੧੫. ਉਪਜ੍ਝਾਯਵਤ੍ਤਕਥਾ

੬੪. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਅਨੁਪਜ੍ਝਾਯਕਾ ਅਨਾਚਰਿਯਕਾ [ਇਦਂ ਪਦਂ ਸੀ. ਸ੍ਯਾ. ਪੋਤ੍ਥਕੇਸੁ ਨਤ੍ਥਿ] ਅਨੋਵਦਿਯਮਾਨਾ ਅਨਨੁਸਾਸਿਯਮਾਨਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ; ਮਨੁਸ੍ਸਾਨਂ [ਤੇ ਮਨੁਸ੍ਸਾਨਂ (ਕ.)] ਭੁਞ੍ਜਮਾਨਾਨਂ ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ; ਮਨੁਸ੍ਸਾਨਂ ਭੁਞ੍ਜਮਾਨਾਨਂ, ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤਿ ਸੇਯ੍ਯਥਾਪਿ ਬ੍ਰਾਹ੍ਮਣਾ ਬ੍ਰਾਹ੍ਮਣਭੋਜਨੇ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਲਜ੍ਜਿਨੋ ਕੁਕ੍ਕੁਚ੍ਚਕਾ ਸਿਕ੍ਖਾਕਾਮਾ, ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ; ਮਨੁਸ੍ਸਾਨਂ ਭੁਞ੍ਜਮਾਨਾਨਂ, ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ; ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ; ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤੀ’’ਤਿ. ਅਥ ਖੋ ਤੇ ਭਿਕ੍ਖੂ…ਪੇ… ਭਗਵਤੋ ਏਤਮਤ੍ਥਂ ਆਰੋਚੇਸੁਂ.

ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਨ੍ਤਿ, ਮਨੁਸ੍ਸਾਨਂ ਭੁਞ੍ਜਮਾਨਾਨਂ ਉਪਰਿ ਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਨ੍ਤਿ, ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਨ੍ਤਿ, ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਨ੍ਤੀ’’ਤਿ? ‘‘ਸਚ੍ਚਂ ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਭਿਕ੍ਖਵੇ, ਤੇਸਂ ਮੋਘਪੁਰਿਸਾਨਂ ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਦੁਨ੍ਨਿਵਤ੍ਥਾ ਦੁਪ੍ਪਾਰੁਤਾ ਅਨਾਕਪ੍ਪਸਮ੍ਪਨ੍ਨਾ ਪਿਣ੍ਡਾਯ ਚਰਿਸ੍ਸਨ੍ਤਿ, ਮਨੁਸ੍ਸਾਨਂ ਭੁਞ੍ਜਮਾਨਾਨਂ ਉਪਰਿਭੋਜਨੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਖਾਦਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਸਾਯਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਉਪਰਿਪਾਨੀਯੇਪਿ ਉਤ੍ਤਿਟ੍ਠਪਤ੍ਤਂ ਉਪਨਾਮੇਸ੍ਸਨ੍ਤਿ, ਸਾਮਂ ਸੂਪਮ੍ਪਿ ਓਦਨਮ੍ਪਿ ਵਿਞ੍ਞਾਪੇਤ੍ਵਾ ਭੁਞ੍ਜਿਸ੍ਸਨ੍ਤਿ, ਭਤ੍ਤਗ੍ਗੇਪਿ ਉਚ੍ਚਾਸਦ੍ਦਾ ਮਹਾਸਦ੍ਦਾ ਵਿਹਰਿਸ੍ਸਨ੍ਤਿ. ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ, ਪਸਨ੍ਨਾਨਂ ਵਾ ਭਿਯ੍ਯੋਭਾਵਾਯ. ਅਥ ਖ੍ਵੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਞ੍ਚੇਵ ਅਪ੍ਪਸਾਦਾਯ, ਪਸਨ੍ਨਾਨਞ੍ਚ ਏਕਚ੍ਚਾਨਂ ਅਞ੍ਞਥਤ੍ਤਾਯਾ’’ਤਿ. ਅਥ ਖੋ ਭਗਵਾ ਤੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਦੁਬ੍ਭਰਤਾਯ ਦੁਪ੍ਪੋਸਤਾਯ ਮਹਿਚ੍ਛਤਾਯ ਅਸਨ੍ਤੁਟ੍ਠਿਤਾਯ [ਅਸਨ੍ਤੁਟ੍ਠਿਯਾ (ਸੀ.), ਅਸਨ੍ਤੁਟ੍ਠਤਾਯ (ਸ੍ਯਾ)] ਸਙ੍ਗਣਿਕਾਯ ਕੋਸਜ੍ਜਸ੍ਸ ਅਵਣ੍ਣਂ ਭਾਸਿਤ੍ਵਾ ਅਨੇਕਪਰਿਯਾਯੇਨ ਸੁਭਰਤਾਯ ਸੁਪੋਸਤਾਯ ਅਪ੍ਪਿਚ੍ਛਸ੍ਸ ਸਨ੍ਤੁਟ੍ਠਸ੍ਸ ਸਲ੍ਲੇਖਸ੍ਸ ਧੁਤਸ੍ਸ ਪਾਸਾਦਿਕਸ੍ਸ ਅਪਚਯਸ੍ਸ ਵੀਰਿਯਾਰਮ੍ਭਸ੍ਸ [ਵਿਰਿਯਾਰਮ੍ਭਸ੍ਸ (ਸੀ. ਸ੍ਯਾ.)] ਵਣ੍ਣਂ ਭਾਸਿਤ੍ਵਾ ਭਿਕ੍ਖੂਨਂ ਤਦਨੁਚ੍ਛਵਿਕਂ ਤਦਨੁਲੋਮਿਕਂ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੬੫. ‘‘ਅਨੁਜਾਨਾਮਿ, ਭਿਕ੍ਖਵੇ, ਉਪਜ੍ਝਾਯਂ. ਉਪਜ੍ਝਾਯੋ, ਭਿਕ੍ਖਵੇ, ਸਦ੍ਧਿਵਿਹਾਰਿਕਮ੍ਹਿ ਪੁਤ੍ਤਚਿਤ੍ਤਂ ਉਪਟ੍ਠਪੇਸ੍ਸਤਿ, ਸਦ੍ਧਿਵਿਹਾਰਿਕੋ ਉਪਜ੍ਝਾਯਮ੍ਹਿ ਪਿਤੁਚਿਤ੍ਤਂ ਉਪਟ੍ਠਪੇਸ੍ਸਤਿ. ਏਵਂ ਤੇ ਅਞ੍ਞਮਞ੍ਞਂ ਸਗਾਰਵਾ ਸਪ੍ਪਤਿਸ੍ਸਾ ਸਭਾਗਵੁਤ੍ਤਿਨੋ ਵਿਹਰਨ੍ਤਾ ਇਮਸ੍ਮਿਂ ਧਮ੍ਮਵਿਨਯੇ ਵੁਡ੍ਢਿਂ ਵਿਰੁਲ਼੍ਹਿਂ ਵੇਪੁਲ੍ਲਂ ਆਪਜ੍ਜਿਸ੍ਸਨ੍ਤਿ. ਏਵਞ੍ਚ ਪਨ, ਭਿਕ੍ਖਵੇ, ਉਪਜ੍ਝਾਯੋ ਗਹੇਤਬ੍ਬੋ – ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਉਪਜ੍ਝਾਯੋ ਮੇ, ਭਨ੍ਤੇ, ਹੋਹਿ; ਉਪਜ੍ਝਾਯੋ ਮੇ, ਭਨ੍ਤੇ, ਹੋਹਿ; ਉਪਜ੍ਝਾਯੋ ਮੇ, ਭਨ੍ਤੇ, ਹੋਹੀ’ਤਿ. ਸਾਹੂਤਿ ਵਾ ਲਹੂਤਿ ਵਾ ਓਪਾਯਿਕਨ੍ਤਿ ਵਾ ਪਤਿਰੂਪਨ੍ਤਿ ਵਾ ਪਾਸਾਦਿਕੇਨ ਸਮ੍ਪਾਦੇਹੀਤਿ ਵਾ ਕਾਯੇਨ ਵਿਞ੍ਞਾਪੇਤਿ, ਵਾਚਾਯ ਵਿਞ੍ਞਾਪੇਤਿ, ਕਾਯੇਨ ਵਾਚਾਯ [ਨ ਵਾਚਾਯ (ਕ.)] ਵਿਞ੍ਞਾਪੇਤਿ, ਗਹਿਤੋ ਹੋਤਿ ਉਪਜ੍ਝਾਯੋ; ਨ ਕਾਯੇਨ ਵਿਞ੍ਞਾਪੇਤਿ, ਨ ਵਾਚਾਯ ਵਿਞ੍ਞਾਪੇਤਿ, ਨ ਕਾਯੇਨ ਵਾਚਾਯ ਵਿਞ੍ਞਾਪੇਤਿ, ਨ ਗਹਿਤੋ ਹੋਤਿ ਉਪਜ੍ਝਾਯੋ.

੬੬. [ਚੂਲ਼ਵ. ੩੭੬ ਆਦਯੋ]‘‘ਸਦ੍ਧਿਵਿਹਾਰਿਕੇਨ, ਭਿਕ੍ਖਵੇ, ਉਪਜ੍ਝਾਯਮ੍ਹਿ ਸਮ੍ਮਾ ਵਤ੍ਤਿਤਬ੍ਬਂ. ਤਤ੍ਰਾਯਂ ਸਮ੍ਮਾਵਤ੍ਤਨਾ –

‘‘ਕਾਲਸ੍ਸੇਵ ਵੁਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਦਨ੍ਤਕਟ੍ਠਂ ਦਾਤਬ੍ਬਂ, ਮੁਖੋਦਕਂ ਦਾਤਬ੍ਬਂ, ਆਸਨਂ ਪਞ੍ਞਪੇਤਬ੍ਬਂ. ਸਚੇ ਯਾਗੁ ਹੋਤਿ, ਭਾਜਨਂ ਧੋਵਿਤ੍ਵਾ ਯਾਗੁ ਉਪਨਾਮੇਤਬ੍ਬਾ. ਯਾਗੁਂ ਪੀਤਸ੍ਸ ਉਦਕਂ ਦਤ੍ਵਾ ਭਾਜਨਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਪਟਿਸਾਮੇਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਉਪਜ੍ਝਾਯੋ ਗਾਮਂ ਪਵਿਸਿਤੁਕਾਮੋ ਹੋਤਿ, ਨਿਵਾਸਨਂ ਦਾਤਬ੍ਬਂ, ਪਟਿਨਿਵਾਸਨਂ ਪਟਿਗ੍ਗਹੇਤਬ੍ਬਂ, ਕਾਯਬਨ੍ਧਨਂ ਦਾਤਬ੍ਬਂ, ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਦਾਤਬ੍ਬਾ, ਧੋਵਿਤ੍ਵਾ ਪਤ੍ਤੋ ਸੋਦਕੋ [ਸਉਦਕੋ (ਕ.)] ਦਾਤਬ੍ਬੋ. ਸਚੇ ਉਪਜ੍ਝਾਯੋ ਪਚ੍ਛਾਸਮਣਂ ਆਕਙ੍ਖਤਿ, ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਸਗੁਣਂ ਕਤ੍ਵਾ ਸਙ੍ਘਾਟਿਯੋ ਪਾਰੁਪਿਤ੍ਵਾ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਧੋਵਿਤ੍ਵਾ ਪਤ੍ਤਂ ਗਹੇਤ੍ਵਾ ਉਪਜ੍ਝਾਯਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ. ਨਾਤਿਦੂਰੇ ਗਨ੍ਤਬ੍ਬਂ, ਨਾਚ੍ਚਾਸਨ੍ਨੇ ਗਨ੍ਤਬ੍ਬਂ, ਪਤ੍ਤਪਰਿਯਾਪਨ੍ਨਂ ਪਟਿਗ੍ਗਹੇਤਬ੍ਬਂ. ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾ. ਉਪਜ੍ਝਾਯੋ ਆਪਤ੍ਤਿਸਾਮਨ੍ਤਾ ਭਣਮਾਨੋ ਨਿਵਾਰੇਤਬ੍ਬੋ.

‘‘ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਪਚ੍ਚੁਗ੍ਗਨ੍ਤ੍ਵਾ ਪਤ੍ਤਚੀਵਰਂ ਪਟਿਗ੍ਗਹੇਤਬ੍ਬਂ, ਪਟਿਨਿਵਾਸਨਂ ਦਾਤਬ੍ਬਂ, ਨਿਵਾਸਨਂ ਪਟਿਗ੍ਗਹੇਤਬ੍ਬਂ. ਸਚੇ ਚੀਵਰਂ ਸਿਨ੍ਨਂ ਹੋਤਿ, ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬਂ, ਨ ਚ ਉਣ੍ਹੇ ਚੀਵਰਂ ਨਿਦਹਿਤਬ੍ਬਂ; ਚੀਵਰਂ ਸਙ੍ਘਰਿਤਬ੍ਬਂ, ਚੀਵਰਂ ਸਙ੍ਘਰਨ੍ਤੇਨ ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾ ਚੀਵਰਂ ਸਙ੍ਘਰਿਤਬ੍ਬਂ – ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਂ.

‘‘ਸਚੇ ਪਿਣ੍ਡਪਾਤੋ ਹੋਤਿ, ਉਪਜ੍ਝਾਯੋ ਚ ਭੁਞ੍ਜਿਤੁਕਾਮੋ ਹੋਤਿ, ਉਦਕਂ ਦਤ੍ਵਾ ਪਿਣ੍ਡਪਾਤੋ ਉਪਨਾਮੇਤਬ੍ਬੋ. ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਭੁਤ੍ਤਾਵਿਸ੍ਸ ਉਦਕਂ ਦਤ੍ਵਾ ਪਤ੍ਤਂ ਪਟਿਗ੍ਗਹੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ ਧੋਵਿਤ੍ਵਾ ਵੋਦਕਂ ਕਤ੍ਵਾ ਮੁਹੁਤ੍ਤਂ ਉਣ੍ਹੇ ਓਤਾਪੇਤਬ੍ਬੋ, ਨ ਚ ਉਣ੍ਹੇ ਪਤ੍ਤੋ ਨਿਦਹਿਤਬ੍ਬੋ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ. ਉਪਜ੍ਝਾਯਮ੍ਹਿ ਵੁਟ੍ਠਿਤੇ ਆਸਨਂ ਉਦ੍ਧਰਿਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਪਟਿਸਾਮੇਤਬ੍ਬਂ. ਸਚੇ ਸੋ ਦੇਸੋ ਉਕ੍ਲਾਪੋ ਹੋਤਿ, ਸੋ ਦੇਸੋ ਸਮ੍ਮਜ੍ਜਿਤਬ੍ਬੋ.

‘‘ਸਚੇ ਉਪਜ੍ਝਾਯੋ ਨਹਾਯਿਤੁਕਾਮੋ ਹੋਤਿ, ਨਹਾਨਂ ਪਟਿਯਾਦੇਤਬ੍ਬਂ. ਸਚੇ ਸੀਤੇਨ ਅਤ੍ਥੋ ਹੋਤਿ, ਸੀਤਂ ਪਟਿਯਾਦੇਤਬ੍ਬਂ. ਸਚੇ ਉਣ੍ਹੇਨ ਅਤ੍ਥੋ ਹੋਤਿ, ਉਣ੍ਹਂ ਪਟਿਯਾਦੇਤਬ੍ਬਂ.

‘‘ਸਚੇ ਉਪਜ੍ਝਾਯੋ ਜਨ੍ਤਾਘਰਂ ਪਵਿਸਿਤੁਕਾਮੋ ਹੋਤਿ, ਚੁਣ੍ਣਂ ਸਨ੍ਨੇਤਬ੍ਬਂ, ਮਤ੍ਤਿਕਾ ਤੇਮੇਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਉਪਜ੍ਝਾਯਸ੍ਸ ਪਿਟ੍ਠਿਤੋ ਪਿਟ੍ਠਿਤੋ ਗਨ੍ਤ੍ਵਾ ਜਨ੍ਤਾਘਰਪੀਠਂ ਦਤ੍ਵਾ ਚੀਵਰਂ ਪਟਿਗ੍ਗਹੇਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ, ਚੁਣ੍ਣਂ ਦਾਤਬ੍ਬਂ, ਮਤ੍ਤਿਕਾ ਦਾਤਬ੍ਬਾ. ਸਚੇ ਉਸ੍ਸਹਤਿ, ਜਨ੍ਤਾਘਰਂ ਪਵਿਸਿਤਬ੍ਬਂ. ਜਨ੍ਤਾਘਰਂ ਪਵਿਸਨ੍ਤੇਨ ਮਤ੍ਤਿਕਾਯ ਮੁਖਂ ਮਕ੍ਖੇਤ੍ਵਾ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਂ ਪਵਿਸਿਤਬ੍ਬਂ. ਨ ਥੇਰੇ ਭਿਕ੍ਖੂ ਅਨੁਪਖਜ੍ਜ ਨਿਸੀਦਿਤਬ੍ਬਂ. ਨ ਨਵਾ ਭਿਕ੍ਖੂ ਆਸਨੇਨ ਪਟਿਬਾਹਿਤਬ੍ਬਾ. ਜਨ੍ਤਾਘਰੇ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਜਨ੍ਤਾਘਰਾ ਨਿਕ੍ਖਮਨ੍ਤੇਨ ਜਨ੍ਤਾਘਰਪੀਠਂ ਆਦਾਯ ਪੁਰਤੋ ਚ ਪਚ੍ਛਤੋ ਚ ਪਟਿਚ੍ਛਾਦੇਤ੍ਵਾ ਜਨ੍ਤਾਘਰਾ ਨਿਕ੍ਖਮਿਤਬ੍ਬਂ.

‘‘ਉਦਕੇਪਿ ਉਪਜ੍ਝਾਯਸ੍ਸ ਪਰਿਕਮ੍ਮਂ ਕਾਤਬ੍ਬਂ. ਨਹਾਤੇਨ ਪਠਮਤਰਂ ਉਤ੍ਤਰਿਤ੍ਵਾ ਅਤ੍ਤਨੋ ਗਤ੍ਤਂ ਵੋਦਕਂ ਕਤ੍ਵਾ ਨਿਵਾਸੇਤ੍ਵਾ ਉਪਜ੍ਝਾਯਸ੍ਸ ਗਤ੍ਤਤੋ ਉਦਕਂ ਪਮਜ੍ਜਿਤਬ੍ਬਂ, ਨਿਵਾਸਨਂ ਦਾਤਬ੍ਬਂ, ਸਙ੍ਘਾਟਿ ਦਾਤਬ੍ਬਾ, ਜਨ੍ਤਾਘਰਪੀਠਂ ਆਦਾਯ ਪਠਮਤਰਂ ਆਗਨ੍ਤ੍ਵਾ ਆਸਨਂ ਪਞ੍ਞਪੇਤਬ੍ਬਂ, ਪਾਦੋਦਕਂ ਪਾਦਪੀਠਂ ਪਾਦਕਥਲਿਕਂ ਉਪਨਿਕ੍ਖਿਪਿਤਬ੍ਬਂ, ਉਪਜ੍ਝਾਯੋ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਉਦ੍ਦਿਸਾਪੇਤੁਕਾਮੋ ਹੋਤਿ, ਉਦ੍ਦਿਸਿਤਬ੍ਬੋ. ਸਚੇ ਪਰਿਪੁਚ੍ਛਿਤੁਕਾਮੋ ਹੋਤਿ, ਪਰਿਪੁਚ੍ਛਿਤਬ੍ਬੋ.

‘‘ਯਸ੍ਮਿਂ ਵਿਹਾਰੇ ਉਪਜ੍ਝਾਯੋ ਵਿਹਰਤਿ, ਸਚੇ ਸੋ ਵਿਹਾਰੋ ਉਕ੍ਲਾਪੋ ਹੋਤਿ, ਸਚੇ ਉਸ੍ਸਹਤਿ, ਸੋਧੇਤਬ੍ਬੋ. ਵਿਹਾਰਂ ਸੋਧੇਨ੍ਤੇਨ ਪਠਮਂ ਪਤ੍ਤਚੀਵਰਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਭਿਸਿਬਿਬ੍ਬੋਹਨਂ [ਭਿਸਿਬਿਮ੍ਬੋਹਨਂ (ਸੀ. ਸ੍ਯਾ.)] ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਮਞ੍ਚੋ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ. ਪੀਠਂ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਮਞ੍ਚਪਟਿਪਾਦਕਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਾ. ਖੇਲ਼ਮਲ੍ਲਕੋ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬੋ. ਅਪਸ੍ਸੇਨਫਲਕਂ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਭੂਮਤ੍ਥਰਣਂ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਂ. ਸਚੇ ਵਿਹਾਰੇ ਸਨ੍ਤਾਨਕਂ ਹੋਤਿ, ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਂ, ਆਲੋਕਸਨ੍ਧਿਕਣ੍ਣਭਾਗਾ ਪਮਜ੍ਜਿਤਬ੍ਬਾ. ਸਚੇ ਗੇਰੁਕਪਰਿਕਮ੍ਮਕਤਾ ਭਿਤ੍ਤਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਕਾਲ਼ਵਣ੍ਣਕਤਾ ਭੂਮਿ ਕਣ੍ਣਕਿਤਾ ਹੋਤਿ, ਚੋਲ਼ਕਂ ਤੇਮੇਤ੍ਵਾ ਪੀਲ਼ੇਤ੍ਵਾ ਪਮਜ੍ਜਿਤਬ੍ਬਾ. ਸਚੇ ਅਕਤਾ ਹੋਤਿ ਭੂਮਿ, ਉਦਕੇਨ ਪਰਿਪ੍ਫੋਸਿਤ੍ਵਾ ਸਮ੍ਮਜ੍ਜਿਤਬ੍ਬਾ – ਮਾ ਵਿਹਾਰੋ ਰਜੇਨ ਉਹਞ੍ਞੀਤਿ. ਸਙ੍ਕਾਰਂ ਵਿਚਿਨਿਤ੍ਵਾ ਏਕਮਨ੍ਤਂ ਛਡ੍ਡੇਤਬ੍ਬਂ.

‘‘ਭੂਮਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਮਞ੍ਚਪਟਿਪਾਦਕਾ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਾ. ਮਞ੍ਚੋ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬੋ. ਪੀਠਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਨੀਚਂ ਕਤ੍ਵਾ ਸਾਧੁਕਂ ਅਪ੍ਪਟਿਘਂਸਨ੍ਤੇਨ, ਅਸਙ੍ਘਟ੍ਟੇਨ੍ਤੇਨ ਕਵਾਟਪਿਟ੍ਠਂ, ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਭਿਸਿਬਿਬ੍ਬੋਹਨਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਨਿਸੀਦਨਪਚ੍ਚਤ੍ਥਰਣਂ ਓਤਾਪੇਤ੍ਵਾ ਸੋਧੇਤ੍ਵਾ ਪਪ੍ਫੋਟੇਤ੍ਵਾ ਅਤਿਹਰਿਤ੍ਵਾ ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਂ. ਖੇਲ਼ਮਲ੍ਲਕੋ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬੋ. ਅਪਸ੍ਸੇਨਫਲਕਂ ਓਤਾਪੇਤ੍ਵਾ ਪਮਜ੍ਜਿਤ੍ਵਾ ਅਤਿਹਰਿਤ੍ਵਾ ਯਥਾਠਾਨੇ ਠਪੇਤਬ੍ਬਂ. ਪਤ੍ਤਚੀਵਰਂ ਨਿਕ੍ਖਿਪਿਤਬ੍ਬਂ. ਪਤ੍ਤਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਪਤ੍ਤਂ ਗਹੇਤ੍ਵਾ ਏਕੇਨ ਹਤ੍ਥੇਨ ਹੇਟ੍ਠਾਮਞ੍ਚਂ ਵਾ ਹੇਟ੍ਠਾਪੀਠਂ ਵਾ ਪਰਾਮਸਿਤ੍ਵਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਨ ਚ ਅਨਨ੍ਤਰਹਿਤਾਯ ਭੂਮਿਯਾ ਪਤ੍ਤੋ ਨਿਕ੍ਖਿਪਿਤਬ੍ਬੋ. ਚੀਵਰਂ ਨਿਕ੍ਖਿਪਨ੍ਤੇਨ ਏਕੇਨ ਹਤ੍ਥੇਨ ਚੀਵਰਂ ਗਹੇਤ੍ਵਾ ਏਕੇਨ ਹਤ੍ਥੇਨ ਚੀਵਰਵਂਸਂ ਵਾ ਚੀਵਰਰਜ੍ਜੁਂ ਵਾ ਪਮਜ੍ਜਿਤ੍ਵਾ ਪਾਰਤੋ ਅਨ੍ਤਂ ਓਰਤੋ ਭੋਗਂ ਕਤ੍ਵਾ ਚੀਵਰਂ ਨਿਕ੍ਖਿਪਿਤਬ੍ਬਂ.

‘‘ਸਚੇ ਪੁਰਤ੍ਥਿਮਾ ਸਰਜਾ ਵਾਤਾ ਵਾਯਨ੍ਤਿ, ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਪਚ੍ਛਿਮਾ ਸਰਜਾ ਵਾਤਾ ਵਾਯਨ੍ਤਿ, ਪਚ੍ਛਿਮਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਉਤ੍ਤਰਾ ਸਰਜਾ ਵਾਤਾ ਵਾਯਨ੍ਤਿ, ਉਤ੍ਤਰਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਦਕ੍ਖਿਣਾ ਸਰਜਾ ਵਾਤਾ ਵਾਯਨ੍ਤਿ, ਦਕ੍ਖਿਣਾ ਵਾਤਪਾਨਾ ਥਕੇਤਬ੍ਬਾ. ਸਚੇ ਸੀਤਕਾਲੋ ਹੋਤਿ, ਦਿਵਾ ਵਾਤਪਾਨਾ ਵਿਵਰਿਤਬ੍ਬਾ, ਰਤ੍ਤਿਂ ਥਕੇਤਬ੍ਬਾ. ਸਚੇ ਉਣ੍ਹਕਾਲੋ ਹੋਤਿ, ਦਿਵਾ ਵਾਤਪਾਨਾ ਥਕੇਤਬ੍ਬਾ, ਰਤ੍ਤਿਂ ਵਿਵਰਿਤਬ੍ਬਾ.

‘‘ਸਚੇ ਪਰਿਵੇਣਂ ਉਕ੍ਲਾਪਂ ਹੋਤਿ, ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ. ਸਚੇ ਕੋਟ੍ਠਕੋ ਉਕ੍ਲਾਪੋ ਹੋਤਿ, ਕੋਟ੍ਠਕੋ ਸਮ੍ਮਜ੍ਜਿਤਬ੍ਬੋ. ਸਚੇ ਉਪਟ੍ਠਾਨਸਾਲਾ ਉਕ੍ਲਾਪਾ ਹੋਤਿ, ਉਪਟ੍ਠਾਨਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਅਗ੍ਗਿਸਾਲਾ ਉਕ੍ਲਾਪਾ ਹੋਤਿ, ਅਗ੍ਗਿਸਾਲਾ ਸਮ੍ਮਜ੍ਜਿਤਬ੍ਬਾ. ਸਚੇ ਵਚ੍ਚਕੁਟਿ ਉਕ੍ਲਾਪਾ ਹੋਤਿ, ਵਚ੍ਚਕੁਟਿ ਸਮ੍ਮਜ੍ਜਿਤਬ੍ਬਾ. ਸਚੇ ਪਾਨੀਯਂ ਨ ਹੋਤਿ, ਪਾਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਪਰਿਭੋਜਨੀਯਂ ਨ ਹੋਤਿ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ. ਸਚੇ ਆਚਮਨਕੁਮ੍ਭਿਯਾ ਉਦਕਂ ਨ ਹੋਤਿ, ਆਚਮਨਕੁਮ੍ਭਿਯਾ ਉਦਕਂ ਆਸਿਞ੍ਚਿਤਬ੍ਬਂ.

‘‘ਸਚੇ ਉਪਜ੍ਝਾਯਸ੍ਸ ਅਨਭਿਰਤਿ ਉਪ੍ਪਨ੍ਨਾ ਹੋਤਿ, ਸਦ੍ਧਿਵਿਹਾਰਿਕੇਨ ਵੂਪਕਾਸੇਤਬ੍ਬੋ, ਵੂਪਕਾਸਾਪੇਤਬ੍ਬੋ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਕੁਕ੍ਕੁਚ੍ਚਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਨੋਦੇਤਬ੍ਬਂ, ਵਿਨੋਦਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯਸ੍ਸ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤਿ, ਸਦ੍ਧਿਵਿਹਾਰਿਕੇਨ ਵਿਵੇਚੇਤਬ੍ਬਂ, ਵਿਵੇਚਾਪੇਤਬ੍ਬਂ, ਧਮ੍ਮਕਥਾ ਵਾਸ੍ਸ ਕਾਤਬ੍ਬਾ. ਸਚੇ ਉਪਜ੍ਝਾਯੋ ਗਰੁਧਮ੍ਮਂ ਅਜ੍ਝਾਪਨ੍ਨੋ ਹੋਤਿ ਪਰਿਵਾਸਾਰਹੋ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਪਰਿਵਾਸਂ ਦਦੇਯ੍ਯਾਤਿ. ਸਚੇ ਉਪਜ੍ਝਾਯੋ ਮੂਲਾਯ ਪਟਿਕਸ੍ਸਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਮੂਲਾਯ ਪਟਿਕਸ੍ਸੇਯ੍ਯਾਤਿ. ਸਚੇ ਉਪਜ੍ਝਾਯੋ ਮਾਨਤ੍ਤਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਮਾਨਤ੍ਤਂ ਦਦੇਯ੍ਯਾਤਿ. ਸਚੇ ਉਪਜ੍ਝਾਯੋ ਅਬ੍ਭਾਨਾਰਹੋ ਹੋਤਿ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਂ ਅਬ੍ਭੇਯ੍ਯਾਤਿ. ਸਚੇ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਕਤ੍ਤੁਕਾਮੋ ਹੋਤਿ ਤਜ੍ਜਨੀਯਂ ਵਾ ਨਿਯਸ੍ਸਂ [ਨਿਯਸਂ (ਕ.)] ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਸਙ੍ਘੋ ਉਪਜ੍ਝਾਯਸ੍ਸ ਕਮ੍ਮਂ ਨ ਕਰੇਯ੍ਯ ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ. ਕਤਂ ਵਾ ਪਨਸ੍ਸ ਹੋਤਿ ਸਙ੍ਘੇਨ ਕਮ੍ਮਂ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ, ਸਦ੍ਧਿਵਿਹਾਰਿਕੇਨ ਉਸ੍ਸੁਕ੍ਕਂ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯੋ ਸਮ੍ਮਾ ਵਤ੍ਤੇਯ੍ਯ, ਲੋਮਂ ਪਾਤੇਯ੍ਯ, ਨੇਤ੍ਥਾਰਂ ਵਤ੍ਤੇਯ੍ਯ, ਸਙ੍ਘੋ ਤਂ ਕਮ੍ਮਂ ਪਟਿਪ੍ਪਸ੍ਸਮ੍ਭੇਯ੍ਯਾਤਿ.

‘‘ਸਚੇ ਉਪਜ੍ਝਾਯਸ੍ਸ ਚੀਵਰਂ ਧੋਵਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਧੋਵਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਧੋਵਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਕਾਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਕਾਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਕਰਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਰਜਨਂ ਪਚਿਤਬ੍ਬਂ ਹੋਤਿ, ਸਦ੍ਧਿਵਿਹਾਰਿਕੇਨ ਪਚਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਰਜਨਂ ਪਚਿਯੇਥਾਤਿ. ਸਚੇ ਉਪਜ੍ਝਾਯਸ੍ਸ ਚੀਵਰਂ ਰਜਿਤਬ੍ਬਂ [ਰਜੇਤਬ੍ਬਂ (ਸੀ. ਸ੍ਯਾ.)] ਹੋਤਿ, ਸਦ੍ਧਿਵਿਹਾਰਿਕੇਨ ਰਜਿਤਬ੍ਬਂ, ਉਸ੍ਸੁਕ੍ਕਂ ਵਾ ਕਾਤਬ੍ਬਂ – ਕਿਨ੍ਤਿ ਨੁ ਖੋ ਉਪਜ੍ਝਾਯਸ੍ਸ ਚੀਵਰਂ ਰਜਿਯੇਥਾਤਿ. ਚੀਵਰਂ ਰਜਨ੍ਤੇਨ [ਰਜੇਨ੍ਤੇਨ (ਸੀ. ਸ੍ਯਾ.)] ਸਾਧੁਕਂ ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਂ ਰਜਿਤਬ੍ਬਂ, ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਂ.

‘‘ਨ ਉਪਜ੍ਝਾਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਤ੍ਤੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਚੀਵਰਂ ਦਾਤਬ੍ਬਂ, ਨ ਏਕਚ੍ਚਸ੍ਸ ਚੀਵਰਂ ਪਟਿਗ੍ਗਹੇਤਬ੍ਬਂ; ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਦਾਤਬ੍ਬੋ, ਨ ਏਕਚ੍ਚਸ੍ਸ ਪਰਿਕ੍ਖਾਰੋ ਪਟਿਗ੍ਗਹੇਤਬ੍ਬੋ; ਨ ਏਕਚ੍ਚਸ੍ਸ ਕੇਸਾ ਛੇਦੇਤਬ੍ਬਾ [ਛੇਤ੍ਤਬ੍ਬਾ (ਸੀ.), ਛੇਦਿਤਬ੍ਬਾ (ਕ.)], ਨ ਏਕਚ੍ਚੇਨ ਕੇਸਾ ਛੇਦਾਪੇਤਬ੍ਬਾ; ਨ ਏਕਚ੍ਚਸ੍ਸ ਪਰਿਕਮ੍ਮਂ ਕਾਤਬ੍ਬਂ, ਨ ਏਕਚ੍ਚੇਨ ਪਰਿਕਮ੍ਮਂ ਕਾਰਾਪੇਤਬ੍ਬਂ; ਨ ਏਕਚ੍ਚਸ੍ਸ ਵੇਯ੍ਯਾਵਚ੍ਚੋ [ਵੇਯ੍ਯਾਵਚ੍ਚਂ (ਕਤ੍ਥਚਿ)] ਕਾਤਬ੍ਬੋ, ਨ ਏਕਚ੍ਚੇਨ ਵੇਯ੍ਯਾਵਚ੍ਚੋ ਕਾਰਾਪੇਤਬ੍ਬੋ; ਨ ਏਕਚ੍ਚਸ੍ਸ ਪਚ੍ਛਾਸਮਣੇਨ ਹੋਤਬ੍ਬਂ, ਨ ਏਕਚ੍ਚੋ ਪਚ੍ਛਾਸਮਣੋ ਆਦਾਤਬ੍ਬੋ; ਨ ਏਕਚ੍ਚਸ੍ਸ ਪਿਣ੍ਡਪਾਤੋ ਨੀਹਰਿਤਬ੍ਬੋ, ਨ ਏਕਚ੍ਚੇਨ ਪਿਣ੍ਡਪਾਤੋ ਨੀਹਰਾਪੇਤਬ੍ਬੋ; ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋ; ਨ ਸੁਸਾਨਂ ਗਨ੍ਤਬ੍ਬਂ; ਨ ਦਿਸਾ ਪਕ੍ਕਮਿਤਬ੍ਬਾ. ਸਚੇ ਉਪਜ੍ਝਾਯੋ ਗਿਲਾਨੋ ਹੋਤਿ, ਯਾਵਜੀਵਂ ਉਪਟ੍ਠਾਤਬ੍ਬੋ; ਵੁਟ੍ਠਾਨਮਸ੍ਸ ਆਗਮੇਤਬ੍ਬ’’ਨ੍ਤਿ.

ਉਪਜ੍ਝਾਯਵਤ੍ਤਂ ਨਿਟ੍ਠਿਤਂ.