੨੨੪. ਗਿਲਾਨਵਤ੍ਥੁਕਥਾ

੩੬੫. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਕੁਚ੍ਛਿਵਿਕਾਰਾਬਾਧੋ ਹੋਤਿ. ਸੋ ਸਕੇ ਮੁਤ੍ਤਕਰੀਸੇ ਪਲਿਪਨ੍ਨੋ ਸੇਤਿ. ਅਥ ਖੋ ਭਗਵਾ ਆਯਸ੍ਮਤਾ ਆਨਨ੍ਦੇਨ ਪਚ੍ਛਾਸਮਣੇਨ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਯੇਨ ਤਸ੍ਸ ਭਿਕ੍ਖੁਨੋ ਵਿਹਾਰੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਭਗਵਾ ਤਂ ਭਿਕ੍ਖੁਂ ਸਕੇ ਮੁਤ੍ਤਕਰੀਸੇ ਪਲਿਪਨ੍ਨਂ ਸਯਮਾਨਂ, ਦਿਸ੍ਵਾਨ ਯੇਨ ਸੋ ਭਿਕ੍ਖੁ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਕਿਂ ਤੇ, ਭਿਕ੍ਖੁ, ਆਬਾਧੋ’’ਤਿ? ‘‘ਕੁਚ੍ਛਿਵਿਕਾਰੋ ਮੇ, ਭਗਵਾ’’ਤਿ. ‘‘ਅਤ੍ਥਿ ਪਨ ਤੇ, ਭਿਕ੍ਖੁ, ਉਪਟ੍ਠਾਕੋ’’ਤਿ? ‘‘ਨਤ੍ਥਿ, ਭਗਵਾ’’ਤਿ. ‘‘ਕਿਸ੍ਸ ਤਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ? ‘‘ਅਹਂ ਖੋ, ਭਨ੍ਤੇ, ਭਿਕ੍ਖੂਨਂ ਅਕਾਰਕੋ; ਤੇਨ ਮਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਗਚ੍ਛਾਨਨ੍ਦ, ਉਦਕਂ ਆਹਰ, ਇਮਂ ਭਿਕ੍ਖੁਂ ਨਹਾਪੇਸ੍ਸਾਮਾ’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਉਦਕਂ ਆਹਰਿ. ਭਗਵਾ ਉਦਕਂ ਆਸਿਞ੍ਚਿ. ਆਯਸ੍ਮਾ ਆਨਨ੍ਦੋ ਪਰਿਧੋਵਿ. ਭਗਵਾ ਸੀਸਤੋ ਅਗ੍ਗਹੇਸਿ. ਆਯਸ੍ਮਾ ਆਨਨ੍ਦੋ ਪਾਦਤੋ ਉਚ੍ਚਾਰੇਤ੍ਵਾ ਮਞ੍ਚਕੇ ਨਿਪਾਤੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਅਤ੍ਥਿ, ਭਿਕ੍ਖਵੇ, ਅਮੁਕਸ੍ਮਿਂ ਵਿਹਾਰੇ ਭਿਕ੍ਖੁ ਗਿਲਾਨੋ’’ਤਿ? ‘‘ਅਤ੍ਥਿ, ਭਗਵਾ’’ਤਿ. ‘‘ਕਿਂ ਤਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਆਬਾਧੋ’’ਤਿ? ‘‘ਤਸ੍ਸ, ਭਨ੍ਤੇ, ਆਯਸ੍ਮਤੋ ਕੁਚ੍ਛਿਵਿਕਾਰਾਬਾਧੋ’’ਤਿ. ‘‘ਅਤ੍ਥਿ ਪਨ, ਭਿਕ੍ਖਵੇ, ਤਸ੍ਸ ਭਿਕ੍ਖੁਨੋ ਉਪਟ੍ਠਾਕੋ’’ਤਿ? ‘‘ਨਤ੍ਥਿ, ਭਗਵਾ’’ਤਿ. ‘‘ਕਿਸ੍ਸ ਤਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ? ‘‘ਏਸੋ, ਭਨ੍ਤੇ, ਭਿਕ੍ਖੁ ਭਿਕ੍ਖੂਨਂ ਅਕਾਰਕੋ; ਤੇਨ ਤਂ ਭਿਕ੍ਖੂ ਨ ਉਪਟ੍ਠੇਨ੍ਤੀ’’ਤਿ. ‘‘ਨਤ੍ਥਿ ਵੋ, ਭਿਕ੍ਖਵੇ, ਮਾਤਾ, ਨਤ੍ਥਿ ਪਿਤਾ, ਯੇ ਵੋ ਉਪਟ੍ਠਹੇਯ੍ਯੁਂ. ਤੁਮ੍ਹੇ ਚੇ, ਭਿਕ੍ਖਵੇ, ਅਞ੍ਞਮਞ੍ਞਂ ਨ ਉਪਟ੍ਠਹਿਸ੍ਸਥ, ਅਥ ਕੋ ਚਰਹਿ ਉਪਟ੍ਠਹਿਸ੍ਸਤਿ? ਯੋ, ਭਿਕ੍ਖਵੇ, ਮਂ ਉਪਟ੍ਠਹੇਯ੍ਯ ਸੋ ਗਿਲਾਨਂ ਉਪਟ੍ਠਹੇਯ੍ਯ. ਸਚੇ ਉਪਜ੍ਝਾਯੋ ਹੋਤਿ, ਉਪਜ੍ਝਾਯੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਆਚਰਿਯੋ ਹੋਤਿ, ਆਚਰਿਯੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਦ੍ਧਿਵਿਹਾਰਿਕੋ ਹੋਤਿ, ਸਦ੍ਧਿਵਿਹਾਰਿਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਅਨ੍ਤੇਵਾਸਿਕੋ ਹੋਤਿ, ਅਨ੍ਤੇਵਾਸਿਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਮਾਨੁਪਜ੍ਝਾਯਕੋ ਹੋਤਿ, ਸਮਾਨੁਪਜ੍ਝਾਯਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਸਮਾਨਾਚਰਿਯਕੋ ਹੋਤਿ, ਸਮਾਨਾਚਰਿਯਕੇਨ ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬਂ. ਸਚੇ ਨ ਹੋਤਿ ਉਪਜ੍ਝਾਯੋ ਵਾ ਆਚਰਿਯੋ ਵਾ ਸਦ੍ਧਿਵਿਹਾਰਿਕੋ ਵਾ ਅਨ੍ਤੇਵਾਸਿਕੋ ਵਾ ਸਮਾਨੁਪਜ੍ਝਾਯਕੋ ਵਾ ਸਮਾਨਾਚਰਿਯਕੋ ਵਾ ਸਙ੍ਘੇਨ ਉਪਟ੍ਠਾਤਬ੍ਬੋ. ਨੋ ਚੇ ਉਪਟ੍ਠਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ’’.

੩੬੬. ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਦੂਪਟ੍ਠੋ ਹੋਤਿ – ਅਸਪ੍ਪਾਯਕਾਰੀ ਹੋਤਿ, ਸਪ੍ਪਾਯੇ ਮਤ੍ਤਂ ਨ ਜਾਨਾਤਿ, ਭੇਸਜ੍ਜਂ ਨ ਪਟਿਸੇਵਿਤਾ ਹੋਤਿ, ਅਤ੍ਥਕਾਮਸ੍ਸ ਗਿਲਾਨੁਪਟ੍ਠਾਕਸ੍ਸ ਯਥਾਭੂਤਂ ਆਬਾਧਂ ਨਾਵਿਕਤ੍ਤਾ ਹੋਤਿ ‘ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿ, ਪਟਿਕ੍ਕਮਨ੍ਤਂ ਵਾ ਪਟਿਕ੍ਕਮਤੀਤਿ, ਠਿਤਂ ਵਾ ਠਿਤੋ’ਤਿ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਨਧਿਵਾਸਕਜਾਤਿਕੋ ਹੋਤਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਦੂਪਟ੍ਠੋ ਹੋਤਿ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਸੂਪਟ੍ਠੋ ਹੋਤਿ – ਸਪ੍ਪਾਯਕਾਰੀ ਹੋਤਿ, ਸਪ੍ਪਾਯੇ ਮਤ੍ਤਂ ਜਾਨਾਤਿ, ਭੇਸਜ੍ਜਂ ਪਟਿਸੇਵਿਤਾ ਹੋਤਿ, ਅਤ੍ਥਕਾਮਸ੍ਸ ਗਿਲਾਨੁਪਟ੍ਠਾਕਸ੍ਸ ਯਥਾਭੂਤਂ ਆਬਾਧਂ ਆਵਿਕਤ੍ਤਾ ਹੋਤਿ ‘ਅਭਿਕ੍ਕਮਨ੍ਤਂ ਵਾ ਅਭਿਕ੍ਕਮਤੀਤਿ, ਪਟਿਕ੍ਕਮਨ੍ਤਂ ਵਾ ਪਟਿਕ੍ਕਮਤੀਤਿ, ਠਿਤਂ ਵਾ ਠਿਤੋ’ਤਿ, ਉਪ੍ਪਨ੍ਨਾਨਂ ਸਾਰੀਰਿਕਾਨਂ ਵੇਦਨਾਨਂ ਦੁਕ੍ਖਾਨਂ ਤਿਬ੍ਬਾਨਂ ਖਰਾਨਂ ਕਟੁਕਾਨਂ ਅਸਾਤਾਨਂ ਅਮਨਾਪਾਨਂ ਪਾਣਹਰਾਨਂ ਅਧਿਵਾਸਕਜਾਤਿਕੋ ਹੋਤਿ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੋ ਸੂਪਟ੍ਠੋ ਹੋਤਿ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਨਾਲਂ ਗਿਲਾਨਂ ਉਪਟ੍ਠਾਤੁਂ – ਨ ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਨ ਜਾਨਾਤਿ, ਅਸਪ੍ਪਾਯਂ ਉਪਨਾਮੇਤਿ ਸਪ੍ਪਾਯਂ ਅਪਨਾਮੇਤਿ, ਆਮਿਸਨ੍ਤਰੋ ਗਿਲਾਨਂ ਉਪਟ੍ਠਾਤਿ ਨੋ ਮੇਤ੍ਤਚਿਤ੍ਤੋ, ਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਨ ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁਂ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਨਾਲਂ ਗਿਲਾਨਂ ਉਪਟ੍ਠਾਤੁਂ.

ਪਞ੍ਚਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਅਲਂ ਗਿਲਾਨਂ ਉਪਟ੍ਠਾਤੁਂ – ਪਟਿਬਲੋ ਹੋਤਿ ਭੇਸਜ੍ਜਂ ਸਂਵਿਧਾਤੁਂ, ਸਪ੍ਪਾਯਾਸਪ੍ਪਾਯਂ ਜਾਨਾਤਿ, ਅਸਪ੍ਪਾਯਂ ਅਪਨਾਮੇਤਿ ਸਪ੍ਪਾਯਂ ਉਪਨਾਮੇਤਿ, ਮੇਤ੍ਤਚਿਤ੍ਤੋ ਗਿਲਾਨਂ ਉਪਟ੍ਠਾਤਿ ਨੋ ਆਮਿਸਨ੍ਤਰੋ, ਅਜੇਗੁਚ੍ਛੀ ਹੋਤਿ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਖੇਲ਼ਂ ਵਾ ਵਨ੍ਤਂ ਵਾ ਨੀਹਾਤੁਂ, ਪਟਿਬਲੋ ਹੋਤਿ ਗਿਲਾਨਂ ਕਾਲੇਨ ਕਾਲਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤੁਂ ਸਮਾਦਪੇਤੁਂ ਸਮੁਤ੍ਤੇਜੇਤੁਂ ਸਮ੍ਪਹਂਸੇਤੁਂ. ਇਮੇਹਿ ਖੋ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਗਿਲਾਨੁਪਟ੍ਠਾਕੋ ਅਲਂ ਗਿਲਾਨਂ ਉਪਟ੍ਠਾਤੁਨ੍ਤਿ.

ਗਿਲਾਨਵਤ੍ਥੁਕਥਾ ਨਿਟ੍ਠਿਤਾ.