੩. ਨਯਮੁਖਮਾਤਿਕਾਵਣ੍ਣਨਾ

੩. ਨਯਾਨਂ ਸਙ੍ਗਹਾਦਿਪ੍ਪਕਾਰਵਿਸੇਸਾਨਂ ਪਵਤ੍ਤਿ ਦੇਸਨਾ, ਤਸ੍ਸਾ ਵਿਨਿਗ੍ਗਮਟ੍ਠਾਨਤਾਯ ਦ੍ਵਾਰਂ. ਯਥਾਵੁਤ੍ਤਧਮ੍ਮਾ ਯਥਾਰਹਂ ਖਨ੍ਧਾਯਤਨਧਾਤੁਯੋ ਅਰੂਪਿਨੋ ਚ ਖਨ੍ਧਾਤਿ ਤੇਸਂ ਉਦ੍ਦੇਸੋ ਨਯਮੁਖਮਾਤਿਕਾ. ਤੇਨਾਹ ‘‘ਨਯਾਨ’’ਨ੍ਤਿਆਦਿ. ਵਿਯੁਜ੍ਜਨਸੀਲਾ, ਵਿਯੋਗੋ ਵਾ ਏਤੇਸਂ ਅਤ੍ਥੀਤਿ ਵਿਯੋਗਿਨੋ, ਤਥਾ ਸਹਯੋਗਿਨੋ, ਸਙ੍ਗਹਾਸਙ੍ਗਹਧਮ੍ਮਾ ਚ ਵਿਯੋਗੀਸਹਯੋਗੀਧਮ੍ਮਾ ਚ ਸਙ੍ਗਹਾ…ਪੇ… ਧਮ੍ਮਾ, ਸਙ੍ਗਣ੍ਹਨਾਸਙ੍ਗਣ੍ਹਨਵਸੇਨ ਵਿਯੁਜ੍ਜਨਸਂਯੁਜ੍ਜਨਵਸੇਨ ਚ ਪਵਤ੍ਤਨਕਸਭਾਵਾਤਿ ਅਤ੍ਥੋ. ਚੁਦ੍ਦਸਪੀਤਿਆਦਿਨਾ ਤਮੇਵਤ੍ਥਂ ਪਾਕਟਤਰਂ ਕਰੋਤਿ. ਯੇਹੀਤਿ ਯੇਹਿ ਖਨ੍ਧਾਦੀਹਿ ਅਰੂਪਕ੍ਖਨ੍ਧੇਹਿ ਚ. ਤੇ ਚਤ੍ਤਾਰੋਤਿ ਤੇ ਸਙ੍ਗਹਾਦਯੋ ਚਤ੍ਤਾਰੋ. ਸਚ੍ਚਾਦੀਹਿਪੀਤਿ ਸਚ੍ਚਇਨ੍ਦ੍ਰਿਯਪਟਿਚ੍ਚਸਮੁਪ੍ਪਾਦਾਦੀਹਿਪਿ ਸਹ. ਯਥਾਸਮ੍ਭਵਨ੍ਤਿ ਸਮ੍ਭਵਾਨੁਰੂਪਂ, ਯਂ ਯਂ ਪਦਂ ਸਙ੍ਗਹਿਤੋ ਅਸਙ੍ਗਹਿਤੋਤਿ ਚ ਵਤ੍ਤੁਂ ਯੁਤ੍ਤਂ, ਤਂ ਤਨ੍ਤਿ ਅਤ੍ਥੋ.

ਸੋ ਪਨਾਤਿ ਸਙ੍ਗਹਾਸਙ੍ਗਹੋ. ਸਙ੍ਗਾਹਕਭੂਤੇਹੀਤਿ ਸਙ੍ਗਹਣਕਿਰਿਯਾਯ ਕਤ੍ਤੁਭੂਤੇਹਿ. ਤੇਹੀਤਿ ਸਚ੍ਚਾਦੀਹਿ. ਨ ਸਙ੍ਗਹਭੂਤੇਹੀਤਿ ਸਙ੍ਗਹਣਕਿਰਿਯਾਯ ਕਰਣਭੂਤੇਹਿ ਸਚ੍ਚਾਦੀਹਿ ਸਙ੍ਗਹਾਸਙ੍ਗਹੋ ਨ ਵੁਤ੍ਤੋ. ਤਤ੍ਥਾਪਿ ਹਿ ਖਨ੍ਧਾਯਤਨਧਾਤੁਯੋ ਏਵ ਕਰਣਭੂਤਾਤਿ ਦਸ੍ਸੇਤਿ. ਖਨ੍ਧਾਦੀਹੇਵ ਸਙ੍ਗਹੇਹੀਤਿ ਖਨ੍ਧਾਦੀਹਿਯੇਵ ਸਙ੍ਗਣ੍ਹਨਕਿਰਿਯਾਯ ਕਰਣਭੂਤੇਹਿ, ‘‘ਖਨ੍ਧਸਙ੍ਗਹੇਨ ਸਙ੍ਗਹਿਤਾ, ਆਯਤਨਸਙ੍ਗਹੇਨ ਅਸਙ੍ਗਹਿਤਾ, ਧਾਤੁਸਙ੍ਗਹੇਨ ਅਸਙ੍ਗਹਿਤਾ, ਤੇ ਧਮ੍ਮਾ ਚਤੂਹਿ ਖਨ੍ਧੇਹਿ, ਦ੍ਵੀਹਾਯਤਨੇਹਿ, ਅਟ੍ਠਹਿ ਧਾਤੂਹਿ ਅਸਙ੍ਗਹਿਤਾ’’ਤਿ ਸਙ੍ਗਹਾਸਙ੍ਗਹੋ ਨਿਯਮੇਤ੍ਵਾ ਵੁਤ੍ਤੋ. ਤਸ੍ਮਾਤਿ ਯਸ੍ਮਾ ਸਚ੍ਚਾਦੀਨਿ ਸਙ੍ਗਾਹਕਭਾਵੇਨ ਵੁਤ੍ਤਾਨਿ, ਨ ਸਙ੍ਗਹਭਾਵੇਨ, ਖਨ੍ਧਾਦੀਨਿਯੇਵ ਚ ਸਙ੍ਗਹਭਾਵੇਨ ਵੁਤ੍ਤਾਨਿ, ਤਸ੍ਮਾ.

ਕਸ੍ਮਾ ਪਨੇਤ੍ਥ ਸਚ੍ਚਾਦਯੋ ਸਙ੍ਗਹਵਸੇਨ ਨ ਵੁਤ੍ਤਾਤਿ? ਤਥਾਦੇਸਨਾਯ ਅਸਮ੍ਭਵਤੋ. ਨ ਹਿ ਸਕ੍ਕਾ ਰੂਪਕ੍ਖਨ੍ਧਾਦੀਨਂ ਸਮੁਦਯਸਚ੍ਚਾਦੀਹਿ, ਸਞ੍ਞਾਦੀਨਂ ਵਾ ਇਨ੍ਦ੍ਰਿਯਾਦੀਹਿ ਸਙ੍ਗਹਨਯੇਨ ਪੁਚ੍ਛਿਤੁਂ ਵਿਸ੍ਸਜ੍ਜਿਤੁਂ ਵਾਤਿ. ਤਥਾ ਅਰਿਯਫਲਾਦੀਸੁ ਉਪ੍ਪਨ੍ਨਵੇਦਨਾਦੀਨਂ ਸਚ੍ਚਵਿਨਿਮੁਤ੍ਤਤਾਯ ‘‘ਵੇਦਨਾਕ੍ਖਨ੍ਧੋ ਕਤਿਹਿ ਸਚ੍ਚੇਹਿ ਸਙ੍ਗਹਿਤੋ’’ਤਿ ਪੁਚ੍ਛਿਤ੍ਵਾਪਿ ‘‘ਏਕੇਨ ਸਚ੍ਚੇਨ ਸਙ੍ਗਹਿਤੋ’’ਤਿਆਦਿਨਾ ਨਿਯਮੇਤ੍ਵਾ ਸਙ੍ਗਹਂ ਦਸ੍ਸੇਤੁਂ ਨ ਸਕ੍ਕਾਤਿ. ਯਥਾਸਮ੍ਭਵਨ੍ਤਿ ਯੇਹਿ ਸਮ੍ਪਯੋਗੋ, ਯੇਹਿ ਚ ਵਿਪ੍ਪਯੋਗੋ, ਤਦਨੁਰੂਪਂ.

ਰੂਪਂ ਰੂਪੇਨ ਨਿਬ੍ਬਾਨੇਨ ਵਾ ਵਿਪ੍ਪਯੁਤ੍ਤਂ ਨ ਹੋਤਿ, ਨਿਬ੍ਬਾਨਂ ਵਾ ਰੂਪੇਨ. ਕਸ੍ਮਾ? ਸਮ੍ਪਯੁਤ੍ਤਨ੍ਤਿ ਅਨਾਸਙ੍ਕਨੀਯਸਭਾਵਤ੍ਤਾ. ਚਤੁਨ੍ਨਞ੍ਹਿ ਖਨ੍ਧਾਨਂ ਅਞ੍ਞਮਞ੍ਞਂ ਸਮ੍ਪਯੋਗੀਭਾਵਤੋ ‘‘ਰੂਪਨਿਬ੍ਬਾਨੇਹਿਪਿ ਸੋ ਅਤ੍ਥਿ ਨਤ੍ਥੀ’’ਤਿ ਸਿਯਾ ਆਸਙ੍ਕਾ, ਤਸ੍ਮਾ ਤੇਸਂ ਇਤਰੇਹਿ, ਇਤਰੇਸਞ੍ਚ ਤੇਹਿ ਵਿਪ੍ਪਯੋਗੋ ਵੁਚ੍ਚਤਿ, ਨ ਪਨ ਰੂਪਸ੍ਸ ਰੂਪੇਨ, ਨਿਬ੍ਬਾਨੇਨ ਵਾ, ਨਿਬ੍ਬਾਨਸ੍ਸ ਵਾ ਰੂਪੇਨ ਕਤ੍ਥਚਿ ਸਮ੍ਪਯੋਗੋ ਅਤ੍ਥੀਤਿ ਤਦਾਸਙ੍ਕਾਭਾਵਤੋ ਵਿਪ੍ਪਯੋਗੋਪਿ ਰੂਪਸ੍ਸ ਰੂਪਨਿਬ੍ਬਾਨੇਹਿ, ਨਿਬ੍ਬਾਨਸ੍ਸ ਵਾ ਤੇਨ ਨ ਵੁਚ੍ਚਤਿ, ਅਰੂਪਕ੍ਖਨ੍ਧੇਹਿਯੇਵ ਪਨ ਵੁਚ੍ਚਤੀਤਿ ਆਹ ‘‘ਚਤੂਹੇਵਾ’’ਤਿਆਦਿ. ਅਨਾਰਮ੍ਮਣਸ੍ਸ ਚਕ੍ਖਾਯਤਨਾਦਿਕਸ੍ਸ. ਅਨਾਰਮ੍ਮਣਅਨਾਰਮ੍ਮਣਮਿਸ੍ਸਕੇਹੀਤਿ ਅਨਾਰਮ੍ਮਣੇਨ ਸੋਤਾਯਤਨਾਦਿਨਾ ਅਨਾਰਮ੍ਮਣਮਿਸ੍ਸਕੇਨ ਚ ਧਮ੍ਮਾਯਤਨਾਦਿਨਾ. ਮਿਸ੍ਸਕਸ੍ਸ ਧਮ੍ਮਾਯਤਨਾਦਿਕਸ੍ਸ. ਅਨਾਰਮ੍ਮਣਅਨਾਰਮ੍ਮਣਮਿਸ੍ਸਕੇਹਿ ਨ ਹੋਤੀਤਿ ਯੋਜੇਤਬ੍ਬਂ. ਯੇਸਂ ਪਨ ਯੇਹਿ ਹੋਤਿ, ਤਂ ਦਸ੍ਸੇਤੁਂ ‘‘ਅਨਾਰਮ੍ਮਣਸ੍ਸ ਪਨਾ’’ਤਿਆਦਿ ਵੁਤ੍ਤਂ. ਯਥਾ ਹਿ ਸਾਰਮ੍ਮਣਸ੍ਸ ਅਨਾਰਮ੍ਮਣੇਨ ਅਨਾਰਮ੍ਮਣਮਿਸ੍ਸਕੇਨ ਚ ਵਿਪ੍ਪਯੋਗੋ ਹੋਤਿ, ਏਵਂ ਸਾਰਮ੍ਮਣੇਨਪਿ ਸੋ ਹੋਤਿਯੇਵ. ਤੇਨ ਵਿਯ ਅਨਾਰਮ੍ਮਣਸ੍ਸ ਅਨਾਰਮ੍ਮਣਮਿਸ੍ਸਕਸ੍ਸ ਚਾਤਿ ਦਟ੍ਠਬ੍ਬਂ.