੨੩੨. ਅਟ੍ਠਚੀਵਰਮਾਤਿਕਾ

੩੭੯. ਅਟ੍ਠਿਮਾ, ਭਿਕ੍ਖਵੇ, ਮਾਤਿਕਾ ਚੀਵਰਸ੍ਸ ਉਪ੍ਪਾਦਾਯ – ਸੀਮਾਯ ਦੇਤਿ, ਕਤਿਕਾਯ ਦੇਤਿ, ਭਿਕ੍ਖਾਪਞ੍ਞਤ੍ਤਿਯਾ ਦੇਤਿ, ਸਙ੍ਘਸ੍ਸ ਦੇਤਿ, ਉਭਤੋਸਙ੍ਘਸ੍ਸ ਦੇਤਿ, ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤਿ, ਆਦਿਸ੍ਸ ਦੇਤਿ, ਪੁਗ੍ਗਲਸ੍ਸ ਦੇਤਿ.

ਸੀਮਾਯ ਦੇਤਿ – ਯਾਵਤਿਕਾ ਭਿਕ੍ਖੂ ਅਨ੍ਤੋਸੀਮਗਤਾ ਤੇਹਿ ਭਾਜੇਤਬ੍ਬਂ. ਕਤਿਕਾਯ ਦੇਤਿ – ਸਮ੍ਬਹੁਲਾ ਆਵਾਸਾ ਸਮਾਨਲਾਭਾ ਹੋਨ੍ਤਿ ਏਕਸ੍ਮਿਂ ਆਵਾਸੇ ਦਿਨ੍ਨੇ ਸਬ੍ਬਤ੍ਥ ਦਿਨ੍ਨਂ ਹੋਤਿ. ਭਿਕ੍ਖਾਪਞ੍ਞਤ੍ਤਿਯਾ ਦੇਤਿ, ਯਤ੍ਥ ਸਙ੍ਘਸ੍ਸ ਧੁਵਕਾਰਾ ਕਰਿਯ੍ਯਨ੍ਤਿ, ਤਤ੍ਥ ਦੇਤਿ. ਸਙ੍ਘਸ੍ਸ ਦੇਤਿ, ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤਬ੍ਬਂ. ਉਭਤੋਸਙ੍ਘਸ੍ਸ ਦੇਤਿ, ਬਹੁਕਾਪਿ ਭਿਕ੍ਖੂ ਹੋਨ੍ਤਿ, ਏਕਾ ਭਿਕ੍ਖੁਨੀ ਹੋਤਿ, ਉਪਡ੍ਢਂ ਦਾਤਬ੍ਬਂ, ਬਹੁਕਾਪਿ ਭਿਕ੍ਖੁਨਿਯੋ ਹੋਨ੍ਤਿ, ਏਕੋ ਭਿਕ੍ਖੁ ਹੋਤਿ, ਉਪਡ੍ਢਂ ਦਾਤਬ੍ਬਂ. ਵਸ੍ਸਂਵੁਟ੍ਠਸਙ੍ਘਸ੍ਸ ਦੇਤਿ, ਯਾਵਤਿਕਾ ਭਿਕ੍ਖੂ ਤਸ੍ਮਿਂ ਆਵਾਸੇ ਵਸ੍ਸਂਵੁਟ੍ਠਾ, ਤੇਹਿ ਭਾਜੇਤਬ੍ਬਂ. ਆਦਿਸ੍ਸ ਦੇਤਿ, ਯਾਗੁਯਾ ਵਾ ਭਤ੍ਤੇ ਵਾ ਖਾਦਨੀਯੇ ਵਾ ਚੀਵਰੇ ਵਾ ਸੇਨਾਸਨੇ ਵਾ ਭੇਸਜ੍ਜੇ ਵਾ. ਪੁਗ੍ਗਲਸ੍ਸ ਦੇਤਿ, ‘‘ਇਮਂ ਚੀਵਰਂ ਇਤ੍ਥਨ੍ਨਾਮਸ੍ਸ ਦਮ੍ਮੀ’’ਤਿ.

ਅਟ੍ਠਚੀਵਰਮਾਤਿਕਾ ਨਿਟ੍ਠਿਤਾ.

ਚੀਵਰਕ੍ਖਨ੍ਧਕੋ ਅਟ੍ਠਮੋ.