੪੭. ਪਣ੍ਡਕਵਤ੍ਥੁ

੧੦੯. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਪਣ੍ਡਕੋ ਭਿਕ੍ਖੂਸੁ ਪਬ੍ਬਜਿਤੋ ਹੋਤਿ. ਸੋ ਦਹਰੇ ਦਹਰੇ ਭਿਕ੍ਖੂ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਏਥ, ਮਂ ਆਯਸ੍ਮਨ੍ਤੋ ਦੂਸੇਥਾ’’ਤਿ. ਭਿਕ੍ਖੂ ਅਪਸਾਦੇਨ੍ਤਿ – ‘‘ਨਸ੍ਸ, ਪਣ੍ਡਕ, ਵਿਨਸ੍ਸ, ਪਣ੍ਡਕ, ਕੋ ਤਯਾ ਅਤ੍ਥੋ’’ਤਿ. ਸੋ ਭਿਕ੍ਖੂਹਿ ਅਪਸਾਦਿਤੋ ਮਹਨ੍ਤੇ ਮਹਨ੍ਤੇ ਮੋਲ਼ਿਗਲ੍ਲੇ ਸਾਮਣੇਰੇ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਏਥ, ਮਂ ਆਵੁਸੋ ਦੂਸੇਥਾ’’ਤਿ. ਸਾਮਣੇਰਾ ਅਪਸਾਦੇਨ੍ਤਿ – ‘‘ਨਸ੍ਸ, ਪਣ੍ਡਕ, ਵਿਨਸ੍ਸ, ਪਣ੍ਡਕ, ਕੋ ਤਯਾ ਅਤ੍ਥੋ’’ਤਿ. ਸੋ ਸਾਮਣੇਰੇਹਿ ਅਪਸਾਦਿਤੋ ਹਤ੍ਥਿਭਣ੍ਡੇ ਅਸ੍ਸਭਣ੍ਡੇ ਉਪਸਙ੍ਕਮਿਤ੍ਵਾ ਏਵਂ ਵਦੇਤਿ – ‘‘ਏਥ, ਮਂ, ਆਵੁਸੋ, ਦੂਸੇਥਾ’’ਤਿ. ਹਤ੍ਥਿਭਣ੍ਡਾ ਅਸ੍ਸਭਣ੍ਡਾ ਦੂਸੇਸੁਂ. ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਪਣ੍ਡਕਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ. ਯੇਪਿ ਇਮੇਸਂ ਨ ਪਣ੍ਡਕਾ, ਤੇਪਿ ਇਮੇ ਪਣ੍ਡਕੇ ਦੂਸੇਨ੍ਤਿ. ਏਵਂ ਇਮੇ ਸਬ੍ਬੇਵ ਅਬ੍ਰਹ੍ਮਚਾਰਿਨੋ’’ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਹਤ੍ਥਿਭਣ੍ਡਾਨਂ ਅਸ੍ਸਭਣ੍ਡਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਪਣ੍ਡਕੋ, ਭਿਕ੍ਖਵੇ, ਅਨੁਪਸਮ੍ਪਨ੍ਨੋ ਨ ਉਪਸਮ੍ਪਾਦੇਤਬ੍ਬੋ, ਉਪਸਮ੍ਪਨ੍ਨੋ ਨਾਸੇਤਬ੍ਬੋਤਿ.