੩. ਗਮਿਕਵਤ੍ਤਕਥਾ

੩੬੦. ਤੇਨ ਖੋ ਪਨ ਸਮਯੇਨ ਗਮਿਕਾ ਭਿਕ੍ਖੂ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਅਪ੍ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਵਿਵਰਿਤ੍ਵਾ ਸੇਨਾਸਨਂ ਅਨਾਪੁਚ੍ਛਾ ਪਕ੍ਕਮਨ੍ਤਿ. ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਨਸ੍ਸਤਿ. ਸੇਨਾਸਨਂ ਅਗੁਤ੍ਤਂ ਹੋਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਗਮਿਕਾ ਭਿਕ੍ਖੂ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਅਪ੍ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਵਿਵਰਿਤ੍ਵਾ ਸੇਨਾਸਨਂ ਅਨਾਪੁਚ੍ਛਾ ਪਕ੍ਕਮਿਸ੍ਸਨ੍ਤਿ! ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਨਸ੍ਸਤਿ. ਸੇਨਾਸਨਂ ਅਗੁਤ੍ਤਂ ਹੋਤੀ’’ਤਿ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ…ਪੇ… ਸਚ੍ਚਂ ਭਗਵਾਤਿ…ਪੇ… ਵਿਗਰਹਿਤ੍ਵਾ…ਪੇ… ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –

੩੬੧. ‘‘ਤੇਨ ਹਿ, ਭਿਕ੍ਖਵੇ, ਗਮਿਕਾਨਂ ਭਿਕ੍ਖੂਨਂ ਵਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਗਮਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬਂ. ਗਮਿਕੇਨ, ਭਿਕ੍ਖਵੇ, ਭਿਕ੍ਖੁਨਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਸੇਨਾਸਨਂ ਆਪੁਚ੍ਛਾ ਪਕ੍ਕਮਿਤਬ੍ਬਂ [ਆਪੁਚ੍ਛਿਤਬ੍ਬਂ (ਸ੍ਯਾ.)]. ਸਚੇ ਭਿਕ੍ਖੁ ਨ ਹੋਤਿ, ਸਾਮਣੇਰੋ ਆਪੁਚ੍ਛਿਤਬ੍ਬੋ. ਸਚੇ ਸਾਮਣੇਰੋ ਨ ਹੋਤਿ, ਆਰਾਮਿਕੋ ਆਪੁਚ੍ਛਿਤਬ੍ਬੋ. ਸਚੇ ਆਰਾਮਿਕੋ ਨ ਹੋਤਿ, ਉਪਾਸਕੋ ਆਪੁਚ੍ਛਿਤਬ੍ਬੋ. ਸਚੇ ਨ ਹੋਤਿ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਉਪਾਸਕੋ ਵਾ, ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਵਿਹਾਰੋ ਓਵਸ੍ਸਤਿ, ਸਚੇ ਉਸ੍ਸਹਤਿ, ਛਾਦੇਤਬ੍ਬੋ, ਉਸ੍ਸੁਕਂ ਵਾ ਕਾਤਬ੍ਬਂ – ‘ਕਿਨ੍ਤਿ ਨੁ ਖੋ ਵਿਹਾਰੋ ਛਾਦਿਯੇਥਾ’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਯੋ ਦੇਸੋ ਅਨੋਵਸ੍ਸਕੋ ਹੋਤਿ, ਤਤ੍ਥ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬਂ. ਸਚੇ ਸਬ੍ਬੋ ਵਿਹਾਰੋ ਓਵਸ੍ਸਤਿ, ਸਚੇ ਉਸ੍ਸਹਤਿ, ਸੇਨਾਸਨਂ ਗਾਮਂ ਅਤਿਹਰਿਤਬ੍ਬਂ, ਉਸ੍ਸੁਕਂ ਵਾ ਕਾਤਬ੍ਬਂ – ‘ਕਿਨ੍ਤਿ ਨੁ ਖੋ ਸੇਨਾਸਨਂ ਗਾਮਂ ਅਤਿਹਰਿਯੇਥਾ’ਤਿ. ਏਵਞ੍ਚੇਤਂ ਲਭੇਥ, ਇਚ੍ਚੇਤਂ ਕੁਸਲਂ. ਨੋ ਚੇ ਲਭੇਥ, ਅਜ੍ਝੋਕਾਸੇ ਚਤੂਸੁ ਪਾਸਾਣੇਸੁ ਮਞ੍ਚਂ ਪਞ੍ਞਪੇਤ੍ਵਾ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਸੇਨਾਸਨਂ ਉਪਰਿ ਪੁਞ੍ਜਂ ਕਰਿਤ੍ਵਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍ਵਾ ਤਿਣੇਨ ਵਾ ਪਣ੍ਣੇਨ ਵਾ ਪਟਿਚ੍ਛਾਦੇਤ੍ਵਾ ਪਕ੍ਕਮਿਤਬ੍ਬਂ – ਅਪ੍ਪੇਵ ਨਾਮ ਅਙ੍ਗਾਨਿਪਿ ਸੇਸੇਯ੍ਯੁਨ੍ਤਿ. ਇਦਂ ਖੋ, ਭਿਕ੍ਖਵੇ, ਗਮਿਕਾਨਂ ਭਿਕ੍ਖੂਨਂ ਵਤ੍ਤਂ ਯਥਾ ਗਮਿਕੇਹਿ ਭਿਕ੍ਖੂਹਿ ਸਮ੍ਮਾ ਵਤ੍ਤਿਤਬ੍ਬ’’ਨ੍ਤਿ.