੧੪੪. ਭਣ੍ਡਨਕਾਰਕਵਤ੍ਥੁ

੨੪੦. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਿਂਸੁ. ਤੇਸਂ ਸਾਮਨ੍ਤਾ ਅਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਵਸ੍ਸਂ ਉਪਗਚ੍ਛਿਂਸੁ – ਮਯਂ ਤੇਸਂ ਭਿਕ੍ਖੂਨਂ ਵਸ੍ਸਂਵੁਟ੍ਠਾਨਂ ਪਵਾਰਣਾਯ ਪਵਾਰਣਂ ਠਪੇਸ੍ਸਾਮਾਤਿ. ਅਸ੍ਸੋਸੁਂ ਖੋ ਤੇ ਭਿਕ੍ਖੂ – ‘‘ਅਮ੍ਹਾਕਂ ਕਿਰ ਸਾਮਨ੍ਤਾ ਅਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਵਸ੍ਸਂ ਉਪਗਤਾ – ਮਯਂ ਤੇਸਂ ਭਿਕ੍ਖੂਨਂ ਵਸ੍ਸਂਵੁਟ੍ਠਾਨਂ ਪਵਾਰਣਾਯ ਪਵਾਰਣਂ ਠਪੇਸ੍ਸਾਮਾ’’ਤਿ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਨ੍ਤਿ. ਤੇਸਂ ਸਾਮਨ੍ਤਾ ਅਞ੍ਞੇ ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਵਸ੍ਸਂ ਉਪਗਚ੍ਛਨ੍ਤਿ – ਮਯਂ ਤੇਸਂ ਭਿਕ੍ਖੂਨਂ ਵਸ੍ਸਂਵੁਟ੍ਠਾਨਂ ਪਵਾਰਣਾਯ ਪਵਾਰਣਂ ਠਪੇਸ੍ਸਾਮਾਤਿ. ਅਨੁਜਾਨਾਮਿ, ਭਿਕ੍ਖਵੇ, ਤੇਹਿ ਭਿਕ੍ਖੂਹਿ ਦ੍ਵੇ ਤਯੋ ਉਪੋਸਥੇ ਚਾਤੁਦ੍ਦਸਿਕੇ ਕਾਤੁਂ – ਕਥਂ ਮਯਂ ਤੇਹਿ ਭਿਕ੍ਖੂਹਿ ਪਠਮਤਰਂ ਪਵਾਰੇਯ੍ਯਾਮਾਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਂ ਆਵਾਸਂ ਆਗਚ੍ਛਨ੍ਤਿ, ਤੇਹਿ, ਭਿਕ੍ਖਵੇ, ਆਵਾਸਿਕੇਹਿ ਭਿਕ੍ਖੂਹਿ ਲਹੁਂ ਲਹੁਂ ਸਨ੍ਨਿਪਤਿਤ੍ਵਾ ਪਵਾਰੇਤਬ੍ਬਂ, ਪਵਾਰੇਤ੍ਵਾ ਵਤ੍ਤਬ੍ਬਾ – ‘‘ਪਵਾਰਿਤਾ ਖੋ ਮਯਂ, ਆਵੁਸੋ; ਯਥਾਯਸ੍ਮਨ੍ਤਾ ਮਞ੍ਞਨ੍ਤਿ ਤਥਾ ਕਰੋਨ੍ਤੂ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਅਸਂਵਿਹਿਤਾ ਤਂ ਆਵਾਸਂ ਆਗਚ੍ਛਨ੍ਤਿ, ਤੇਹਿ, ਭਿਕ੍ਖਵੇ, ਆਵਾਸਿਕੇਹਿ ਭਿਕ੍ਖੂਹਿ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਾਨੀਯੇਨ ਪਰਿਪੁਚ੍ਛਿਤਬ੍ਬਾ; ਤੇਸਂ ਵਿਕ੍ਖਿਤ੍ਵਾ [ਵਿਕ੍ਖਿਪਾਪੇਤ੍ਵਾ (ਪਟਿਵਿਸੋਧਕਾਨਂ ਮਤਿ), ਆਚਿਕ੍ਖਿਤ੍ਵਾ (ਕ.)] ਨਿਸ੍ਸੀਮਂ ਗਨ੍ਤ੍ਵਾ ਪਵਾਰੇਤਬ੍ਬਂ, ਪਵਾਰੇਤ੍ਵਾ ਵਤ੍ਤਬ੍ਬਾ – ‘‘ਪਵਾਰਿਤਾ ਖੋ ਮਯਂ, ਆਵੁਸੋ; ਯਥਾਯਸ੍ਮਨ੍ਤਾ ਮਞ੍ਞਨ੍ਤਿ ਤਥਾ ਕਰੋਨ੍ਤੂ’’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਆਵਾਸਿਕੇਨ ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਆਵਾਸਿਕਾ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤੋ [ਆਯਸ੍ਮਨ੍ਤਾ (ਕ.)], ਆਵਾਸਿਕਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਕਾਲ਼ੇ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਭਿਕ੍ਖੂ ਏਵਂ ਵਦੇਯ੍ਯੁਂ – ‘‘ਸਾਧਾਵੁਸੋ, ਇਦਾਨੇਵ ਨੋ ਪਵਾਰੇਥਾ’’ਤਿ, ਤੇ ਏਵਮਸ੍ਸੁ ਵਚਨੀਯਾ – ‘‘ਅਨਿਸ੍ਸਰਾ ਖੋ ਤੁਮ੍ਹੇ, ਆਵੁਸੋ, ਅਮ੍ਹਾਕਂ ਪਵਾਰਣਾਯ; ਨ ਤਾਵ ਮਯਂ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਂ ਕਾਲ਼ਂ ਅਨੁਵਸੇਯ੍ਯੁਂ, ਆਵਾਸਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਆਵਾਸਿਕਾ ਭਿਕ੍ਖੂ ਞਾਪੇਤਬ੍ਬਾ –

‘‘ਸੁਣਨ੍ਤੁ ਮੇ, ਆਯਸ੍ਮਨ੍ਤੋ, ਆਵਾਸਿਕਾ. ਯਦਾਯਸ੍ਮਨ੍ਤਾਨਂ ਪਤ੍ਤਕਲ੍ਲਂ, ਇਦਾਨਿ ਉਪੋਸਥਂ ਕਰੇਯ੍ਯਾਮ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯਾਮ, ਆਗਮੇ ਜੁਣ੍ਹੇ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤੇ ਭਿਕ੍ਖੂ ਏਵਂ ਵਦੇਯ੍ਯੁਂ – ‘‘ਸਾਧਾਵੁਸੋ, ਇਦਾਨੇਵ ਨੋ ਪਵਾਰੇਯ੍ਯਾਥਾ’’ਤਿ, ਤੇ ਏਵਮਸ੍ਸੁ ਵਚਨੀਯਾ – ‘‘ਅਨਿਸ੍ਸਰਾ ਖੋ ਤੁਮ੍ਹੇ, ਆਵੁਸੋ, ਅਮ੍ਹਾਕਂ ਪਵਾਰਣਾਯ, ਨ ਤਾਵ ਮਯਂ ਪਵਾਰੇਯ੍ਯਾਮਾ’’ਤਿ. ਤੇ ਚੇ, ਭਿਕ੍ਖਵੇ, ਭਿਕ੍ਖੂ ਭਣ੍ਡਨਕਾਰਕਾ ਕਲਹਕਾਰਕਾ ਵਿਵਾਦਕਾਰਕਾ ਭਸ੍ਸਕਾਰਕਾ ਸਙ੍ਘੇ ਅਧਿਕਰਣਕਾਰਕਾ ਤਮ੍ਪਿ ਜੁਣ੍ਹਂ ਅਨੁਵਸੇਯ੍ਯੁਂ, ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਸਬ੍ਬੇਹੇਵ ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਅਕਾਮਾ ਪਵਾਰੇਤਬ੍ਬਂ.

ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਗਿਲਾਨੋ ਅਗਿਲਾਨਸ੍ਸ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਆਯਸ੍ਮਾ ਖੋ ਗਿਲਾਨੋ. ਗਿਲਾਨੋ ਚ ਅਨਨੁਯੋਗਕ੍ਖਮੋ ਵੁਤ੍ਤੋ ਭਗਵਤਾ. ਆਗਮੇਹਿ, ਆਵੁਸੋ, ਯਾਵ ਅਰੋਗੋ ਹੋਸਿ. ਅਰੋਗੋ ਆਕਙ੍ਖਮਾਨੋ ਚੋਦੇਸ੍ਸਸੀ’’ਤਿ. ਏਵਞ੍ਚੇ ਵੁਚ੍ਚਮਾਨੋ ਚੋਦੇਤਿ, ਅਨਾਦਰਿਯੇ ਪਾਚਿਤ੍ਤਿਯਂ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਅਗਿਲਾਨੋ ਗਿਲਾਨਸ੍ਸ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਅਯਂ ਖੋ, ਆਵੁਸੋ, ਭਿਕ੍ਖੁ ਗਿਲਾਨੋ. ਗਿਲਾਨੋ ਚ ਅਨਨੁਯੋਗਕ੍ਖਮੋ ਵੁਤ੍ਤੋ ਭਗਵਤਾ. ਆਗਮੇਹਿ, ਆਵੁਸੋ, ਯਾਵਾਯਂ ਭਿਕ੍ਖੁ ਅਰੋਗੋ ਹੋਤਿ. ਅਰੋਗਂ ਆਕਙ੍ਖਮਾਨੋ ਚੋਦੇਸ੍ਸਸੀ’’ਤਿ. ਏਵਞ੍ਚੇ ਵੁਚ੍ਚਮਾਨੋ ਚੋਦੇਤਿ, ਅਨਾਦਰਿਯੇ ਪਾਚਿਤ੍ਤਿਯਂ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਗਿਲਾਨੋ ਗਿਲਾਨਸ੍ਸ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਆਯਸ੍ਮਨ੍ਤਾ ਖੋ ਗਿਲਾਨਾ. ਗਿਲਾਨੋ ਚ ਅਨਨੁਯੋਗਕ੍ਖਮੋ ਵੁਤ੍ਤੋ ਭਗਵਤਾ. ਆਗਮੇਹਿ, ਆਵੁਸੋ, ਯਾਵ ਅਰੋਗਾ ਹੋਥ. ਅਰੋਗੋ ਅਰੋਗਂ ਆਕਙ੍ਖਮਾਨੋ ਚੋਦੇਸ੍ਸਸੀ’’ਤਿ [ਯਾਵ ਅਰੋਗੋ ਹੋਤਿ, ਅਰੋਗਂ ਆਕਙ੍ਖਮਾਨੋ ਚੋਦੇਸ੍ਸਸੀਤਿ (ਕ.)]. ਏਵਞ੍ਚੇ ਵੁਚ੍ਚਮਾਨੋ ਚੋਦੇਤਿ, ਅਨਾਦਰਿਯੇ ਪਾਚਿਤ੍ਤਿਯਂ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਅਗਿਲਾਨੋ ਅਗਿਲਾਨਸ੍ਸ ਪਵਾਰਣਂ ਠਪੇਤਿ, ਉਭੋ ਸਙ੍ਘੇਨ ਸਮਨੁਯੁਞ੍ਜਿਤ੍ਵਾ ਸਮਨੁਗਾਹਿਤ੍ਵਾ [ਸਮਨੁਭਾਸਿਤ੍ਵਾ (ਸੀ.)] ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਨ੍ਤਿ.

ਭਣ੍ਡਨਕਾਰਕਵਤ੍ਥੁ ਨਿਟ੍ਠਿਤਂ.