੫. ਬਾਹਿਰਮਾਤਿਕਾਵਣ੍ਣਨਾ

੫. ਏਤੇਨ ਠਪਨਾਕਾਰੇਨਾਤਿ ਸਰੂਪੇਨ ਅਗ੍ਗਹੇਤ੍ਵਾ ਯਥਾਵੁਤ੍ਤੇਨ ਪਕਰਣਨ੍ਤਰਮਾਤਿਕਾਯ ਇਧ ਮਾਤਿਕਾਭਾਵਕਿਤ੍ਤਨਸਙ੍ਖਾਤੇਨ ਠਪਨਾਕਾਰੇਨ. ਪਕਰਣਨ੍ਤਰਠਪਿਤਾਯ ਮਾਤਿਕਾਯ ਅਵਿਭਾਗੇਨ ਪਚ੍ਛਤੋ ਗਹਣਂ ਬਹਿ ਠਪਨਨ੍ਤਿ ਆਹ ‘‘ਬਹਿ ਪਿਟ੍ਠਿਤੋ ਠਪਿਤਤ੍ਤਾ’’ਤਿ. ਇਧ ਅਟ੍ਠਪੇਤ੍ਵਾਤਿ ਇਮਿਸ੍ਸਾ ਧਾਤੁਕਥਾਯ ਸਰੂਪੇਨ ਅਵਤ੍ਵਾ. ਤਥਾ ਪਕਾਸਿਤਤ੍ਤਾਤਿ ਮਾਤਿਕਾਭਾਵੇਨ ਜੋਤਿਤਤ੍ਤਾ. ਧਮ੍ਮਸਙ੍ਗਣੀਸੀਸੇਨ ਹਿ ਧਮ੍ਮਸਙ੍ਗਣਿਯਂ ਆਗਤਮਾਤਿਕਾਵ ਗਹਿਤਾਤਿ. ਯੇਹਿ ਨਯੇਹਿ ਧਾਤੁਕਥਾਯ ਨਿਦ੍ਦੇਸੋ, ਤੇਸੁ ਨਯੇਸੁ, ਤੇਹਿ ਵਿਭਜਿਤਬ੍ਬੇਸੁ ਖਨ੍ਧਾਦੀਸੁ, ਤੇਸਂ ਨਯਾਨਂ ਪਵਤ੍ਤਿਦ੍ਵਾਰਲਕ੍ਖਣੇਸੁ ਚ ਉਦ੍ਦਿਟ੍ਠੇਸੁ ਧਾਤੁਕਥਾਯ ਉਦ੍ਦੇਸਵਸੇਨ ਵਤ੍ਤਬ੍ਬਂ ਵੁਤ੍ਤਮੇਵ ਹੋਤੀਤਿ ਯਂ ਉਦ੍ਦੇਸਵਸੇਨ ਵਤ੍ਤਬ੍ਬਂ, ਤਂ ਵਤ੍ਵਾ ਪੁਨ ਯਥਾਵੁਤ੍ਤਾਨਂ ਖਨ੍ਧਾਦੀਨਂ ਕੁਸਲਾਦਿਵਿਭਾਗਦਸ੍ਸਨਤ੍ਥਂ ‘‘ਸਬ੍ਬਾਪਿ ਧਮ੍ਮਸਙ੍ਗਣੀ ਧਾਤੁਕਥਾਯ ਮਾਤਿਕਾ’’ਤਿ ਵੁਤ੍ਤਨ੍ਤਿ ਏਵਮੇਤ੍ਥ ਮਾਤਿਕਾਯ ਨਿਕ੍ਖੇਪਵਿਧਿ ਵੇਦਿਤਬ੍ਬੋ.

‘‘ਗਾਵੀਤਿ ਅਯਮਾਹਾ’’ਤਿ ਏਤ੍ਥ ਗਾਵੀ-ਸਦ੍ਦੋ ਵਿਯ ‘‘ਸਙ੍ਗਹੋ ਅਸਙ੍ਗਹੋ’’ਤਿ ਏਤ੍ਥ ਪਦਤ੍ਥਵਿਪਲ੍ਲਾਸਕਾਰਿਨਾ ਇਤਿ-ਸਦ੍ਦੇਨ ਅਤ੍ਥਪਦਤ੍ਥਕੋ ਸਙ੍ਗਹਾਸਙ੍ਗਹ-ਸਦ੍ਦੋ ਸਦ੍ਦਪਦਤ੍ਥਕੋ ਜਾਯਤੀਤਿ ਅਧਿਪ੍ਪਾਯੇਨਾਹ ‘‘ਅਨਿਦ੍ਧਾਰਿਤਤ੍ਥਸ੍ਸ ਸਦ੍ਦਸ੍ਸੇਵ ਵੁਤ੍ਤਤ੍ਤਾ’’ਤਿ. ਤੇਨ ਅਤ੍ਥੁਦ੍ਧਾਰਤੋ ਸਙ੍ਗਹਸਦ੍ਦਂ ਸਂਵਣ੍ਣੇਤੀਤਿ ਦਸ੍ਸੇਤਿ. ਅਨਿਦ੍ਧਾਰਿਤਵਿਸੇਸੋਤਿ ਅਸਙ੍ਗਹਿਤਜਾਤਿਸਞ੍ਜਾਤਿਆਦਿਵਿਸੇਸੋ. ਸਾਮਞ੍ਞੇਨ ਗਹੇਤਬ੍ਬਤਨ੍ਤਿ ਸਙ੍ਗਹਸਦ੍ਦਾਭਿਧੇਯ੍ਯਤਾਸਾਮਞ੍ਞੇਨ ਵਿਞ੍ਞਾਯਮਾਨੋ ਵੁਚ੍ਚਮਾਨੋ ਵਾ. ਨ ਚੇਤ੍ਥ ਸਾਮਞ੍ਞਞ੍ਚ ਏਕਰੂਪਮੇਵਾਤਿ ਚੋਦਨਾ ਕਾਤਬ੍ਬਾ ਭੇਦਾਪੇਕ੍ਖਤ੍ਤਾ ਤਸ੍ਸ. ਯਤ੍ਤਕਾ ਹਿ ਤਸ੍ਸ ਵਿਸੇਸਾ, ਤਦਪੇਕ੍ਖਮੇਵ ਤਨ੍ਤਿ. ‘‘ਅਤ੍ਤਨੋ ਜਾਤਿਯਾ’’ਤਿ ਵਿਞ੍ਞਾਯਤਿ ਯਥਾ ‘‘ਮਤ੍ਤੇਯ੍ਯਾ’’ਤਿ ਵੁਤ੍ਤੇ ਅਤ੍ਤਨੋ ਮਾਤੁ ਹਿਤਾਤਿ.

ਧਮ੍ਮਵਿਸੇਸਂ ਅਨਿਦ੍ਧਾਰੇਤ੍ਵਾਤਿ ਸਙ੍ਗਹਿਤਤਾਦਿਨਾ ਪੁਚ੍ਛਿਤਬ੍ਬਵਿਸ੍ਸਜ੍ਜੇਤਬ੍ਬਧਮ੍ਮਾਨਂ ਵਿਸੇਸਨਂ ਅਕਤ੍ਵਾ. ਸਾਮਞ੍ਞੇਨਾਤਿ ਅਵਿਸੇਸੇਨ. ਧਮ੍ਮਾਨਨ੍ਤਿ ਖਨ੍ਧਾਦਿਧਮ੍ਮਾਨਂ. ਅਵਸੇਸਾ ਨਿਦ੍ਧਾਰੇਤ੍ਵਾਤਿ ‘‘ਸਙ੍ਗਹਿਤੇਨ ਅਸਙ੍ਗਹਿਤ’’ਨ੍ਤਿਆਦਿਕਾ ਅਵਸੇਸਾ ਦ੍ਵਾਦਸਪਿ ਪੁਚ੍ਛਿਤਬ੍ਬਵਿਸ੍ਸਜ੍ਜੇਤਬ੍ਬਧਮ੍ਮਵਿਸੇਸਂ ਨਿਦ੍ਧਾਰੇਤ੍ਵਾ ਧਮ੍ਮਾਨਂ ਪੁਚ੍ਛਨਵਿਸ੍ਸਜ੍ਜਨਨਯਉਦ੍ਦੇਸਾਤਿ ਯੋਜਨਾ. ਨਨੁ ਚ ‘‘ਸਙ੍ਗਹਿਤੇਨ ਅਸਙ੍ਗਹਿਤ’’ਨ੍ਤਿਆਦਯੋਪਿ ਯਥਾਵੁਤ੍ਤਵਿਸੇਸਂ ਅਨਿਦ੍ਧਾਰੇਤ੍ਵਾ ਸਾਮਞ੍ਞੇਨ ਧਮ੍ਮਾਨਂ ਪੁਚ੍ਛਨਵਿਸ੍ਸਜ੍ਜਨਨਯੁਦ੍ਦੇਸਾਤਿ ਚੋਦਨਂ ਸਨ੍ਧਾਯਾਹ ‘‘ਸਙ੍ਗਹਿਤੇਨ ਅਸਙ੍ਗਹਿਤ’’ਨ੍ਤਿਆਦਿ. ਯਸ੍ਸ ਅਤ੍ਥੋ ਞਾਯਤਿ, ਸਦ੍ਦੋ ਚ ਨ ਪਯੁਜ੍ਜਤਿ, ਸੋ ਲੋਪੋਤਿ ਵੇਦਿਤਬ੍ਬੋ, ਆਵੁਤ੍ਤਿਆਦਿਵਸੇਨ ਵਾ ਅਯਮਤ੍ਥੋ ਦੀਪੇਤਬ੍ਬੋ. ਤੇਨਾਤਿ ਲੁਤ੍ਤਨਿਦ੍ਦਿਟ੍ਠੇਨ ਅਸਙ੍ਗਹਿਤ-ਸਦ੍ਦੇਨ. ਸਙ੍ਗਹਿਤਵਿਸੇਸਵਿਸਿਟ੍ਠੋਤਿ ਚਕ੍ਖਾਯਤਨੇਨ ਖਨ੍ਧਸਙ੍ਗਹੇਨ ਸਙ੍ਗਹਿਤਤਾਵਿਸੇਸਵਿਸਿਟ੍ਠੋ, ਤੇਨ ਸੋਤਾਯਤਨਾਦਿਭਾਵੇਨ ਅਸਙ੍ਗਹਿਤੋ ਸੋਤਪਸਾਦਾਦਿਕੋ ਯੋ ਰੁਪ੍ਪਨਸਭਾਵੋ ਧਮ੍ਮਵਿਸੇਸੋ. ਤਨ੍ਨਿਸ੍ਸਿਤੋ ਤਂ ਧਮ੍ਮਵਿਸੇਸਂ ਨਿਸ੍ਸਾਯ ਲਬ੍ਭਮਾਨੋ. ‘‘ਤੇ ਧਮ੍ਮਾ ਕਤਿਹਿ ਖਨ੍ਧੇਹਿ…ਪੇ… ਚਤੂਹਿ ਖਨ੍ਧੇਹਿ ਅਸਙ੍ਗਹਿਤਾ’’ਤਿਆਦਿਨਾ ਅਸਙ੍ਗਹਿਤਤਾਸਙ੍ਖਾਤੋ ਪੁਚ੍ਛਾਵਿਸ੍ਸਜ੍ਜਨਨਯੋ ਪਰਤੋ ਪੁਚ੍ਛਿਤ੍ਵਾ ਵਿਸ੍ਸਜ੍ਜਿਯਮਾਨੋ ਇਧ ਉਦ੍ਦਿਟ੍ਠੋ ਹੋਤਿ. ਵਿਸੇਸਨੇ ਕਰਣਵਚਨਨ੍ਤਿ ਇਮਿਨਾ ਤਸ੍ਸ ਧਮ੍ਮਸ੍ਸ ਯਥਾਵੁਤ੍ਤਸਙ੍ਗਹਿਤਤਾਵਿਸੇਸਵਿਸਿਟ੍ਠਤਂਯੇਵ ਵਿਭਾਵੇਤਿ. ਏਵਮੇਤੇ ਪੁਚ੍ਛਿਤਬ੍ਬਵਿਸ੍ਸਜ੍ਜੇਤਬ੍ਬਧਮ੍ਮਵਿਸੇਸਂ ਨਿਦ੍ਧਾਰੇਤ੍ਵਾ ਪੁਚ੍ਛਨਵਿਸ੍ਸਜ੍ਜਨਨਯੁਦ੍ਦੇਸਾ ਪਵਤ੍ਤਾਤਿ ਵੇਦਿਤਬ੍ਬਾ.

ਨਨੁ ਚ ‘‘ਸਙ੍ਗਹਿਤੇਨ ਅਸਙ੍ਗਹਿਤ’’ਨ੍ਤਿ ਏਤ੍ਤਾਵਤਾਪਿ ਅਯਮਤ੍ਥੋ ਲਬ੍ਭਤੀਤਿ? ਨ ਲਬ੍ਭਤਿ ਤਸ੍ਸ ਧਮ੍ਮਮਤ੍ਤਦੀਪਨਤੋ. ਨਯੁਦ੍ਦੇਸੋ ਹੇਸੋ, ਨ ਧਮ੍ਮੁਦ੍ਦੇਸੋ. ਤਥਾ ਹਿ ਪਾਲ਼ਿਯਂ ਸਙ੍ਗਹਿਤੇਨਅਸਙ੍ਗਹਿਤਪਦਨਿਦ੍ਦੇਸੇ ‘‘ਚਕ੍ਖਾਯਤਨੇਨ ਯੇ ਧਮ੍ਮਾ ਖਨ੍ਧਸਙ੍ਗਹੇਨ ਸਙ੍ਗਹਿਤਾ, ਆਯਤਨ…ਪੇ… ਧਾਤੁਸਙ੍ਗਹੇਨ ਅਸਙ੍ਗਹਿਤਾ’’ਤਿ ਵਤ੍ਵਾ ‘‘ਤੇ ਧਮ੍ਮਾ ਕਤਿਹਿ ਖਨ੍ਧੇਹਿ…ਪੇ… ਅਸਙ੍ਗਹਿਤਾ’’ਤਿ (ਧਾਤੁ. ੧੭੧) ਪੁਚ੍ਛਿਤ੍ਵਾ ‘‘ਤੇ ਧਮ੍ਮਾ ਚਤੂਹਿ ਖਨ੍ਧੇਹਿ ਦ੍ਵੀਹਾਯਤਨੇਹਿ ਅਟ੍ਠਹਿ ਧਾਤੂਹਿ ਅਸਙ੍ਗਹਿਤਾ’’ਤਿ ਦੁਤਿਯਂ ਅਸਙ੍ਗਹਿਤਪਦਂ ਗਹਿਤਂ. ਅਞ੍ਞਥਾ ‘‘ਚਕ੍ਖਾਯਤਨੇਨ ਯੇ ਧਮ੍ਮਾ ਖਨ੍ਧਸਙ੍ਗਹੇਨ ਸਙ੍ਗਹਿਤਾ, ਤੇ ਧਮ੍ਮਾ ਆਯਤਨਸਙ੍ਗਹੇਨ ਅਸਙ੍ਗਹਿਤਾ, ਧਾਤੁਸਙ੍ਗਹੇਨ ਅਸਙ੍ਗਹਿਤਾ. ਤੇ ਕਤਮੇ’’ਇਚ੍ਚੇਵ ਨਿਦ੍ਦਿਸਿਤਬ੍ਬਂ ਸਿਯਾ.

ਏਸ ਨਯੋਤਿ ਅਤਿਦੇਸੇਨ ਦਸ੍ਸਿਤਮਤ੍ਥਂ ਪਾਕਟਤਰਂ ਕਾਤੁਂ ‘‘ਤੇਸੁਪੀ’’ਤਿਆਦਿ ਵੁਤ੍ਤਂ. ਤਤਿਯਪਦੇਨਾਤਿ ਲੁਤ੍ਤਨਿਦ੍ਦੇਸੇਨ ਗਹੇਤਬ੍ਬਨ੍ਤਿ ਵੁਤ੍ਤਪਦਂ ਸਨ੍ਧਾਯਾਹ. ਕਤ੍ਤੁਅਤ੍ਥੇ ਕਰਣਨਿਦ੍ਦੇਸੋ ਸਙ੍ਗਹਿਤਾਸਙ੍ਗਹਿਤੇਹਿ ਤੇਹਿ ਧਮ੍ਮੇਹਿ ਧਮ੍ਮਾਨਂ ਸਙ੍ਗਹਿਤਤਾਸਙ੍ਗਹਿਤਤਾਯ ਵੁਤ੍ਤਤ੍ਤਾ. ਤਥਾ ਹਿ ਤਤ੍ਥ ਪਾਲ਼ਿਯਂ ‘‘ਤੇਹਿ ਧਮ੍ਮੇਹਿ ਯੇ ਧਮ੍ਮਾ’’ਤਿ ਧਮ੍ਮਮੁਖੇਨੇਵ ਸਙ੍ਗਹਿਤਤਾਸਙ੍ਗਹਿਤਤਾ ਵੁਤ੍ਤਾ. ਦੁਤਿਯਤਤਿਯੇਸੁ ਪਨ ਸਙ੍ਗਹਿਤਤਾਸਙ੍ਗਹਿਤਤਾਸਙ੍ਖਾਤਵਿਸੇਸਨਦ੍ਵਾਰੇਨ ਧਮ੍ਮਾਨਂ ਅਸਙ੍ਗਹਿਤਤਾਸਙ੍ਗਹਿਤਤਾ ਵੁਤ੍ਤਾਤਿ ਤਤ੍ਥ ‘‘ਵਿਸੇਸਨੇ ਕਰਣਵਚਨ’’ਨ੍ਤਿ ਵੁਤ੍ਤਂ. ਤੇਨਾਹ ‘‘ਤਤ੍ਥ ਹਿ…ਪੇ… ਧਮ੍ਮਨ੍ਤਰਸ੍ਸਾ’’ਤਿ. ਤਤ੍ਥ ਸਭਾਵਨ੍ਤਰੇਨਾਤਿ ਸਙ੍ਗਹਿਤਤਾਸਙ੍ਗਹਿਤਤਾਸਙ੍ਖਾਤੇਨ ਸਭਾਵਨ੍ਤਰੇਨ ਪਕਾਰਨ੍ਤਰੇਨ. ਸਭਾਵਨ੍ਤਰਸ੍ਸਾਤਿ ਅਸਙ੍ਗਹਿਤਤਾਸਙ੍ਗਹਿਤਤਾਸਙ੍ਖਾਤਸ੍ਸ ਸਭਾਵਨ੍ਤਰਸ੍ਸ. ਏਤੇਸੂਤਿ ਚਤੁਤ੍ਥਪਞ੍ਚਮੇਸੁ. ਧਮ੍ਮਨ੍ਤਰੇਨਾਤਿ ਅਞ੍ਞਧਮ੍ਮੇਨ. ਧਮ੍ਮਨ੍ਤਰਸ੍ਸਾਤਿ ਤਤੋ ਅਞ੍ਞਸ੍ਸ ਧਮ੍ਮਸ੍ਸ ਵਿਸੇਸਨਂ ਕਤਂ. ਤਤ੍ਥ ਹਿ ਅਨ੍ਤਰੇਨ ਪਕਾਰਵਿਸੇਸਾਮਸਨਂ ਧਮ੍ਮੇਨੇਵ ਧਮ੍ਮੋ ਵਿਸੇਸਿਤੋਤਿ. ਆਦਿਪਦੇਨੇਵਾਤਿ ‘‘ਸਙ੍ਗਹਿਤੇਨਾ’’ਤਿਆਦਿਨਾ ਵੁਤ੍ਤੇਨ ਪਠਮਪਦੇਨੇਵ. ਇਤਰੇਹੀਤਿ ‘‘ਸਮ੍ਪਯੁਤ੍ਤਂ ਵਿਪ੍ਪਯੁਤ੍ਤ’’ਨ੍ਤਿਆਦਿਨਾ ਵੁਤ੍ਤੇਹਿ ਦੁਤਿਯਤਤਿਯਪਦੇਹਿ. ਏਤ੍ਥਾਤਿ ਏਕਾਦਸਮਾਦੀਸੁ ਚਤੂਸੁ. ਦੁਤਿਯਤਤਿਯੇਸੁ ਵਿਯ ਵਿਸੇਸਨੇ ਏਵ ਕਰਣਵਚਨਂ ਦਟ੍ਠਬ੍ਬਂ, ਨ ਚਤੁਤ੍ਥਪਞ੍ਚਮੇਸੁ ਵਿਯ ਕਤ੍ਤੁਅਤ੍ਥੇਤਿ ਅਧਿਪ੍ਪਾਯੋ. ਪੁਚ੍ਛਾਵਿਸ੍ਸਜ੍ਜਨਾਨਨ੍ਤਿਆਦਿਨਾ ਤਮੇਵਤ੍ਥਂ ਵਿਭਾਵੇਤਿ.

ਵਿਵਿਧਕਪ੍ਪਨਤੋਤਿ ਵਿਵਿਧਂ ਬਹੁਧਾ ਕਪ੍ਪਨਤੋ, ਸਙ੍ਗਹਾਸਙ੍ਗਹਾਨਂ ਵਿਸੁਂ ਸਹ ਚ ਵਿਸੇਸਨਵਿਸੇਸਿਤਬ੍ਬਭਾਵਕਪ੍ਪਨਤੋਤਿ ਅਤ੍ਥੋ. ਤਂ ਪਨ ਵਿਕਪ੍ਪਨਂ ਵੁਤ੍ਤਾਕਾਰੇਨ ਵਿਭਜਨਂ ਹੋਤੀਤਿ ਆਹ ‘‘ਵਿਭਾਗਤੋਤਿ ਅਤ੍ਥੋ’’ਤਿ. ਸਨ੍ਨਿਟ੍ਠਾਨਲਕ੍ਖਣੇਨ ਅਧਿਮੋਕ੍ਖੇਨ ਸਮ੍ਪਯੁਤ੍ਤਧਮ੍ਮਾ ਆਰਮ੍ਮਣੇ ਨਿਚ੍ਛਯਨਾਕਾਰੇਨ ਪਵਤ੍ਤਿਯਾ ਸਨ੍ਨਿਟ੍ਠਾਨਵਸੇਨ ਵੁਤ੍ਤਧਮ੍ਮਾ. ਤੇ ਚ ਤੇਹਿ ਸਦ੍ਧਿਂ ਤਦਵਸਿਟ੍ਠੇ ਦ੍ਵਿਪਞ੍ਚਵਿਞ੍ਞਾਣਵਿਚਿਕਿਚ੍ਛਾਸਹਗਤਧਮ੍ਮੇ ਚ ਸਙ੍ਗਹੇਤ੍ਵਾ ਆਹ ‘‘ਸਨ੍ਨਿਟ੍ਠਾਨਵਸੇਨ ਵੁਤ੍ਤਾ ਚ ਸਬ੍ਬੇ ਚ ਚਿਤ੍ਤੁਪ੍ਪਾਦਾ ਸਨ੍ਨਿਟ੍ਠਾਨਵਸੇਨ ਵੁਤ੍ਤਸਬ੍ਬਚਿਤ੍ਤੁਪ੍ਪਾਦਾ’’ਤਿ. ਇਤਰੇਤਿ ਫਸ੍ਸਾਦਯੋ. ਸਬ੍ਬੇਸਨ੍ਤਿ ਏਕੂਨਨਵੁਤਿਯਾ ਚਿਤ੍ਤੁਪ੍ਪਾਦਾਨਂ. ਪਰਿਗ੍ਗਹੇਤਬ੍ਬਾਤਿ ਸਙ੍ਗਹਾਦਿਵਸੇਨ ਪਰਿਗ੍ਗਣ੍ਹਿਤਬ੍ਬਾ. ਮਹਾਵਿਸਯੇਨ ਅਧਿਮੋਕ੍ਖੇਨ. ਅਞ੍ਞੇਸਨ੍ਤਿ ਵਿਤਕ੍ਕਾਦੀਨਂ. ਵਚਨਂ ਸਨ੍ਧਾਯਾਤਿ ‘‘ਅਧਿਮੁਚ੍ਚਨਂ ਅਧਿਮੋਕ੍ਖੋ, ਸੋ ਸਨ੍ਨਿਟ੍ਠਾਨਲਕ੍ਖਣੋ’’ਤਿ ਧਮ੍ਮਸਙ੍ਗਹਵਣ੍ਣਨਾਯਂ (ਧ. ਸ. ਅਟ੍ਠ. ਯੇਵਾਪਨਕਵਣ੍ਣਨਾ) ‘‘ਤਣ੍ਹਾਪਚ੍ਚਯਾ ਅਧਿਮੋਕ੍ਖੋ, ਅਧਿਮੋਕ੍ਖਪਚ੍ਚਯਾ ਭਵੋ’’ਤਿ ਪਟਿਚ੍ਚਸਮੁਪ੍ਪਾਦਵਿਭਙ੍ਗੇ ਚ ਆਗਤਂ ਵਚਨਂ ਸਨ੍ਧਾਯ. ਅਤ੍ਥੇ ਸਤੀਤਿ ‘‘ਸਨ੍ਨਿਟ੍ਠਾਨ…ਪੇ… ਸਾਧਾਰਣਤੋ’’ਤਿ ਏਵਮਤ੍ਥੇ ਵੁਚ੍ਚਮਾਨੇ. ਵਤ੍ਤਬ੍ਬੇਸੂਤਿ ਸਙ੍ਗਹਾਦਿਪਰਿਗ੍ਗਹਤ੍ਥਂ ਵਤ੍ਤਬ੍ਬੇਸੁ. ਵੁਤ੍ਤਾ ਫਸ੍ਸਾਦਯੋ ਮਨਸਿਕਾਰਪਰਿਯੋਸਾਨਾ. ਤਾਦਿਸਸ੍ਸਾਤਿ ਫਸ੍ਸਾਦਿਸਦਿਸਸ੍ਸ ਸਾਧਾਰਣਸ੍ਸ ਅਧਿਮੋਕ੍ਖਸਦਿਸਸ੍ਸ ਅਸਾਧਾਰਣਸ੍ਸ ਅਞ੍ਞਸ੍ਸ ਧਮ੍ਮਸ੍ਸ ਅਭਾਵਾ.

ਨਨੁ ਜੀਵਿਤਿਨ੍ਦ੍ਰਿਯਚਿਤ੍ਤਟ੍ਠਿਤਿਯੋਪਿ ਸਾਧਾਰਣਾਤਿ? ਸਚ੍ਚਂ ਸਾਧਾਰਣਾ, ਅਤ੍ਥਿ ਪਨ ਵਿਸੇਸੋਤਿ ਦਸ੍ਸੇਨ੍ਤੋ ਆਹ ‘‘ਜੀਵਿਤਿਨ੍ਦ੍ਰਿਯਂ ਪਨਾ’’ਤਿਆਦਿ. ਅਸਮਾਧਿਸਭਾਵਾ ਬਲਭਾਵਂ ਅਪ੍ਪਤ੍ਤਾ ਸਾਮਞ੍ਞਸਦ੍ਦੇਨੇਵ ਵਤ੍ਤਬ੍ਬਾਤਿ ਯੋਜਨਾ. ਸਾਮਞ੍ਞਵਿਸੇਸਸਦ੍ਦੇਹਿ ਚਾਤਿ ਸਾਮਞ੍ਞਵਿਸੇਸਸਦ੍ਦੇਹਿ ਵਤ੍ਤਬ੍ਬਾ ਚ ਸਮਾਧਿਸਭਾਵਾ ਚਿਤ੍ਤੇਕਗ੍ਗਤਾ. ਵਿਸੇਸਸਦ੍ਦਵਚਨੀਯਂ ਅਞ੍ਞਨ੍ਤਿ ਬਲਪ੍ਪਤ੍ਤਸਮਾਧਿਤੋ ਅਞ੍ਞਂ ਸਾਮਞ੍ਞਸਦ੍ਦੇਨ ਬ੍ਯਾਪੇਤਬ੍ਬਂ, ਵਿਸੇਸਸਦ੍ਦੇਨ ਚ ਨਿਵਤ੍ਤੇਤਬ੍ਬਂ ਨਤ੍ਥਿ ਸਮਾਧਿਸਭਾਵਾਯ ਏਵ ਚਿਤ੍ਤੇਕਗ੍ਗਤਾਯ ਗਹਿਤਤ੍ਤਾ. ਨ ਅਞ੍ਞਬ੍ਯਾਪਕਨਿਵਤ੍ਤਕੋ ਸਾਮਞ੍ਞਵਿਸੇਸੋ ਅਨਞ੍ਞ…ਪੇ… ਵਿਸੇਸੋ, ਤਸ੍ਸ ਦੀਪਨਤੋ. ਤਸ੍ਸੇਵ ਧਮ੍ਮਸ੍ਸਾਤਿ ਤਸ੍ਸੇਵ ਬਲਪ੍ਪਤ੍ਤਸਮਾਧਿਧਮ੍ਮਸ੍ਸ. ਭੇਦਦੀਪਕੇਹੀਤਿ ਵਿਸੇਸਦੀਪਕੇਹਿ ਸਮਾਧਿਬਲਾਦਿਵਚਨੇਹਿ ਵਤ੍ਤਬ੍ਬਾ. ਵੁਤ੍ਤਲਕ੍ਖਣਾ ਅਨਞ੍ਞਬ੍ਯਾਪਕਨਿਵਤ੍ਤਕਸਾਮਞ੍ਞਵਿਸੇਸਦੀਪਨਾ ਸਦ੍ਦਾ. ਤਤੋ ਵਿਪਰੀਤੇਹਿ ਅਞ੍ਞਂ ਬ੍ਯਾਪੇਤਬ੍ਬਂ ਨਿਵਤ੍ਤੇਤਬ੍ਬਞ੍ਚ ਗਹੇਤ੍ਵਾ ਪਵਤ੍ਤੇਹਿ ਸਾਮਞ੍ਞਵਿਸੇਸਸਦ੍ਦੇਹੇਵ ਨ ਸੁਖਾਦਿਸਭਾਵਾ ਵੇਦਨਾ ਵਿਯ ਵਤ੍ਤਬ੍ਬਾ. ਤਸ੍ਮਾਤਿ ਯਸ੍ਮਾ ਅਸਮਾਧਿਸਭਾਵਾ ਸਮਾਧਿਸਭਾਵਾਤਿ ਦ੍ਵੇਧਾ ਭਿਨ੍ਦਿਤ੍ਵਾ ਗਹਿਤਾ ਚਿਤ੍ਤੇਕਗ੍ਗਤਾ, ਤਸ੍ਮਾ. ਅਸਮਾਧਿਸਭਾਵਮੇਵ ਪਕਾਸੇਯ੍ਯ ਵਿਸੇਸਸਦ੍ਦਨਿਰਪੇਕ੍ਖਂ ਪਵਤ੍ਤਮਾਨਤ੍ਤਾ. ਇਤਰੋਤਿ ਸਮਾਧਿਬਲਾਦਿਕੋ ਵਿਸੇਸਸਦ੍ਦੋ. ਇਧਾਤਿ ਇਮਸ੍ਮਿਂ ਅਬ੍ਭਨ੍ਤਰਮਾਤਿਕੁਦ੍ਦੇਸੇ, ਸਾਧਾਰਣੇ ਫਸ੍ਸਾਦਿਕੇ, ਮਹਾਵਿਸਯੇ ਵਾ ਅਧਿਮੋਕ੍ਖੇ ਉਦ੍ਦਿਸਿਯਮਾਨੇ. ਨਨੁ ਚ ਅਭਿਨ੍ਦਿਤ੍ਵਾ ਗਯ੍ਹਮਾਨਾ ਚਿਤ੍ਤੇਕਗ੍ਗਤਾ ਵੇਦਨਾ ਵਿਯ ਸਾਧਾਰਣਾ ਹੋਤੀਤਿ ਚੋਦਨਂ ਸਨ੍ਧਾਯਾਹ ‘‘ਅਭਿਨ੍ਨਾਪਿ ਵਾ’’ਤਿਆਦਿ. ‘‘ਚਿਤ੍ਤਸ੍ਸ ਠਿਤਿ ਚਿਤ੍ਤੇਕਗ੍ਗਤਾ ਅਵਿਸਾਹਟਮਾਨਸਤਾ (ਧ. ਸ. ੧੧, ੧੫). ਅਰੂਪੀਨਂ ਧਮ੍ਮਾਨਂ ਆਯੁ ਠਿਤੀ’’ਤਿ (ਧ. ਸ. ੧੯) ਵਚਨਤੋ ਸਮਾਧਿਜੀਵਿਤਿਨ੍ਦ੍ਰਿਯਾਨਂ ਅਞ੍ਞਧਮ੍ਮਨਿਸ੍ਸਯੇਨ ਵਤ੍ਤਬ੍ਬਤਾ ਵੇਦਿਤਬ੍ਬਾ. ਨ ਅਰਹਤੀਤਿ ਇਧ ਉਦ੍ਦੇਸਂ ਨ ਅਰਹਤਿ ਸਮੁਖੇਨੇਵ ਵਤ੍ਤਬ੍ਬੇਸੁ ਫਸ੍ਸਾਦੀਸੁ ਉਦ੍ਦਿਸਿਯਮਾਨੇਸੂਤਿ ਅਤ੍ਥੋ.

ਮਾਤਿਕਾਵਣ੍ਣਨਾ ਨਿਟ੍ਠਿਤਾ.