੧੮੩. ਰੋਜਮਲ੍ਲਵਤ੍ਥੁ

੩੦੧. ਅਥ ਖੋ ਭਗਵਾ ਆਪਣੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਕੁਸਿਨਾਰਾ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਅਸ੍ਸੋਸੁਂ ਖੋ ਕੋਸਿਨਾਰਕਾ ਮਲ੍ਲਾ – ‘‘ਭਗਵਾ ਕਿਰ ਕੁਸਿਨਾਰਂ ਆਗਚ੍ਛਤਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹੀ’’ਤਿ. ਤੇ ਸਙ੍ਗਰਂ [ਸਙ੍ਕਰਂ (ਕ.)] ਅਕਂਸੁ – ‘‘ਯੋ ਭਗਵਤੋ ਪਚ੍ਚੁਗ੍ਗਮਨਂ ਨ ਕਰਿਸ੍ਸਤਿ, ਪਞ੍ਚਸਤਾਨਿਸ੍ਸ ਦਣ੍ਡੋ’’ਤਿ. ਤੇਨ ਖੋ ਪਨ ਸਮਯੇਨ ਰੋਜੋ ਮਲ੍ਲੋ ਆਯਸ੍ਮਤੋ ਆਨਨ੍ਦਸ੍ਸ ਸਹਾਯੋ ਹੋਤਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਕੁਸਿਨਾਰਾ ਤਦਵਸਰਿ. ਅਥ ਖੋ ਕੋਸਿਨਾਰਕਾ ਮਲ੍ਲਾ ਭਗਵਤੋ ਪਚ੍ਚੁਗ੍ਗਮਨਂ ਅਕਂਸੁ. ਅਥ ਖੋ ਰੋਜੋ ਮਲ੍ਲੋ ਭਗਵਤੋ ਪਚ੍ਚੁਗ੍ਗਮਨਂ ਕਰਿਤ੍ਵਾ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ ਰੋਜਂ ਮਲ੍ਲਂ ਆਯਸ੍ਮਾ ਆਨਨ੍ਦੋ ਏਤਦਵੋਚ – ‘‘ਉਲ਼ਾਰਂ ਖੋ ਤੇ ਇਦਂ, ਆਵੁਸੋ ਰੋਜ, ਯਂ ਤ੍ਵਂ ਭਗਵਤੋ ਪਚ੍ਚੁਗ੍ਗਮਨਂ ਅਕਾਸੀ’’ਤਿ. ‘‘ਨਾਹਂ, ਭਨ੍ਤੇ ਆਨਨ੍ਦ, ਬਹੁਕਤੋ ਬੁਦ੍ਧੇ ਵਾ ਧਮ੍ਮੇ ਵਾ ਸਙ੍ਘੇ ਵਾ; ਅਪਿ ਚ ਞਾਤੀਹਿ ਸਙ੍ਗਰੋ ਕਤੋ – ‘ਯੋ ਭਗਵਤੋ ਪਚ੍ਚੁਗ੍ਗਮਨਂ ਨ ਕਰਿਸ੍ਸਤਿ, ਪਞ੍ਚਸਤਾਨਿਸ੍ਸ ਦਣ੍ਡੋ’’’ਤਿ; ਸੋ ਖੋ ਅਹਂ, ਭਨ੍ਤੇ ਆਨਨ੍ਦ, ਞਾਤੀਨਂ ਦਣ੍ਡਭਯਾ ਏਵਾਹਂ ਭਗਵਤੋ ਪਚ੍ਚੁਗ੍ਗਮਨਂ ਅਕਾਸਿਨ੍ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਅਨਤ੍ਤਮਨੋ ਅਹੋਸਿ’ ਕਥਞ੍ਹਿ ਨਾਮ ਰੋਜੋ ਮਲ੍ਲੋ ਏਵਂ ਵਕ੍ਖਤੀ’ਤਿ? ਅਥ ਖੋ ਆਯਸ੍ਮਾ ਆਨਨ੍ਦੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਆਨਨ੍ਦੋ ਭਗਵਨ੍ਤਂ ਏਤਦਵੋਚ – ‘‘ਅਯਂ, ਭਨ੍ਤੇ, ਰੋਜੋ ਮਲ੍ਲੋ ਅਭਿਞ੍ਞਾਤੋ ਞਾਤਮਨੁਸ੍ਸੋ. ਮਹਤ੍ਥਿਕੋ ਖੋ ਪਨ ਏਵਰੂਪਾਨਂ ਞਾਤਮਨੁਸ੍ਸਾਨਂ ਇਮਸ੍ਮਿਂ ਧਮ੍ਮਵਿਨਯੇ ਪਸਾਦੋ. ਸਾਧੁ, ਭਨ੍ਤੇ, ਭਗਵਾ ਤਥਾ ਕਰੋਤੁ, ਯਥਾ ਰੋਜੋ ਮਲ੍ਲੋ ਇਮਸ੍ਮਿਂ ਧਮ੍ਮਵਿਨਯੇ ਪਸੀਦੇਯ੍ਯਾ’’ਤਿ. ‘‘ਨ ਖੋ ਤਂ, ਆਨਨ੍ਦ, ਦੁਕ੍ਕਰਂ ਤਥਾਗਤੇਨ, ਯਥਾ ਰੋਜੋ ਮਲ੍ਲੋ ਇਮਸ੍ਮਿਂ ਧਮ੍ਮਵਿਨਯੇ ਪਸੀਦੇਯ੍ਯਾ’’ਤਿ.

ਅਥ ਖੋ ਭਗਵਾ ਰੋਜਂ ਮਲ੍ਲਂ ਮੇਤ੍ਤੇਨ ਚਿਤ੍ਤੇਨ ਫਰਿਤ੍ਵਾ ਉਟ੍ਠਾਯਾਸਨਾ ਵਿਹਾਰਂ ਪਾਵਿਸਿ. ਅਥ ਖੋ ਰੋਜੋ ਮਲ੍ਲੋ ਭਗਵਤੋ ਮੇਤ੍ਤੇਨ ਚਿਤ੍ਤੇਨ ਫੁਟ੍ਠੋ, ਸੇਯ੍ਯਥਾਪਿ ਨਾਮ ਗਾਵਿਂ ਤਰੁਣਵਚ੍ਛੋ, ਏਵਮੇਵ, ਵਿਹਾਰੇਨ ਵਿਹਾਰਂ ਪਰਿਵੇਣੇਨ ਪਰਿਵੇਣਂ ਉਪਸਙ੍ਕਮਿਤ੍ਵਾ ਭਿਕ੍ਖੂ ਪੁਚ੍ਛਤਿ – ‘‘ਕਹਂ ਨੁ ਖੋ, ਭਨ੍ਤੇ, ਏਤਰਹਿ ਸੋ ਭਗਵਾ ਵਿਹਰਤਿ ਅਰਹਂ ਸਮ੍ਮਾਸਮ੍ਬੁਦ੍ਧੋ, ਦਸ੍ਸਨਕਾਮਾ ਹਿ ਮਯਂ ਤਂ ਭਗਵਨ੍ਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧ’’ਨ੍ਤਿ. ‘‘ਏਸਾਵੁਸੋ ਰੋਜ, ਵਿਹਾਰੋ ਸਂਵੁਤਦ੍ਵਾਰੋ, ਤੇਨ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਅਤਰਮਾਨੋ ਆਲ਼ਿਨ੍ਦਂ ਪਵਿਸਿਤ੍ਵਾ ਉਕ੍ਕਾਸਿਤ੍ਵਾ ਅਗ੍ਗਲ਼ਂ ਆਕੋਟੇਹਿ, ਵਿਵਰਿਸ੍ਸਤਿ ਤੇ ਭਗਵਾ ਦ੍ਵਾਰ’’ਨ੍ਤਿ. ਅਥ ਖੋ ਰੋਜੋ ਮਲ੍ਲੋ ਯੇਨ ਸੋ ਵਿਹਾਰੋ ਸਂਵੁਤਦ੍ਵਾਰੋ, ਤੇਨ ਅਪ੍ਪਸਦ੍ਦੋ ਉਪਸਙ੍ਕਮਿਤ੍ਵਾ ਅਤਰਮਾਨੋ ਆਲ਼ਿਨ੍ਦਂ ਪਵਿਸਿਤ੍ਵਾ ਉਕ੍ਕਾਸਿਤ੍ਵਾ ਅਗ੍ਗਲ਼ਂ ਆਕੋਟੇਸਿ. ਵਿਵਰਿ ਭਗਵਾ ਦ੍ਵਾਰਂ. ਅਥ ਖੋ ਰੋਜੋ ਮਲ੍ਲੋ ਵਿਹਾਰਂ ਪਵਿਸਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਰੋਜਸ੍ਸ ਮਲ੍ਲਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਅਯ੍ਯਾ ਮਮਞ੍ਞੇਵ ਪਟਿਗ੍ਗਣ੍ਹੇਯ੍ਯੁਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ, ਨੋ ਅਞ੍ਞੇਸ’’ਨ੍ਤਿ. ‘‘ਯੇਸਂ ਖੋ, ਰੋਜ, ਸੇਕ੍ਖੇਨ ਞਾਣੇਨ ਸੇਕ੍ਖੇਨ ਦਸ੍ਸਨੇਨ ਧਮ੍ਮੋ ਦਿਟ੍ਠੋ ਸੇਯ੍ਯਥਾਪਿ ਤਯਾ, ਤੇਸਮ੍ਪਿ ਏਵਂ ਹੋਤਿ – ‘ਅਹੋ ਨੂਨ ਅਯ੍ਯਾ ਅਮ੍ਹਾਕਞ੍ਞੇਵ ਪਟਿਗ੍ਗਣ੍ਹੇਯ੍ਯੁਂ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਂ, ਨੋ ਅਞ੍ਞੇਸ’ਨ੍ਤਿ. ਤੇਨ ਹਿ, ਰੋਜ, ਤਵ ਚੇਵ ਪਟਿਗ੍ਗਹਿਸ੍ਸਨ੍ਤਿ ਅਞ੍ਞੇਸਞ੍ਚਾ’’ਤਿ.

੩੦੨. ਤੇਨ ਖੋ ਪਨ ਸਮਯੇਨ ਕੁਸਿਨਾਰਾਯਂ ਪਣੀਤਾਨਂ ਭਤ੍ਤਾਨਂ ਭਤ੍ਤਪਟਿਪਾਟਿ ਅਟ੍ਠਿਤਾ ਹੋਤਿ. ਅਥ ਖੋ ਰੋਜਸ੍ਸ ਮਲ੍ਲਸ੍ਸ ਪਟਿਪਾਟਿਂ ਅਲਭਨ੍ਤਸ੍ਸ ਏਤਦਹੋਸਿ – ‘‘ਯਂਨੂਨਾਹਂ ਭਤ੍ਤਗ੍ਗਂ ਓਲੋਕੇਯ੍ਯਂ, ਯਂ ਭਤ੍ਤਗ੍ਗੇ ਨਾਸ੍ਸ, ਤਂ ਪਟਿਯਾਦੇਯ੍ਯ’’ਨ੍ਤਿ. ਅਥ ਖੋ ਰੋਜੋ ਮਲ੍ਲੋ ਭਤ੍ਤਗ੍ਗਂ ਓਲੋਕੇਨ੍ਤੋ ਦ੍ਵੇ ਨਾਦ੍ਦਸ – ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ. ਅਥ ਖੋ ਰੋਜੋ ਮਲ੍ਲੋ ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚ – ‘‘ਇਧ ਮੇ, ਭਨ੍ਤੇ ਆਨਨ੍ਦ, ਪਟਿਪਾਟਿਂ ਅਲਭਨ੍ਤਸ੍ਸ ਏਤਦਹੋਸਿ – ‘ਯਂਨੂਨਾਹਂ ਭਤ੍ਤਗ੍ਗਂ ਓਲੋਕੇਯ੍ਯਂ, ਯਂ ਭਤ੍ਤਗ੍ਗੇ ਨਾਸ੍ਸ, ਤਂ ਪਟਿਯਾਦੇਯ੍ਯ’ਨ੍ਤਿ. ਸੋ ਖੋ ਅਹਂ, ਭਨ੍ਤੇ ਆਨਨ੍ਦ, ਭਤ੍ਤਗ੍ਗਂ ਓਲੋਕੇਨ੍ਤੋ ਦ੍ਵੇ ਨਾਦ੍ਦਸਂ – ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ. ਸਚਾਹਂ, ਭਨ੍ਤੇ ਆਨਨ੍ਦ, ਪਟਿਯਾਦੇਯ੍ਯਂ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ, ਪਟਿਗ੍ਗਣ੍ਹੇਯ੍ਯ ਮੇ ਭਗਵਾ’’ਤਿ? ‘‘ਤੇਨ ਹਿ, ਰੋਜ, ਭਗਵਨ੍ਤਂ ਪਟਿਪੁਚ੍ਛਿਸ੍ਸਾਮੀ’’ਤਿ. ਅਥ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਤੇਨ ਹਾਨਨ੍ਦ, ਪਟਿਯਾਦੇਤੂ’’ਤਿ. ‘‘ਤੇਨ ਹਿ, ਰੋਜ, ਪਟਿਯਾਦੇਹੀ’’ਤਿ. ਅਥ ਖੋ ਰੋਜੋ ਮਲ੍ਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਹੂਤਂ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚ ਪਟਿਯਾਦਾਪੇਤ੍ਵਾ ਭਗਵਤੋ ਉਪਨਾਮੇਸਿ ‘‘ਪਟਿਗ੍ਗਣ੍ਹਾਤੁ ਮੇ, ਭਨ੍ਤੇ, ਭਗਵਾ ਡਾਕਞ੍ਚ ਪਿਟ੍ਠਖਾਦਨੀਯਞ੍ਚਾ’’ਤਿ. ‘‘ਤੇਨ ਹਿ, ਰੋਜ, ਭਿਕ੍ਖੂਨਂ ਦੇਹੀ’’ਤਿ. ਅਥ ਖੋ ਰੋਜੋ ਮਲ੍ਲੋ ਭਿਕ੍ਖੂਨਂ ਦੇਤਿ. ਭਿਕ੍ਖੂ ਕੁਕ੍ਕੁਚ੍ਚਾਯਨ੍ਤਾ ਨ ਪਟਿਗ੍ਗਣ੍ਹਨ੍ਤਿ. ‘‘ਪਟਿਗ੍ਗਣ੍ਹਥ, ਭਿਕ੍ਖਵੇ, ਪਰਿਭੁਞ੍ਜਥਾ’’ਤਿ. ਅਥ ਖੋ ਰੋਜੋ ਮਲ੍ਲੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਹੂਤੇਹਿ ਡਾਕੇਹਿ ਚ ਪਿਟ੍ਠਖਾਦਨੀਯੇਹਿ ਚ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਧੋਤਹਤ੍ਥਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਰੋਜਂ ਮਲ੍ਲਂ ਭਗਵਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਞ੍ਚ ਡਾਕਂ ਸਬ੍ਬਞ੍ਚ ਪਿਟ੍ਠਖਾਦਨੀਯ’’ਨ੍ਤਿ.

ਰੋਜਮਲ੍ਲਵਤ੍ਥੁ ਨਿਟ੍ਠਿਤਂ.