੪੩. ਦਣ੍ਡਕਮ੍ਮਵਤ੍ਥੁ

੧੦੭. ਤੇਨ ਖੋ ਪਨ ਸਮਯੇਨ ਸਾਮਣੇਰਾ ਭਿਕ੍ਖੂਸੁ ਅਗਾਰਵਾ ਅਪ੍ਪਤਿਸ੍ਸਾ ਅਸਭਾਗਵੁਤ੍ਤਿਕਾ ਵਿਹਰਨ੍ਤਿ. ਭਿਕ੍ਖੂ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਾਮਣੇਰਾ ਭਿਕ੍ਖੂਸੁ ਅਗਾਰਵਾ ਅਪ੍ਪਤਿਸ੍ਸਾ ਅਸਭਾਗਵੁਤ੍ਤਿਕਾ ਵਿਹਰਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਂ ਕਾਤੁਂ. ਭਿਕ੍ਖੂਨਂ ਅਲਾਭਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਨਤ੍ਥਾਯ ਪਰਿਸਕ੍ਕਤਿ, ਭਿਕ੍ਖੂਨਂ ਅਵਾਸਾਯ ਪਰਿਸਕ੍ਕਤਿ, ਭਿਕ੍ਖੂ ਅਕ੍ਕੋਸਤਿ ਪਰਿਭਾਸਤਿ, ਭਿਕ੍ਖੂ ਭਿਕ੍ਖੂਹਿ ਭੇਦੇਤਿ – ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਸ੍ਸ ਸਾਮਣੇਰਸ੍ਸ ਦਣ੍ਡਕਮ੍ਮਂ ਕਾਤੁਨ੍ਤਿ.

ਅਥ ਖੋ ਭਿਕ੍ਖੂਨਂ ਏਤਦਹੋਸਿ – ‘‘ਕਿਂ ਨੁ ਖੋ ਦਣ੍ਡਕਮ੍ਮਂ ਕਾਤਬ੍ਬ’’ਨ੍ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਨੁਜਾਨਾਮਿ, ਭਿਕ੍ਖਵੇ, ਆਵਰਣਂ ਕਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਾਮਣੇਰਾਨਂ ਸਬ੍ਬਂ ਸਙ੍ਘਾਰਾਮਂ ਆਵਰਣਂ ਕਰੋਨ੍ਤਿ. ਸਾਮਣੇਰਾ ਆਰਾਮਂ ਪਵਿਸਿਤੁਂ ਅਲਭਮਾਨਾ ਪਕ੍ਕਮਨ੍ਤਿਪਿ, ਵਿਬ੍ਭਮਨ੍ਤਿਪਿ, ਤਿਤ੍ਥਿਯੇਸੁਪਿ ਸਙ੍ਕਮਨ੍ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਸਬ੍ਬੋ ਸਙ੍ਘਾਰਾਮੋ ਆਵਰਣਂ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਨੁਜਾਨਾਮਿ, ਭਿਕ੍ਖਵੇ, ਯਤ੍ਥ ਵਾ ਵਸਤਿ, ਯਤ੍ਥ ਵਾ ਪਟਿਕ੍ਕਮਤਿ, ਤਤ੍ਥ ਆਵਰਣਂ ਕਾਤੁਨ੍ਤਿ.

ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਸਾਮਣੇਰਾਨਂ ਮੁਖਦ੍ਵਾਰਿਕਂ ਆਹਾਰਂ ਆਵਰਣਂ ਕਰੋਨ੍ਤਿ. ਮਨੁਸ੍ਸਾ ਯਾਗੁਪਾਨਮ੍ਪਿ ਸਙ੍ਘਭਤ੍ਤਮ੍ਪਿ ਕਰੋਨ੍ਤਾ ਸਾਮਣੇਰੇ ਏਵਂ ਵਦੇਨ੍ਤਿ – ‘‘ਏਥ, ਭਨ੍ਤੇ, ਯਾਗੁਂ ਪਿਵਥ; ਏਥ, ਭਨ੍ਤੇ, ਭਤ੍ਤਂ ਭੁਞ੍ਜਥਾ’’ਤਿ. ਸਾਮਣੇਰਾ ਏਵਂ ਵਦੇਨ੍ਤਿ – ‘‘ਨਾਵੁਸੋ, ਲਬ੍ਭਾ. ਭਿਕ੍ਖੂਹਿ ਆਵਰਣਂ ਕਤ’’ਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ ਸਾਮਣੇਰਾਨਂ ਮੁਖਦ੍ਵਾਰਿਕਂ ਆਹਾਰਂ ਆਵਰਣਂ ਕਰਿਸ੍ਸਨ੍ਤੀ’’ਤਿ. ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਨ, ਭਿਕ੍ਖਵੇ, ਮੁਖਦ੍ਵਾਰਿਕੋ ਆਹਾਰੋ ਆਵਰਣਂ ਕਾਤਬ੍ਬੋ. ਯੋ ਕਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾਤਿ.

ਦਣ੍ਡਕਮ੍ਮਵਤ੍ਥੁ ਨਿਟ੍ਠਿਤਂ.