੬. ਚੀਵਰਸਿਬ੍ਬਨਸਿਕ੍ਖਾਪਦਂ

੧੭੫. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਪਟ੍ਟੋ [ਪਟ੍ਠੋ (ਸੀ. ਸ੍ਯਾ.)] ਹੋਤਿ ਚੀਵਰਕਮ੍ਮਂ ਕਾਤੁਂ. ਅਞ੍ਞਤਰਾ ਭਿਕ੍ਖੁਨੀ ਯੇਨਾਯਸ੍ਮਾ ਉਦਾਯੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਦਾਯਿਂ ਏਤਦਵੋਚ – ‘‘ਸਾਧੁ ਮੇ, ਭਨ੍ਤੇ, ਅਯ੍ਯੋ ਚੀਵਰਂ ਸਿਬ੍ਬਤੂ’’ਤਿ. ਅਥ ਖੋ ਆਯਸ੍ਮਾ ਉਦਾਯੀ ਤਸ੍ਸਾ ਭਿਕ੍ਖੁਨਿਯਾ ਚੀਵਰਂ ਸਿਬ੍ਬਿਤ੍ਵਾ ਸੁਰਤ੍ਤਂ ਸੁਪਰਿਕਮ੍ਮਕਤਂ ਕਤ੍ਵਾ ਮਜ੍ਝੇ ਪਟਿਭਾਨਚਿਤ੍ਤਂ ਵੁਟ੍ਠਾਪੇਤ੍ਵਾ ਸਂਹਰਿਤ੍ਵਾ ਨਿਕ੍ਖਿਪਿ. ਅਥ ਖੋ ਸਾ ਭਿਕ੍ਖੁਨੀ ਯੇਨਾਯਸ੍ਮਾ ਉਦਾਯੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਦਾਯਿਂ ਏਤਦਵੋਚ – ‘‘ਕਹਂ ਤਂ, ਭਨ੍ਤੇ, ਚੀਵਰ’’ਨ੍ਤਿ? ‘‘ਹਨ੍ਦ, ਭਗਿਨਿ, ਇਮਂ ਚੀਵਰਂ ਯਥਾਸਂਹਟਂ ਹਰਿਤ੍ਵਾ ਨਿਕ੍ਖਿਪਿਤ੍ਵਾ ਯਦਾ ਭਿਕ੍ਖੁਨਿਸਙ੍ਘੋ ਓਵਾਦਂ ਆਗਚ੍ਛਤਿ ਤਦਾ ਇਮਂ ਚੀਵਰਂ ਪਾਰੁਪਿਤ੍ਵਾ ਭਿਕ੍ਖੁਨਿਸਙ੍ਘਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਆਗਚ੍ਛਾ’’ਤਿ. ਅਥ ਖੋ ਸਾ ਭਿਕ੍ਖੁਨੀ ਤਂ ਚੀਵਰਂ ਯਥਾਸਂਹਟਂ ਹਰਿਤ੍ਵਾ ਨਿਕ੍ਖਿਪਿਤ੍ਵਾ ਯਦਾ ਭਿਕ੍ਖੁਨਿਸਙ੍ਘੋ ਓਵਾਦਂ ਆਗਚ੍ਛਤਿ ਤਦਾ ਤਂ ਚੀਵਰਂ ਪਾਰੁਪਿਤ੍ਵਾ ਭਿਕ੍ਖੁਨਿਸਙ੍ਘਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਆਗਚ੍ਛਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਯਾਵ ਛਿਨ੍ਨਿਕਾ ਇਮਾ ਭਿਕ੍ਖੁਨਿਯੋ ਧੁਤ੍ਤਿਕਾ ਅਹਿਰਿਕਾਯੋ, ਯਤ੍ਰ ਹਿ ਨਾਮ ਚੀਵਰੇ ਪਟਿਭਾਨਚਿਤ੍ਤਂ ਵੁਟ੍ਠਾਪੇਸ੍ਸਨ੍ਤੀ’’ਤਿ!

ਭਿਕ੍ਖੁਨਿਯੋ ਏਵਮਾਹਂਸੁ – ‘‘ਕਸ੍ਸਿਦਂ ਕਮ੍ਮ’’ਨ੍ਤਿ? ‘‘ਅਯ੍ਯਸ੍ਸ ਉਦਾਯਿਸ੍ਸਾ’’ਤਿ. ‘‘ਯੇਪਿ ਤੇ ਛਿਨ੍ਨਕਾ ਧੁਤ੍ਤਕਾ ਅਹਿਰਿਕਾ ਤੇਸਮ੍ਪਿ ਏਵਰੂਪਂ ਨ ਸੋਭੇਯ੍ਯ, ਕਿਂ ਪਨ ਅਯ੍ਯਸ੍ਸ ਉਦਾਯਿਸ੍ਸਾ’’ਤਿ! ਅਥ ਖੋ ਤਾ ਭਿਕ੍ਖੁਨਿਯੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਦਾਯੀ ਭਿਕ੍ਖੁਨਿਯਾ ਚੀਵਰਂ ਸਿਬ੍ਬਿਸ੍ਸਤੀ’’ਤਿ…ਪੇ… ਸਚ੍ਚਂ ਕਿਰ ਤ੍ਵਂ, ਉਦਾਯਿ, ਭਿਕ੍ਖੁਨਿਯਾ ਚੀਵਰਂ ਸਿਬ੍ਬਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ‘‘ਞਾਤਿਕਾ ਤੇ, ਉਦਾਯਿ, ਅਞ੍ਞਾਤਿਕਾ’’ਤਿ? ‘‘ਅਞ੍ਞਾਤਿਕਾ, ਭਗਵਾ’’ਤਿ. ‘‘ਅਞ੍ਞਾਤਕੋ, ਮੋਘਪੁਰਿਸ, ਅਞ੍ਞਾਤਿਕਾਯ ਨ ਜਾਨਾਤਿ ਪਤਿਰੂਪਂ ਵਾ ਅਪ੍ਪਤਿਰੂਪਂ ਵਾ ਪਾਸਾਦਿਕਂ ਵਾ ਅਪਾਸਾਦਿਕਂ ਵਾ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਸਿਬ੍ਬਿਸ੍ਸਸਿ! ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੧੭੬. ‘‘ਯੋ ਪਨ ਭਿਕ੍ਖੁ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਚੀਵਰਂ ਸਿਬ੍ਬੇਯ੍ਯ ਵਾ ਸਿਬ੍ਬਾਪੇਯ੍ਯ ਵਾ, ਪਾਚਿਤ੍ਤਿਯ’’ਨ੍ਤਿ.

੧੭੭. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਅਞ੍ਞਾਤਿਕਾ ਨਾਮ ਮਾਤਿਤੋ ਵਾ ਪਿਤਿਤੋ ਵਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧਾ.

ਭਿਕ੍ਖੁਨੀ ਨਾਮ ਉਭਤੋਸਙ੍ਘੇ ਉਪਸਮ੍ਪਨ੍ਨਾ.

ਚੀਵਰਂ ਨਾਮ ਛਨ੍ਨਂ ਚੀਵਰਾਨਂ ਅਞ੍ਞਤਰਂ ਚੀਵਰਂ.

ਸਿਬ੍ਬੇਯ੍ਯਾਤਿ ਸਯਂ ਸਿਬ੍ਬਤਿ ਆਰਾਪਥੇ ਆਰਾਪਥੇ ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਸਿਬ੍ਬਾਪੇਯ੍ਯਾਤਿ ਅਞ੍ਞਂ ਆਣਾਪੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਸਕਿਂ ਆਣਤ੍ਤੋ ਬਹੁਕਮ੍ਪਿ ਸਿਬ੍ਬਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

੧੭੮. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਚੀਵਰਂ ਸਿਬ੍ਬਤਿ ਵਾ ਸਿਬ੍ਬਾਪੇਤਿ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਞ੍ਞਾਤਿਕਾਯ ਵੇਮਤਿਕੋ ਚੀਵਰਂ ਸਿਬ੍ਬਤਿ ਵਾ ਸਿਬ੍ਬਾਪੇਤਿ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ. ਅਞ੍ਞਾਤਿਕਾਯ ਞਾਤਿਕਸਞ੍ਞੀ ਚੀਵਰਂ ਸਿਬ੍ਬਤਿ ਵਾ ਸਿਬ੍ਬਾਪੇਤਿ ਵਾ, ਆਪਤ੍ਤਿ ਪਾਚਿਤ੍ਤਿਯਸ੍ਸ.

ਏਕਤੋਉਪਸਮ੍ਪਨ੍ਨਾਯ ਚੀਵਰਂ ਸਿਬ੍ਬਤਿ ਵਾ ਸਿਬ੍ਬਾਪੇਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਿਕਾਯ ਅਞ੍ਞਾਤਿਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਿਕਾਯ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਿਕਾਯ ਞਾਤਿਕਸਞ੍ਞੀ, ਅਨਾਪਤ੍ਤਿ.

੧੭੯. ਅਨਾਪਤ੍ਤਿ ਞਾਤਿਕਾਯ, ਚੀਵਰਂ ਠਪੇਤ੍ਵਾ ਅਞ੍ਞਂ ਪਰਿਕ੍ਖਾਰਂ ਸਿਬ੍ਬਤਿ ਵਾ ਸਿਬ੍ਬਾਪੇਤਿ ਵਾ, ਸਿਕ੍ਖਮਾਨਾਯ, ਸਾਮਣੇਰਿਯਾ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਚੀਵਰਸਿਬ੍ਬਨਸਿਕ੍ਖਾਪਦਂ ਨਿਟ੍ਠਿਤਂ ਛਟ੍ਠਂ.