸਲਾਕਭਤ੍ਤੇ, ਪਕ੍ਖਿਕੇ, ਉਪੋਸਥਿਕੇ, ਪਾਟਿਪਦਿਕੇ, ਪਞ੍ਚ ਭੋਜਨਾਨਿ ਠਪੇਤ੍ਵਾ ਸਬ੍ਬਤ੍ਥ ਅਨਾਪਤ੍ਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਪਰਮ੍ਪਰਭੋਜਨਸਿਕ੍ਖਾਪਦਂ ਨਿਟ੍ਠਿਤਂ ਤਤਿਯਂ.