੧੪੫. ਪਵਾਰਣਾਸਙ੍ਗਹੋ

੨੪੧. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਕੋਸਲੇਸੁ ਜਨਪਦੇ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਿਂਸੁ. ਤੇਸਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ ਹੋਤਿ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਅਮ੍ਹਾਕਂ ਖੋ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮ. ਕਥਂ ਨੁ ਖੋ ਅਮ੍ਹੇਹਿ ਪਟਿਪਜ੍ਜਿਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਸਨ੍ਦਿਟ੍ਠਾ ਸਮ੍ਭਤ੍ਤਾ ਭਿਕ੍ਖੂ ਅਞ੍ਞਤਰਸ੍ਮਿਂ ਆਵਾਸੇ ਵਸ੍ਸਂ ਉਪਗਚ੍ਛਨ੍ਤਿ. ਤੇਸਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ ਹੋਤਿ. ਤਤ੍ਰ ਚੇ ਭਿਕ੍ਖੂਨਂ ਏਵਂ ਹੋਤਿ – ‘‘ਅਮ੍ਹਾਕਂ ਖੋ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮਾ’’ਤਿ, ਅਨੁਜਾਨਾਮਿ, ਭਿਕ੍ਖਵੇ, ਤੇਹਿ ਭਿਕ੍ਖੂਹਿ ਪਵਾਰਣਾਸਙ੍ਗਹਂ ਕਾਤੁਂ. ਏਵਞ੍ਚ ਪਨ, ਭਿਕ੍ਖਵੇ, ਕਾਤਬ੍ਬੋ. ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤਬ੍ਬਂ – ਸਨ੍ਨਿਪਤਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਪਵਾਰਣਾਸਙ੍ਗਹਂ ਕਰੇਯ੍ਯ, ਇਦਾਨਿ ਉਪੋਸਥਂ ਕਰੇਯ੍ਯ, ਪਾਤਿਮੋਕ੍ਖਂ ਉਦ੍ਦਿਸੇਯ੍ਯ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਸਮਗ੍ਗਾਨਂ ਸਮ੍ਮੋਦਮਾਨਾਨਂ ਅਵਿਵਦਮਾਨਾਨਂ ਵਿਹਰਤਂ ਅਞ੍ਞਤਰੋ ਫਾਸੁਵਿਹਾਰੋ ਅਧਿਗਤੋ. ਸਚੇ ਮਯਂ ਇਦਾਨਿ ਪਵਾਰੇਸ੍ਸਾਮ, ਸਿਯਾਪਿ ਭਿਕ੍ਖੂ ਪਵਾਰੇਤ੍ਵਾ ਚਾਰਿਕਂ ਪਕ੍ਕਮੇਯ੍ਯੁਂ. ਏਵਂ ਮਯਂ ਇਮਮ੍ਹਾ ਫਾਸੁਵਿਹਾਰਾ ਪਰਿਬਾਹਿਰਾ ਭਵਿਸ੍ਸਾਮ. ਸਙ੍ਘੋ ਪਵਾਰਣਾਸਙ੍ਗਹਂ ਕਰੋਤਿ, ਇਦਾਨਿ ਉਪੋਸਥਂ ਕਰਿਸ੍ਸਤਿ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਤਿ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਸ੍ਸਤਿ. ਯਸ੍ਸਾਯਸ੍ਮਤੋ ਖਮਤਿ ਪਵਾਰਣਾਸਙ੍ਗਹਸ੍ਸ ਕਰਣਂ, ਇਦਾਨਿ ਉਪੋਸਥਂ ਕਰਿਸ੍ਸਤਿ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਤਿ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਸ੍ਸਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਕਤੋ ਸਙ੍ਘੇਨ ਪਵਾਰਣਾਸਙ੍ਗਹੋ, ਇਦਾਨਿ ਉਪੋਸਥਂ ਕਰਿਸ੍ਸਤਿ, ਪਾਤਿਮੋਕ੍ਖਂ ਉਦ੍ਦਿਸਿਸ੍ਸਤਿ, ਆਗਮੇ ਜੁਣ੍ਹੇ ਕੋਮੁਦਿਯਾ ਚਾਤੁਮਾਸਿਨਿਯਾ ਪਵਾਰੇਸ੍ਸਤਿ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਕਤੇ ਪਵਾਰਣਾਸਙ੍ਗਹੇ ਅਞ੍ਞਤਰੋ ਭਿਕ੍ਖੁ ਏਵਂ ਵਦੇਯ੍ਯ – ‘‘ਇਚ੍ਛਾਮਹਂ, ਆਵੁਸੋ, ਜਨਪਦਚਾਰਿਕਂ ਪਕ੍ਕਮਿਤੁਂ; ਅਤ੍ਥਿ ਮੇ ਜਨਪਦੇ ਕਰਣੀਯ’’ਨ੍ਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਸਾਧਾਵੁਸੋ, ਪਵਾਰੇਤ੍ਵਾ ਗਚ੍ਛਾਹੀ’’ਤਿ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਪਵਾਰਯਮਾਨੋ ਅਞ੍ਞਤਰਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਅਨਿਸ੍ਸਰੋ ਖੋ ਮੇ ਤ੍ਵਂ, ਆਵੁਸੋ, ਪਵਾਰਣਾਯ, ਨ ਤਾਵਾਹਂ ਪਵਾਰੇਸ੍ਸਾਮੀ’’ਤਿ. ਤਸ੍ਸ ਚੇ, ਭਿਕ੍ਖਵੇ, ਭਿਕ੍ਖੁਨੋ ਪਵਾਰਯਮਾਨਸ੍ਸ ਅਞ੍ਞਤਰੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਉਭੋ ਸਙ੍ਘੇਨ ਸਮਨੁਯੁਞ੍ਜਿਤ੍ਵਾ ਸਮਨੁਗਾਹਿਤ੍ਵਾ ਯਥਾਧਮ੍ਮਂ ਕਾਰਾਪੇਤਬ੍ਬਾ. ਸੋ ਚੇ, ਭਿਕ੍ਖਵੇ, ਭਿਕ੍ਖੁ ਜਨਪਦੇ ਤਂ ਕਰਣੀਯਂ ਤੀਰੇਤ੍ਵਾ ਪੁਨਦੇਵ ਅਨ੍ਤੋ ਕੋਮੁਦਿਯਾ ਚਾਤੁਮਾਸਿਨਿਯਾ ਤਂ ਆਵਾਸਂ ਆਗਚ੍ਛਤਿ, ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਅਞ੍ਞਤਰੋ ਭਿਕ੍ਖੁ ਤਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਸੋ ਏਵਮਸ੍ਸ ਵਚਨੀਯੋ – ‘‘ਅਨਿਸ੍ਸਰੋ ਖੋ ਮੇ ਤ੍ਵਂ, ਆਵੁਸੋ, ਪਵਾਰਣਾਯ; ਪਵਾਰਿਤੋ ਅਹ’’ਨ੍ਤਿ. ਤੇਹਿ ਚੇ, ਭਿਕ੍ਖਵੇ, ਭਿਕ੍ਖੂਹਿ ਪਵਾਰਿਯਮਾਨੇ ਸੋ ਭਿਕ੍ਖੁ ਅਞ੍ਞਤਰਸ੍ਸ ਭਿਕ੍ਖੁਨੋ ਪਵਾਰਣਂ ਠਪੇਤਿ, ਉਭੋ ਸਙ੍ਘੇਨ ਸਮਨੁਯੁਞ੍ਜਿਤ੍ਵਾ ਸਮਨੁਗਾਹਿਤ੍ਵਾ ਯਥਾਧਮ੍ਮਂ ਕਾਰਾਪੇਤ੍ਵਾ ਸਙ੍ਘੇਨ ਪਵਾਰੇਤਬ੍ਬਨ੍ਤਿ.

ਪਵਾਰਣਾਸਙ੍ਗਹੋ ਨਿਟ੍ਠਿਤੋ.

ਪਵਾਰਣਾਕ੍ਖਨ੍ਧਕੋ ਚਤੁਤ੍ਥੋ.