੨੩੪. ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁ

੩੮੦. ਤੇਨ ਸਮਯੇਨ ਬੁਦ੍ਧੋ ਭਗਵਾ ਚਮ੍ਪਾਯਂ ਵਿਹਰਤਿ ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇ. ਤੇਨ ਖੋ ਪਨ ਸਮਯੇਨ ਕਾਸੀਸੁ ਜਨਪਦੇ ਵਾਸਭਗਾਮੋ ਨਾਮ ਹੋਤਿ. ਤਤ੍ਥ ਕਸ੍ਸਪਗੋਤ੍ਤੋ ਨਾਮ ਭਿਕ੍ਖੁ ਆਵਾਸਿਕੋ ਹੋਤਿ ਤਨ੍ਤਿਬਦ੍ਧੋ ਉਸ੍ਸੁਕ੍ਕਂ ਆਪਨ੍ਨੋ – ਕਿਨ੍ਤਿ ਅਨਾਗਤਾ ਚ ਪੇਸਲਾ ਭਿਕ੍ਖੂ ਆਗਚ੍ਛੇਯ੍ਯੁਂ, ਆਗਤਾ ਚ ਪੇਸਲਾ ਭਿਕ੍ਖੂ ਫਾਸੁ ਵਿਹਰੇਯ੍ਯੁਂ, ਅਯਞ੍ਚ ਆਵਾਸੋ ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜੇਯ੍ਯਾਤਿ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਕਾਸੀਸੁ ਚਾਰਿਕਂ ਚਰਮਾਨਾ ਯੇਨ ਵਾਸਭਗਾਮੋ ਤਦਵਸਰੁਂ. ਅਦ੍ਦਸਾ ਖੋ ਕਸ੍ਸਪਗੋਤ੍ਤੋ ਭਿਕ੍ਖੁ ਤੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਆਸਨਂ ਪਞ੍ਞਪੇਸਿ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸਿ, ਪਾਨੀਯੇਨ ਆਪੁਚ੍ਛਿ, ਨਹਾਨੇ ਉਸ੍ਸੁਕ੍ਕਂ ਅਕਾਸਿ, ਉਸ੍ਸੁਕ੍ਕਮ੍ਪਿ ਅਕਾਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਭਦ੍ਦਕੋ ਖੋ ਅਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਕਰੋਤਿ, ਉਸ੍ਸੁਕ੍ਕਮ੍ਪਿ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਹਨ੍ਦ, ਮਯਂ, ਆਵੁਸੋ, ਇਧੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਮਾ’’ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਤਤ੍ਥੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਸੁਂ.

ਅਥ ਖੋ ਕਸ੍ਸਪਗੋਤ੍ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਯੋ ਖੋ ਇਮੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਕਿਲਮਥੋ ਸੋ ਪਟਿਪ੍ਪਸ੍ਸਦ੍ਧੋ. ਯੇਪਿਮੇ ਗੋਚਰੇ ਅਪ੍ਪਕਤਞ੍ਞੁਨੋ ਤੇਦਾਨਿਮੇ ਗੋਚਰੇ ਪਕਤਞ੍ਞੁਨੋ. ਦੁਕ੍ਕਰਂ ਖੋ ਪਨ ਪਰਕੁਲੇਸੁ ਯਾਵਜੀਵਂ ਉਸ੍ਸੁਕ੍ਕਂ ਕਾਤੁਂ, ਵਿਞ੍ਞਤ੍ਤਿ ਚ ਮਨੁਸ੍ਸਾਨਂ ਅਮਨਾਪਾ. ਯਂਨੂਨਾਹਂ ਨ ਉਸ੍ਸੁਕ੍ਕਂ ਕਰੇਯ੍ਯਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿ’’ਨ੍ਤਿ. ਸੋ ਨ ਉਸ੍ਸੁਕ੍ਕਂ ਅਕਾਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਪੁਬ੍ਬੇ ਖ੍ਵਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਅਕਾਸਿ, ਉਸ੍ਸੁਕ੍ਕਮ੍ਪਿ ਅਕਾਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਾਯਂ ਨ ਉਸ੍ਸੁਕ੍ਕਂ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਦੁਟ੍ਠੋਦਾਨਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ. ਹਨ੍ਦ, ਮਯਂ, ਆਵੁਸੋ, ਆਵਾਸਿਕਂ [ਇਮਂ ਆਵਾਸਿਕਂ (ਸ੍ਯਾ.)] ਭਿਕ੍ਖੁਂ ਉਕ੍ਖਿਪਾਮਾ’’ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਸਨ੍ਨਿਪਤਿਤ੍ਵਾ ਕਸ੍ਸਪਗੋਤ੍ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਪੁਬ੍ਬੇ ਖੋ ਤ੍ਵਂ, ਆਵੁਸੋ, ਨਹਾਨੇ ਉਸ੍ਸੁਕ੍ਕਂ ਕਰੋਸਿ, ਉਸ੍ਸੁਕ੍ਕਮ੍ਪਿ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਿ ਤ੍ਵਂ ਨ ਉਸ੍ਸੁਕ੍ਕਂ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ. ਪਸ੍ਸਸੇਤਂ ਆਪਤ੍ਤਿ’’ਨ੍ਤਿ? ‘‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ, ਯਮਹਂ ਪਸ੍ਸੇਯ੍ਯ’’ਨ੍ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਕਸ੍ਸਪਗੋਤ੍ਤਂ ਭਿਕ੍ਖੁਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ.

ਅਥ ਖੋ ਕਸ੍ਸਪਗੋਤ੍ਤਸ੍ਸ ਭਿਕ੍ਖੁਨੋ ਏਤਦਹੋਸਿ – ‘‘ਅਹਂ ਖੋ ਏਤਂ ਨ ਜਾਨਾਮਿ ‘ਆਪਤ੍ਤਿ ਵਾ ਏਸਾ ਅਨਾਪਤ੍ਤਿ ਵਾ, ਆਪਨ੍ਨੋ ਚਮ੍ਹਿ [ਵਮ੍ਹਿ (?)] ਅਨਾਪਨ੍ਨੋ ਵਾ, ਉਕ੍ਖਿਤ੍ਤੋ ਚਮ੍ਹਿ ਅਨੁਕ੍ਖਿਤ੍ਤੋ ਵਾ, ਧਮ੍ਮਿਕੇਨ ਵਾ ਅਧਮ੍ਮਿਕੇਨ ਵਾ, ਕੁਪ੍ਪੇਨ ਵਾ ਅਕੁਪ੍ਪੇਨ ਵਾ, ਠਾਨਾਰਹੇਨ ਵਾ ਅਟ੍ਠਾਨਾਰਹੇਨ ਵਾ’. ਯਂਨੂਨਾਹਂ ਚਮ੍ਪਂ ਗਨ੍ਤ੍ਵਾ ਭਗਵਨ੍ਤਂ ਏਤਮਤ੍ਥਂ ਪੁਚ੍ਛੇਯ੍ਯ’’ਨ੍ਤਿ. ਅਥ ਖੋ ਕਸ੍ਸਪਗੋਤ੍ਤੋ ਭਿਕ੍ਖੁ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਚਮ੍ਪਾ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਚਮ੍ਪਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਕਸ੍ਸਪਗੋਤ੍ਤਂ ਭਿਕ੍ਖੁਂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖੁ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤੋ, ਕੁਤੋ ਚ ਤ੍ਵਂ, ਭਿਕ੍ਖੁ, ਆਗਚ੍ਛਸੀ’’ਤਿ? ‘‘ਖਮਨੀਯਂ, ਭਗਵਾ; ਯਾਪਨੀਯਂ, ਭਗਵਾ; ਅਪ੍ਪਕਿਲਮਥੇਨ ਚਾਹਂ, ਭਨ੍ਤੇ, ਅਦ੍ਧਾਨਂ ਆਗਤੋ. ਅਤ੍ਥਿ, ਭਨ੍ਤੇ, ਕਾਸੀਸੁ ਜਨਪਦੇ ਵਾਸਭਗਾਮੋ ਨਾਮ. ਤਤ੍ਥਾਹਂ, ਭਗਵਾ, ਆਵਾਸਿਕੋ ਤਨ੍ਤਿਬਦ੍ਧੋ ਉਸ੍ਸੁਕ੍ਕਂ ਆਪਨ੍ਨੋ – ‘ਕਿਨ੍ਤਿ ਅਨਾਗਤਾ ਚ ਪੇਸਲਾ ਭਿਕ੍ਖੂ ਆਗਚ੍ਛੇਯ੍ਯੁਂ, ਆਗਤਾ ਚ ਪੇਸਲਾ ਭਿਕ੍ਖੂ ਫਾਸੁ ਵਿਹਰੇਯ੍ਯੁਂ, ਅਯਞ੍ਚ ਆਵਾਸੋ ਵੁਦ੍ਧਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜੇਯ੍ਯਾ’ਤਿ. ਅਥ ਖੋ, ਭਨ੍ਤੇ, ਸਮ੍ਬਹੁਲਾ ਭਿਕ੍ਖੂ ਕਾਸੀਸੁ ਚਾਰਿਕਂ ਚਰਮਾਨਾ ਯੇਨ ਵਾਸਭਗਾਮੋ ਤਦਵਸਰੁਂ. ਅਦ੍ਦਸਂ ਖੋ ਅਹਂ, ਭਨ੍ਤੇ, ਤੇ ਭਿਕ੍ਖੂ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਆਸਨਂ ਪਞ੍ਞਪੇਸਿਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਸਿਂ, ਪਾਨੀਯੇਨ ਅਪੁਚ੍ਛਿਂ, ਨਹਾਨੇ ਉਸ੍ਸੁਕ੍ਕਂ ਅਕਾਸਿਂ, ਉਸ੍ਸੁਕ੍ਕਮ੍ਪਿ ਅਕਾਸਿਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ, ਭਨ੍ਤੇ, ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘ਭਦ੍ਦਕੋ ਖੋ ਅਯਂ ਆਵੁਸੋ ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਕਰੋਤਿ, ਉਸ੍ਸੁਕ੍ਕਮ੍ਪਿ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਹਨ੍ਦ, ਮਯਂ, ਆਵੁਸੋ, ਇਧੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਮਾ’ਤਿ. ਅਥ ਖੋ ਤੇ, ਭਨ੍ਤੇ, ਆਗਨ੍ਤੁਕਾ ਭਿਕ੍ਖੂ ਤਤ੍ਥੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਸੁਂ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਯੋ ਖੋ ਇਮੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਆਗਨ੍ਤੁਕਕਿਲਮਥੋ ਸੋ ਪਟਿਪ੍ਪਸ੍ਸਦ੍ਧੋ. ਯੇਪਿਮੇ ਗੋਚਰੇ ਅਪ੍ਪਕਤਞ੍ਞੁਨੋ ਤੇਦਾਨਿਮੇ ਗੋਚਰੇ ਪਕਤਞ੍ਞੁਨੋ. ਦੁਕ੍ਕਰਂ ਖੋ ਪਨ ਪਰਕੁਲੇਸੁ ਯਾਵਜੀਵਂ ਉਸ੍ਸੁਕ੍ਕਂ ਕਾਤੁਂ, ਵਿਞ੍ਞਤ੍ਤਿ ਚ ਮਨੁਸ੍ਸਾਨਂ ਅਮਨਾਪਾ. ਯਂਨੂਨਾਹਂ ਨ ਉਸ੍ਸੁਕ੍ਕਂ ਕਰੇਯ੍ਯਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ, ਨ ਉਸ੍ਸੁਕ੍ਕਂ ਅਕਾਸਿਂ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਅਥ ਖੋ ਤੇਸਂ, ਭਨ੍ਤੇ, ਆਗਨ੍ਤੁਕਾਨਂ ਭਿਕ੍ਖੂਨਂ ਏਤਦਹੋਸਿ – ‘ਪੁਬ੍ਬੇ ਖ੍ਵਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ ਨਹਾਨੇ ਉਸ੍ਸੁਕ੍ਕਂ ਕਰੋਤਿ, ਉਸ੍ਸੁਕ੍ਕਮ੍ਪਿ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਾਯਂ ਨ ਉਸ੍ਸੁਕ੍ਕਂ ਕਰੋਤਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਦੁਟ੍ਠੋਦਾਨਾਯਂ, ਆਵੁਸੋ, ਆਵਾਸਿਕੋ ਭਿਕ੍ਖੁ. ਹਨ੍ਦ, ਮਯਂ, ਆਵੁਸੋ, ਆਵਾਸਿਕਂ ਭਿਕ੍ਖੁਂ ਉਕ੍ਖਿਪਾਮਾ’ਤਿ. ਅਥ ਖੋ ਤੇ, ਭਨ੍ਤੇ, ਆਗਨ੍ਤੁਕਾ ਭਿਕ੍ਖੂ ਸਨ੍ਨਿਪਤਿਤ੍ਵਾ ਮਂ ਏਤਦਵੋਚੁਂ – ‘ਪੁਬ੍ਬੇ ਖੋ ਤ੍ਵਂ, ਆਵੁਸੋ, ਨਹਾਨੇ ਉਸ੍ਸੁਕ੍ਕਂ ਕਰੋਸਿ, ਉਸ੍ਸੁਕ੍ਕਮ੍ਪਿ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਸੋਦਾਨਿ ਤ੍ਵਂ ਨ ਉਸ੍ਸੁਕ੍ਕਂ ਕਰੋਸਿ ਯਾਗੁਯਾ ਖਾਦਨੀਯੇ ਭਤ੍ਤਸ੍ਮਿਂ. ਆਪਤ੍ਤਿਂ ਤ੍ਵਂ, ਆਵੁਸੋ, ਆਪਨ੍ਨੋ. ਪਸ੍ਸਸੇਤਂ ਆਪਤ੍ਤਿ’ਨ੍ਤਿ? ‘ਨਤ੍ਥਿ ਮੇ, ਆਵੁਸੋ, ਆਪਤ੍ਤਿ ਯਮਹਂ ਪਸ੍ਸੇਯ੍ਯ’ਨ੍ਤਿ. ਅਥ ਖੋ ਤੇ, ਭਨ੍ਤੇ, ਆਗਨ੍ਤੁਕਾ ਭਿਕ੍ਖੂ ਮਂ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖਿਪਿਂਸੁ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਹਂ ਖੋ ਏਤਂ ਨ ਜਾਨਾਮਿ ‘ਆਪਤ੍ਤਿ ਵਾ ਏਸਾ ਅਨਾਪਤ੍ਤਿ ਵਾ, ਆਪਨ੍ਨੋ ਚਮ੍ਹਿ ਅਨਾਪਨ੍ਨੋ ਵਾ, ਉਕ੍ਖਿਤ੍ਤੋ ਚਮ੍ਹਿ ਅਨੁਕ੍ਖਿਤ੍ਤੋ ਵਾ, ਧਮ੍ਮਿਕੇਨ ਵਾ ਅਧਮ੍ਮਿਕੇਨ ਵਾ, ਕੁਪ੍ਪੇਨ ਵਾ ਅਕੁਪ੍ਪੇਨ ਵਾ, ਠਾਨਾਰਹੇਨ ਵਾ ਅਟ੍ਠਾਨਾਰਹੇਨ ਵਾ’. ਯਂਨੂਨਾਹਂ ਚਮ੍ਪਂ ਗਨ੍ਤ੍ਵਾ ਭਗਵਨ੍ਤਂ ਏਤਮਤ੍ਥਂ ਪੁਚ੍ਛੇਯ੍ਯ’ਨ੍ਤਿ. ਤਤੋ ਅਹਂ, ਭਗਵਾ, ਆਗਚ੍ਛਾਮੀ’’ਤਿ. ‘‘ਅਨਾਪਤ੍ਤਿ ਏਸਾ, ਭਿਕ੍ਖੁ, ਨੇਸਾ ਆਪਤ੍ਤਿ. ਅਨਾਪਨ੍ਨੋਸਿ, ਨਸਿ ਆਪਨ੍ਨੋ. ਅਨੁਕ੍ਖਿਤ੍ਤੋਸਿ, ਨਸਿ ਉਕ੍ਖਿਤ੍ਤੋ. ਅਧਮ੍ਮਿਕੇਨਾਸਿ ਕਮ੍ਮੇਨ ਉਕ੍ਖਿਤ੍ਤੋ ਕੁਪ੍ਪੇਨ ਅਟ੍ਠਾਨਾਰਹੇਨ. ਗਚ੍ਛ ਤ੍ਵਂ, ਭਿਕ੍ਖੁ, ਤਤ੍ਥੇਵ ਵਾਸਭਗਾਮੇ ਨਿਵਾਸਂ ਕਪ੍ਪੇਹੀ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਕਸ੍ਸਪਗੋਤ੍ਤੋ ਭਿਕ੍ਖੁ ਭਗਵਤੋ ਪਟਿਸ੍ਸੁਣਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਯੇਨ ਵਾਸਭਗਾਮੋ ਤੇਨ ਪਕ੍ਕਾਮਿ.

੩੮੧. ਅਥ ਖੋ ਤੇਸਂ ਆਗਨ੍ਤੁਕਾਨਂ ਭਿਕ੍ਖੂਨਂ ਅਹੁਦੇਵ ਕੁਕ੍ਕੁਚ੍ਚਂ, ਅਹੁ ਵਿਪ੍ਪਟਿਸਾਰੋ – ‘‘ਅਲਾਭਾ ਵਤ ਨੋ, ਨ ਵਤ ਨੋ ਲਾਭਾ, ਦੁਲ੍ਲਦ੍ਧਂ ਵਤ ਨੋ, ਨ ਵਤ ਨੋ ਸੁਲਦ੍ਧਂ, ਯੇ ਮਯਂ ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਮ੍ਹਾ. ਹਨ੍ਦ, ਮਯਂ, ਆਵੁਸੋ, ਚਮ੍ਪਂ ਗਨ੍ਤ੍ਵਾ ਭਗਵਤੋ ਸਨ੍ਤਿਕੇ ਅਚ੍ਚਯਂ ਅਚ੍ਚਯਤੋ ਦੇਸੇਮਾ’’ਤਿ. ਅਥ ਖੋ ਤੇ ਆਗਨ੍ਤੁਕਾ ਭਿਕ੍ਖੂ ਸੇਨਾਸਨਂ ਸਂਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਚਮ੍ਪਾ ਤੇਨ ਪਕ੍ਕਮਿਂਸੁ. ਅਨੁਪੁਬ੍ਬੇਨ ਯੇਨ ਚਮ੍ਪਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਤੇ ਭਿਕ੍ਖੂ ਏਤਦਵੋਚ – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ, ਕਚ੍ਚਿ ਯਾਪਨੀਯਂ, ਕਚ੍ਚਿਤ੍ਥ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤਾ, ਕੁਤੋ ਚ ਤੁਮ੍ਹੇ, ਭਿਕ੍ਖਵੇ, ਆਗਚ੍ਛਥਾ’’ਤਿ? ‘‘ਖਮਨੀਯਂ, ਭਗਵਾ; ਯਾਪਨੀਯਂ, ਭਗਵਾ; ਅਪ੍ਪਕਿਲਮਥੇਨ ਚ ਮਯਂ, ਭਨ੍ਤੇ, ਅਦ੍ਧਾਨਂ ਆਗਤਾ. ਅਤ੍ਥਿ, ਭਨ੍ਤੇ, ਕਾਸੀਸੁ ਜਨਪਦੇ ਵਾਸਭਗਾਮੋ ਨਾਮ. ਤਤੋ ਮਯਂ, ਭਗਵਾ, ਆਗਚ੍ਛਾਮਾ’’ਤਿ. ‘‘ਤੁਮ੍ਹੇ, ਭਿਕ੍ਖਵੇ, ਆਵਾਸਿਕਂ ਭਿਕ੍ਖੁਂ ਉਕ੍ਖਿਪਿਤ੍ਥਾ’’ਤਿ? ‘‘ਏਵਂ, ਭਨ੍ਤੇ’’ਤਿ. ‘‘ਕਿਸ੍ਮਿਂ, ਭਿਕ੍ਖਵੇ, ਵਤ੍ਥੁਸ੍ਮਿਂ ਕਾਰਣੇ’’ਤਿ? ‘‘ਅਵਤ੍ਥੁਸ੍ਮਿਂ, ਭਗਵਾ, ਅਕਾਰਣੇ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸਾ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਸ੍ਸਥ. ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ…’’ ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਸੁਦ੍ਧੋ ਭਿਕ੍ਖੁ ਅਨਾਪਤ੍ਤਿਕੋ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਤਬ੍ਬੋ. ਯੋ ਉਕ੍ਖਿਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਅਥ ਖੋ ਤੇ ਭਿਕ੍ਖੂ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਅਚ੍ਚਯੋ ਨੋ, ਭਨ੍ਤੇ, ਅਚ੍ਚਗਮਾ ਯਥਾਬਾਲੇ ਯਥਾਮੂਲ਼੍ਹੇ ਯਥਾਅਕੁਸਲੇ, ਯੇ ਮਯਂ ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਮ੍ਹਾ. ਤੇਸਂ ਨੋ, ਭਨ੍ਤੇ, ਭਗਵਾ ਅਚ੍ਚਯਂ ਅਚ੍ਚਯਤੋ ਪਟਿਗ੍ਗਣ੍ਹਾਤੁ ਆਯਤਿਂ ਸਂਵਰਾਯਾ’’ਤਿ. ‘‘ਤਗ੍ਘ, ਤੁਮ੍ਹੇ, ਭਿਕ੍ਖਵੇ, ਅਚ੍ਚਯੋ ਅਚ੍ਚਗਮਾ ਯਥਾਬਾਲੇ ਯਥਾਮੂਲ਼੍ਹੇ ਯਥਾਅਕੁਸਲੇ, ਯੇ ਤੁਮ੍ਹੇ ਸੁਦ੍ਧਂ ਭਿਕ੍ਖੁਂ ਅਨਾਪਤ੍ਤਿਕਂ ਅਵਤ੍ਥੁਸ੍ਮਿਂ ਅਕਾਰਣੇ ਉਕ੍ਖਿਪਿਤ੍ਥ. ਯਤੋ ਚ ਖੋ ਤੁਮ੍ਹੇ, ਭਿਕ੍ਖਵੇ, ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਥ, ਤਂ ਵੋ ਮਯਂ ਪਟਿਗ੍ਗਣ੍ਹਾਮ. ਵੁਦ੍ਧਿਹੇਸਾ, ਭਿਕ੍ਖਵੇ, ਅਰਿਯਸ੍ਸ ਵਿਨਯੇ ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ [ਆਯਤਿਂ ਚ (ਸੀ.)] ਸਂਵਰਂ ਆਪਜ੍ਜਤੀ’’ਤਿ.

ਕਸ੍ਸਪਗੋਤ੍ਤਭਿਕ੍ਖੁਵਤ੍ਥੁ ਨਿਟ੍ਠਿਤਂ.