੨੫. ਅਞ੍ਞਤਿਤ੍ਥਿਯਪੁਬ੍ਬਕਥਾ

੮੬. ਤੇਨ ਖੋ ਪਨ ਸਮਯੇਨ ਯੋ ਸੋ ਅਞ੍ਞਤਿਤ੍ਥਿਯਪੁਬ੍ਬੋ [ਯੋ ਸੋ ਪਸੁਰਪਰਿਬ੍ਬਾਜਕੋ ਅਞ੍ਞਤਿਤ੍ਥਿਯਪੁਬ੍ਬੋ (ਕ.)] ਪਜ੍ਝਾਯੇਨ ਸਹਧਮ੍ਮਿਕਂ ਵੁਚ੍ਚਮਾਨੋ ਉਪਜ੍ਝਾਯਸ੍ਸ ਵਾਦਂ ਆਰੋਪੇਤ੍ਵਾ ਤਂਯੇਵ ਤਿਤ੍ਥਾਯਤਨਂ ਸਙ੍ਕਮਿ. ਸੋ ਪੁਨ ਪਚ੍ਚਾਗਨ੍ਤ੍ਵਾ ਭਿਕ੍ਖੂ ਉਪਸਮ੍ਪਦਂ ਯਾਚਿ. ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਯੋ ਸੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਉਪਜ੍ਝਾਯੇਨ ਸਹਧਮ੍ਮਿਕਂ ਵੁਚ੍ਚਮਾਨੋ ਉਪਜ੍ਝਾਯਸ੍ਸ ਵਾਦਂ ਆਰੋਪੇਤ੍ਵਾ ਤਂਯੇਵ ਤਿਤ੍ਥਾਯਤਨਂ ਸਙ੍ਕਨ੍ਤੋ, ਸੋ ਆਗਤੋ ਨ ਉਪਸਮ੍ਪਾਦੇਤਬ੍ਬੋ. ਯੋ ਸੋ, ਭਿਕ੍ਖਵੇ, ਅਞ੍ਞੋਪਿ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਪਬ੍ਬਜ੍ਜਂ, ਆਕਙ੍ਖਤਿ ਉਪਸਮ੍ਪਦਂ, ਤਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸੋ ਦਾਤਬ੍ਬੋ. ਏਵਞ੍ਚ ਪਨ, ਭਿਕ੍ਖਵੇ, ਦਾਤਬ੍ਬੋ – ਪਠਮਂ ਕੇਸਮਸ੍ਸੁਂ ਓਹਾਰਾਪੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦਾਪੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਏਵਂ ਵਦੇਹੀਤਿ ਵਤ੍ਤਬ੍ਬੋ – ‘‘ਬੁਦ੍ਧਂ ਸਰਣਂ ਗਚ੍ਛਾਮਿ, ਧਮ੍ਮਂ ਸਰਣਂ ਗਚ੍ਛਾਮਿ, ਸਙ੍ਘਂ ਸਰਣਂ ਗਚ੍ਛਾਮਿ; ਦੁਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਦੁਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮਿ; ਤਤਿਯਮ੍ਪਿ ਬੁਦ੍ਧਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਧਮ੍ਮਂ ਸਰਣਂ ਗਚ੍ਛਾਮਿ, ਤਤਿਯਮ੍ਪਿ ਸਙ੍ਘਂ ਸਰਣਂ ਗਚ੍ਛਾਮੀ’’ਤਿ.

ਤੇਨ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੇਨ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਾਮਿ ਉਪਸਮ੍ਪਦਂ. ਸੋਹਂ, ਭਨ੍ਤੇ, ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਾਮੀ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬੋ. ਤਤਿਯਮ੍ਪਿ ਯਾਚਿਤਬ੍ਬੋ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਉਪਸਮ੍ਪਦਂ. ਸੋ ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ ਸਙ੍ਘੋ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸਂ ਦਦੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਤਿ ਉਪਸਮ੍ਪਦਂ. ਸੋ ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸਂ ਦੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸਸ੍ਸ ਦਾਨਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦਿਨ੍ਨੋ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਚਤ੍ਤਾਰੋ ਮਾਸੇ ਪਰਿਵਾਸੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੮੭. ‘‘ਏਵਂ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ, ਏਵਂ ਅਨਾਰਾਧਕੋ. ਕਥਞ੍ਚ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ? ਇਧ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਤਿਕਾਲੇਨ ਗਾਮਂ ਪਵਿਸਤਿ, ਅਤਿਦਿਵਾ ਪਟਿਕ੍ਕਮਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਵੇਸਿਯਾਗੋਚਰੋ ਵਾ ਹੋਤਿ, ਵਿਧਵਾਗੋਚਰੋ ਵਾ ਹੋਤਿ, ਥੁਲ੍ਲਕੁਮਾਰਿਕਾਗੋਚਰੋ ਵਾ ਹੋਤਿ, ਪਣ੍ਡਕਗੋਚਰੋ ਵਾ ਹੋਤਿ, ਭਿਕ੍ਖੁਨਿਗੋਚਰੋ ਵਾ ਹੋਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਾਨਿ ਤਾਨਿ ਸਬ੍ਰਹ੍ਮਚਾਰੀਨਂ ਉਚ੍ਚਾਵਚਾਨਿ ਕਰਣੀਯਾਨਿ, ਤਤ੍ਥ ਨ ਦਕ੍ਖੋ ਹੋਤਿ, ਨ ਅਨਲਸੋ, ਨ ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤੋ, ਨ ਅਲਂ ਕਾਤੁਂ, ਨ ਅਲਂ ਸਂਵਿਧਾਤੁਂ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨ ਤਿਬ੍ਬਚ੍ਛਨ੍ਦੋ ਹੋਤਿ ਉਦ੍ਦੇਸੇ, ਪਰਿਪੁਚ੍ਛਾਯ, ਅਧਿਸੀਲੇ, ਅਧਿਚਿਤ੍ਤੇ, ਅਧਿਪਞ੍ਞਾਯ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਸ੍ਸ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਅਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਅਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ. ਯਸ੍ਸ ਵਾ ਪਨ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ. ਇਦਂ, ਭਿਕ੍ਖਵੇ, ਸਙ੍ਘਾਤਨਿਕਂ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਅਨਾਰਾਧਨੀਯਸ੍ਮਿਂ. ਏਵਮ੍ਪਿ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਅਨਾਰਾਧਕੋ ਹੋਤਿ. ਏਵਂ ਅਨਾਰਾਧਕੋ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਗਤੋ ਨ ਉਪਸਮ੍ਪਾਦੇਤਬ੍ਬੋ.

‘‘ਕਥਞ੍ਚ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ? ਇਧ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨਾਤਿਕਾਲੇਨ ਗਾਮਂ ਪਵਿਸਤਿ ਨਾਤਿਦਿਵਾ ਪਟਿਕ੍ਕਮਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨ ਵੇਸਿਯਾਗੋਚਰੋ ਹੋਤਿ, ਨ ਵਿਧਵਾਗੋਚਰੋ ਹੋਤਿ, ਨ ਥੁਲ੍ਲਕੁਮਾਰਿਕਾਗੋਚਰੋ ਹੋਤਿ, ਨ ਪਣ੍ਡਕਗੋਚਰੋ ਹੋਤਿ, ਨ ਭਿਕ੍ਖੁਨਿਗੋਚਰੋ ਹੋਤਿ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਾਨਿ ਤਾਨਿ ਸਬ੍ਰਹ੍ਮਚਾਰੀਨਂ ਉਚ੍ਚਾਵਚਾਨਿ ਕਰਣੀਯਾਨਿ, ਤਤ੍ਥ ਦਕ੍ਖੋ ਹੋਤਿ, ਅਨਲਸੋ, ਤਤ੍ਰੁਪਾਯਾਯ ਵੀਮਂਸਾਯ ਸਮਨ੍ਨਾਗਤੋ, ਅਲਂ ਕਾਤੁਂ, ਅਲਂ ਸਂਵਿਧਾਤੁਂ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਤਿਬ੍ਬਚ੍ਛਨ੍ਦੋ ਹੋਤਿ ਉਦ੍ਦੇਸੇ, ਪਰਿਪੁਚ੍ਛਾਯ, ਅਧਿਸੀਲੇ, ਅਧਿਚਿਤ੍ਤੇ, ਅਧਿਪਞ੍ਞਾਯ. ਏਵਮ੍ਪਿ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਯਸ੍ਸ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਅਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਅਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ. ਯਸ੍ਸ ਵਾ ਪਨ ਤਿਤ੍ਥਾਯਤਨਾ ਸਙ੍ਕਨ੍ਤੋ ਹੋਤਿ, ਤਸ੍ਸ ਸਤ੍ਥੁਨੋ ਤਸ੍ਸ ਦਿਟ੍ਠਿਯਾ ਤਸ੍ਸ ਖਨ੍ਤਿਯਾ ਤਸ੍ਸ ਰੁਚਿਯਾ ਤਸ੍ਸ ਆਦਾਯਸ੍ਸ ਵਣ੍ਣੇ ਭਞ੍ਞਮਾਨੇ ਕੁਪਿਤੋ ਹੋਤਿ ਅਨਤ੍ਤਮਨੋ ਅਨਭਿਰਦ੍ਧੋ, ਬੁਦ੍ਧਸ੍ਸ ਵਾ ਧਮ੍ਮਸ੍ਸ ਵਾ ਸਙ੍ਘਸ੍ਸ ਵਾ ਵਣ੍ਣੇ ਭਞ੍ਞਮਾਨੇ ਅਤ੍ਤਮਨੋ ਹੋਤਿ ਉਦਗ੍ਗੋ ਅਭਿਰਦ੍ਧੋ. ਇਦਂ, ਭਿਕ੍ਖਵੇ, ਸਙ੍ਘਾਤਨਿਕਂ ਅਞ੍ਞਤਿਤ੍ਥਿਯਪੁਬ੍ਬਸ੍ਸ ਆਰਾਧਨੀਯਸ੍ਮਿਂ. ਏਵਮ੍ਪਿ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਰਾਧਕੋ ਹੋਤਿ. ਏਵਂ ਆਰਾਧਕੋ ਖੋ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਆਗਤੋ ਉਪਸਮ੍ਪਾਦੇਤਬ੍ਬੋ.

‘‘ਸਚੇ, ਭਿਕ੍ਖਵੇ, ਅਞ੍ਞਤਿਤ੍ਥਿਯਪੁਬ੍ਬੋ ਨਗ੍ਗੋ ਆਗਚ੍ਛਤਿ, ਉਪਜ੍ਝਾਯਮੂਲਕਂ ਚੀਵਰਂ ਪਰਿਯੇਸਿਤਬ੍ਬਂ. ਸਚੇ ਅਚ੍ਛਿਨ੍ਨਕੇਸੋ ਆਗਚ੍ਛਤਿ, ਸਙ੍ਘੋ ਅਪਲੋਕੇਤਬ੍ਬੋ ਭਣ੍ਡੁਕਮ੍ਮਾਯ. ਯੇ ਤੇ, ਭਿਕ੍ਖਵੇ, ਅਗ੍ਗਿਕਾ ਜਟਿਲਕਾ, ਤੇ ਆਗਤਾ ਉਪਸਮ੍ਪਾਦੇਤਬ੍ਬਾ, ਨ ਤੇਸਂ ਪਰਿਵਾਸੋ ਦਾਤਬ੍ਬੋ. ਤਂ ਕਿਸ੍ਸ ਹੇਤੁ? ਕਮ੍ਮਵਾਦਿਨੋ ਏਤੇ, ਭਿਕ੍ਖਵੇ, ਕਿਰਿਯਵਾਦਿਨੋ. ਸਚੇ, ਭਿਕ੍ਖਵੇ, ਜਾਤਿਯਾ ਸਾਕਿਯੋ ਅਞ੍ਞਤਿਤ੍ਥਿਯਪੁਬ੍ਬੋ ਆਗਚ੍ਛਤਿ, ਸੋ ਆਗਤੋ ਉਪਸਮ੍ਪਾਦੇਤਬ੍ਬੋ, ਨ ਤਸ੍ਸ ਪਰਿਵਾਸੋ ਦਾਤਬ੍ਬੋ. ਇਮਾਹਂ, ਭਿਕ੍ਖਵੇ, ਞਾਤੀਨਂ ਆਵੇਣਿਕਂ ਪਰਿਹਾਰਂ ਦਮ੍ਮੀ’’ਤਿ.

ਅਞ੍ਞਤਿਤ੍ਥਿਯਪੁਬ੍ਬਕਥਾ ਨਿਟ੍ਠਿਤਾ.

ਸਤ੍ਤਮਭਾਣਵਾਰੋ.