੪੮. ਥੇਯ੍ਯਸਂਵਾਸਕਵਤ੍ਥੁ

੧੧੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪੁਰਾਣਕੁਲਪੁਤ੍ਤੋ ਖੀਣਕੋਲਞ੍ਞੋ ਸੁਖੁਮਾਲੋ ਹੋਤਿ. ਅਥ ਖੋ ਤਸ੍ਸ ਪੁਰਾਣਕੁਲਪੁਤ੍ਤਸ੍ਸ ਖੀਣਕੋਲਞ੍ਞਸ੍ਸ ਏਤਦਹੋਸਿ – ‘‘ਅਹਂ ਖੋ ਸੁਖੁਮਾਲੋ, ਨ ਪਟਿਬਲੋ ਅਨਧਿਗਤਂ ਵਾ ਭੋਗਂ ਅਧਿਗਨ੍ਤੁਂ, ਅਧਿਗਤਂ ਵਾ ਭੋਗਂ ਫਾਤਿਂ ਕਾਤੁਂ. ਕੇਨ ਨੁ ਖੋ ਅਹਂ ਉਪਾਯੇਨ ਸੁਖਞ੍ਚ ਜੀਵੇਯ੍ਯਂ, ਨ ਚ ਕਿਲਮੇਯ੍ਯ’’ਨ੍ਤਿ? ਅਥ ਖੋ ਤਸ੍ਸ ਪੁਰਾਣਕੁਲਪੁਤ੍ਤਸ੍ਸ ਖੀਣਕੋਲਞ੍ਞਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨਾਹਂ ਸਾਮਂ ਪਤ੍ਤਚੀਵਰਂ ਪਟਿਯਾਦੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂਹਿ ਸਦ੍ਧਿਂ ਸਂਵਸੇਯ੍ਯ’’ਨ੍ਤਿ. ਅਥ ਖੋ ਸੋ ਪੁਰਾਣਕੁਲਪੁਤ੍ਤੋ ਖੀਣਕੋਲਞ੍ਞੋ ਸਾਮਂ ਪਤ੍ਤਚੀਵਰਂ ਪਟਿਯਾਦੇਤ੍ਵਾ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦੇਤ੍ਵਾ ਆਰਾਮਂ ਗਨ੍ਤ੍ਵਾ ਭਿਕ੍ਖੂ ਅਭਿਵਾਦੇਤਿ. ਭਿਕ੍ਖੂ ਏਵਮਾਹਂਸੁ – ‘‘ਕਤਿਵਸ੍ਸੋਸਿ ਤ੍ਵਂ, ਆਵੁਸੋ’’ਤਿ? ਕਿਂ ਏਤਂ, ਆਵੁਸੋ, ਕਤਿਵਸ੍ਸੋ ਨਾਮਾਤਿ? ਕੋ ਪਨ ਤੇ, ਆਵੁਸੋ, ਉਪਜ੍ਝਾਯੋਤਿ? ਕਿਂ ਏਤਂ, ਆਵੁਸੋ, ਉਪਜ੍ਝਾਯੋ ਨਾਮਾਤਿ? ਭਿਕ੍ਖੂ ਆਯਸ੍ਮਨ੍ਤਂ ਉਪਾਲਿਂ ਏਤਦਵੋਚੁਂ – ‘‘ਇਙ੍ਘਾਵੁਸੋ ਉਪਾਲਿ, ਇਮਂ ਪਬ੍ਬਜਿਤਂ ਅਨੁਯੁਞ੍ਜਾਹੀ’’ਤਿ. ਅਥ ਖੋ ਸੋ ਪੁਰਾਣਕੁਲਪੁਤ੍ਤੋ ਖੀਣਕੋਲਞ੍ਞੋ ਆਯਸ੍ਮਤਾ ਉਪਾਲਿਨਾ ਅਨੁਯੁਞ੍ਜਿਯਮਾਨੋ ਏਤਮਤ੍ਥਂ ਆਰੋਚੇਸਿ. ਆਯਸ੍ਮਾ ਉਪਾਲਿ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਥੇਯ੍ਯਸਂਵਾਸਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ. ਤਿਤ੍ਥਿਯਪਕ੍ਕਨ੍ਤਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.