੧੮੦. ਮੇਣ੍ਡਕਗਹਪਤਿਵਤ੍ਥੁ

੨੯੬. ਤੇਨ ਖੋ ਪਨ ਸਮਯੇਨ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ. ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਤਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਤਿ. ਭਰਿਯਾਯ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕਂਯੇਵ ਆਲ਼੍ਹਕਥਾਲਿਕਂ ਉਪਨਿਸੀਦਿਤ੍ਵਾ ਏਕਞ੍ਚ ਸੂਪਭਿਞ੍ਜਨਕਂ [ਸੂਪਭਿਞ੍ਜਰਕਂ (ਸੀ.)] ਦਾਸਕਮ੍ਮਕਰਪੋਰਿਸਂ ਭਤ੍ਤੇਨ ਪਰਿਵਿਸਤਿ, ਨ ਤਾਵ ਤਂ ਖਿਯ੍ਯਤਿ [ਖੀਯਤਿ (ਸੀ. ਸ੍ਯਾ.)] ਯਾਵ ਸਾ ਨ ਵੁਟ੍ਠਾਤਿ. ਪੁਤ੍ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕਂਯੇਵ ਸਹਸ੍ਸਥਵਿਕਂ ਗਹੇਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਵੇਤਨਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵਸ੍ਸ ਹਤ੍ਥਗਤਾ. ਸੁਣਿਸਾਯ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕਂਯੇਵ ਚਤੁਦੋਣਿਕਂ ਪਿਟਕਂ ਉਪਨਿਸੀਦਿਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਭਤ੍ਤਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ ਹੋਤਿ – ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤਿ.

ਅਸ੍ਸੋਸਿ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ – ‘‘ਅਮ੍ਹਾਕਂ ਕਿਰ ਵਿਜਿਤੇ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ. ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਤਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਤਿ. ਭਰਿਯਾਯ ਏਵਰੂਪੋ ਇਦ੍ਧਾਨੁਭਾਵੋ – ਏਕਂਯੇਵ ਆਲ਼੍ਹਕਥਾਲਿਕਂ ਉਪਨਿਸੀਦਿਤ੍ਵਾ ਏਕਞ੍ਚ ਸੂਪਭਿਞ੍ਜਨਕਂ ਦਾਸਕਮ੍ਮਕਰਪੋਰਿਸਂ ਭਤ੍ਤੇਨ ਪਰਿਵਿਸਤਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ਪੁਤ੍ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਏਕਂਯੇਵ ਸਹਸ੍ਸਥਵਿਕਂ ਗਹੇਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਵੇਤਨਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵਸ੍ਸ ਹਤ੍ਥਗਤਾ. ਸੁਣਿਸਾਯ ਏਵਰੂਪੋ ਇਦ੍ਧਾਨੁਭਾਵੋ – ਏਕਂਯੇਵ ਚਤੁਦੋਣਿਕਂ ਪਿਟਕਂ ਉਪਨਿਸੀਦਿਤ੍ਵਾ ਦਾਸਕਮ੍ਮਕਰਪੋਰਿਸਸ੍ਸ ਛਮਾਸਿਕਂ ਭਤ੍ਤਂ ਦੇਤਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤੀ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਅਞ੍ਞਤਰਂ ਸਬ੍ਬਤ੍ਥਕਂ ਮਹਾਮਤ੍ਤਂ ਆਮਨ੍ਤੇਸਿ – ‘‘ਅਮ੍ਹਾਕਂ ਕਿਰ, ਭਣੇ, ਵਿਜਿਤੇ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ. ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ – ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਤਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਤਿ. ਭਰਿਯਾਯ…ਪੇ… ਪੁਤ੍ਤਸ੍ਸ… ਸੁਣਿਸਾਯ… ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ, ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤੀਤਿ. ਗਚ੍ਛ, ਭਣੇ, ਜਾਨਾਹਿ. ਯਥਾ ਮਯਾ ਸਾਮਂ ਦਿਟ੍ਠੋ, ਏਵਂ ਤਵ ਦਿਟ੍ਠੋ ਭਵਿਸ੍ਸਤੀ’’ਤਿ.

੨੯੭. ਏਵਂ, ਦੇਵਾਤਿ ਖੋ ਸੋ ਮਹਾਮਤ੍ਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਣਿਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਯੇਨ ਭਦ੍ਦਿਯਂ ਤੇਨ ਪਾਯਾਸਿ. ਅਨੁਪੁਬ੍ਬੇਨ ਯੇਨ ਭਦ੍ਦਿਯਂ ਯੇਨ ਮੇਣ੍ਡਕੋ ਗਹਪਤਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮੇਣ੍ਡਕਂ ਗਹਪਤਿਂ ਏਤਦਵੋਚ – ‘‘ਅਹਞ੍ਹਿ, ਗਹਪਤਿ, ਰਞ੍ਞਾ ਆਣਤ੍ਤੋ ‘ਅਮ੍ਹਾਕਂ ਕਿਰ, ਭਣੇ, ਵਿਜਿਤੇ ਭਦ੍ਦਿਯਨਗਰੇ ਮੇਣ੍ਡਕੋ ਗਹਪਤਿ ਪਟਿਵਸਤਿ, ਤਸ੍ਸ ਏਵਰੂਪੋ ਇਦ੍ਧਾਨੁਭਾਵੋ, ਸੀਸਂ ਨਹਾਯਿਤ੍ਵਾ…ਪੇ… ਭਰਿਯਾਯ… ਪੁਤ੍ਤਸ੍ਸ… ਸੁਣਿਸਾਯ… ਦਾਸਸ੍ਸ ਏਵਰੂਪੋ ਇਦ੍ਧਾਨੁਭਾਵੋ, ਏਕੇਨ ਨਙ੍ਗਲੇਨ ਕਸਨ੍ਤਸ੍ਸ ਸਤ੍ਤ ਸੀਤਾਯੋ ਗਚ੍ਛਨ੍ਤੀ’ਤਿ, ਗਚ੍ਛ, ਭਣੇ, ਜਾਨਾਹਿ. ਯਥਾ ਮਯਾ ਸਾਮਂ ਦਿਟ੍ਠੋ, ਏਵਂ ਤਵ ਦਿਟ੍ਠੋ ਭਵਿਸ੍ਸਤੀ’ਤਿ. ਪਸ੍ਸਾਮ ਤੇ, ਗਹਪਤਿ, ਇਦ੍ਧਾਨੁਭਾਵ’’ਨ੍ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਸੀਸਂ ਨਹਾਯਿਤ੍ਵਾ ਧਞ੍ਞਾਗਾਰਂ ਸਮ੍ਮਜ੍ਜਾਪੇਤ੍ਵਾ ਬਹਿਦ੍ਵਾਰੇ ਨਿਸੀਦਿ, ਅਨ੍ਤਲਿਕ੍ਖਾ ਧਞ੍ਞਸ੍ਸ ਧਾਰਾ ਓਪਤਿਤ੍ਵਾ ਧਞ੍ਞਾਗਾਰਂ ਪੂਰੇਸਿ. ‘‘ਦਿਟ੍ਠੋ ਤੇ, ਗਹਪਤਿ, ਇਦ੍ਧਾਨੁਭਾਵੋ. ਭਰਿਯਾਯ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਭਰਿਯਂ ਆਣਾਪੇਸਿ – ‘‘ਤੇਨ ਹਿ ਚਤੁਰਙ੍ਗਿਨਿਂ ਸੇਨਂ ਭਤ੍ਤੇਨ ਪਰਿਵਿਸਾ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਭਰਿਯਾ ਏਕਂਯੇਵ ਆਲ਼੍ਹਕਥਾਲਿਕਂ ਉਪਨਿਸੀਦਿਤ੍ਵਾ ਏਕਞ੍ਚ ਸੂਪਭਿਞ੍ਜਨਕਂ ਚਤੁਰਙ੍ਗਿਨਿਂ ਸੇਨਂ ਭਤ੍ਤੇਨ ਪਰਿਵਿਸਿ, ਨ ਤਾਵ ਤਂ ਖਿਯ੍ਯਤਿ, ਯਾਵ ਸਾ ਨ ਵੁਟ੍ਠਾਤਿ. ‘‘ਦਿਟ੍ਠੋ ਤੇ, ਗਹਪਤਿ, ਭਰਿਯਾਯਪਿ ਇਦ੍ਧਾਨੁਭਾਵੋ. ਪੁਤ੍ਤਸ੍ਸ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਪੁਤ੍ਤਂ ਆਣਾਪੇਸਿ – ‘‘ਤੇਨ ਹਿ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਵੇਤਨਂ ਦੇਹੀ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਪੁਤ੍ਤੋ ਏਕਂਯੇਵ ਸਹਸ੍ਸਥਵਿਕਂ ਗਹੇਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਵੇਤਨਂ ਅਦਾਸਿ, ਨ ਤਾਵ ਤਂ ਖਿਯ੍ਯਤਿ, ਯਾਵਸ੍ਸ ਹਤ੍ਥਗਤਾ. ‘‘ਦਿਟ੍ਠੋ ਤੇ, ਗਹਪਤਿ, ਪੁਤ੍ਤਸ੍ਸਪਿ ਇਦ੍ਧਾਨੁਭਾਵੋ. ਸੁਣਿਸਾਯ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਸੁਣਿਸਂ ਆਣਾਪੇਸਿ – ‘‘ਤੇਨ ਹਿ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਭਤ੍ਤਂ ਦੇਹੀ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਸੁਣਿਸਾ ਏਕਂਯੇਵ ਚਤੁਦੋਣਿਕਂ ਪਿਟਕਂ ਉਪਨਿਸੀਦਿਤ੍ਵਾ ਚਤੁਰਙ੍ਗਿਨਿਯਾ ਸੇਨਾਯ ਛਮਾਸਿਕਂ ਭਤ੍ਤਂ ਅਦਾਸਿ, ਨ ਤਾਵ ਤਂ ਖਿਯ੍ਯਤਿ ਯਾਵ ਸਾ ਨ ਵੁਟ੍ਠਾਤਿ. ‘‘ਦਿਟ੍ਠੋ ਤੇ, ਗਹਪਤਿ, ਸੁਣਿਸਾਯਪਿ ਇਦ੍ਧਾਨੁਭਾਵੋ. ਦਾਸਸ੍ਸ ਤੇ ਇਦ੍ਧਾਨੁਭਾਵਂ ਪਸ੍ਸਿਸ੍ਸਾਮਾ’’ਤਿ. ‘‘ਮਯ੍ਹਂ ਖੋ, ਸਾਮਿ, ਦਾਸਸ੍ਸ ਇਦ੍ਧਾਨੁਭਾਵੋ ਖੇਤ੍ਤੇ ਪਸ੍ਸਿਤਬ੍ਬੋ’’ਤਿ. ‘‘ਅਲਂ, ਗਹਪਤਿ, ਦਿਟ੍ਠੋ ਤੇ ਦਾਸਸ੍ਸਪਿ ਇਦ੍ਧਾਨੁਭਾਵੋ’’ਤਿ. ਅਥ ਖੋ ਸੋ ਮਹਾਮਤ੍ਤੋ ਚਤੁਰਙ੍ਗਿਨਿਯਾ ਸੇਨਾਯ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ. ਯੇਨ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸਿ.

੨੯੮. ਅਥ ਖੋ ਭਗਵਾ ਵੇਸਾਲਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਭਦ੍ਦਿਯਂ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਡ੍ਢਤੇਲਸੇਹਿ ਭਿਕ੍ਖੁਸਤੇਹਿ. ਅਥ ਖੋ ਭਗਵਾ ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਭਦ੍ਦਿਯਂ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਭਦ੍ਦਿਯੇ ਵਿਹਰਤਿ ਜਾਤਿਯਾ ਵਨੇ. ਅਸ੍ਸੋਸਿ ਖੋ ਮੇਣ੍ਡਕੋ ਗਹਪਤਿ – ‘‘ਸਮਣੋ ਖਲੁ ਭੋ ਗੋਤਮੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਭਦ੍ਦਿਯਂ ਅਨੁਪ੍ਪਤ੍ਤੋ ਭਦ੍ਦਿਯੇ ਵਿਹਰਤਿ ਜਾਤਿਯਾ ਵਨੇ. ਤਂ ਖੋ ਪਨ ਭਗਵਨ੍ਤਂ ਗੋਤਮਂ ਏਵਂ ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਤੋ – ‘ਇਤਿਪਿ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਵਿਜ੍ਜਾਚਰਣਸਮ੍ਪਨ੍ਨੋ ਸੁਗਤੋ ਲੋਕਵਿਦੂ ਅਨੁਤ੍ਤਰੋ ਪੁਰਿਸਦਮ੍ਮਸਾਰਥਿ ਸਤ੍ਥਾ ਦੇਵਮਨੁਸ੍ਸਾਨਂ ਬੁਦ੍ਧੋ ਭਗਵਾ’ [ਭਗਵਾਤਿ (ਕ.)]. ਸੋ ਇਮਂ ਲੋਕਂ ਸਦੇਵਕਂ ਸਮਾਰਕਂ ਸਬ੍ਰਹ੍ਮਕਂ ਸਸ੍ਸਮਣਬ੍ਰਾਹ੍ਮਣਿਂ ਪਜਂ ਸਦੇਵਮਨੁਸ੍ਸਂ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਪਵੇਦੇਤਿ. ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ. ਸਾਧੁ ਖੋ ਪਨ ਤਥਾਰੂਪਾਨਂ ਅਰਹਤਂ ਦਸ੍ਸਨਂ ਹੋਤੀ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਭਦ੍ਰਾਨਿ ਭਦ੍ਰਾਨਿ ਯਾਨਾਨਿ ਯੋਜਾਪੇਤ੍ਵਾ ਭਦ੍ਰਂ ਭਦ੍ਰਂ ਯਾਨਂ ਅਭਿਰੁਹਿਤ੍ਵਾ ਭਦ੍ਰੇਹਿ ਭਦ੍ਰੇਹਿ ਯਾਨੇਹਿ ਭਦ੍ਦਿਯਾ ਨਿਯ੍ਯਾਸਿ ਭਗਵਨ੍ਤਂ ਦਸ੍ਸਨਾਯ. ਅਦ੍ਦਸਂਸੁ ਖੋ ਸਮ੍ਬਹੁਲਾ ਤਿਤ੍ਥਿਯਾ ਮੇਣ੍ਡਕਂ ਗਹਪਤਿਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਮੇਣ੍ਡਕਂ ਗਹਪਤਿਂ ਏਤਦਵੋਚੁਂ – ‘‘ਕਹਂ ਤ੍ਵਂ, ਗਹਪਤਿ, ਗਚ੍ਛਸੀ’’ਤਿ? ‘‘ਗਚ੍ਛਾਮਹਂ, ਭਨ੍ਤੇ, ਭਗਵਨ੍ਤਂ [ਇਦਂ ਪਦਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ] ਸਮਣਂ ਗੋਤਮਂ ਦਸ੍ਸਨਾਯਾ’’ਤਿ. ‘‘ਕਿਂ ਪਨ ਤ੍ਵਂ, ਗਹਪਤਿ, ਕਿਰਿਯਵਾਦੋ ਸਮਾਨੋ ਅਕਿਰਿਯਵਾਦਂ ਸਮਣਂ ਗੋਤਮਂ ਦਸ੍ਸਨਾਯ ਉਪਸਙ੍ਕਮਿਸ੍ਸਸਿ? ਸਮਣੋ ਹਿ, ਗਹਪਤਿ, ਗੋਤਮੋ ਅਕਿਰਿਯਵਾਦੋ ਅਕਿਰਿਯਾਯ ਧਮ੍ਮਂ ਦੇਸੇਤਿ, ਤੇਨ ਚ ਸਾਵਕੇ ਵਿਨੇਤੀ’’ਤਿ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਏਤਦਹੋਸਿ – ‘‘ਨਿਸ੍ਸਂਸਯਂ, ਖੋ ਸੋ ਭਗਵਾ ਅਰਹਂ ਸਮ੍ਮਾਸਮ੍ਬੁਦ੍ਧੋ ਭਵਿਸ੍ਸਤਿ, ਯਥਯਿਮੇ ਤਿਤ੍ਥਿਯਾ ਉਸੂਯਨ੍ਤੀ’’ਤਿ. ਯਾਵਤਿਕਾ ਯਾਨਸ੍ਸ ਭੂਮਿ, ਯਾਨੇਨ ਗਨ੍ਤ੍ਵਾ ਯਾਨਾ ਪਚ੍ਚੋਰੋਹਿਤ੍ਵਾ ਪਤ੍ਤਿਕੋਵ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯੋ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤਂ. ਅਧਿਵਾਸੇਤੁ ਚ ਮੇ, ਭਨ੍ਤੇ, ਭਗਵਾ ਸ੍ਵਾਤਨਾਯ ਭਤ੍ਤਂ ਸਦ੍ਧਿਂ ਭਿਕ੍ਖੁਸਙ੍ਘੇਨਾ’’ਤਿ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਅਥ ਖੋ ਮੇਣ੍ਡਕੋ ਗਹਪਤਿ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

ਅਥ ਖੋ ਮੇਣ੍ਡਕੋ ਗਹਪਤਿ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਪਣੀਤਂ ਖਾਦਨੀਯਂ ਭੋਜਨੀਯਂ ਪਟਿਯਾਦਾਪੇਤ੍ਵਾ ਭਗਵਤੋ ਕਾਲਂ ਆਰੋਚਾਪੇਸਿ – ‘‘ਕਾਲੋ, ਭਨ੍ਤੇ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ਅਥ ਖੋ ਭਗਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਯੇਨ ਮੇਣ੍ਡਕਸ੍ਸ ਗਹਪਤਿਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ ਸਦ੍ਧਿਂ ਭਿਕ੍ਖੁਸਙ੍ਘੇਨ. ਅਥ ਖੋ ਮੇਣ੍ਡਕਸ੍ਸ ਗਹਪਤਿਸ੍ਸ ਭਰਿਯਾ ਚ ਪੁਤ੍ਤੋ ਚ ਸੁਣਿਸਾ ਚ ਦਾਸੋ ਚ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ. ਤੇਸਂ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ – ਦਾਨਕਥਂ…ਪੇ… ਅਪਰਪ੍ਪਚ੍ਚਯਾ ਸਤ੍ਥੁਸਾਸਨੇ ਭਗਵਨ੍ਤਂ ਏਤਦਵੋਚੁਂ – ‘‘ਅਭਿਕ੍ਕਨ੍ਤਂ, ਭਨ੍ਤੇ…ਪੇ… ਏਤੇ ਮਯਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ. ਉਪਾਸਕੇ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ਤਿ. ਅਥ ਖੋ ਮੇਣ੍ਡਕੋ ਗਹਪਤਿ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਸਹਤ੍ਥਾ ਸਨ੍ਤਪ੍ਪੇਤ੍ਵਾ ਸਮ੍ਪਵਾਰੇਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਮੇਣ੍ਡਕੋ ਗਹਪਤਿ ਭਗਵਨ੍ਤਂ ਏਤਦਵੋਚ – ‘‘ਯਾਵ, ਭਨ੍ਤੇ, ਭਗਵਾ ਭਦ੍ਦਿਯੇ ਵਿਹਰਤਿ ਤਾਵ ਅਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਧੁਵਭਤ੍ਤੇਨਾ’’ਤਿ. ਅਥ ਖੋ ਭਗਵਾ ਮੇਣ੍ਡਕਂ ਗਹਪਤਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਤ੍ਵਾ ਸਮਾਦਪੇਤ੍ਵਾ ਸਮੁਤ੍ਤੇਜੇਤ੍ਵਾ ਸਮ੍ਪਹਂਸੇਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ.

ਮੇਣ੍ਡਕਗਹਪਤਿਵਤ੍ਥ ਨਿਟ੍ਠਿਤਂ.