੭੩. ਉਪੋਸਥਪ੍ਪਮੁਖਾਨੁਜਾਨਨਾ

੧੪੨. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਅਤਿਖੁਦ੍ਦਕਂ ਉਪੋਸਥਾਗਾਰਂ ਸਮ੍ਮਤਂ ਹੋਤਿ, ਤਦਹੁਪੋਸਥੇ ਮਹਾਭਿਕ੍ਖੁਸਙ੍ਘੋ ਸਨ੍ਨਿਪਤਿਤੋ ਹੋਤਿ. ਭਿਕ੍ਖੂ ਅਸਮ੍ਮਤਾਯ ਭੂਮਿਯਾ ਨਿਸਿਨ੍ਨਾ ਪਾਤਿਮੋਕ੍ਖਂ ਅਸ੍ਸੋਸੁਂ. ਅਥ ਖੋ ਤੇਸਂ ਭਿਕ੍ਖੂਨਂ ਏਤਦਹੋਸਿ ‘‘ਭਗਵਤਾ ਪਞ੍ਞਤ੍ਤਂ ‘ਉਪੋਸਥਾਗਾਰਂ ਸਮ੍ਮਨ੍ਨਿਤ੍ਵਾ ਉਪੋਸਥੋ ਕਾਤਬ੍ਬੋ’ਤਿ, ਮਯਞ੍ਚਮ੍ਹਾ ਅਸਮ੍ਮਤਾਯ ਭੂਮਿਯਾ ਨਿਸਿਨ੍ਨੋ ਪਾਤਿਮੋਕ੍ਖਂ ਅਸ੍ਸੁਮ੍ਹਾ, ਕਤੋ ਨੁ ਖੋ ਅਮ੍ਹਾਕਂ ਉਪੋਸਥੋ, ਅਕਤੋ ਨੁ ਖੋ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਸਮ੍ਮਤਾਯ ਵਾ, ਭਿਕ੍ਖਵੇ, ਭੂਮਿਯਾ ਨਿਸਿਨ੍ਨਾ ਅਸਮ੍ਮਤਾਯ ਵਾ ਯਤੋ ਪਾਤਿਮੋਕ੍ਖਂ ਸੁਣਾਤਿ, ਕਤੋਵਸ੍ਸ ਉਪੋਸਥੋ. ਤੇਨ ਹਿ, ਭਿਕ੍ਖਵੇ, ਸਙ੍ਘੋ ਯਾਵ ਮਹਨ੍ਤਂ ਉਪੋਸਥਪ੍ਪਮੁਖਂ [ਉਪੋਸਥਮੁਖਂ (ਸ੍ਯਾ.)] ਆਕਙ੍ਖਤਿ, ਤਾਵ ਮਹਨ੍ਤਂ ਉਪੋਸਥਪ੍ਪਮੁਖਂ ਸਮ੍ਮਨ੍ਨਤੁ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਂ. ਪਠਮਂ ਨਿਮਿਤ੍ਤਾ ਕਿਤ੍ਤੇਤਬ੍ਬਾ. ਨਿਮਿਤ੍ਤੇ ਕਿਤ੍ਤੇਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਾਵਤਾ ਸਮਨ੍ਤਾ ਨਿਮਿਤ੍ਤਾ ਕਿਤ੍ਤਿਤਾ. ਸਙ੍ਘੋ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ. ਸਮ੍ਮਤਂ ਸਙ੍ਘੇਨ ਏਤੇਹਿ ਨਿਮਿਤ੍ਤੇਹਿ ਉਪੋਸਥਪ੍ਪਮੁਖਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਮਿਂ ਆਵਾਸੇ ਤਦਹੁਪੋਸਥੇ ਨਵਕਾ ਭਿਕ੍ਖੂ ਪਠਮਤਰਂ ਸਨ੍ਨਿਪਤਿਤ੍ਵਾ – ‘‘ਨ ਤਾਵ ਥੇਰਾ ਆਗਚ੍ਛਨ੍ਤੀ’’ਤਿ – ਪਕ੍ਕਮਿਂਸੁ. ਉਪੋਸਥੋ ਵਿਕਾਲੇ ਅਹੋਸਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਤਦਹੁਪੋਸਥੇ ਥੇਰੇਹਿ ਭਿਕ੍ਖੂਹਿ ਪਠਮਤਰਂ ਸਨ੍ਨਿਪਤਿਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਰਾਜਗਹੇ ਸਮ੍ਬਹੁਲਾ ਆਵਾਸਾ ਸਮਾਨਸੀਮਾ ਹੋਨ੍ਤਿ. ਤਤ੍ਥ ਭਿਕ੍ਖੂ ਵਿਵਦਨ੍ਤਿ – ‘‘ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੁ, ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੂ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਇਧ ਪਨ, ਭਿਕ੍ਖਵੇ, ਸਮ੍ਬਹੁਲਾ ਆਵਾਸਾ ਸਮਾਨਸੀਮਾ ਹੋਨ੍ਤਿ. ਤਤ੍ਥ ਭਿਕ੍ਖੂ ਵਿਵਦਨ੍ਤਿ – ‘‘ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੁ, ਅਮ੍ਹਾਕਂ ਆਵਾਸੇ ਉਪੋਸਥੋ ਕਰੀਯਤੂ’’ਤਿ. ਤੇਹਿ, ਭਿਕ੍ਖਵੇ, ਭਿਕ੍ਖੂਹਿ ਸਬ੍ਬੇਹੇਵ ਏਕਜ੍ਝਂ ਸਨ੍ਨਿਪਤਿਤ੍ਵਾ ਉਪੋਸਥੋ ਕਾਤਬ੍ਬੋ. ਯਤ੍ਥ ਵਾ ਪਨ ਥੇਰੋ ਭਿਕ੍ਖੁ ਵਿਹਰਤਿ, ਤਤ੍ਥ ਸਨ੍ਨਿਪਤਿਤ੍ਵਾ ਉਪੋਸਥੋ ਕਾਤਬ੍ਬੋ, ਨ ਤ੍ਵੇਵ ਵਗ੍ਗੇਨ ਸਙ੍ਘੇਨ ਉਪੋਸਥੋ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.