੪੯. ਤਿਰਚ੍ਛਾਨਗਤਵਤ੍ਥੁ

੧੧੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਨਾਗੋ ਨਾਗਯੋਨਿਯਾ ਅਟ੍ਟੀਯਤਿ ਹਰਾਯਤਿ ਜਿਗੁਚ੍ਛਤਿ. ਅਥ ਖੋ ਤਸ੍ਸ ਨਾਗਸ੍ਸ ਏਤਦਹੋਸਿ – ‘‘ਕੇਨ ਨੁ ਖੋ ਅਹਂ ਉਪਾਯੇਨ ਨਾਗਯੋਨਿਯਾ ਚ ਪਰਿਮੁਚ੍ਚੇਯ੍ਯਂ ਖਿਪ੍ਪਞ੍ਚ ਮਨੁਸ੍ਸਤ੍ਤਂ ਪਟਿਲਭੇਯ੍ਯ’’ਨ੍ਤਿ. ਅਥ ਖੋ ਤਸ੍ਸ ਨਾਗਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਸਚੇ ਖੋ ਅਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਂ, ਏਵਾਹਂ ਨਾਗਯੋਨਿਯਾ ਚ ਪਰਿਮੁਚ੍ਚੇਯ੍ਯਂ, ਖਿਪ੍ਪਞ੍ਚ ਮਨੁਸ੍ਸਤ੍ਤਂ ਪਟਿਲਭੇਯ੍ਯ’’ਨ੍ਤਿ. ਅਥ ਖੋ ਸੋ ਨਾਗੋ ਮਾਣਵਕਵਣ੍ਣੇਨ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਤੇਨ ਖੋ ਪਨ ਸਮਯੇਨ ਸੋ ਨਾਗੋ ਅਞ੍ਞਤਰੇਨ ਭਿਕ੍ਖੁਨਾ ਸਦ੍ਧਿਂ ਪਚ੍ਚਨ੍ਤਿਮੇ ਵਿਹਾਰੇ ਪਟਿਵਸਤਿ. ਅਥ ਖੋ ਸੋ ਭਿਕ੍ਖੁ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਅਜ੍ਝੋਕਾਸੇ ਚਙ੍ਕਮਤਿ. ਅਥ ਖੋ ਸੋ ਨਾਗੋ ਤਸ੍ਸ ਭਿਕ੍ਖੁਨੋ ਨਿਕ੍ਖਨ੍ਤੇ ਵਿਸ੍ਸਟ੍ਠੋ ਨਿਦ੍ਦਂ ਓਕ੍ਕਮਿ. ਸਬ੍ਬੋ ਵਿਹਾਰੋ ਅਹਿਨਾ ਪੁਣ੍ਣੋ, ਵਾਤਪਾਨੇਹਿ ਭੋਗਾ ਨਿਕ੍ਖਨ੍ਤਾ ਹੋਨ੍ਤਿ. ਅਥ ਖੋ ਸੋ ਭਿਕ੍ਖੁ ਵਿਹਾਰਂ ਪਵਿਸਿਸ੍ਸਾਮੀਤਿ ਕਵਾਟਂ ਪਣਾਮੇਨ੍ਤੋ ਅਦ੍ਦਸ ਸਬ੍ਬਂ ਵਿਹਾਰਂ ਅਹਿਨਾ ਪੁਣ੍ਣਂ, ਵਾਤਪਾਨੇਹਿ ਭੋਗੇ ਨਿਕ੍ਖਨ੍ਤੇ, ਦਿਸ੍ਵਾਨ ਭੀਤੋ ਵਿਸ੍ਸਰਮਕਾਸਿ. ਭਿਕ੍ਖੂ ਉਪਧਾਵਿਤ੍ਵਾ ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਕਿਸ੍ਸ ਤ੍ਵਂ, ਆਵੁਸੋ, ਵਿਸ੍ਸਰਮਕਾਸੀ’’ਤਿ? ‘‘ਅਯਂ, ਆਵੁਸੋ, ਸਬ੍ਬੋ ਵਿਹਾਰੋ ਅਹਿਨਾ ਪੁਣ੍ਣੋ, ਵਾਤਪਾਨੇਹਿ ਭੋਗਾ ਨਿਕ੍ਖਨ੍ਤਾ’’ਤਿ. ਅਥ ਖੋ ਸੋ ਨਾਗੋ ਤੇਨ ਸਦ੍ਦੇਨ ਪਟਿਬੁਜ੍ਝਿਤ੍ਵਾ ਸਕੇ ਆਸਨੇ ਨਿਸੀਦਿ. ਭਿਕ੍ਖੂ ਏਵਮਾਹਂਸੁ – ‘‘ਕੋਸਿ ਤ੍ਵਂ, ਆਵੁਸੋ’’ਤਿ? ‘‘ਅਹਂ, ਭਨ੍ਤੇ, ਨਾਗੋ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਆਵੁਸੋ, ਏਵਰੂਪਂ ਅਕਾਸੀ’’ਤਿ? ਅਥ ਖੋ ਸੋ ਨਾਗੋ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਤਂ ਨਾਗਂ ਏਤਦਵੋਚ – ‘‘ਤੁਮ੍ਹੇ ਖੋਤ੍ਥ ਨਾਗਾ ਅਵਿਰੁਲ਼੍ਹਿਧਮ੍ਮਾ ਇਮਸ੍ਮਿਂ ਧਮ੍ਮਵਿਨਯੇ. ਗਚ੍ਛ ਤ੍ਵਂ, ਨਾਗ, ਤਤ੍ਥੇਵ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਾ ਚ ਪਕ੍ਖਸ੍ਸ ਉਪੋਸਥਂ ਉਪਵਸ, ਏਵਂ ਤ੍ਵਂ ਨਾਗਯੋਨਿਯਾ ਚ ਪਰਿਮੁਚ੍ਚਿਸ੍ਸਸਿ, ਖਿਪ੍ਪਞ੍ਚ ਮਨੁਸ੍ਸਤ੍ਤਂ ਪਟਿਲਭਿਸ੍ਸਸੀ’’ਤਿ. ਅਥ ਖੋ ਸੋ ਨਾਗੋ ਅਵਿਰੁਲ਼੍ਹਿਧਮ੍ਮੋ ਕਿਰਾਹਂ ਇਮਸ੍ਮਿਂ ਧਮ੍ਮਵਿਨਯੇਤਿ ਦੁਕ੍ਖੀ ਦੁਮ੍ਮਨੋ ਅਸ੍ਸੂਨਿ ਪਵਤ੍ਤਯਮਾਨੋ ਵਿਸ੍ਸਰਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਦ੍ਵੇਮੇ, ਭਿਕ੍ਖਵੇ, ਪਚ੍ਚਯਾ ਨਾਗਸ੍ਸ ਸਭਾਵਪਾਤੁਕਮ੍ਮਾਯ. ਯਦਾ ਚ ਸਜਾਤਿਯਾ ਮੇਥੁਨਂ ਧਮ੍ਮਂ ਪਟਿਸੇਵਤਿ, ਯਦਾ ਚ ਵਿਸ੍ਸਟ੍ਠੋ ਨਿਦ੍ਦਂ ਓਕ੍ਕਮਤਿ – ਇਮੇ ਖੋ, ਭਿਕ੍ਖਵੇ, ਦ੍ਵੇ ਪਚ੍ਚਯਾ ਨਾਗਸ੍ਸ ਸਭਾਵਪਾਤੁਕਮ੍ਮਾਯ. ਤਿਰਚ੍ਛਾਨਗਤੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋ’’ਤਿ.