੭. ਸਂਵਿਧਾਨਸਿਕ੍ਖਾਪਦਂ

੧੮੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨੀਹਿ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਯਥੇਵ ਮਯਂ ਸਪਜਾਪਤਿਕਾ ਆਹਿਣ੍ਡਾਮ, ਏਵਮੇਵਿਮੇ ਸਮਣਾ ਸਕ੍ਯਪੁਤ੍ਤਿਯਾ ਭਿਕ੍ਖੁਨੀਹਿ ਸਦ੍ਧਿਂ ਸਂਵਿਧਾਯ ਆਹਿਣ੍ਡਨ੍ਤੀ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨੀਹਿ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜਿਸ੍ਸਨ੍ਤੀ’’ਤਿ…ਪੇ… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਭਿਕ੍ਖੁਨੀਹਿ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜਥਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਭਿਕ੍ਖੁਨੀਹਿ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜਿਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ.

‘‘ਯੋ ਪਨ ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜੇਯ੍ਯ, ਅਨ੍ਤਮਸੋ ਗਾਮਨ੍ਤਰਮ੍ਪਿ, ਪਾਚਿਤ੍ਤਿਯ’’ਨ੍ਤਿ.

ਏਵਞ੍ਚਿਦਂ ਭਗਵਤਾ ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਤ੍ਤਂ ਹੋਤਿ.

੧੮੧. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਸਾਕੇਤਾ ਸਾਵਤ੍ਥਿਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤਿ. ਅਥ ਖੋ ਤਾ ਭਿਕ੍ਖੁਨਿਯੋ ਤੇ ਭਿਕ੍ਖੂ ਏਤਦਵੋਚੁਂ – ‘‘ਮਯਮ੍ਪਿ ਅਯ੍ਯੇਹਿ ਸਦ੍ਧਿਂ ਗਮਿਸ੍ਸਾਮਾ’’ਤਿ. ‘‘ਨ, ਭਗਿਨੀ, ਕਪ੍ਪਤਿ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜਿਤੁਂ. ਤੁਮ੍ਹੇ ਵਾ ਪਠਮਂ ਗਚ੍ਛਥ ਮਯਂ ਵਾ ਗਮਿਸ੍ਸਾਮਾ’’ਤਿ. ‘‘ਅਯ੍ਯਾ, ਭਨ੍ਤੇ, ਅਗ੍ਗਪੁਰਿਸਾ. ਅਯ੍ਯਾਵ ਪਠਮਂ ਗਚ੍ਛਨ੍ਤੂ’’ਤਿ. ਅਥ ਖੋ ਤਾਸਂ ਭਿਕ੍ਖੁਨੀਨਂ ਪਚ੍ਛਾ ਗਚ੍ਛਨ੍ਤੀਨਂ ਅਨ੍ਤਰਾਮਗ੍ਗੇ ਚੋਰਾ ਅਚ੍ਛਿਨ੍ਦਿਂਸੁ ਚ ਦੂਸੇਸੁਞ੍ਚ. ਅਥ ਖੋ ਤਾ ਭਿਕ੍ਖੁਨਿਯੋ ਸਾਵਤ੍ਥਿਂ ਗਨ੍ਤ੍ਵਾ ਭਿਕ੍ਖੁਨੀਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਸਤ੍ਥਗਮਨੀਯੇ ਮਗ੍ਗੇ ਸਾਸਙ੍ਕਸਮ੍ਮਤੇ ਸਪ੍ਪਟਿਭਯੇ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜਿਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੧੮੨. ‘‘ਯੋ ਪਨ ਭਿਕ੍ਖੁ ਭਿਕ੍ਖੁਨਿਯਾ ਸਦ੍ਧਿਂ ਸਂਵਿਧਾਯ ਏਕਦ੍ਧਾਨਮਗ੍ਗਂ ਪਟਿਪਜ੍ਜੇਯ੍ਯ, ਅਨ੍ਤਮਸੋ ਗਾਮਨ੍ਤਰਮ੍ਪਿ, ਅਞ੍ਞਤ੍ਰ ਸਮਯਾ, ਪਾਚਿਤ੍ਤਿਯਂ. ਤਤ੍ਥਾਯਂ ਸਮਯੋ . ਸਤ੍ਥਗਮਨੀਯੋ ਹੋਤਿ ਮਗ੍ਗੋ ਸਾਸਙ੍ਕਸਮ੍ਮਤੋ ਸਪ੍ਪਟਿਭਯੋ – ਅਯਂ ਤਤ੍ਥ ਸਮਯੋ’’ਤਿ.

੧੮੩. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਭਿਕ੍ਖੁਨੀ ਨਾਮ ਉਭਤੋਸਙ੍ਘੇ ਉਪਸਮ੍ਪਨ੍ਨਾ.

ਸਦ੍ਧਿਨ੍ਤਿ ਏਕਤੋ.

ਸਂਵਿਧਾਯਾਤਿ – ‘‘ਗਚ੍ਛਾਮ, ਭਗਿਨਿ, ਗਚ੍ਛਾਮਾਯ੍ਯ; ਗਚ੍ਛਾਮਾਯ੍ਯ, ਗਚ੍ਛਾਮ, ਭਗਿਨਿ; ਅਜ੍ਜ ਵਾ ਹਿਯ੍ਯੋ ਵਾ ਪਰੇ ਵਾ ਗਚ੍ਛਾਮਾ’’ਤਿ ਸਂਵਿਦਹਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਅਨ੍ਤਮਸੋ ਗਾਮਨ੍ਤਰਮ੍ਪੀਤਿ ਕੁਕ੍ਕੁਟਸਮ੍ਪਾਤੇ ਗਾਮੇ, ਗਾਮਨ੍ਤਰੇ ਗਾਮਨ੍ਤਰੇ ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਗਾਮਕੇ ਅਰਞ੍ਞੇ, ਅਦ੍ਧਯੋਜਨੇ ਅਦ੍ਧਯੋਜਨੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਅਞ੍ਞਤ੍ਰ ਸਮਯਾਤਿ ਠਪੇਤ੍ਵਾ ਸਮਯਂ.

ਸਤ੍ਥਗਮਨੀਯੋ ਨਾਮ ਮਗ੍ਗੋ ਨ ਸਕ੍ਕਾ ਹੋਤਿ ਵਿਨਾ ਸਤ੍ਥੇਨ ਗਨ੍ਤੁਂ.

ਸਾਸਙ੍ਕਂ ਨਾਮ ਤਸ੍ਮਿਂ ਮਗ੍ਗੇ [ਯਸ੍ਮਿਂ ਮਗ੍ਗੇ (?)] ਚੋਰਾਨਂ ਨਿਵਿਟ੍ਠੋਕਾਸੋ ਦਿਸ੍ਸਤਿ, ਭੁਤ੍ਤੋਕਾਸੋ ਦਿਸ੍ਸਤਿ, ਠਿਤੋਕਾਸੋ ਦਿਸ੍ਸਤਿ, ਨਿਸਿਨ੍ਨੋਕਾਸੋ ਦਿਸ੍ਸਤਿ, ਨਿਪਨ੍ਨੋਕਾਸੋ ਦਿਸ੍ਸਤਿ.

ਸਪ੍ਪਟਿਭਯਂ ਨਾਮ ਤਸ੍ਮਿਂ ਮਗ੍ਗੇ ਚੋਰੇਹਿ ਮਨੁਸ੍ਸਾ ਹਤਾ ਦਿਸ੍ਸਨ੍ਤਿ, ਵਿਲੁਤ੍ਤਾ ਦਿਸ੍ਸਨ੍ਤਿ, ਆਕੋਟਿਤਾ ਦਿਸ੍ਸਨ੍ਤਿ, ਸਪ੍ਪਟਿਭਯਂ ਗਨ੍ਤ੍ਵਾ ਅਪ੍ਪਟਿਭਯਂ ਦਸ੍ਸੇਤ੍ਵਾ ਉਯ੍ਯੋਜੇਤਬ੍ਬਾ – ‘‘ਗਚ੍ਛਥ ਭਗਿਨਿਯੋ’’ਤਿ.

੧੮੪. ਸਂਵਿਦਹਿਤੇ ਸਂਵਿਦਹਿਤਸਞ੍ਞੀ ਏਕਦ੍ਧਾਨਮਗ੍ਗਂ ਪਟਿਪਜ੍ਜਤਿ, ਅਨ੍ਤਮਸੋ ਗਾਮਨ੍ਤਰਮ੍ਪਿ, ਅਞ੍ਞਤ੍ਰ ਸਮਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਸਂਵਿਦਹਿਤੇ ਵੇਮਤਿਕੋ ਏਕਦ੍ਧਾਨਮਗ੍ਗਂ ਪਟਿਪਜ੍ਜਤਿ, ਅਨ੍ਤਮਸੋ ਗਾਮਨ੍ਤਰਮ੍ਪਿ, ਅਞ੍ਞਤ੍ਰ ਸਮਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਸਂਵਿਦਹਿਤੇ, ਅਸਂਵਿਦਹਿਤਸਞ੍ਞੀ ਏਕਦ੍ਧਾਨਮਗ੍ਗਂ ਪਟਿਪਜ੍ਜਤਿ, ਅਨ੍ਤਮਸੋ ਗਾਮਨ੍ਤਰਮ੍ਪਿ, ਅਞ੍ਞਤ੍ਰ ਸਮਯਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਭਿਕ੍ਖੁ ਸਂਵਿਦਹਤਿ ਭਿਕ੍ਖੁਨੀ ਨ ਸਂਵਿਦਹਤਿ, ਆਪਤ੍ਤਿ ਦੁਕ੍ਕਟਸ੍ਸ. ਅਸਂਵਿਦਹਿਤੇ ਸਂਵਿਦਹਿਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਅਸਂਵਿਦਹਿਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਅਸਂਵਿਦਹਿਤੇ ਅਸਂਵਿਦਹਿਤਸਞ੍ਞੀ, ਅਨਾਪਤ੍ਤਿ.

੧੮੫. ਅਨਾਪਤ੍ਤਿ ਸਮਯੇ, ਅਸਂਵਿਦਹਿਤ੍ਵਾ ਗਚ੍ਛਤਿ, ਭਿਕ੍ਖੁਨੀ ਸਂਵਿਦਹਤਿ, ਭਿਕ੍ਖੁ ਨ ਸਂਵਿਦਹਤਿ, ਵਿਸਙ੍ਕੇਤੇਨ ਗਚ੍ਛਨ੍ਤਿ, ਆਪਦਾਸੁ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਸਂਵਿਧਾਨਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ.