੧. ਨਯਮਾਤਿਕਾਵਣ੍ਣਨਾ

੧. ਚੁਦ੍ਦਸਵਿਧੇਨਾਤਿ ਚੁਦ੍ਦਸਪ੍ਪਕਾਰੇਨ, ਚੁਦ੍ਦਸਹਿ ਪਦੇਹੀਤਿ ਅਤ੍ਥੋ. ਤਤ੍ਥ ‘‘ਸਙ੍ਗਹੋ ਅਸਙ੍ਗਹੋ’’ਤਿ ਇਦਮੇਕਂ ਪਦਂ, ਤਥਾ ‘‘ਸਮ੍ਪਯੋਗੋ ਵਿਪ੍ਪਯੋਗੋ’’ਤਿ. ‘‘ਸਙ੍ਗਹਿਤੇਨ ਸਮ੍ਪਯੁਤ੍ਤਂ ਵਿਪ੍ਪਯੁਤ੍ਤ’’ਨ੍ਤਿਆਦੀਨਿ ਪਨ ਤੀਣਿ ਤੀਣਿ ਪਦਾਨਿ ਏਕੇਕਂ ਪਦਂ. ਇਤਰੇਸੁ ਪਦਵਿਭਾਗੋ ਸੁਵਿਞ੍ਞੇਯ੍ਯੋਵ. ਏਤੇਹੀਤਿ ਸਙ੍ਗਹਾਦਿਪ੍ਪਕਾਰੇਹਿ. ਨਯਨਂ ਪਾਪਨਂ, ਤਂ ਪਨ ਪਵਤ੍ਤਨਂ ਞਾਪਨਞ੍ਚ ਹੋਤੀਤਿ ‘‘ਪਵਤ੍ਤੀਯਤਿ ਞਾਯਨ੍ਤੀ’’ਤਿ ਚ ਦ੍ਵਿਧਾਪਿ ਅਤ੍ਥੋ ਵੁਤ੍ਤੋ. ਨਯਾ ਏਵ ਉਦ੍ਦਿਸਿਯਮਾਨਾ ਮਾਤਿਕਾ. ਅਤ੍ਥਦ੍ਵਯੇਪਿ ਪਵਤ੍ਤਨਞਾਣਕਿਰਿਯਾਨਂ ਕਰਣਭਾਵੇਨ ਸਙ੍ਗਹਾਦਿਪ੍ਪਕਾਰਾ ਨਯਾਤਿ ਵੁਤ੍ਤਾ. ਤੇਨਾਹ ਅਟ੍ਠਕਥਾਯਂ ‘‘ਇਮਿਨਾ ਸਙ੍ਗਹਾਦਿਕੇਨ ਨਯੇਨਾ’’ਤਿ (ਧਾਤੁ. ਅਟ੍ਠ. ੧). ਪਦਾਨਨ੍ਤਿ ਅਤ੍ਥਦੀਪਕਾਨਂ ਵਚਨਾਨਂ. ਪਜ੍ਜਤਿ ਏਤੇਨ ਅਤ੍ਥੋਤਿ ਹਿ ਪਦਂ. ਪਦਾਨਨ੍ਤਿ ਚ ਸਂਸਾਮਿਸਮ੍ਬਨ੍ਧੇ ਸਾਮਿਵਚਨਂ, ਪਕਰਣਸ੍ਸਾਤਿ ਪਨ ਅਵਯਵਾਵਯਵੀਸਮ੍ਬਨ੍ਧੇ.