੨੭. ਰਾਜਭਟਵਤ੍ਥੁ

੯੦. ਤੇਨ ਖੋ ਪਨ ਸਮਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਨ੍ਤੋ ਕੁਪਿਤੋ ਹੋਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਸੇਨਾਨਾਯਕੇ ਮਹਾਮਤ੍ਤੇ ਆਣਾਪੇਸਿ – ‘‘ਗਚ੍ਛਥ, ਭਣੇ, ਪਚ੍ਚਨ੍ਤਂ ਉਚ੍ਚਿਨਥਾ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਸੇਨਾਨਾਯਕਾ ਮਹਾਮਤ੍ਤਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸੁਂ. ਅਥ ਖੋ ਅਭਿਞ੍ਞਾਤਾਨਂ ਅਭਿਞ੍ਞਾਤਾਨਂ ਯੋਧਾਨਂ ਏਤਦਹੋਸਿ – ‘‘ਮਯਂ ਖੋ ਯੁਦ੍ਧਾਭਿਨਨ੍ਦਿਨੋ ਗਚ੍ਛਨ੍ਤਾ ਪਾਪਞ੍ਚ ਕਰੋਮ, ਬਹੁਞ੍ਚ ਅਪੁਞ੍ਞਂ ਪਸਵਾਮ. ਕੇਨ ਨੁ ਖੋ ਮਯਂ ਉਪਾਯੇਨ ਪਾਪਾ ਚ ਵਿਰਮੇਯ੍ਯਾਮ ਕਲ੍ਯਾਣਞ੍ਚ ਕਰੇਯ੍ਯਾਮਾ’’ਤਿ? ਅਥ ਖੋ ਤੇਸਂ ਯੋਧਾਨਂ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ. ਸਚੇ ਖੋ ਮਯਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਾਮ, ਏਵਂ ਮਯਂ ਪਾਪਾ ਚ ਵਿਰਮੇਯ੍ਯਾਮ ਕਲ੍ਯਾਣਞ੍ਚ ਕਰੇਯ੍ਯਾਮਾ’’ਤਿ. ਅਥ ਖੋ ਤੇ ਯੋਧਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਤੇ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਸੇਨਾਨਾਯਕਾ ਮਹਾਮਤ੍ਤਾ ਰਾਜਭਟੇ ਪੁਚ੍ਛਿਂਸੁ – ‘‘ਕਿਂ ਨੁ ਖੋ, ਭਣੇ, ਇਤ੍ਥਨ੍ਨਾਮੋ ਚ ਇਤ੍ਥਨ੍ਨਾਮੋ ਚ ਯੋਧਾ ਨ ਦਿਸ੍ਸਨ੍ਤੀ’’ਤਿ? ‘‘ਇਤ੍ਥਨ੍ਨਾਮੋ ਚ ਇਤ੍ਥਨ੍ਨਾਮੋ ਚ, ਸਾਮਿ, ਯੋਧਾ ਭਿਕ੍ਖੂਸੁ ਪਬ੍ਬਜਿਤਾ’’ਤਿ. ਸੇਨਾਨਾਯਕਾ ਮਹਾਮਤ੍ਤਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਰਾਜਭਟਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਸੇਨਾਨਾਯਕਾ ਮਹਾਮਤ੍ਤਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਵੋਹਾਰਿਕੇ ਮਹਾਮਤ੍ਤੇ ਪੁਚ੍ਛਿ – ‘‘ਯੋ, ਭਣੇ, ਰਾਜਭਟਂ ਪਬ੍ਬਾਜੇਤਿ, ਕਿਂ ਸੋ ਪਸਵਤੀ’’ਤਿ? ‘‘ਉਪਜ੍ਝਾਯਸ੍ਸ, ਦੇਵ, ਸੀਸਂ ਛੇਤਬ੍ਬਂ, ਅਨੁਸ੍ਸਾਵਕਸ੍ਸ [ਅਨੁਸਾਵਕਸ੍ਸ (ਕ.)] ਜਿਵ੍ਹਾ ਉਦ੍ਧਰਿਤਬ੍ਬਾ, ਗਣਸ੍ਸ ਉਪਡ੍ਢਫਾਸੁਕਾ ਭਞ੍ਜਿਤਬ੍ਬਾ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਨ੍ਤਂ ਏਤਦਵੋਚ – ‘‘ਸਨ੍ਤਿ, ਭਨ੍ਤੇ, ਰਾਜਾਨੋ ਅਸ੍ਸਦ੍ਧਾ ਅਪ੍ਪਸਨ੍ਨਾ. ਤੇ ਅਪ੍ਪਮਤ੍ਤਕੇਨਪਿ ਭਿਕ੍ਖੂ ਵਿਹੇਠੇਯ੍ਯੁਂ. ਸਾਧੁ, ਭਨ੍ਤੇ, ਅਯ੍ਯਾ ਰਾਜਭਟਂ ਨ ਪਬ੍ਬਾਜੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਰਾਜਭਟੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਰਾਜਭਟਵਤ੍ਥੁ ਨਿਟ੍ਠਿਤਂ.