੨੬. ਪਞ੍ਚਾਬਾਧਵਤ੍ਥੁ

੮੮. ਤੇਨ ਖੋ ਪਨ ਸਮਯੇਨ ਮਗਧੇਸੁ ਪਞ੍ਚ ਆਬਾਧਾ ਉਸ੍ਸਨ੍ਨਾ ਹੋਨ੍ਤਿ – ਕੁਟ੍ਠਂ, ਗਣ੍ਡੋ, ਕਿਲਾਸੋ, ਸੋਸੋ, ਅਪਮਾਰੋ. ਮਨੁਸ੍ਸਾ ਪਞ੍ਚਹਿ ਆਬਾਧੇਹਿ ਫੁਟ੍ਠਾ ਜੀਵਕਂ ਕੋਮਾਰਭਚ੍ਚਂ ਉਪਸਙ੍ਕਮਿਤ੍ਵਾ ਏਵਂ ਵਦਨ੍ਤਿ – ‘‘ਸਾਧੁ ਨੋ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ ਬਹੁਕਰਣੀਯੋ; ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ; ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ; ਮਯਞ੍ਚ ਤੇ ਦਾਸਾ; ਸਾਧੁ, ਨੋ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ ਬਹੁਕਰਣੀਯੋ ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ; ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਤੇਸਂ ਮਨੁਸ੍ਸਾਨਂ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨ ਮਯਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਾਮ. ਤਤ੍ਥ ਭਿਕ੍ਖੂ ਚੇਵ ਉਪਟ੍ਠਹਿਸ੍ਸਨ੍ਤਿ, ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿਸ੍ਸਤੀ’’ਤਿ. ਅਥ ਖੋ ਤੇ ਮਨੁਸ੍ਸਾ ਭਿਕ੍ਖੂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਂਸੁ. ਤੇ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਤੇ ਭਿਕ੍ਖੂ ਚੇਵ ਉਪਟ੍ਠਹਿਂਸੁ ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਬਹੂ ਗਿਲਾਨੇ ਭਿਕ੍ਖੂ ਉਪਟ੍ਠਹਨ੍ਤਾ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਨ੍ਤਿ – ਗਿਲਾਨਭਤ੍ਤਂ ਦੇਥ, ਗਿਲਾਨੁਪਟ੍ਠਾਕਭਤ੍ਤਂ ਦੇਥ, ਗਿਲਾਨਭੇਸਜ੍ਜਂ ਦੇਥਾਤਿ. ਜੀਵਕੋਪਿ ਕੋਮਾਰਭਚ੍ਚੋ ਬਹੂ ਗਿਲਾਨੇ ਭਿਕ੍ਖੂ ਤਿਕਿਚ੍ਛਨ੍ਤੋ ਅਞ੍ਞਤਰਂ ਰਾਜਕਿਚ੍ਚਂ ਪਰਿਹਾਪੇਸਿ.

੮੯. ਅਞ੍ਞਤਰੋਪਿ ਪੁਰਿਸੋ ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਜੀਵਕਂ ਕੋਮਾਰਭਚ੍ਚਂ ਉਪਸਙ੍ਕਮਿਤ੍ਵਾ ਏਤਦਵੋਚ – ‘‘ਸਾਧੁ ਮਂ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ, ਬਹੁਕਰਣੀਯੋ, ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ; ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ‘‘ਸਬ੍ਬਂ ਸਾਪਤੇਯ੍ਯਞ੍ਚ ਤੇ, ਆਚਰਿਯ, ਹੋਤੁ, ਅਹਞ੍ਚ ਤੇ ਦਾਸੋ; ਸਾਧੁ ਮਂ, ਆਚਰਿਯ, ਤਿਕਿਚ੍ਛਾਹੀ’’ਤਿ. ‘‘ਅਹਂ ਖ੍ਵਯ੍ਯੋ, ਬਹੁਕਿਚ੍ਚੋ ਬਹੁਕਰਣੀਯੋ, ਰਾਜਾ ਚ ਮੇ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਉਪਟ੍ਠਾਤਬ੍ਬੋ ਇਤ੍ਥਾਗਾਰਞ੍ਚ ਬੁਦ੍ਧਪ੍ਪਮੁਖੋ ਚ ਭਿਕ੍ਖੁਸਙ੍ਘੋ, ਨਾਹਂ ਸਕ੍ਕੋਮਿ ਤਿਕਿਚ੍ਛਿਤੁ’’ਨ੍ਤਿ. ਅਥ ਖੋ ਤਸ੍ਸ ਪੁਰਿਸਸ੍ਸ ਏਤਦਹੋਸਿ – ‘‘ਇਮੇ ਖੋ ਸਮਣਾ ਸਕ੍ਯਪੁਤ੍ਤਿਯਾ ਸੁਖਸੀਲਾ ਸੁਖਸਮਾਚਾਰਾ, ਸੁਭੋਜਨਾਨਿ ਭੁਞ੍ਜਿਤ੍ਵਾ ਨਿਵਾਤੇਸੁ ਸਯਨੇਸੁ ਸਯਨ੍ਤਿ. ਯਂਨੂਨਾਹਂ ਸਮਣੇਸੁ ਸਕ੍ਯਪੁਤ੍ਤਿਯੇਸੁ ਪਬ੍ਬਜੇਯ੍ਯਂ. ਤਤ੍ਥ ਭਿਕ੍ਖੂ ਚੇਵ ਉਪਟ੍ਠਹਿਸ੍ਸਨ੍ਤਿ, ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿਸ੍ਸਤਿ. ਸੋਮ੍ਹਿ [ਸੋਹਂ (ਬਹੂਸੁ, ਵਿਮਤਿਵਿਨੋਦਨੀਟੀਕਾ ਓਲੋਕੇਤਬ੍ਬਾ)] ਅਰੋਗੋ ਵਿਬ੍ਭਮਿਸ੍ਸਾਮੀ’’ਤਿ. ਅਥ ਖੋ ਸੋ ਪੁਰਿਸੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤਂ ਭਿਕ੍ਖੂ ਪਬ੍ਬਾਜੇਸੁਂ, ਉਪਸਮ੍ਪਾਦੇਸੁਂ. ਤਂ ਭਿਕ੍ਖੂ ਚੇਵ ਉਪਟ੍ਠਹਿਂਸੁ, ਜੀਵਕੋ ਚ ਕੋਮਾਰਭਚ੍ਚੋ ਤਿਕਿਚ੍ਛਿ. ਸੋ ਅਰੋਗੋ ਵਿਬ੍ਭਮਿ. ਅਦ੍ਦਸਾ ਖੋ ਜੀਵਕੋ ਕੋਮਾਰਭਚ੍ਚੋ ਤਂ ਪੁਰਿਸਂ ਵਿਬ੍ਭਨ੍ਤਂ, ਦਿਸ੍ਵਾਨ ਤਂ ਪੁਰਿਸਂ ਏਤਦਵੋਚ – ‘‘ਨਨੁ ਤ੍ਵਂ, ਅਯ੍ਯੋ, ਭਿਕ੍ਖੂਸੁ ਪਬ੍ਬਜਿਤੋ ਅਹੋਸੀ’’ਤਿ? ‘‘ਏਵਂ, ਆਚਰਿਯਾ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਅਯ੍ਯੋ, ਏਵਰੂਪਮਕਾਸੀ’’ਤਿ? ਅਥ ਖੋ ਸੋ ਪੁਰਿਸੋ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਏਤਮਤ੍ਥਂ ਆਰੋਚੇਸਿ. ਜੀਵਕੋ ਕੋਮਾਰਭਚ੍ਚੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਕਥਞ੍ਹਿ ਨਾਮ ਭਦਨ੍ਤਾ [ਭਦ੍ਦਨ੍ਤਾ (ਕ.)] ਪਞ੍ਚਹਿ ਆਬਾਧੇਹਿ ਫੁਟ੍ਠਂ ਪਬ੍ਬਾਜੇਸ੍ਸਨ੍ਤੀ’’ਤਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਨ੍ਤਂ ਏਤਦਵੋਚ – ‘‘ਸਾਧੁ, ਭਨ੍ਤੇ, ਅਯ੍ਯਾ ਪਞ੍ਚਹਿ ਆਬਾਧੇਹਿ ਫੁਟ੍ਠਂ ਨ ਪਬ੍ਬਾਜੇਯ੍ਯੁ’’ਨ੍ਤਿ. ਅਥ ਖੋ ਭਗਵਾ ਜੀਵਕਂ ਕੋਮਾਰਭਚ੍ਚਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਜੀਵਕੋ ਕੋਮਾਰਭਚ੍ਚੋ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਪਬ੍ਬਾਜੇਤਬ੍ਬੋ. ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਪਞ੍ਚਾਬਾਧਵਤ੍ਥੁ ਨਿਟ੍ਠਿਤਂ.