੧੪. ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ

੬੦. ਤੇਨ ਖੋ ਪਨ ਸਮਯੇਨ ਸਞ੍ਚਯੋ [ਸਞ੍ਜਯੋ (ਸੀ. ਸ੍ਯਾ.)] ਪਰਿਬ੍ਬਾਜਕੋ ਰਾਜਗਹੇ ਪਟਿਵਸਤਿ ਮਹਤਿਯਾ ਪਰਿਬ੍ਬਾਜਕਪਰਿਸਾਯ ਸਦ੍ਧਿਂ ਅਡ੍ਢਤੇਯ੍ਯੇਹਿ ਪਰਿਬ੍ਬਾਜਕਸਤੇਹਿ. ਤੇਨ ਖੋ ਪਨ ਸਮਯੇਨ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਸਞ੍ਚਯੇ ਪਰਿਬ੍ਬਾਜਕੇ ਬ੍ਰਹ੍ਮਚਰਿਯਂ ਚਰਨ੍ਤਿ. ਤੇਹਿ ਕਤਿਕਾ ਕਤਾ ਹੋਤਿ – ਯੋ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਇਤਰਸ੍ਸ ਆਰੋਚੇਤੂਤਿ. ਅਥ ਖੋ ਆਯਸ੍ਮਾ ਅਸ੍ਸਜਿ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹਂ ਪਿਣ੍ਡਾਯ ਪਾਵਿਸਿ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ, ਓਕ੍ਖਿਤ੍ਤਚਕ੍ਖੁ ਇਰਿਯਾਪਥਸਮ੍ਪਨ੍ਨੋ. ਅਦ੍ਦਸਾ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਅਸ੍ਸਜਿਂ ਰਾਜਗਹੇ ਪਿਣ੍ਡਾਯ ਚਰਨ੍ਤਂ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁਂ ਇਰਿਯਾਪਥਸਮ੍ਪਨ੍ਨਂ. ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਯੇ ਵਤ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਅਯਂ ਤੇਸਂ ਭਿਕ੍ਖੁ ਅਞ੍ਞਤਰੋ. ਯਂਨੂਨਾਹਂ ਇਮਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਪੁਚ੍ਛੇਯ੍ਯਂ – ‘ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’’ਤਿ? ਅਥ ਖੋ ਸਾਰਿਪੁਤ੍ਤਸ੍ਸ ਪਰਿਬ੍ਬਾਜਕਸ੍ਸ ਏਤਦਹੋਸਿ – ‘‘ਅਕਾਲੋ ਖੋ ਇਮਂ ਭਿਕ੍ਖੁਂ ਪੁਚ੍ਛਿਤੁਂ, ਅਨ੍ਤਰਘਰਂ ਪਵਿਟ੍ਠੋ ਪਿਣ੍ਡਾਯ ਚਰਤਿ. ਯਂਨੂਨਾਹਂ ਇਮਂ ਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੇਯ੍ਯਂ, ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗ’’ਨ੍ਤਿ. ਅਥ ਖੋ ਆਯਸ੍ਮਾ ਅਸ੍ਸਜਿ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਂ ਆਦਾਯ ਪਟਿਕ੍ਕਮਿ. ਅਥ ਖੋ ਸਾਰਿਪੁਤ੍ਤੋਪਿ ਪਰਿਬ੍ਬਾਜਕੋ ਯੇਨਾਯਸ੍ਮਾ ਅਸ੍ਸਜਿ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਤਾ ਅਸ੍ਸਜਿਨਾ ਸਦ੍ਧਿਂ ਸਮ੍ਮੋਦਿ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤੋ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਅਸ੍ਸਜਿਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’ਤਿ? ‘‘ਅਤ੍ਥਾਵੁਸੋ, ਮਹਾਸਮਣੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ, ਤਾਹਂ ਭਗਵਨ੍ਤਂ ਉਦ੍ਦਿਸ੍ਸ ਪਬ੍ਬਜਿਤੋ, ਸੋ ਚ ਮੇ ਭਗਵਾ ਸਤ੍ਥਾ, ਤਸ੍ਸ ਚਾਹਂ ਭਗਵਤੋ ਧਮ੍ਮਂ ਰੋਚੇਮੀ’’ਤਿ. ‘‘ਕਿਂਵਾਦੀ ਪਨਾਯਸ੍ਮਤੋ ਸਤ੍ਥਾ, ਕਿਮਕ੍ਖਾਯੀ’’ਤਿ? ‘‘ਅਹਂ ਖੋ, ਆਵੁਸੋ, ਨਵੋ ਅਚਿਰਪਬ੍ਬਜਿਤੋ, ਅਧੁਨਾਗਤੋ ਇਮਂ ਧਮ੍ਮਵਿਨਯਂ, ਨ ਤਾਹਂ ਸਕ੍ਕੋਮਿ ਵਿਤ੍ਥਾਰੇਨ ਧਮ੍ਮਂ ਦੇਸੇਤੁਂ, ਅਪਿ ਚ ਤੇ ਸਂਖਿਤ੍ਤੇਨ ਅਤ੍ਥਂ ਵਕ੍ਖਾਮੀ’’ਤਿ. ਅਥ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਆਯਸ੍ਮਨ੍ਤਂ ਅਸ੍ਸਜਿਂ ਏਤਦਵੋਚ – ‘‘ਹੋਤੁ, ਆਵੁਸੋ –

‘‘ਅਪ੍ਪਂ ਵਾ ਬਹੁਂ ਵਾ ਭਾਸਸ੍ਸੁ, ਅਤ੍ਥਂਯੇਵ ਮੇ ਬ੍ਰੂਹਿ;

ਅਤ੍ਥੇਨੇਵ ਮੇ ਅਤ੍ਥੋ, ਕਿਂ ਕਾਹਸਿ ਬ੍ਯਞ੍ਜਨਂ ਬਹੁ’’ਨ੍ਤਿ.

ਅਥ ਖੋ ਆਯਸ੍ਮਾ ਅਸ੍ਸਜਿ ਸਾਰਿਪੁਤ੍ਤਸ੍ਸ ਪਰਿਬ੍ਬਾਜਕਸ੍ਸ ਇਮਂ ਧਮ੍ਮਪਰਿਯਾਯਂ ਅਭਾਸਿ –

[ਅਪ. ੧.੧.੨੮੬ ਥੇਰਾਪਦਾਨੇਪਿ] ‘‘ਯੇ ਧਮ੍ਮਾ ਹੇਤੁਪ੍ਪਭਵਾ, ਤੇਸਂ ਹੇਤੁਂ ਤਥਾਗਤੋ ਆਹ;

ਤੇਸਞ੍ਚ ਯੋ ਨਿਰੋਧੋ, ਏਵਂਵਾਦੀ ਮਹਾਸਮਣੋ’’ਤਿ.

ਅਥ ਖੋ ਸਾਰਿਪੁਤ੍ਤਸ੍ਸ ਪਰਿਬ੍ਬਾਜਕਸ੍ਸ ਇਮਂ ਧਮ੍ਮਪਰਿਯਾਯਂ ਸੁਤ੍ਵਾ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.

[ਅਪ. ੧.੧.੨੮੯ ਥੇਰਾਪਦਾਨੇਪਿ] ਏਸੇਵ ਧਮ੍ਮੋ ਯਦਿ ਤਾਵਦੇਵ, ਪਚ੍ਚਬ੍ਯਤ੍ਥ ਪਦਮਸੋਕਂ;

ਅਦਿਟ੍ਠਂ ਅਬ੍ਭਤੀਤਂ, ਬਹੁਕੇਹਿ ਕਪ੍ਪਨਹੁਤੇਹੀਤਿ.

੬੧. ਅਥ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ ਯੇਨ ਮੋਗ੍ਗਲ੍ਲਾਨੋ ਪਰਿਬ੍ਬਾਜਕੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ ਮੋਗ੍ਗਲ੍ਲਾਨੋ ਪਰਿਬ੍ਬਾਜਕੋ ਸਾਰਿਪੁਤ੍ਤਂ ਪਰਿਬ੍ਬਾਜਕਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਸਾਰਿਪੁਤ੍ਤਂ ਪਰਿਬ੍ਬਾਜਕਂ ਏਤਦਵੋਚ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ਕਚ੍ਚਿ ਨੁ ਤ੍ਵਂ, ਆਵੁਸੋ, ਅਮਤਂ ਅਧਿਗਤੋ’’ਤਿ? ‘‘ਆਮਾਵੁਸੋ, ਅਮਤਂ ਅਧਿਗਤੋ’’ਤਿ. ‘‘ਯਥਾਕਥਂ ਪਨ ਤ੍ਵਂ, ਆਵੁਸੋ, ਅਮਤਂ ਅਧਿਗਤੋ’’ਤਿ? ‘‘ਇਧਾਹਂ, ਆਵੁਸੋ, ਅਦ੍ਦਸਂ ਅਸ੍ਸਜਿਂ ਭਿਕ੍ਖੁਂ ਰਾਜਗਹੇ ਪਿਣ੍ਡਾਯ ਚਰਨ੍ਤਂ ਪਾਸਾਦਿਕੇਨ ਅਭਿਕ੍ਕਨ੍ਤੇਨ ਪਟਿਕ੍ਕਨ੍ਤੇਨ ਆਲੋਕਿਤੇਨ ਵਿਲੋਕਿਤੇਨ ਸਮਿਞ੍ਜਿਤੇਨ ਪਸਾਰਿਤੇਨ ਓਕ੍ਖਿਤ੍ਤਚਕ੍ਖੁਂ ਇਰਿਯਾਪਥਸਮ੍ਪਨ੍ਨਂ. ਦਿਸ੍ਵਾਨ ਮੇ ਏਤਦਹੋਸਿ – ‘ਯੇ ਵਤ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਅਯਂ ਤੇਸਂ ਭਿਕ੍ਖੁ ਅਞ੍ਞਤਰੋ. ਯਂਨੂਨਾਹਂ ਇਮਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਪੁਚ੍ਛੇਯ੍ਯਂ – ਕਂਸਿ ਤ੍ਵਂ, ਆਵੁਸੋ ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’’ਤਿ. ਤਸ੍ਸ ਮਯ੍ਹਂ, ਆਵੁਸੋ, ਏਤਦਹੋਸਿ – ‘‘ਅਕਾਲੋ ਖੋ ਇਮਂ ਭਿਕ੍ਖੁਂ ਪੁਚ੍ਛਿਤੁਂ ਅਨ੍ਤਰਘਰਂ ਪਵਿਟ੍ਠੋ ਪਿਣ੍ਡਾਯ ਚਰਤਿ, ਯਂਨੂਨਾਹਂ ਇਮਂ ਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੇਯ੍ਯਂ ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗ’’ਨ੍ਤਿ. ਅਥ ਖੋ, ਆਵੁਸੋ, ਅਸ੍ਸਜਿ ਭਿਕ੍ਖੁ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਂ ਆਦਾਯ ਪਟਿਕ੍ਕਮਿ. ਅਥ ਖ੍ਵਾਹਂ, ਆਵੁਸੋ, ਯੇਨ ਅਸ੍ਸਜਿ ਭਿਕ੍ਖੁ ਤੇਨੁਪਸਙ੍ਕਮਿਂ, ਉਪਸਙ੍ਕਮਿਤ੍ਵਾ ਅਸ੍ਸਜਿਨਾ ਭਿਕ੍ਖੁਨਾ ਸਦ੍ਧਿਂ ਸਮ੍ਮੋਦਿਂ, ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਅਟ੍ਠਾਸਿਂ. ਏਕਮਨ੍ਤਂ ਠਿਤੋ ਖੋ ਅਹਂ, ਆਵੁਸੋ, ਅਸ੍ਸਜਿਂ ਭਿਕ੍ਖੁਂ ਏਤਦਵੋਚਂ – ‘‘ਵਿਪ੍ਪਸਨ੍ਨਾਨਿ ਖੋ ਤੇ, ਆਵੁਸੋ, ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ ਪਰਿਯੋਦਾਤੋ. ‘ਕਂਸਿ ਤ੍ਵਂ, ਆਵੁਸੋ, ਉਦ੍ਦਿਸ੍ਸ ਪਬ੍ਬਜਿਤੋ, ਕੋ ਵਾ ਤੇ ਸਤ੍ਥਾ, ਕਸ੍ਸ ਵਾ ਤ੍ਵਂ ਧਮ੍ਮਂ ਰੋਚੇਸੀ’’’ਤਿ? ‘ਅਤ੍ਥਾਵੁਸੋ, ਮਹਾਸਮਣੋ ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ, ਤਾਹਂ ਭਗਵਨ੍ਤਂ ਉਦ੍ਦਿਸ੍ਸ ਪਬ੍ਬਜਿਤੋ, ਸੋ ਚ ਮੇ ਭਗਵਾ ਸਤ੍ਥਾ, ਤਸ੍ਸ ਚਾਹਂ ਭਗਵਤੋ ਧਮ੍ਮਂ ਰੋਚੇਮੀ’ਤਿ. ‘ਕਿਂਵਾਦੀ ਪਨਾਯਸ੍ਮਤੋ ਸਤ੍ਥਾ ਕਿਮਕ੍ਖਾਯੀ’ਤਿ. ‘ਅਹਂ ਖੋ, ਆਵੁਸੋ, ਨਵੋ ਅਚਿਰਪਬ੍ਬਜਿਤੋ ਅਧੁਨਾਗਤੋ ਇਮਂ ਧਮ੍ਮਵਿਨਯਂ, ਨ ਤਾਹਂ ਸਕ੍ਕੋਮਿ ਵਿਤ੍ਥਾਰੇਨ ਧਮ੍ਮਂ ਦੇਸੇਤੁਂ, ਅਪਿ ਚ ਤੇ ਸਂਖਿਤ੍ਤੇਨ ਅਤ੍ਥਂ ਵਕ੍ਖਾਮੀ’’’ਤਿ. ਅਥ ਖ੍ਵਾਹਂ, ਆਵੁਸੋ, ਅਸ੍ਸਜਿਂ ਭਿਕ੍ਖੁਂ ਏਤਦਵੋਚਂ – ‘‘ਹੋਤੁ, ਆਵੁਸੋ,

ਅਪ੍ਪਂ ਵਾ ਬਹੁਂ ਵਾ ਭਾਸਸ੍ਸੁ, ਅਤ੍ਥਂਯੇਵ ਮੇ ਬ੍ਰੂਹਿ;

ਅਤ੍ਥੇਨੇਵ ਮੇ ਅਤ੍ਥੋ, ਕਿਂ ਕਾਹਸਿ ਬ੍ਯਞ੍ਜਨਂ ਬਹੁ’’ਨ੍ਤਿ.

ਅਥ ਖੋ, ਆਵੁਸੋ, ਅਸ੍ਸਜਿ ਭਿਕ੍ਖੁ ਇਮਂ ਧਮ੍ਮਪਰਿਯਾਯਂ ਅਭਾਸਿ –

‘‘ਯੇ ਧਮ੍ਮਾ ਹੇਤੁਪ੍ਪਭਵਾ, ਤੇਸਂ ਹੇਤੁਂ ਤਥਾਗਤੋ ਆਹ;

ਤੇਸਞ੍ਚ ਯੋ ਨਿਰੋਧੋ, ਏਵਂਵਾਦੀ ਮਹਾਸਮਣੋ’’ਤਿ.

ਅਥ ਖੋ ਮੋਗ੍ਗਲ੍ਲਾਨਸ੍ਸ ਪਰਿਬ੍ਬਾਜਕਸ੍ਸ ਇਮਂ ਧਮ੍ਮਪਰਿਯਾਯਂ ਸੁਤ੍ਵਾ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮਨ੍ਤਿ.

ਏਸੇਵ ਧਮ੍ਮੋ ਯਦਿ ਤਾਵਦੇਵ, ਪਚ੍ਚਬ੍ਯਤ੍ਥ ਪਦਮਸੋਕਂ;

ਅਦਿਟ੍ਠਂ ਅਬ੍ਭਤੀਤਂ, ਬਹੁਕੇਹਿ ਕਪ੍ਪਨਹੁਤੇਹੀਤਿ.

੬੨. ਅਥ ਖੋ ਮੋਗ੍ਗਲ੍ਲਾਨੋ ਪਰਿਬ੍ਬਾਜਕੋ ਸਾਰਿਪੁਤ੍ਤਂ ਪਰਿਬ੍ਬਾਜਕਂ ਏਤਦਵੋਚ ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਇਮਾਨਿ ਖੋ, ਆਵੁਸੋ, ਅਡ੍ਢਤੇਯ੍ਯਾਨਿ ਪਰਿਬ੍ਬਾਜਕਸਤਾਨਿ ਅਮ੍ਹੇ ਨਿਸ੍ਸਾਯ ਅਮ੍ਹੇ ਸਮ੍ਪਸ੍ਸਨ੍ਤਾ ਇਧ ਵਿਹਰਨ੍ਤਿ, ਤੇਪਿ ਤਾਵ ਅਪਲੋਕੇਮ [ਅਪਲੋਕਾਮ (ਕ)]. ਯਥਾ ਤੇ ਮਞ੍ਞਿਸ੍ਸਨ੍ਤਿ, ਤਥਾ ਤੇ ਕਰਿਸ੍ਸਨ੍ਤੀ’’ਤਿ. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਯੇਨ ਤੇ ਪਰਿਬ੍ਬਾਜਕਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਤੇ ਪਰਿਬ੍ਬਾਜਕੇ ਏਤਦਵੋਚੁਂ – ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਮਯਂ ਆਯਸ੍ਮਨ੍ਤੇ ਨਿਸ੍ਸਾਯ ਆਯਸ੍ਮਨ੍ਤੇ ਸਮ੍ਪਸ੍ਸਨ੍ਤਾ ਇਧ ਵਿਹਰਾਮ, ਸਚੇ ਆਯਸ੍ਮਨ੍ਤਾ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਨ੍ਤਿ, ਸਬ੍ਬੇਵ ਮਯਂ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਾਮਾ’’ਤਿ. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਯੇਨ ਸਞ੍ਚਯੋ ਪਰਿਬ੍ਬਾਜਕੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਸਞ੍ਚਯਂ ਪਰਿਬ੍ਬਾਜਕਂ ਏਤਦਵੋਚੁਂ – ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਅਲਂ, ਆਵੁਸੋ, ਮਾ ਅਗਮਿਤ੍ਥ, ਸਬ੍ਬੇਵ ਤਯੋ ਇਮਂ ਗਣਂ ਪਰਿਹਰਿਸ੍ਸਾਮਾ’’ਤਿ. ਦੁਤਿਯਮ੍ਪਿ ਖੋ…ਪੇ… ਤਤਿਯਮ੍ਪਿ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਸਞ੍ਚਯਂ ਪਰਿਬ੍ਬਾਜਕਂ ਏਤਦਵੋਚੁਂ – ‘‘ਗਚ੍ਛਾਮ ਮਯਂ, ਆਵੁਸੋ, ਭਗਵਤੋ ਸਨ੍ਤਿਕੇ, ਸੋ ਨੋ ਭਗਵਾ ਸਤ੍ਥਾ’’ਤਿ. ‘‘ਅਲਂ, ਆਵੁਸੋ, ਮਾ ਅਗਮਿਤ੍ਥ, ਸਬ੍ਬੇਵ ਤਯੋ ਇਮਂ ਗਣਂ ਪਰਿਹਰਿਸ੍ਸਾਮਾ’’ਤਿ. ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਤਾਨਿ ਅਡ੍ਢਤੇਯ੍ਯਾਨਿ ਪਰਿਬ੍ਬਾਜਕਸਤਾਨਿ ਆਦਾਯ ਯੇਨ ਵੇਲ਼ੁਵਨਂ ਤੇਨੁਪਸਙ੍ਕਮਿਂਸੁ. ਸਞ੍ਚਯਸ੍ਸ ਪਨ ਪਰਿਬ੍ਬਾਜਕਸ੍ਸ ਤਤ੍ਥੇਵ ਉਣ੍ਹਂ ਲੋਹਿਤਂ ਮੁਖਤੋ ਉਗ੍ਗਞ੍ਛਿ.

ਅਦ੍ਦਸਾ ਖੋ ਭਗਵਾ [ਭਗਵਾਤੇ (ਕ)] ਸਾਰਿਪੁਤ੍ਤਮੋਗ੍ਗਲ੍ਲਾਨੇ ਦੂਰਤੋਵ ਆਗਚ੍ਛਨ੍ਤੇ, ਦਿਸ੍ਵਾਨ ਭਿਕ੍ਖੂ ਆਮਨ੍ਤੇਸਿ – ‘‘ਏਤੇ, ਭਿਕ੍ਖਵੇ, ਦ੍ਵੇ ਸਹਾਯਕਾ ਆਗਚ੍ਛਨ੍ਤਿ, ਕੋਲਿਤੋ ਉਪਤਿਸ੍ਸੋ ਚ. ਏਤਂ ਮੇ ਸਾਵਕਯੁਗਂ ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗ’’ਨ੍ਤਿ.

ਗਮ੍ਭੀਰੇ ਞਾਣਵਿਸਯੇ, ਅਨੁਤ੍ਤਰੇ ਉਪਧਿਸਙ੍ਖਯੇ;

ਵਿਮੁਤ੍ਤੇ ਅਪ੍ਪਤ੍ਤੇ ਵੇਲ਼ੁਵਨਂ, ਅਥ ਨੇ ਸਤ੍ਥਾ ਬ੍ਯਾਕਾਸਿ.

ਏਤੇ ਦ੍ਵੇ ਸਹਾਯਕਾ, ਆਗਚ੍ਛਨ੍ਤਿ ਕੋਲਿਤੋ ਉਪਤਿਸ੍ਸੋ ਚ;

ਏਤਂ ਮੇ ਸਾਵਕਯੁਗਂ, ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗਨ੍ਤਿ.

ਅਥ ਖੋ ਸਾਰਿਪੁਤ੍ਤਮੋਗ੍ਗਲ੍ਲਾਨਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ

ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਅਭਿਞ੍ਞਾਤਾਨਂ ਪਬ੍ਬਜ੍ਜਾ

੬੩. ਤੇਨ ਖੋ ਪਨ ਸਮਯੇਨ ਅਭਿਞ੍ਞਾਤਾ ਅਭਿਞ੍ਞਾਤਾ ਮਾਗਧਿਕਾ ਕੁਲਪੁਤ੍ਤਾ ਭਗਵਤਿ ਬ੍ਰਹ੍ਮਚਰਿਯਂ ਚਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ਅਪੁਤ੍ਤਕਤਾਯ ਪਟਿਪਨ੍ਨੋ ਸਮਣੋ ਗੋਤਮੋ, ਵੇਧਬ੍ਯਾਯ ਪਟਿਪਨ੍ਨੋ ਸਮਣੋ ਗੋਤਮੋ, ਕੁਲੁਪਚ੍ਛੇਦਾਯ ਪਟਿਪਨ੍ਨੋ ਸਮਣੋ ਗੋਤਮੋ, ਇਦਾਨਿ ਅਨੇਨ ਜਟਿਲਸਹਸ੍ਸਂ ਪਬ੍ਬਾਜਿਤਂ, ਇਮਾਨਿ ਚ ਅਡ੍ਢਤੇਯ੍ਯਾਨਿ ਪਰਿਬ੍ਬਾਜਕਸਤਾਨਿ ਸਞ੍ਚਯਾਨਿ [ਸਞ੍ਜੇਯ੍ਯਾਨਿ (ਸੀ.), ਸਞ੍ਜਯਾਨਿ (ਸ੍ਯਾ.)] ਪਬ੍ਬਾਜਿਤਾਨਿ. ਇਮੇ ਚ ਅਭਿਞ੍ਞਾਤਾ ਅਭਿਞ੍ਞਾਤਾ ਮਾਗਧਿਕਾ ਕੁਲਪੁਤ੍ਤਾ ਸਮਣੇ ਗੋਤਮੇ ਬ੍ਰਹ੍ਮਚਰਿਯਂ ਚਰਨ੍ਤੀਤਿ. ਅਪਿਸ੍ਸੁ ਭਿਕ੍ਖੂ ਦਿਸ੍ਵਾ ਇਮਾਯ ਗਾਥਾਯ ਚੋਦੇਨ੍ਤਿ –

‘‘ਆਗਤੋ ਖੋ ਮਹਾਸਮਣੋ, ਮਾਗਧਾਨਂ ਗਿਰਿਬ੍ਬਜਂ;

ਸਬ੍ਬੇ ਸਞ੍ਚਯੇ ਨੇਤ੍ਵਾਨ [ਸਞ੍ਜੇਯ੍ਯਕੇ ਨੇਤ੍ਵਾ (ਸੀ.)], ਕਂਸੁ ਦਾਨਿ ਨਯਿਸ੍ਸਤੀ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਨ, ਭਿਕ੍ਖਵੇ, ਸੋ ਸਦ੍ਦੋ ਚਿਰਂ ਭਵਿਸ੍ਸਤਿ, ਸਤ੍ਤਾਹਮੇਵ ਭਵਿਸ੍ਸਤਿ, ਸਤ੍ਤਾਹਸ੍ਸ ਅਚ੍ਚਯੇਨ ਅਨ੍ਤਰਧਾਯਿਸ੍ਸਤਿ. ਤੇਨ ਹਿ, ਭਿਕ੍ਖਵੇ, ਯੇ ਤੁਮ੍ਹੇ ਇਮਾਯ ਗਾਥਾਯ ਚੋਦੇਨ੍ਤਿ –

‘‘ਆਗਤੋ ਖੋ ਮਹਾਸਮਣੋ, ਮਾਗਧਾਨਂ ਗਿਰਿਬ੍ਬਜਂ;

ਸਬ੍ਬੇ ਸਞ੍ਚਯੇ ਨੇਤ੍ਵਾਨ, ਕਂਸੁ ਦਾਨਿ ਨਯਿਸ੍ਸਤੀ’’ਤਿ.

ਤੇ ਤੁਮ੍ਹੇ ਇਮਾਯ ਗਾਥਾਯ ਪਟਿਚੋਦੇਥ –

‘‘ਨਯਨ੍ਤਿ ਵੇ ਮਹਾਵੀਰਾ, ਸਦ੍ਧਮ੍ਮੇਨ ਤਥਾਗਤਾ;

ਧਮ੍ਮੇਨ ਨਯਮਾਨਾਨਂ [ਨੀਯਮਾਨਾਨਂ (ਕ.)], ਕਾ ਉਸੂਯਾ [ਉਸ੍ਸੁਯਾ (ਕ.)] ਵਿਜਾਨਤ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਮਨੁਸ੍ਸਾ ਭਿਕ੍ਖੂ ਦਿਸ੍ਵਾ ਇਮਾਯ ਗਾਥਾਯ ਚੋਦੇਨ੍ਤਿ –

‘‘ਆਗਤੋ ਖੋ ਮਹਾਸਮਣੋ, ਮਾਗਧਾਨਂ ਗਿਰਿਬ੍ਬਜਂ;

ਸਬ੍ਬੇ ਸਞ੍ਚਯੇ ਨੇਤ੍ਵਾਨ, ਕਂਸੁ ਦਾਨਿ ਨਯਿਸ੍ਸਤੀ’’ਤਿ.

ਭਿਕ੍ਖੂ ਤੇ ਮਨੁਸ੍ਸੇ ਇਮਾਯ ਗਾਥਾਯ ਪਟਿਚੋਦੇਨ੍ਤਿ –

‘‘ਨਯਨ੍ਤਿ ਵੇ ਮਹਾਵੀਰਾ, ਸਦ੍ਧਮ੍ਮੇਨ ਤਥਾਗਤਾ;

ਧਮ੍ਮੇਨ ਨਯਮਾਨਾਨਂ, ਕਾ ਉਸੂਯਾ ਵਿਜਾਨਤ’’ਨ੍ਤਿ.

ਮਨੁਸ੍ਸਾ ਧਮ੍ਮੇਨ ਕਿਰ ਸਮਣਾ ਸਕ੍ਯਪੁਤ੍ਤਿਯਾ ਨੇਨ੍ਤਿ ਨੋ ਅਧਮ੍ਮੇਨਾਤਿ ਸਤ੍ਤਾਹਮੇਵ ਸੋ ਸਦ੍ਦੋ ਅਹੋਸਿ, ਸਤ੍ਤਾਹਸ੍ਸ ਅਚ੍ਚਯੇਨ ਅਨ੍ਤਰਧਾਯਿ.

ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ ਨਿਟ੍ਠਿਤਾ.

ਚਤੁਤ੍ਥਭਾਣਵਾਰੋ ਨਿਟ੍ਠਿਤੋ.