੮੪. ਪਕ੍ਖਗਣਨਾਦਿਉਗ੍ਗਹਣਾਨੁਜਾਨਨਾ

੧੫੬. ਅਥ ਖੋ ਭਗਵਾ ਚੋਦਨਾਵਤ੍ਥੁਸ੍ਮਿਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਪੁਨਦੇਵ ਰਾਜਗਹਂ ਪਚ੍ਚਾਗਞ੍ਛਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂ ਪਿਣ੍ਡਾਯ ਚਰਨ੍ਤੇ ਪੁਚ੍ਛਨ੍ਤਿ – ‘‘ਕਤਿਮੀ, ਭਨ੍ਤੇ, ਪਕ੍ਖਸ੍ਸਾ’’ਤਿ? ਭਿਕ੍ਖੂ ਏਵਮਾਹਂਸੁ – ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਪਕ੍ਖਗਣਨਮਤ੍ਤਮਮ੍ਪਿਮੇ ਸਮਣਾ ਸਕ੍ਯਪੁਤ੍ਤਿਯਾ ਨ ਜਾਨਨ੍ਤਿ, ਕਿਂ ਪਨਿਮੇ ਅਞ੍ਞਂ ਕਿਞ੍ਚਿ ਕਲ੍ਯਾਣਂ ਜਾਨਿਸ੍ਸਨ੍ਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਪਕ੍ਖਗਣਨਂ ਉਗ੍ਗਹੇਤੁਨ੍ਤਿ. ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਪਕ੍ਖਗਣਨਾ ਉਗ੍ਗਹੇਤਬ੍ਬਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬੇਹੇਵ ਪਕ੍ਖਗਣਨਂ ਉਗ੍ਗਹੇਤੁਨ੍ਤਿ.

੧੫੭. ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂ ਪਿਣ੍ਡਾਯ ਚਰਨ੍ਤੇ ਪੁਚ੍ਛਨ੍ਤਿ – ‘‘ਕੀਵਤਿਕਾ, ਭਨ੍ਤੇ, ਭਿਕ੍ਖੂ’’ਤਿ? ਭਿਕ੍ਖੂ ਏਵਮਾਹਂਸੁ – ‘‘ਨ ਖੋ ਮਯਂ, ਆਵੁਸੋ, ਜਾਨਾਮਾ’’ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਞ੍ਞਮਞ੍ਞਮ੍ਪਿਮੇ ਸਮਣਾ ਸਕ੍ਯਪੁਤ੍ਤਿਯਾ ਨ ਜਾਨਨ੍ਤਿ, ਕਿਂ ਪਨਿਮੇ ਅਞ੍ਞਂ ਕਿਞ੍ਚਿ ਕਲ੍ਯਾਣਂ ਜਾਨਿਸ੍ਸਨ੍ਤੀ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਿਕ੍ਖੂ ਗਣੇਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਦਾ ਨੁ ਖੋ ਭਿਕ੍ਖੂ ਗਣੇਤਬ੍ਬਾ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਦਹੁਪੋਸਥੇ ਨਾਮਗ੍ਗੇਨ [ਨਾਮਮਤ੍ਤੇਨ (ਸ੍ਯਾ.), ਗਣਮਗ੍ਗੇਨ (ਕ.)] ਗਣੇਤੁਂ, ਸਲਾਕਂ ਵਾ ਗਾਹੇਤੁਨ੍ਤਿ.

੧੫੮. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਜਾਨਨ੍ਤਾ ਅਜ੍ਜੁਪੋਸਥੋਤਿ ਦੂਰਂ ਗਾਮਂ ਪਿਣ੍ਡਾਯ ਚਰਨ੍ਤਿ. ਤੇ ਉਦ੍ਦਿਸ੍ਸਮਾਨੇਪਿ ਪਾਤਿਮੋਕ੍ਖੇ ਆਗਚ੍ਛਨ੍ਤਿ, ਉਦ੍ਦਿਟ੍ਠਮਤ੍ਤੇਪਿ ਆਗਚ੍ਛਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਰੋਚੇਤੁਂ ‘ਅਜ੍ਜੁਪੋਸਥੋ’ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕੇਨ ਨੁ ਖੋ ਆਰੋਚੇਤਬ੍ਬੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਥੇਰੇਨ ਭਿਕ੍ਖੁਨਾ ਕਾਲਵਤੋ ਆਰੋਚੇਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਥੇਰੋ ਕਾਲਵਤੋ ਨਸ੍ਸਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਭਤ੍ਤਕਾਲੇਪਿ ਆਰੋਚੇਤੁਨ੍ਤਿ.

ਭਤ੍ਤਕਾਲੇਪਿ ਨਸ੍ਸਰਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਯਂ ਕਾਲਂ ਸਰਤਿ, ਤਂ ਕਾਲਂ ਆਰੋਚੇਤੁਨ੍ਤਿ.